༧གོང་ས་མཆོག་གི་ཐའེ་ཝན་མི་མང་དང་རྒྱ་ནག་ཡུན་ནན་བཅས་ཀྱི་གནོད་ཐེབས་མང་ཚོགས་ལ་གདུང་སེམས་མཉམ་སྐྱེད་ཀྱི་གསུང་འཕྲིན་ཞིག་སྩལ་ཡོད་འདུག
ཉེ་ལམ་༧གོང་ས་མཆོག་གིས་ཟླ་སྔོན་མའི་ཕྱི་ཚེས་ ༣༡ ཉིན་གྱི་མཚན་མོར་ཐའེ་ཝན་ལྷོ་ཕྱོགས་ཀོ་ཞོན་གྲོང་ཁྱེར་གྱི་ས་འོག་ཏུ་རྡོ་ཞུན་རླངས་རྫས་གས་འཐོར་དང་། གནམ་གྲུ་བརྡབ་སྐྱོན་སོགས་གྱི་དོན་རྐྱེན་བྱུང་བར་སེམས་གསོའི་གསུང་འཕྲིན་སྩལ་ཡོད་འདུག ༧གོང་ས་མཆོག་གི་སེམས་གསོའི་གསུང་འཕྲིན་ནང་ཉེ་ཆར་བདུན་ཕྲག་གཅིག་རིང་ཐེ་ཝན་ཀོ་ཞོན་གྲོང་ཁྱེར་ནང་རྡོ་ཞུན་རླངས་རྫས་གས་འཐོར་དང་། གནམ་གྲུ་བརྡབ་སྐྱོན་གྱི་དོན་རྐྱེན་རིམ་པ་བྱུང་སྟེ། མི་རྒྱུ་གཉིས་ལ་གྱོང་གུད་ཚབས་ཆེན་ཕོག་པའི་ཡིད་སྐྱོའི་གནས་ཚུལ་བྱུང་འདུག གནས་ཚུལ་ཐོས་མ་ཐག་ངོས་རང་ལ་དམིགས་བསལ་བློ་ཕམ་བྱུང་། ངོས་རང་དེ་སྔ་ཐའེ་ཝན་གྱི་གྲོང་ཁྱེར་ཀོ་ཞོན་ནང་བསྐྱོད་མྱོང་ཡོད་སྟབས། ཁུལ་དེའི་མི་དམངས་ཀྱི་ཆོས་སེམས་དང་དད་གུས་དྲན་གྱི་འདུག དཀའ་ངལ་འཕྲད་བཞིན་པའི་དུས་སྐབས་འདིར་ངོས་ཀྱིས་ཁྱེད་རང་ཚོ་བརྗེད་ཐབས་མེད་པར་མ་ཟད། ཁྱེད་ཅག་གི་ཤུལ་ལུས་ནང་མི་སྤུན་མཆེད་རྣམས་ལ་གདུང་སེམས་མཉམ་སྐྱེའི་སྨོན་ལམ་རྒྱག་བཞིན་ཡོད། ཅེས་གསུངས་འདུག
ཡང་གསུང་འཕྲིན་ནང་༧གོང་ས་མཆོག་གིས། ཉེ་ཆར་རྒྱ་ནག་ཡུ་ནན་ཞིང་ཆེན་དུའང་ས་ཡོམ་བརྒྱབ་ཡོད་པའི་གནས་ཚུལ་གོ་ཐོས་བྱུང་། ད་དུང་འཛམ་གླིང་གི་ས་ཕྱོགས་ཁག་ཅིག་ཏུ་འཁྲུག་རྩོད་དང་རང་བྱུང་གོད་ཆག་སོགས་ལ་བརྟེན་ནས་མི་མང་དག་ཅིག་རྐྱེན་འདས་སུ་གྱུར་བ་དང་། མང་པོ་ཞིག་ལ་རྨས་སྐྱོན་ཕོག་པའི་གནས་སྟངས་ལ་བསམ་བློ་གཏོང་སྐབས་ངོས་རང་ཧ་ཅང་བློ་ཕམ་ཡོང་བཞིན་འདུག ངོས་ཀྱིས་ཤུལ་ལུས་ནང་མི་རྣམས་མགྱོགས་མྱུར་སྡུག་བསྔལ་ལས་གྲོལ་རྒྱུ་དང་། འདས་གྲོངས་སུ་གྱུར་བ་རྣམས་དལ་རྟེན་བཟང་པོ་ཞིག་ཐོབ་ཆེད་བསྔོ་སྨོན་རྒྱག་རྒྱུ་ཡིན། ཞེས་བཀའ་སྩལ་ཡོད་འདུག
གསར་འགོད་པ། དོན་གོ
