མདོ་སྨད་དབུས་རྒྱུན་ནས་སློབ་བུ་བསྟན་འཛིན་འཕྲིན་ལས་ལཊ་སུ་ད་ལོའི་དབྱིན་ཡུལ་ཨེཊ་ལན་ཊིག་མཐོ་སློབ་ཀྱི་སློབ་བསྡུའི་རྒྱུགས་སྤྲོད་ཁྲོད་ཨང་དང་པོ་ཐོབ་པར་གཟེངས་སྟོད་ཀྱི་བྱ་དགའ་སྤྲད་སོང་།
དེ་རིང་སྔ་དྲོའི་ཆུ་ཚོད་ ༩ ཙམ་ལ་མདོ་སྨད་དབུས་སྤྱི་ཁྱབ་རྒྱུན་ལས་ཁང་གིས། བོད་མིའི་སྒྲིག་འཛུགས་ཤེས་རིག་ལས་ཁུངས་བརྒྱུད་ད་ལོར་དབྱིན་ཡུལ་གྱི་ཨེཊ་ལན་ཊིག་མཐོ་སློབ་(UWC Atlantic College Wales)ཀྱིས། བོད་ཕྲུག་སློབ་མ་བསྡུ་བའི་རྒྱུགས་འབྲས་ཨང་དང་པོ་ཐོབ་མཁན་སློབ་བུ་བསྟན་འཛིན་འཕྲིན་ལས་ལགས་སུ། གཟེངས་བསྟོད་རྟིང་སྐུལ་བྱ་དགའ་སྤྲོད་པའི་མཛད་སྒོ་ཞིག་ཚོགས་སོང་། སྐབས་དེར་ཕྱི་འབྲེལ་བཀའ་བློན་བདེ་སྐྱིད་ཆོས་དབྱངས་མཆོག་དང་སྤྱི་འཐུས་རྒྱུན་ལས་རྒྱ་རིགས་ཐར་ལགས། དེ་བཞིན་མདོ་སྨད་དབུས་རྒྱུན་ཚོགས་གཙོ་བསྟན་པའི་དངོས་གྲུབ་ལགས་བཅས་འཛོམས་པའི་ཐོག་གཟེངས་བསྟོད་རྟགས་མ་དང་ཧིན་སྒོར་ ༡༡༡༡༡ གནང་སོང་།
ཚོགས་གཙོ་ལགས་ཀྱིས་གཟེངས་བསྟོད་ཀྱི་བྱ་དགའི་སྐོར་ལ། སློབ་བུ་བསྟན་འཛིན་འཕྲིན་ལས་ལགས་ལ་རྒྱུགས་འབྲས་ཨང་དང་པོ་ཐོབ་སྟེ། དབྱིན་ཡུལ་ཨེཊ་ལན་ཊིག་མཐོ་སློབ་ཏུ་འགྲོ་བའི་གོ་སྐབས་ཐོབ་ཡོད་སྟབས། ང་ཚོ་མདོ་སྨད་དབུས་རྒྱུན་གྱི་ངོས་ནས་མདོ་སྨད་མི་མང་གི་ཚབ་བྱས་ཏེ། མ་འོངས་པར་སློབ་སྦྱོང་ཐོག་ཡར་རྒྱས་གོང་འཕེལ་གཏོང་བའི་རེ་སྐུལ་དང་། བྱིས་པ་ཆུང་ཆུང་ཞིག་ཡིན་དུས་ནས་སློབ་སྦྱོང་ཐོག་རེ་བ་རྒྱག་ས་ཞིག་དང་། ཁོ་རང་གི་པ་ལགས་ཀྱིས་མགོའི་སྐྲ་སེང་བའི་བར་བོད་སྤྱི་པར་ཞབས་ཞུ་ཞུས་པ་ལྟར། མ་འོངས་པར་བུ་ཡིས་ཀྱང་བོད་སྤྱི་དང་མདོ་སྨད་ལ་ཞབས་ཞུ་ཞུ་བའི་ཆོད་སེམས་བརྟན་པོ་དགོས་སྐོར་བརྗོད་སོང་།
དེའི་རྗེས་ཕྱི་འབྲེལ་བཀའ་བློན་མཆོག་གིས་སློབ་སྦྱོང་དང་དཔལ་འབྱོར་ཚད་མཐོ་བོར་སླེབ་པའི་ཐོག སྤྱི་སེམས་ཧ་ཅང་གལ་ཆེན་ཡིན་སྐོར་གསུངས་དོན། དེང་སང་བོད་པ་ཕྱི་རྒྱལ་དུ་འགྲོ་མཁན་དང་སློབ་སྦྱོང་ཡག་པོ་ཐོན་མཁན་མང་དུ་ འགྲོ་བཞིན་ཡོད་པ་རེད། ང་རང་ཕྱི་རྒྱལ་དུ་འཚར་ལོངས་བྱུང་བ་ཞིག་ཡིན་པའི་ཆ་ནས་ངེས་པར་དུ་སེམས་ལ་འཛིན་ དགོས་པའི་གནད་དོན་གལ་ཆེ་ཤོས་ཤིག་ནི། ཕྱི་རྒྱལ་དུ་སློབ་སྦྱོང་བྱེད་དུ་ཕྱིན་པ་ཡིན་ན་རེད། གཏན་འཇགས་གནས་སྤོ་བྱས་པ་ཡིན་ནའང་རེད། ཕྱི་རྒྱལ་ནས་སློབ་སྦྱོང་གནས་ཚད་དང་དཔལ་འབྱོར་གནས་སྟངས་ག་འདྲ་ཞིག་ཆགས་པ་ཡིན་ ནའང་སྤྱི་སེམས་དེ་ཧ་ཅང་གལ་ཆེན་པོ་རེད། སློབ་སྦྱོང་དང་དཔལ་འབྱོར་ཚད་མཐོ་བོ་ཅི་ཙམ་ཡོད་ཀྱང་སྤྱི་སེམས་མེད་ན་སོ་སོ་སྒེར་གཅིག་པུ་མ་གཏོགས་ཕན་ཐོགས་ཀྱི་མེད་སྟབས། གནད་དོན་འདི་ངེས་པར་དུ་སེམས་ལ་འཇོག་རོགས། ཞེས་དང་། མ་འོངས་པར་ལམ་སྟོན་དགོས་པ་དང་དྲི་བ་ག་རེ་ཡོད་ནའང་ང་ལ་འབྲེལ་བ་གནང་རོགས་ཞེས་སོགས་གསུངས་སོང་།
སྤྱི་འཐུས་རྒྱ་རིགས་ཐར་ལགས་ཀྱིས་རང་ཚུགས་ཡོད་པའི་ཐོག་ནས་སློབ་སྦྱོང་ལ་འབད་བརྩོན་བྱེད་དགོས་སྐོར་ལ། ཕྱི་རྒྱལ་གྱི་སློབ་གྲྭ་ཁག་ཏུ་ང་ཚོ་བོད་པའི་སློབ་གྲྭའི་ནང་གི་འདི་ཆོག་དང་དེ་མི་ཆོག་ཟེར་བའི་གནད་དོན་མང་པོ་ལྷོད་ཡངས་སུ་བཏང་ཡོད་སྟབས། སོ་སོར་རང་ཚུགས་མེད་ན་གང་མགྱོགས་འཕྲོ་བརླག་ཏུ་འགྲོ་བའི་ཉེན་ཁ་ཆེན་པོ་ཡོད་པ་ རེད། གལ་ཏེ་རང་ཚུགས་ཡོད་ན་ཁོར་ཡུག་དེ་ནས་སློབ་སྦྱོང་མང་པོ་ཞིག་ཚུར་སྤྲད་ཡོང་གི་ཡོད་སྟབས། དེ་ཚོ་ཚང་མ་སོ་སོའི་བདེ་བ་དང་ཡོན་ཏན། ཁྱད་ཆོས་ཤིག་ཏུ་ལེན་ཐུབ་ན་མི་ཚད་ལྡན་ཞིག་ཆགས་པའི་གོ་སྐབས་དང་མཐུན་རྐྱེན་དེ་འཛོམས་ཡོང་སྟབས། མ་འོངས་པར་དང་པོ་རང་གི་ཕ་མ་སེམས་ལ་འཛིན་དགོས་པ་དང་། དེ་ནས་རང་གི་མི་རིགས་དང་རྒྱལ་ཁབ་སེམས་ལ་བཟུང་སྟེ་སློབ་སྦྱོང་ལ་འབད་བརྩོན་བྱས་ན་འབྲས་བུ་ཞིག་འཐོན་ངེས་རེད། ཅེས་བརྗོད་སོང་།
བསྟན་འཛིན་འཕྲིན་ལས་ལགས་ཀྱིས་སོ་སོའི་ཚོར་སྣང་དང་མ་འོངས་པའི་འཆར་གཞིའི་སྐོར་བརྗོད་དོན། ངས་གོ་སྐབས་འདི་བེད་སྤྱོད་ཡག་པོ་ཞིག་གཏོང་འདོད་ཡོད། སྔོན་ཆད་ངས་སློབ་སྦྱོང་བྱས་ཏེ་གྲུབ་འབྲས་ཆེན་པོ་ལེན་ཐུབ་ས་མ་རེད་བསམ་པའི་ཚོར་སྣང་བྱུང་མྱོང་། ཡིན་ནའང་། གོ་སྐབས་འདི་ཐོབ་སྟེ་༧གོང་ས་མཆོག་དང་རྒྱལ་བ་ཀརྨ་པ་མཆོག་རྣམ་གཉིས་ནས་མཇལ་ཁ་བཀའ་སློབ་ཞུ་རྒྱུ་བྱུང་སྐབས། མི་རྙིང་པ་ཞིག་ལ་རེ་བ་དང་སེམས་ཤུགས་གསར་པ་ཞིག་བསླེབས་བྱུང་། མ་འོངས་པར་སློབ་གྲྭ་དེར་སོང་ནས་སློབ་སྦྱོང་ཐོག་ཧུར་ཐག་བྱེད་འདོད་ཡོད་ལ། ལྷག་པར་དུ་ང་རང་གི་ཆེད་སྦྱོང་ཚན་རིག་ཡིན་པས། ཁོར་ཡུག་གི་མཐུན་རྐྱེན་འཛོམས་པ་ལྟར་སོ་སོའི་ཆེད་སྦྱོང་ཐོག་འབད་བརྩོན་བྱས་ཏེ། མ་འོངས་པར་བྱུང་ན་སྤྱི་ཚོགས་ཁྱོན་ཡོངས་དང་མ་བྱུང་ཡང་བོད་མིའི་སྤྱི་ཚོགས་ནང་ཚན་རིག་སྐོར་གྱི་རྩོམ་པ་པོ་ཞིག་(columnist)བྱེད་འདོད་ཡོད་ཅེས་བརྗོད་སོང་།
སློབ་བུ་བསྟན་འཛིན་འཕྲིན་ལས་ནི་ད་ལྟ་རང་ལོ་ ༡༦ ཡིན་ལ། གངས་སྐྱིད་ཉིན་སློབ་དང་དྷ་སྟེང་བོད་ཁྱིམ་གཉིས་སུ་འཛིན་རིམ་དགུ་པ་བར་སློབ་སྦྱོང་བྱས་ཡོད་པ་དང་། དེའི་རྗེས་སློབ་སྦྱོང་དང་སྤྱོད་ལམ་ལེགས་གྲས་སུ་བདམས་ཏེ་ས་ལུ་གྷར་བོད་ཁྱིམ་དུ་ཚུད། སློབ་གྲྭ་དེར་ལོ་ལྟར་སྦྱངས་འབྲས་ཨང་རིམ་རྩེ་ཕུད་ཀྱི་གྲས་སུ་ཐོན་ཡོད་པ་མ་ཟད། ད་ལོའི་དབྱིན་ཡུལ་ཨེཊ་ལན་ཊིག་མཐོ་སློབ་ཀྱིས་འཛིན་རིམ་བཅུ་པ་ཡན་གྱི་བོད་ཕྲུག་སློབ་མ་གཅིག་བསྡུ་བའི་རྒྱུགས་སྤྲོད་ནང་རྒྱུགས་འབྲས་ཨང་དང་པོ་ཐོབ་ཡོད་འདུག
མདོ་སྨད་དབུས་རྒྱུན་གྱི་ལས་གཞིའི་ཁྲོད་ལོ་རེའི་མདོ་སྨད་ཁྱབ་ཁོངས་ནང་སྤྱི་བའི་ལས་དོན་གྲུབ་འབྲས་གཟེངས་ཐོན་རིགས་དང་། སློབ་སྦྱོང་རྩེར་སོན་གྱི་སློབ་ཕྲུག་སོགས་ལ་གཟེངས་རྟགས་འདི་སྤྲོད་སྲོལ་ཡོད་པ་ལྟར། དེ་སྔོན་གློག་ཀླད་ཆེད་མཁས་པ་བློ་བཟང་སྨོན་ལམ་ལགས་དང་། རྒྱ་གར་རྒྱལ་ཡོངས་འཛིན་རིམ་བཅུ་བའི་རྒྱུགས་འབྲས་ཨང་དང་པོ་ཐོན་མཁན་བུ་མོ་བསྟན་འཛིན་དཔལ་སྒྲོན་གཉིས་ལ་གནང་ཡོད་འདུག
གསར་འགོད་པ། པདྨ་མཚོ།
རྣམ་དཔྱོད་ལྡན་པའི་སློབ་ཕྲུག་བསྟན་འཛིན་འཕྲིན་ལས་ལགས་སུ་བཀྲ་ཤིས་བདེ་ལེགས་ཞུ། ཁྱེད་རང་ཕྱི་རྒྱལ་དུ་སློབ་སྦྱོང་ལ་ཕྱིན་ཏེ་རྗེས་མ་ཕྱིར་བཙན་བྱོལ་བོད་མིའི་སྤྱི་ཚོགས་ནང་ཕེབས་ནས་བོད་རྒྱ་ཆེའི་མི་མང་ལ་སྲི་ཞུ་བསྒྲུབ་དགོས། འདི་སེམས་ལ་འཛིན་རོགས།
སློབ་མ་བསྟན་འཛིན་འཕྲིན་ལས་ལ་བཀྲ་ཤིས་བདེ་ལེགས་ཞུ། ཡིན་ཡང་ནམ་རྒྱུན་མ་དོ་སྨད་དབུས་རྒྱུན་དང་མདོ་སྨད་སྤྱི་འཐུས་ཚོས་དབུ་མའི་ལམ་ལ་ཤར་སྐྱོད་དགོས་ཞེས་ཤུགས་ཆེན་གླེང་གི་ཡོད། ད་ཐེངས་སྤྱི་འཐུས་རྒྱ་རིགས་ཐར་གྱིས་རྒྱལ་ཁབ་དང་མི་རིགས་སེམས་ལ་བཟུང་ནས་སློབ་སྦྱོང་བྱོས་ལབ་དུས་ག་རེ་ཡིན་ནམ་སྙམ། ང་ཚོའི་དབང་འཛིན་པ་ཚོས་ཁ་གཅིག་ནས་རྒྱལ་ཞེན་དགོས་པའི་སློབ་སྟོན་གནང་བ་དང་། ཁ་གཅིག་ནས་རང་བཙན་རྩོད་མཁན་མད་ོསྨད་ནང་ལ་ཡོང་མི་ཉན་ཟེར་བའི་ཁ་གཅིག་གི་ནང་ནས་ལྕེ་གཉིས་འགུལ་སྟངས་འདི་ངོ་མ་ང་རང་མགོ་འཐོམས་བཅུག་སོང་།