པ་ཀི་སི་ཐན་དམག་མིས་འཇབ་རྒོལ་བྱས།

མདང་དགོང་པ་ཀི་སི་ཐན་དམག་མིས་རྒྱ་གར་གྱི་ས་མཚམས་སྒར་ས་ཁག་ཅིག་ལ་འཇབ་རྒོལ་བྱས་ཏེ་རྒྱ་གར་གྱི་དམག་མི་ ༤ རྨས་སྐྱོན་བཏང་ཡོད་འདུག

མདང་དགོང་ཆུ་ཚོད་ ༨།༣༠ ཙམ་ནས་དེ་རིང་སྔ་དྲོའི་ཆུ་ཚོད་ ༧ བར་པ་ཀི་སི་ཐན་མཐའ་སྲུང་དམག་མིས་རྒྱ་གར་གྱི་ཇ་མུ་རྫོང་ (Jammu District) ཁོངས་ཀྱི་མཐའ་མཚམས་དམག་སྒར་ནེ་ཁཱོ་ཝལ་ (Nikowal) དང་བྷོ་ཝར་ (Bhudwar) ཕྱོགས་སུ་མེ་མདའ་བརྒྱབ་པ་མ་ཟད། དེའི་རྗེས་པི་ཌལ་ (Pittal) དང་པེན་ཌི་ཅར་ཁཱན་ (Pindi Charkan)། ཁཱ་ཁེ་(Kake de Kothe)་སོགས་ཀྱི་ནང་སྒྱོགས་མདེལ་འཕངས་ཏེ། རྒྱ་གར་གྱི་དམག་མི་ ༤ རྨས་སྐྱོན་བཏང་ཡོད་འདུག དེ་ནི་ཉེ་ཆར་རྒྱ་གར་དང་པ་ཀི་སི་ཐན་བར་མེ་མདའ་འཕེན་རྒྱུ་མཚམས་འཇོག་གི་གྲོས་མོལ་བྱས་རྗེས་ཀྱི་འཇབ་རྒོལ་ཐེངས་གསུམ་པ་དེ་ཆགས་ཡོད་འདུག

རྒྱ་གར་བདེ་སྲུང་བློན་ཆེན་ཨ་རུན་ཇད་ཌི་ལེ་ (Arun Jaitley)ལགས་ཀྱིས། “པ་ཀི་སི་ཐན་མཐའ་སྲུང་དམག་མི་དང་རྒྱ་གར་དམག་མི་བར་ས་མཚམས་ཁུལ་དུ་མེ་འཕེན་མཚམས་འཇོག་བྱ་རྒྱུའི་ཐག་གཅོད་བྱས་ཡོད་ཀྱང་། པ་ཀི་སི་ཐན་དམག་མིས་གཅིག་མཇུག་གཉིས་མཐུད་ཐོག་རྒྱ་གར་གྱི་དམག་སྒར་ཁག་ལ་འཇབ་རྒོལ་དང་འབྲེལ། དམག་འཁྲུག་ལངས་གཞིའི་དོན་རྐྱེན་བཟོ་བཞིན་ཡོད་སྟབས། འབྲེལ་ཡོད་གཞུང་དང་འབྲེལ་བ་བྱས་ཏེ་ཐག་གཅོད་ཐུབ་ཐབས་བྱ་རྒྱུ་ཡིན” ཞེས་བརྗོད་འདུག

འདིའི་ཐད་རྒྱ་གར་གྱི་མཐའ་སྲུང་དམག་མི་ཞིག་གིས། “མདང་དགོང་པ་ཀི་སི་ཐན་མཐའ་མཚམས་དམག་མིས་ང་ཚོའི་ཇ་མུ་ཁུལ་གྱི་སྒར་ས་ཙམ་མ་ཟད། གྲོང་གསེབ་ཁུལ་དུ་སྒྱོགས་མདེལ་དང་མེ་མདའ་གང་བྱུང་བརྒྱབ་སྟེ་ཉེན་ཁ་བཟོས་ཡོད་སྟབས་ང་ཚོས་ཀྱང་ཁོ་ཚོའི་བྱ་སྤྱོད་གཞིར་བཟུང་འཁོན་ལན་བསློགས་པ་ཡིན” ཞེས་བརྗོད་འདུག

ཟླ་འདིའི་ཚེས་ ༨ ཉིན། ཇ་མུ་རྫོང་ཁོངས་པུ་རའ་ (RS Pura) ཁུལ་གྱི་ཨོག་ཌེ་རའོ་(Octerio) ཞེས་པ་རུ། རྒྱ་གར་དང་པ་ཀི་སི་ཐན་མཐའ་སྲུང་དམག་དཔོན་རྣམ་གཉིས་ཀྱིས་ས་མཚམས་ཁུལ་དུ་མེ་འཕེན་མཚམས་འཇོག་བྱ་རྒྱུའི་ཐག་གཅོད་དང་འབྲེལ། པ་ཀི་སི་ཐན་དམག་མིས་རྒྱ་གར་གྱི་དམག་མི་ཞིག་ཀློད་གྲོལ་བཏང་བ་སོགས་ཕན་ཚུན་ཡིད་ཆེས་ཐོབ་པ་བྱུང་ཡོད་ཀྱང་། ཉིན་དེ་རང་ལ་པ་ཀི་སི་ཐན་དམག་མིས་ཇ་མུ་དང་ཀཱ་ཤི་མེར་མངའ་སྡེའི་པོན་ཆི་(Poonch) རྫོང་ཁོངས་ཀྱི་བྷེམ་བྷར་གྷ་ལི་སྒར་སར་ (Bhimbher Gali) དང་། ཚེས་ ༥ ཉིན་ཤེར་ཤག་ཌི་ (Sher Shakti) དམག་སྒར་ལ་འཇབ་རྒོལ་བྱས་ཡོད།

དེ་རིང་སླར་ཡང་པོན་ཆི་རྫོང་ཁོངས་ཀྱི་མན་ཌར་ (Mendhar) དམག་སྒར་ལ་གང་བྱུང་མེ་མདའ་དང་སྒྱོགས་མདེལ་འཕངས་ཡོད་སྟབས། རྒྱ་གར་དམག་མིས་ཀྱང་པ་ཀི་སི་ཐན་དམག་མི་དང་ཁ་གཏད་བཅག་ཡོད་འདུག

རྒྱ་གར་གྱི་ཐབས་ཇུས་མཁས་པ་རེག་གྷར་སན་ཇོན་ལགས་ཀྱིས། “ཉེ་ལམ་པ་ཀི་སི་ཐན་དམག་མིས་རྒྱ་གར་གྱི་ས་མཚམས་དམག་སྒར་དང་དེ་ཁུལ་ས་ཁུལ་ཁག་ནང་འཇབ་རྒོལ་ཡང་ཡང་བྱས་ཏེ། རྒྱ་གར་ལ་བརྙས་བཅོས་བྱེད་བཞིན་ཡོད་སྟབས། རྒྱ་གར་གཞུང་གིས་དེ་མཚུངས་འཁོན་ལན་སློག་རྒྱུ་གལ་ཆེན་པོ་ཆགས་ཡོད” ཅེས་བརྗོད་འདུག

ཆབ་སྲིད་དབྱེ་ཞིབ་པ་ཚོས། སང་ཉིན་རྒྱ་གར་གྱི་སྲིད་བློན་ནཱ་རེན་ཌ་མུ་དྷི་ཇ་མུ་ཀ་ཤི་མེར་མངའ་སྡེའི་ལ་དྭགས་རྫོང་དང་ཀར་གྷེལ་རྫོང (Kargil) གཉིས་ནང་གཟིགས་སྐོར་དང་འབྲེལ། ཆུ་གློག་ས་ཚིགས་གཉིས་ཀྱི་རྨང་གཞི་གསར་རྒྱག་གི་ལས་གཞི་དབུ་འབྱེད་དང་མང་ཚོགས་ལ་གཏམ་བཤད་གནང་རྒྱུ་ཡིན་སྟབས། པ་ཀི་སི་ཐན་མཐའ་སྲུང་དམག་མིས་འཇབ་རྒོལ་བྱས་པ་ཞིག་ཡིན་སྐོར་སོགས་བརྗོད་འདུག

གསར་འགོད་པ། དོན་གྲུབ།