ངའི་བཙོན་རོགས་མང་པོ་ཞིག་མེན་ཡཱང་བཙོན་ཁང་དུ་ཡོད།

འདི་གའི་གསར་འགོད་པ་དྷ་ས་སྣེ་ལེན་ཁང་དུ་བསྐྱོད་དེ་ཉེ་ལམ་བོད་ནས་གསར་དུ་འབྱོར་ཞིང་ད་ལྟ་དྷ་ས་དབུས་སྣེ་ལེན་ཁང་དུ་བཞུགས་ཡོད་པའི་ཆབ་སྲིད་བཙོན་ཟུར་རྔ་པ་སྤྲོ་ཚིགས་དགོན་པའི་གྲྭ་འཇམ་དབྱངས་བརྩོན་འགྲུས་ལགས་སུ། ས་བྱི་ཞི་རྒོལ་ཆེན་མོའི་སྐབས་ཁོང་དང་ཁོང་གི་གྲོགས་པོ་ཚོས་ངོ་རྒོལ་གནང་བ་དང་། དེའི་རྗེས་རྒྱ་གཞུང་གི་འཇུ་བཟུང་བྱས་ཏེ་བཙོན་ཁང་རིམ་པའི་ནང་དཀའ་སྡུག་ཅི་མྱངས་བཅས་ཀྱི་སྐོར་ལ་གླེང་མོལ་བྱས།

གྲྭ་འཇམ་དབྱངས་བརྩོན་འགྲུས་ལགས་ཀྱིས་བརྗོད་པ་ལྟར་ན་ ༢༠༠༨ ལོའི་ཟླ་ ༣ ཚེས་ ༡༦ ཉིན་རྔ་པ་རྫོང་དུ་བོད་མི་ཚོས་རྒྱ་གཞུང་ལ་ངོ་རྒོལ་བྱས་སྐབས། ཁོང་དང་སྤྲོ་ཚིགས་དགོན་པའི་གྲྭ་པ་ ༡༨ ཙམ་གྱིས་མི་མང་དང་མཉམ་དུ་རྔ་པ་རྫོང་གི་སྲང་ལམ་དུ། ༧གོང་ས་མཆོག་བོད་དུ་ཕེབས་དགོས། བོད་མིར་རང་དབང་དང་ཞི་བདེ་དགོས་ཞེས་སྐད་འབོད་རྒྱག་བཞིན་ཁྲོམ་སྐོར་བྱས་སྐབས། རྒྱ་ནག་གི་ཉེན་རྟོག་འབྱོར་ཏེ་མང་ཚོགས་ཁྲོད་གང་བྱུང་མེ་མདའ་བརྒྱབ་ཡོད་པ་དང་། ཁོ་རང་གི་མཐོང་ས་ནས་མི་སྐྱ་ཕོ་མོ་ ༡༣ ཙམ་དམར་གསོད་དང་། གཞན་མང་པོ་ཞིག་ལ་རྨས་སྐྱོན་ཕོག་པ་དངོས་སུ་མཐོང་ཡོད་འདུག ཉིན་དེའི་དགོང་མོ་ཁོང་དང་རོགས་པ་གྲྭ་པ་ཚོས་སྤྲོ་ཚིགས་ཤང་སྲིད་གཞུང་དང་སློབ་གྲྭའི་རུ་ཁག་གི་ལས་ཁུངས་སོགས་ཀྱི་རྭ་སྐོར་ནང་གི་རྒྱ་ནག་གི་རྒྱལ་དར་ཕབ་ནས་མེར་བསྲེཊ་བཏང་ཡོད་འདུག གནས་ཚུལ་དེ་དག་བྱུང་རྗེས་རྒྱ་གཞུང་གིས་ལས་དོན་རུ་ཁག་བཏང་སྟེ་སྤྲོ་ཚིགས་དགོན་པ་སྒོ་རྒྱག་བཅུག་ཅིང་། དེའི་ཉེ་འཁོར་དུ་ཡོད་པའི་སློབ་གྲྭ་སློབ་མཚམས་འཇོག་བཅུག་སྟེ་གྲྭ་པ་རྣམས་སློབ་གྲྭའི་ནང་བསྡུ་སྐོང་གིས་བདུན་ཕྲག་གཅིག་རིང་རྒྱལ་གཅེས་ཆོས་གཅེས་ཟེར་བའི་སློབ་གསོ་སྤེལ་ཡོད་འདུག

ཟླ་ ༣ ཚེས་ ༢༦ ཉིན་གྱི་དགོང་མོར་རྒྱ་གཞུང་གིས་ཁོང་གི་རོགས་པ་གྲྭ་ཚུལ་ཁྲིམས་དང་དགེ་འདུན། སྐལ་རྒྱམ། རབ་བརྟན། ཐུབ་པ། གདུགས་དཀར་སྐྱབས། བསྟན་འཛིན་ཚེ་བྷོ། སྟམ་ཁོ་སོགས་གྲྭ་པ་ ༩ ལ་སྐད་ཆ་འདྲི་རྒྱུ་ཡོད་ཚུལ་བཤད་དེ་འཛིན་བཟུང་གིས་རྔ་པ་རྫོང་དུ་འཁྲིད་ཡོད་ཅིང་། རྔ་པ་རྫོང་བཙོན་ཁང་སྒོ་ཁར་བསླེབ་མ་ཐག་དམག་མིའི་རུ་ཁག་ཅིག་གིས་ལྕགས་མདུང་དང་འགྱིག་རིང་སོགས་ཀྱིས་གཅར་རྡུང་ཚོད་མེད་བཏང་རྗེས་བཙོན་འཇུག་བྱས་ཡོད་འདུག ཉིན་ལྟར་སྔ་དྲོའི་ཆུ་ཚོད་ ༡༡ ཙམ་དང་ཕྱི་དྲོའི་ཆུ་ཚོད་ ༥ པ་ཡས་མས་ལ་ལྕགས་ཕོར་ཆུང་ཆུང་ཞིག་ཏུ་དམག་མིའི་ཟས་ལྷག་རེ་ལས་ཟ་མ་གཞན་གང་ཡང་སྤྲད་མེད་པ་དང་། མཚམས་ཤིག་རྔ་པ་རྫོང་གི་བཙོན་ཁང་བཙོན་པས་ཁེངས་ཏེ་ཁོ་རང་དང་ཚུལ་ཁྲིམས། རབ་བརྟན། དགེ་འདུན། སྐལ་རྒྱམ། ཐུབ་པ་བཅས་སྤྲོ་ཚིགས་དགོན་པའི་གྲྭ་པ་ ༦ དང་། འཇམ་དབྱངས་ཉི་མ་དང་ཚུལ་ཁྲིམས། མགོན་པོ། བརྩོན་ཁོ། བློ་བཟང་ཉི་མ་བཅས་གདོང་རི་དགོན་པའི་གྲྭ་པ་ ༥། སྐྱོར་དཔོན་ཚུལ་ཁྲིམས་རྒྱ་མཚོ་དང་རྡོ་རམས་པའི་སྐྱོར་དཔོན་ཀླུ་སྒྲུབ་བསྟན་དར། ཨ་ཁུ་བསོད་ནམས་བཅས་ཨ་མཆོག་མཚན་ཉིད་དགོན་པའི་གྲྭ་པ་ ༣ སོགས་ལ་ལག་ལྕགས་བརྒྱབ་སྟེ་མོང་ཞན་བཙོན་ཁང་དུ་འཁྲིད་ཡོད་འདུག སྐབས་དེར་དམག་མིའི་རླངས་འཁོར་ནང་ཁྲོ་ཆུ་རྫོང་བརྒྱུད་དེ་འགྲོ་སྐབས་ཁ་བ་བབས་ཏེ་རླངས་འཁོར་འགྲོ་མ་ཐུབ་པར་དཀའ་ངལ་མང་པོ་འཕྲད་ཡོད་ཅིང་། དམག་མི་ཚོས་བཙོན་པའི་རྒྱབ་ཀྱི་ཐུལ་བ་འཕྲོག་ནས་རླངས་འཁོར་གྱི་འཁོར་ལོའི་འོག་ཏུ་བཏིང་སྟེ་བགྲོད་ཐབས་བྱེད་པ་དང་། དམག་མི་རླངས་འཁོར་ནང་ཡར་འཛེཊ་མར་འབབ་བྱེད་སྐབས་གྲྭ་པ་ཚོའི་མགོ་ཐོག་ཏུ་རྐང་པས་བརྫི་བ་སོགས་བྱས་ཡོད་འདུག

༢༠༠༨ ལོའི་ཟླ་ ༥ པའི་ནང་སི་ཁྲོན་མོང་ཞན་དང་ཝུན་ཁྲོན། ཉི་ཞན་སོགས་སུ་ས་འགུལ་བྱུང་སྐབས། དམག་མི་ཚོས་བཙོན་ཁང་སྒོ་ལྕགས་བརྒྱབ་སྟེ་བྲོས་ཕྱིན་ཡོད་ཀྱང་། བཙོན་ཁང་དེ་གསར་བ་ཡིན་སྟབས་རྡིབ་སྐྱོན་སོགས་བྱུང་མེད་པ་དང་། རྗེས་སུ་དམག་མི་དང་ཉེན་རྟོག་པ་ཚོ་ཕྱིར་ལོག་སྟེ་བཙོན་པ་ཚོ་རི་མགོར་ཉལ་བཅུག་པ་སོགས་བྱས་ཡོད་འདུག དེ་གར་ཟ་མ་འབྲས་སྐྱ་ཉུང་ངུ་རེ་ལས་ཟ་མ་གཞན་མེད་སྟབས་བཙོན་པ་ཚང་མའི་གཟུཊ་པོ་སྐྱོ་བོ་ཆགས་ཤིང་། ཡར་ལངས་སྐབས་མགོ་ལ་མུན་ནག་འཁོར་ནས་ས་ལ་འགྱེལ་འགྲོ་བ་སོཊ་བྱུང་ཡོད་འདུག ཟླ་གཅིག་གི་རྗེས་སུ་གདོང་རི་དགོན་པའི་གྲྭ་པ་ ༥ དང་། སྤྲོ་ཚིགས་དགོན་པའི་གྲྭ་པ་ ༦། རོང་ངན་གྱི་མི་སྐྱ་རྣམ་སྲས་སོགས་མི་གཉིས་རེ་ཐག་པས་བསྡམས་ཤིང་མགོ་ལ་རས་ནག་པོ་བསྐོན་ཏེ་དམར་ཐང་རྫོང་གི་བཙོན་ཁང་དུ་འཁྲིད་ཡོད་པ་དང་། དེ་གར་ཟླ་ ༧ ཙམ་བཅུག་རྗེས་ངའི་རོགས་པ་གྲྭ་པ་ལྔར་ལོ་ ༡ དང་ཟླ་ ༩ རེ་དང་། གདོང་རི་དགོན་པའི་གྲྭ་པ་ཚོར་ལོ་ ༡ དང་ཟླ་བ་ ༥ རེ། བ་ཆེན་ཤང་གི་འཇམ་དཔལ་སེང་གེ་ལ་ལོ་ ༢ བཅས་ཀྱི་ཁྲིམས་ཐག་བཅད་ཡོད་འདུག

ཁོང་ལ་ནག་ཉེས་གང་འདྲ་ཞིག་གི་འོག་བཙོན་འཇུག་ཁྲིམས་ཐག་བཅད་མིན་དྲིར་པར་ཁོང་གིས། ང་རང་ལ་ལོ་དེའི་བོད་ཀྱི་ལོ་སར་སྐབས་རྔ་པ་རྫོང་ཁྲིམས་ཁང་གིས་སྤྲོ་ཚིགས་དགོན་པའི་ལས་འགུལ་གྱི་སྣེ་འཁྲིད་པ་ཡིན་པའི་ཉེས་མིང་འོག་ལོ་ ༢ ཁྲིམས་ཐག་བཅད་པ་དང་། གདོང་རི་དགོན་པའི་གྲྭ་འཇམ་དབྱངས་ཉི་མར་ལོ་ ༢། རོང་ངན་གྱི་རྣམ་སྲས་ལ་ལོ་ ༤ བཅས་ཀྱི་ཁྲིམས་ཐག་བཅད་སོང་། དེའི་རྗེས་ང་ཚོ་མི་གསུམ་དང་མཚན་ཉིད་དགོན་པའི་གྲྭ་པ་ཚོ་མེན་ཡཱང་བཙོན་ཁང་དུ་བསྐྱལ་ཞིང་། ༢༠༡༠ ཟླ་ ༣ ཚེས་ ༣༡ ཉིན་བཙོན་འཇུག་དུས་ཡུན་རྫོགས་ཏེ་ཀློད་གྲོལ་བཏང་སོང་། སྐབས་དེར་ང་རང་ཕྱིར་དགོན་པར་ལོག་སྐབས། རྒྱ་ནག་གི་ཉེན་རྟོག་ཁང་དགོན་པར་བཙུགས་ཏེ་གྲྭ་པ་ཚོའི་འགུལ་སྐྱོད་ལ་ལྟ་རྟོག་བྱེད་ཀྱི་འདུག ང་བཙོན་གྲོལ་སྐབས་མང་ཚོགས་འདུ་འཛོམས་མི་ཡོང་ཆེད། གསང་སྟབས་ཀྱིས་བཙོན་གྲོལ་བཏང་སྟེ་ཉེན་རྟོག་པའི་རླངས་འཁོར་ནང་བཅུག་ནས་ངའི་ནང་གི་སྒོ་ཁ་བར་བསྐྱལ་སོང་། དུས་དེ་ནས་བཟུང་ས་ཆ་གང་དུ་འགྲོ་དགོས་ཀྱང་ཐོ་འགོད་བྱེད་དགོས་པ་དང་། ཟླ་བ་འགའ་རེའི་མཚམས་སུ་འདྲི་གཅོད་བྱེད་པ་སོགས་སུན་པོ་མང་པོ་བཟོས་ཡོང་གི་འདུག ཐེངས་ཤིག་ཁོང་ཚོར་བརྡ་ལན་མ་སྤྲད་པར་ནང་མི་དང་དགོན་པ་སོགས་ལའང་གསང་བ་བྱས་ཏེ་རྫ་སེར་ཤུལ་དགོན་པར་ཕྱིན་ཏེ་ཟླ་བ་ ༨ ལྷག་གི་རིང་སློབ་སྦྱོང་བྱས་པ་ཡིན། ཞེས་བརྗོད་བྱུང་།

ཁོང་ཀློད་གྲོལ་སྐབས་སི་ཁྲོན་མེན་ཡཱང་བཙོན་ཁང་ནང་ལྷག་ཡོད་པའི་བོད་པའི་བཙོན་པ་ཚོའི་སྐོར་ངོ་སྤྲོད་གནང་དོན། ངས་ངོ་ཤེས་པ་ད་ལྟ་བཙོན་ཁང་དུ་ལྷག་བསྡད་པ་ཨ་མཆོག་མཚན་ཉིད་དགོན་པའི་སྐྱོར་དཔོན་ཚུལ་ཁྲིམས་རྒྱ་མཚོར་ཁྲིམས་ཐག་ལོ་ ༩ དང་། སྐྱོར་དཔོན་ཀླུ་སྒྲུབ་བསྟན་དར་ལ་ལོ་ ༧། སྐྱོར་དཔོན་ཀླུ་སྒྲུབ་ཕུན་ཚོགས་ལ་ལོ་ ༡༣། ཀླུ་སྒྲུབ་ཡེ་ཤེས་ལ་ལོ་ ༡༣། ལི་ཐང་རོང་རྒྱས་ཨ་གྲགས་ལ་ལོ་ ༨། ཨ་ཁུ་བྷོར་ལོ་ ༡༠། ཀུན་མཁྱེན་ལ་ལོ་ ༩། སྐལ་བཟང་རྒྱལ་མཚོར་ལོ་ ༥། བློས་ཐོག་ལ་ལོ་ ༣། ཀིརྟི་དགོན་གྱི་གྲྭ་འཕྲིན་ལས་ཚེ་རིང་ལ་ལོ་ ༩། ཀུན་དགའ་ལ་ལོ་ ༢། རྡོ་རྗེར་ལོ་ ༢། ལྷ་མོ་ཀིརྟི་དགོན་གྱི་གྲྭ་བསྟན་པ་རྒྱ་མཚོར་ལོ་ ༥། དཀོན་མཆོག་ཚུལ་ཁྲིམས་ལ་ལོ་ ༤། དཀོན་མཆོག་གྲགས་པར་ལོ་ ༤ བཅས་བཅད་འདུག

དེ་བཞིན། རྔ་སྨད་ལོ་རྟའི་སྐར་མར་ཚེ་བཙོན་དང་། ཚེ་ཁོར་ལོ་ ༡༣། གཏེར་མཛོད་ལ་ལོ་ ༡༥། རྔ་མ་འ་ཁམས་ཀྱི་དཔལ་རྒྱས་ལ་ལོ་ ༡༡། འཕགས་པར་ལོ་ ༡༢། འོད་ལྡན་ལ་ལོ་ ༩། བྱམས་མེ་དགོན་གྱི་གྲྭ་སྟོབས་ལྡན་ལ་ལོ་ ༢ དང་ཟླ་ ༦། བྱམས་པ་དགེ་འདུན་ལ་ལོ་ ༢ དང་ཟླ་ ༦། སྐལ་བཟང་བྱམས་པར་ལོ་ ༢། འཛམ་ཐང་གསང་ལུང་དགོན་པའི་བཀྲ་ཤིས་བརྟན་ལ་ལོ་ ༣ ། མཚོ་སྔོན་གྱི་སྐྱབས་གྲོལ་རྒྱ་མཚོར་ལོ་ ༣། སྐྱ་རུ་བའི་ལྷུན་གྲུབ་ལ་ལོ་ ༤། རིན་ཆེན་ལ་ལོ་ ༡༡། དར་རྒྱས་ལ་ལོ་ ༤ ། བློ་གྲོས་ལ་ལོ་ ༥། རྨེ་རུ་མའི་ཚེ་བདག་མགོན་པོར་ལོ་ ༦ ། སངས་རྒྱས་ལ་ལོ་ ༤། དབུར་ཆོས་ལོ་ ༤། རྟོགས་ལྡན་དགོན་པའི་གྲྭ་སེང་གྷར་ལོ་ ༨། འཕྲིན་ཁོར་ལོ་ ༨། རྔ་སྨད་རོང་ངན་གྱི་རྣམ་སྲས་ལ་ལོ་ ༤། རྔ་སྨད་གདོང་རི་དགོན་གྱི་གྲྭ་འཇམ་དབྱངས་ཉི་མར་ལོ་ ༢། སྨེ་བ་ཞང་གི་ཀུན་རྡོར་ལོ་ ༨། ནོ་པར་ལོ་ ༦ བཅས་ཀྱི་ཁྲིམས་ཐག་བཅད་ཡོད་པ་རེད། ཅེས་བརྗོད་བྱུང་།

བོད་ཀྱི་དུས་བབ་ཚགས་པར་ལས་འདིར་བཀོད།

གསར་འགོད་པ། དོན་གོ