ཟླ་འདིའི་ཕྱི་ཚེས་ ༡ ཉིན་ཤིན་ཅང་སཱ་ཊི་རྫོང་དུ་དམར་གསོད་དོན་རྐྱེན་ཞིག་བྱུང་སྟེ་མི་ ༩༦ རྐྱེན་འདས་སུ་གྱུར་ཡོད་འདུག
ཤིན་ཅང་ས་གནས་སྲིད་གཞུང་གིས་གནས་ཚུལ་སྤེལ་བ་ལྟར་ན། ཟླ་འདིའི་ཕྱི་ཚེས་ ༡ ཉིན་ཤིན་ཅང་སཱ་ཊི་རྫོང་དུ་དམར་གསོད་དོན་རྐྱེན་ཞིག་བྱུང་སྟེ། རླངས་འཁོར་དང་སྦག་སྦག་ ༣༡ སྲེག་བཅོམ་བཏང་ཡོད་པ་མ་ཟད། ལག་ཏུ་གྲི་དང་སྟ་རེ་བཟུང་བའི་ངོ་རྒོལ་བ་ཚོས་མི་མང་ནང་གང་བྱུང་མཚོན་ཆས་བརྒྱབ་སྟེ། རྒྱ་རིགས་ ༣༥ དང་ཡུ་གུར་བ་ ༢ བཅས་མི་མང་དཀྱུས་མ་ ༣༧ དམར་གསོད་དང་། མི་ ༡༣ ལ་རྨས་སྐྱོན་བཟོས་ཡོད་པ་དང་། སྐབས་དེར་ཉེན་རྟོག་པས་མེ་མདའ་བརྒྱབ་སྟེ་ངོ་རྒོལ་བ་ ༥༩ བསད་ཅིང་། དོགས་ཡོད་ཉེས་ཅན་ ༢༡༥ འཛིན་བཟུང་བྱས་ཡོད་པ་རེད། ཐེངས་འདིའི་དོན་རྐྱེན་ཁྲོད་ཁྱོན་མི་གྲངས་ ༩༦ རྐྱེན་འདས་སུ་གྱུར་ཡོད་འདུག
རྒྱ་ནག་གཞུང་ཕྱོགས་ནས་ད་རེས་ཀྱི་དོན་རྐྱེན་དེ་ཕྱི་ནང་གི་འཇིགས་སྐུལ་དྲག་སྤྱོད་པ་ངན་འབྲེལ་གྱིས་རྩ་འཛུགས་དང་གསང་བའི་འཆར་གཞི་ལྡན་པའི་གདུག་རྩུབ་ཆེ་བའི་ངོ་རྒོལ་དོན་རྐྱེན་ཚབས་ཆེན་ཞིག་ཡིན་སྐོར་བསྒྲགས་ཡོད་པ་མ་ཟད། ཡུ་གུར་མི་རིགས་རང་སྐྱོང་ལྗོངས་ཀྱི་དམར་ཤོག་དྲུང་ཆེ་ཀྲང་ཁྲིན་ཞན་གྱིས། དྲག་སྤྱོད་པར་རྡུག་རྡེག་ཚ་ནན་བཏང་སྟེ་རྩ་མེད་བཟོ་དགོས་ལུགས་ཀྱི་བཀའ་ཁྱབ་བཏང་ཡོད་འདུག
འཇར་མན་དུ་ཡོད་པའི་འཛམ་གླིང་ཡུ་གུར་མི་རིགས་མཐུན་ཚོགས་ཀྱི་མགྲིན་ཚབ་པ་ཌི་ལི་ཤཱ་ལགས་ཀྱིས། རྒྱ་གཞུང་གིས་བསྒྲགས་པའི་རྐྱེན་འདས་ཕྱིན་པའི་མི་གྲངས་དང་། ས་གནས་ནས་ཐད་ཀར་ཁོང་ཚོར་མཁོ་སྤྲོད་བྱས་པའི་མི་གྲངས་གཉིས་ཀྱི་བར་ཁྱད་པར་ཆེན་པོ་ཡོད་པ་མ་ཟད། རྒྱ་གཞུང་གིས་ཡུ་གུར་བའི་འཐབ་རྩོད་ཀྱི་དངོས་ཡོད་གནས་ཚུལ་ལ་འཁྱོག་བརྗོད་བྱས་ལུགས་ཡོད་དང་། ཐེངས་འདིར་དྲག་ཆས་ཉེན་རྟོག་པས་དྲག་གནོན་བྱས་ཏེ་མི་མང་ལ་ཤི་རྨས་ཚབས་ཆེན་བྱུང་བར་འགན་འཁུར་དགོས་པ་མ་ཟད། དོན་རྐྱེན་གྱི་མགོ་མཇུག་བར་གསུམ་ཕྱི་གསལ་ནང་གསལ་དང་དྲང་བདེན་ཁུངས་སྐྱེལ་དགོས་པའི་འབོད་སྐུལ་བྱས་འདུག
ཡང་ཟླ་འདིའི་ཕྱི་ཚེས་ ༢༨ ཉིན། སཱ་ཊི་རྫོང་དུ་ངོ་རྒོལ་དོན་རྐྱེན་ཞིག་བྱུང་སྟེ་མི་བཅུ་གྲངས་ཤིག་ལ་ཤི་རྨས་བྱུང་བའི་གནས་ཚུལ་ཐོན་ཡོད་ཀྱང་། རྒྱ་གཞུང་གིས་བརྒྱུད་ལམ་བཀག་སྡོམ་བྱས་ཏེ་དེ་འབྲེལ་གྱི་གནས་ཚུལ་ཚང་མ་ནག་གསུབ་བཏང་ཡོད་སྟབས། ད་ལྟའི་ཆར་ཤི་རྨས་ཀྱི་གྲངས་འབོར་དང་ངོ་རྒོལ་བ་ཅི་ཙམ་འཛིན་བཟུང་བྱས་ཡོད་སོགས་གསལ་པོ་མེད་པ་རེད།
གསར་འགོད་པ། པདྨ་མཚོ།
