ཨ་རི་དང་ཡུ་རོབ་རྒྱལ་ཁབ་ཁག་གིས་ཨུ་རུ་སུས་ཡུག་རེན་གྱེན་ལོག་ཤོག་ཁག་ལ་རྒྱབ་རོགས་བྱེད་ཀྱིན་ཡོད་པར་དཔལ་འབྱོར་ཉེས་ཆད་བཅད་འདུག
ཁ་སང་ཨ་རི་དང་ཡུ་རོབ་མཐུན་ཚོགས་མཉམ་འབྲེལ་གསལ་བསྒྲགས་སྤེལ་ཏེ། ཨུ་རུ་སུ་གཞུང་གིས་ཡུག་རེན་གྱེན་ལོག་ཤོག་ཁག་ལ་རྒྱབ་སྐྱོར་བྱས་ཏེ་མཱ་ལེ་ཞི་ཡའི་འགྲུལ་སྐྱེལ་གནམ་གྲུ་ཨང་རྟགས་ (MH 17) གཏོར་རྒོལ་བཏང་ཡོད་པའི་དོགས་གཞི་ཡོད་པ་མ་ཟད། ཡུག་རེན་གྱི་ས་མཚམས་ཁུལ་དུ་མཚོན་ཆ་དང་དམག་མི་འགྲེམ་འཇོག་བྱས་ཏེ་ཡུག་རེན་གྱི་བརྟན་ལྷིང་སྲུང་སྐྱོབ་ལ་འགོག་རྐྱེན་བཟོ་བཞིན་ཡོད་སྟབས། ཡུ་རོབ་མཐུན་ཚོགས་ཀྱིས་ཨུ་རུ་སུར་དམག་དོན་དང་། མང་ཚོགས་ཀྱི་བཀོལ་སྤྱོད་འཕྲུལ་རིགས། རྡོ་སྣུམ་སྔོག་འདོན་ཡོ་ཆས། རྒྱལ་ཁབ་ཕན་ཚུན་བར་དམག་གྲུ་འགྲོ་འོང་། ཨུ་རུ་སུའི་ལས་གྲྭ་ཁག་ལ་མ་དངུལ་གཏོང་ཕྱོགས་བཅས་ལ་དམ་དྲག་བྱ་རྒྱུ་ཡིན་པ་དང་། ཨ་རིས་ཨུ་རུ་སུ་གཞུང་གི་ཝུ་ཀྲི་བི་ (VTB) དངུལ་ཁང་དང་མཱོ་སོ་ཀཱོ་ (Bank of Moscow) དངུལ་ཁང་། སོ་ནམ་ཞིང་ལས་ (Russian Agriculture Bank) དངུལ་ཁང་བཅས་སུ་མ་འཇོག་བྱེད་མཚམས་བཞག་སྟེ་ཨུ་རུ་སུའི་དངུལ་རྩའི་ཁེ་ལས་བརྒྱ་ཆ་ ༣༠ ཙམ་ལ་དཔལ་འབྱོར་ཉེས་ཆད་གཏོང་རྒྱུའི་ཐག་གཅོད་བྱས་ཡོད་པ་ཁྱབ་བསྒྲགས་བྱས་འདུག
འདིའི་ཐད་ཨོ་བྷ་མས།Â ལོ་ངོ་བཅུ་ཕྲག་ཁ་ཤས་རིང་ཨུ་རུ་སུ་དང་རྒྱལ་སྤྱིའི་སྤྱི་ཚོགས་བར་གྱི་འབྲེལ་ལམ་ལ་འཕེལ་རྒྱས་ཕྱིན་ཡོད་ཀྱང་། དེ་རིང་སླར་ཡང་ཨུ་རུ་སུ་རྒྱལ་སྤྱིའི་སྤྱི་ཚོགས་དང་བྲལ་ཏེ་ཁེར་རྐྱང་དུ་ལུས་པ་རེད། དེ་ནི་ཨུ་རུ་སུ་དང་སྲིད་འཛིན་པུ་ཌིན་གྱིས་ཆེད་དུ་བདམས་པ་ཞིག་ཆགས་ཡོད། ད་རེབ་དཔལ་འབྱོར་ཉེས་ཆད་འདིས་ཨུ་རུ་སུའི་དཔལ་འབྱོར་ཉམས་ཆག་ཆེན་པོ་འགྲོ་རྒྱུ་ཡིན་པ་མ་ཟད། གལ་ཏེ་ཨུ་རུ་སུ་ད་དུང་མུ་མཐུད་ལམ་ཀ་དེར་ཞུགས་པ་ཡིན་ན་དཔལ་འབྱོར་ཐོག་གྱོང་གུད་དེ་བས་ཆེན་པོ་ཕོག་སྲིད་པ་རེད། ཅེས་བརྗོད་འདུག
ཡུ་རོབ་མཐུན་ཚོགས་ཀྱི་ཚོགས་གཙོ་ཧར་མན་ (Herman Van Rompuy) དང་ཡུ་རོབ་ལྷན་ཚོགས་ཀྱི་ཚོགས་གཙོ་ཇོ་སེ་ (Jose Manuel Barroso)གཉིས་ཐུན་མོང་ཐོག་བསྒྲགས་གཏམ་སྤེལ་བའི་ནང་། ཉེ་ལམ་ཡུག་རེན་ནང་འབྱུང་བཞིན་པའི་གྱེན་ལོག་གཞོལ་འཇགས་བྱེད་མ་ཐུབ་པ་མ་ཟད། ཧོ་ལན་ཌི་ནས་མཱ་ལེ་ཞི་ཡར་འཕུར་སྐྱོད་བྱེད་མཁན་གྱི་འགྲུལ་སྐྱེལ་གནམ་གྲུ་ཞིག་ཡུག་རེན་གྱེན་ལོག་ཤོག་ཁག་སྡོད་ཁུལ་དུ་གཏོར་རྒོལ་བྱུང་སྟེ། ཉེས་མེད་མི་སེར་ ༢༩༨ རྐྱེན་འདས་སུ་ཕྱིན་པ་དེར་ལན་འདེབས་ཁ་གསལ་དགོས་པ་མ་ཟད། ཨུ་རུ་སུས་ཡུག་རེན་གྱེན་ལོག་ཤོག་ཁག་ལ་རྒྱབ་སྐྱོར་བྱེད་བཞིན་ཡོད་པར་ཡུ་རོབ་མཐུན་ཚོགས་ངོས་ནས་བཟོད་སྒོམ་ནམ་ཡང་བྱ་མི་སྲིད། ཅེས་སོགས་བརྗོད་འདུག
ཨུ་རུ་སུའི་ཡུ་རོབ་མཐུན་ཚོགས་ཀྱི་གཞུང་ཚབ་ཝུ་ལཱ་ཌི་མེར་ (Vladimir Chizhov) ལགས་ཀྱིས། ངར་ཡུ་རོབ་མཐུན་ཚོགས་ཀྱིས་མཇུག་འབྲས་གང་ཡང་འཐོན་རྒྱུ་མེད་པའི་ཐབས་ལམ་ཞིག་ལ་ཁ་ཕྱོགས་བསྒྱུར་བར་བློ་ཕམ་ཡོད། ཁོང་ཚོས་གནམ་གྲུ་གཏོར་རྒོལ་གྱི་གནད་དོན་དེར་སེམས་འཚབ་བྱེད་བཞིན་ཡོད་པ་ལྟར། ང་ཚོས་ཀྱང་བྱེད་བཞིན་ཡོད་སྟབས་ང་ཚོར་ཁོང་ཚོས་དཔལ་འབྱོར་ཉེས་ཆད་དེ་ལྟར་གཏོང་དགོས་དོན་མེད། ཅེས་སོགས་བརྗོད་འདུག
ཟླ་འདིའི་ཚེས་ ༡༦ ཉིན་ཨོ་བྷ་མས་ཨ་རིའི་ཁེ་ལས་དང་ཨུ་རུ་སུ་གཞུང་གི་སྟངས་འཛིན་འོག་ཡོད་པའི་རོ་སེ་ནཱེབ་རྡོ་སྣུམ་ཁེ་ལས་ (Rosneft oil company) དང་ཝུབ་དངུལ་རྩའི་ཁེ་ལས་ (VEB)། དེ་བཞིན། སྒེར་གཉེར་རྡོ་སྣུམ་ཁེ་ལས་ནཱོ་ཝ་ཌེག་(Novatek) དང་སྒེར་གཉེར་དངུལ་ཁང་གྷ་ཛེ་པོར་རོམ་ (Gazprombank) བཅས་བར་གྱི་མཉམ་ལས་གྲོས་མཐུན་བཀག་སྡོམ་བྱས་ཡོད་པ་དང་། ཡུ་རོབ་མཐུན་ཚོགས་ཀྱིས་ཨུ་རུ་སུའི་ནང་ཡུ་རོབ་མ་འཛུགས་དངུལ་ཁང་(European Investment Bank) དང་། ཡུ་རོབ་དངུལ་ཁང་ (European Bank) གཉིས་ཀྱིས་མ་དངུལ་གཏོང་མཚམས་འཇོག་རྒྱུའི་ཐག་གཅོད་བྱས་ཡོད།
ཆབ་སྲིད་དབྱེ་ཞིབ་པ་ཚོས། གལ་ཏེ་ཨུ་རུ་སུ་གཞུང་དང་མཱ་ལེ་ཞི་ཡའི་གནམ་གྲུ་གཏོར་རྒོལ་བཏང་བ་དེར་འབྲེལ་བ་མེད་ཚེ། ཨ་རི་དང་ཡུ་རོབ་མཐུན་ཚོགས་ཀྱིས་ཨུ་རུ་སུར་དཔལ་འབྱོར་ཉེས་ཆད་བཏང་བར་རྒྱལ་སྤྱིའི་སྤྱི་ཚོགས་ཀྱིས་སྐྱོན་བརྗོད་བྱ་ངེས་ཡིན་སྐོར་བརྗོད་འདུག
གསར་འགོད་པ། དོན་གྲུབ།
