བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༣༣ སྟེང་གི་རྩོམ་སྒྲིག་པའི་གཏམ།
དྷ་རམ་ས་ལའི་གཞུང་འབྲེལ་མིན་པའི་ཚོགས་པ་ཆེ་ཁག་གིས་དེ་སྔོན་བོད་དོན་འཐབ་རྩོད་ཐོག་གོ་གནས་གལ་ཆེན་བཟུང་ཡོད། བོད་མིའི་སྤྱི་ཚོགས་ཀྱི་ཤེས་ཡོན་དང་འཕྲོད་བསྟེན་སོགས་ཀྱི་སྤྱི་ཚོགས་ཞབས་ཞུའི་ཐད་དུའང་ལག་རྗེས་མི་ཉུང་བཞག་ཡོད། འོན་ཀྱང་བར་ལམ་ཞིག་ནས་དྷ་སའི་ཚོགས་པ་ཁག་ལ་གྲགས་འགུལ་མེད་པ་དང་། གྲགས་འགུལ་ཕྲན་ཙམ་ཡོད་པ་ཡང་ཚོགས་པ་རེ་ཟུང་གི་ནང་ཁུལ་འཆམ་མིན་དང་ཆབ་སྲིད་ལངས་ཕྱོགས་མཐུན་མིན། ཚོགས་པ་ཚོགས་པའི་བར་དུ་མཉམ་འབྲེལ་ཡོང་མིན་སོགས་ཀྱི་རྙོག་གླེང་དག་རེད།
མི་འབོར་ཉིས་ཁྲི་ཙམ་ལས་མེད་པའི་དྷ་རམ་ས་ལའི་རི་སྒང་ཆུང་ཆུང་འདིར་ཚོགས་པ་སྒྲིག་འཛུགས་ཆེ་ཆུང་མང་པོས་ཁེངས་ཡོད། བོད་ནས་ཕེབས་པའི་གསར་འབྱོར་ལས་མེད་ཚོ་དང་ཕྱི་རྒྱལ་ཡུལ་སྐོར་སྤྲོ་འཆམ་པ། དེ་བཞིན་རྒྱ་གར་ཡུལ་མི་སོགས་འཕུད་བའི་དྷ་སའི་སྡོད་དམངས་སུ་ཞིག་ཡིན་ཡང་། དང་པོ་ཚོགས་པ་ཞིག་གི་ཚོགས་མི་ཡིན་པ་དང་། གཉིས་པ་ཚོགས་པ་དེའི་ནང་ཁུལ་གྱི་ཤོག་ཁག་ཅིག་གི་རྒྱབ་རྩ་ཡིན་པ། གསུམ་པ་ཤོག་ཁག་གང་དེའི་སྐུ་ངོ་སུ་དང་ནང་ཚགས་ཡིན་པ་བཅས་ནི་གང་ཟག་གང་དེ་དྷ་སའི་མི་གྲལ་དུ་ཚུད་པའི་ལམ་ཁ་དང་པོ་ཡིན།
སྤྱིར་བཙན་བྱོལ་བོད་མིའི་སྤྱི་ཚོགས་ཁྱོན་ཡོངས་དང་། སྒོས་དྷ་རམ་ས་ལར་ཚོགས་པ་སྐྱིད་སྡུག་མང་བའི་རྒྱུ་རྐྱེན་གཅིག་དེ། དམངས་གཙོའི་རྒྱལ་ཁབ་ཁག་ནང་ལྟ་གྲུབ་ཀྱི་ཆེད་དུ་ཚོགས་པ་འཛུགས་པ་དང་། སྤྱི་གཞུང་སྲ་བརྟན་གྱི་ཆེད་དུ་སྒྲིག་འཛུགས་བཟོ་བའི་ལུགས་སྲོལ་ཡོད་ཀྱང་། བཙན་བྱོལ་བོད་མིའི་སྤྱི་ཚོགས་ཁྲོད་ཚོགས་པའི་ཆེད་དུ་ལངས་ཕྱོགས་ལོགས་སུ་འཛིན་པ་དང་། གང་ཟག་སྒེར་གྱི་ལྟོ་གོས་གནས་མལ་དང་མཚན་སྙན་གོ་གནས་ཀྱི་ཆེད་དུ་ཚོགས་པ་གསར་བ་འཛུགས་པ་སོགས་ནི་རྒྱལ་ཁ་དང་རྒྱུན་སྲོལ་ཞིག་ཏུ་རྩི་བ་འདིས་ཀྱང་ཡིན་ངེས།
དྷ་རམ་ས་ལ་ནས་མི་གཅིག་ལྟ་བ་ལངས་ཕྱོགས་མི་འདྲ་བའི་ཚོགས་པ་གཉིས་ནང་ཞུགས་པ་དང་། ཚོགས་པ་གཅིག་ནས་ཐོན་ཏེ་ཚོགས་པ་གཞན་ནང་འཛུལ་བ། གོ་སྐབས་རག་ན་ལྟ་བ་ལངས་ཕྱོགས་བསྒྱུར་ཆོག་པ་དང་། རྐྱེན་དང་འཕྲད་ན་ཆོལ་ཁོངས་ལུང་ཚན་བརྗེ་ཐུབ་པ། དགོས་མཁོར་ཐུག་ན་ཆོས་ལུགས་ཆོས་བརྒྱུད་ཀྱང་བསྒྱུར་ནུས་པའི་ཁོག་པའི་ཤོང་ཚད་ཆེན་པོ་དང་གདོང་གི་སྐྱི་ལྤགས་མཐུག་པོ་དེ་ཧ་ཅང་རྒྱུན་ལྡན་དུ་རྩི་བ་མ་ཟད། སྤྱི་བའི་རྩ་དོན་ཆེད་ཡིན་པའི་འགྲེལ་བཤད་ཉི་ཚེ་བ་རེ་རྒྱག་རྒྱུར་ཡང་ངོ་ཚ་མེད། རྒྱལ་ཁབ་རང་བཙན་པ་ཞིག་ལ་མཚོན་ན་དེའི་ནང་དུ་ཚོགས་པ་འདྲ་མིན་གལ་ཆེན་ཡིན་ལ། ཚོགས་པ་ལས་ཀྱང་ལྟ་གྲུབ་འདྲ་མིན་གལ་ཆེན་ཡིན་ཡང་། རྒྱལ་ཁབ་ཤོར་ནས་མིའི་ལུང་པར་ཆབ་སྲིད་སྐྱབས་བཅོལ་དུ་སྡོད་མཁན་བོད་པར་མཚོན་ན། ལངས་ཕྱོགས་བརྟན་པོ་མེད་པར་སྒེར་བའི་དགོས་མཁོ་སྒྲུབ་བྱེད་ཀྱི་ཚོགས་པ་སྒྲིག་འཛུགས་མང་པོ་དགོས་པ་ཆུང་ལ། ཆིག་སྒྲིལ་གྱི་བཀག་རྡོར་འགྱུར་གཞིའི་རྩ་དོན་ཆབ་སྲིད་ཐད་ཀྱི་ལྟ་བ་ལངས་ཕྱོཊ་སྣ་ཚོགས་དེ་བས་ཀྱང་དགོས་དོན་མེད།
ངས་འདི་ལྟར་བཤད་སྐབས་རང་དབང་དམངས་གཙོའི་ལུང་པར་སྐྱེས་འཚར་བྱུང་ཞིང་། རང་ལ་རྒྱལ་ཁབ་དང་ས་ཆ་ཡོད་མེད་ཀྱང་སེམས་ངོས་ན་རབ་རིབ་མག་མོག་ཡིན་མཁན་ཚོས་ཨུ་ཚུགས་ཀྱིས་ལུང་དང་རིགས་པ་དྲངས། ལོ་རྒྱུས་ཆབ་སྲིད་སྐྱོར་ཏེ་ཞྭ་དཔེ་ལྷམ་འགེབ་བྱེད་སྲིད་མོད། སྤྱི་བའི་སྒྲིག་འཛུགས་དམངས་གཙོའི་ཀ་བ་གསུམ་གྱིས་རང་སྐྱ་ཐུབ་ཀྱི་མེད་པའི་གནས་ཚང་དུ། ད་སྔ་འུ་ཚང་གི་ཚོགས་སྐྱིད་མང་པོ་ཞིག་གིས་ཚུར་བླངས་པ་ལས་ཕར་བསྐྱལ་བ་མང་བ་དེས་ཀྱང་རྟོགས་སླའོ།།
