དཔེ་སྟོན་སློབ་གྲྭའི་ངལ་གསོ།

དགེ་མིང་འཛིན་པ་གྲྭ་ཐུབ་བསྟན་ཆོས་འཕེལ།

སྐྱིད་སྡུག་གཉིས་ཀྱི་སོ་ཁ་དང་ཆགས་འཇིག་གཉིས་ཀྱི་ས་མཚམས་སུ་སླེབས་པའི་ང་ཚོ་བོད་པ་ཚང་གི་ལས་དབང་འདིར་བསམ་གཞིགས་རེ་བྱས་ཚེ། ཡ་ཁོག་སྙིང་ཆུང་ནད་པ་དང་། ངུས་ན་མཆི་མ་རྣག་ཁྲག་རེད། འོན་ཀྱང་། ང་ནི་རྣམ་དཔྱོད་ཀྱི་ནུས་པ་ཆུང་ལ། ཤེས་ཡོན་གྱི་གོ་རྟོགས་དམའ་བས། ངས་ནུས་པ་ཆེན་པོའི་ཐོག མི་རིགས་འདི་ལ་ཞབས་ཞུ་བྱེད་ག་ལ་ཐུབ།

རེད་དེ། ང་ཡང་བོད་མི་འཁྲུལ་མེད་ཅིག་ཡིན་པར་བརྟེན། མི་ཆུང་རུང་བསམ་པ་ཡར་སེམས་ཀྱི་ངང་ནས་རང་མི་རིགས་འདི་གནས་དགོས་ན་མི་རིགས་འདིའི་ཁྱད་ནོར། རིགས་ལམ་ནང་ཆོས་དེ་སློབ་ཕྲུག་ཚོར་བསླབ་དགོས་པ་དང་། དེ་སློབ་པར་ཡང་མི་རིགས་འདིའི་བླ་སྲོག་ལྟ་བུའི་སྐད་ཡིག་དེ་ཡར་རྒྱས་གཏོང་དགོས་པ་ཟློག་མེད་ཀྱི་ང་ཚོའི་ལས་འགན་ཞིག་དང་། ང་ཚོའི་མི་རིགས་འདི་སྐྱོབ་ཐབས་ཀྱི་ལམ་གྱི་བདེན་པ་ངོ་མ་ཡིན་པ་ངས་སྔ་མོ་ཞིག་ནས་རྟོགས་ཡོད་ལ། རང་སོ་སོའི་ངོ་ནས་ཀྱང་། རང་ནུས་གང་ཡོད་ཀྱིས་དེའི་ཐོག་འབད་འབུངས་བྱས་དང་བྱེད་བཞིན་ཡོད།

ཡིན་ན་ཡང་ད་བར་རང་ཉིད་ཀྱི་བློ་འདོད་ཁེངས་ཐག་ཆོད་པ་ཞིག་ཕར་ཞོག བློ་སེམས་བདེ་པོ་ཙམ་ཡང་ཡོང་ཐུབ་ཀྱི་མི་འདུག དེའི་རྒྱུ་རྐྱེན་གཙོ་བོ་ཞིག་ནི་རང་ཉིད་ཀྱི་རྒྱལ་ཁབ་གཞན་ལག་ཏུ་ཡོད་པ་དང་། བཙན་བྱོལ་གཞུང་དེ་རང་གི་འདོད་འདུན་ཐོག་ཤར་སྐྱོད་བྱེད་ཐུབ་ཀྱི་མེད་པ་སོགས་ཡིན་པ་མཐོང་ཆོས་སུ་གྱུར་སོང་། གང་ཡིན་ཞེ་ན། ང་རང་གཞུང་སྒེར་གྱི་སློབ་གྲྭ་དང་། དགོན་པ་མང་པོའི་ནང་སྐོར་བསྐྱོད་བྱས་ཀྱང་། ཉེ་ཆར་དཔེ་སྟོན་སློབ་གྲྭའི་ནང་བདུན་ཕྲག་ཁ་ཤས་ཀྱི་སློབ་ཁྲིད་བྱེད་སྐབས་དེར་ངའི་སེམས་ཀྱི་བདེ་སྐྱིད་དང་། ལུས་ཀྱི་ངལ་གསོ། མདོར་ན་བདེ་བ་ཅན་ཏུ་བསླེབས་པའི་ཚོར་སྣང་ཞིག་འགོག་མེད་དུ་སྦྱིན་སོང་།

བོད་པར་ལ་རྒྱ་ཞེན་ཁག་དང་བོད་ཡིག་བོད་སྐད་ལ་བརྩེ་བ་ཟབ་མོ་ཡོད་མཁན་ཚོ་དངོས་སུ་བསྐྱོད་དེ་ཞིབ་འཇུག་གྱིས་དང་། མ་མཐར་ཡང་མིག་ཙམ་ལྟོས་ཏེ་ཨ་ཅོག་གཡོར་དང་། དཔེ་སྟོན་སློབ་མའི་བོད་ཡིག་གི་གནས་ཚད་ནི་ངོ་མ་བསམ་ཡུལ་ལས་འདས་པ་ཞིག་དང་། བློ་ཡུལ་དུ་ཤོང་དཀའ་བ་ཞིག་རེད། གང་ལ་ཞེ་ན། སྐྱབས་བཅོལ་ལུང་པ་ཞིག་ནས་གཞན་དབང་སྟབས་བསྟུན་འོག་ཏུ། བོད་སྐད་བཀོལ་སྤྱོད་བྱེད་པའི་ཁོར་ཡུག་ཙམ་ཡང་མེད་ས་ཞིག་ནས་ས་སྐྱེས་རྡོ་སྐྱེས་ཀྱི་བོད་ཕྲུག་ཅིག་གིས། ལོ་ངོ་བཅོ་ལྔ་མ་སོན་གོང་ནས་རང་སྟོབས་ཀྱིས་དཔྱད་རྩོམ་དང་སྙན་རྩོམ་སོགས་འབྲི་ཐུབ་པ་འདི་མིག་འཁྲུལ་མིན་པར། ཟམ་གདོང་རིན་པོ་ཆེས་བྱིན་གྱིས་རླབས་ཤིག་གམ། ངོ་མ་ཡ་མཚན་གྱི་གནས་ཆེན་པོ་ཞིག་རེད། ད་དུང་དེ་ལས་ངོ་མཚར་བ་ཞིག་ལ། ད་སྐབས་འཛིན་གྲྭ་བཅུ་བའི་ནང་སློབ་བཞིན་པའི་སློབ་ཕྲུག་འགའ་ཤས་ཀྱིས་དབྱིན་ཡིག་གི་གསར་འགྱུར་ཐད་ཀར་བོད་ཡིག་ཏུ་ཕབ་བསྒྱུར་བྱེད་ཐུབ་པ་སོགས་ང་ལ་མིག་མཐོང་ལག་ཟིན་བྱུང་སོང་ལ། དེར་ཚིག་སྦྱོར་དང་ནང་དོན། དག་ཆ་སོགས་ཕྱོགས་གང་ཐད་དུ་ཧ་ལམ་ནོར་འཁྲུལ་གཅིག་ཀྱང་མཐོང་རྒྱུ་མི་འདུག་ཟེར་ཆོག་པའི་ཚོད་དུ་གདའ།

ཨེ་མ་ཧོ། མེས་དབོན་གཙུག་ལག་དཔེ་སྟོན་སློབ་གྲྭ་འདི་གསར་འཛུགས་གནང་མཁན་གྱི་རྒན་རབས་རྣམ་པ་དང་། དེ་ལ་མཐུན་འགྱུར་གནང་མཁན་སྤྱིན་བདག་ད་དུང་དངོས་སུ་ཕྱག་ལས་གནང་བཞིན་པའི་དགེ་ལས་སློབ་ཕྲུག སློབ་ཕྲུག་གི་ཕ་མ་བཅས་ལ་ངས་ལག་ཟུང་ཐལ་མོ་སྤྱར་ནས་ཐུགས་རྗེ་ཞུ། གང་ཞེ་ན། ཁྱེད་ཚོ་མི་རིགས་འདིའི་དྲིན་ཆེན་རེད་ ལ། བོད་མི་ཡོངས་ཀྱི་མིག་དཔེ་ཡག་ཤོས་དེ་ཡང་ཁྱེད་ཅག་རེད། བཀའ་དྲིན་ཆེ། བོད་པ་ཚང་གི་ནོར་བུ། བོད་ཡོངས་ཀྱི་བླ་སྲོག འཛམ་གླིང་ཞི་བདེའི་སྣེ་ཁྲིད། མེས་པོ་གོང་མའི་ཤུལ་བཞག བོད་ཀྱི་སྐད་དང་ཡི་གེ་འདི་ཇི་འདྲའི་བདག་གཅེས་ལེགས་པོ་གནང་འདུག ངོ་མ་བཀྲིན་ཆེ། བོད་རྒྱལ་ལོ།