འདན་མ་རུ་བོད་མིར་དྲག་གནོན།

ཟླ་འདིའི་ཕྱི་ཚེས་ ༡༡ ཉིན་གྱི་མཚན་མོར་སེལ་ཤུལ་རྫོང་འདན་མ་ཤུག་པ་སྡེ་བའི་སྡེ་དཔོན་དབང་གྲགས་ལགས་འཛིན་བཟུང་བྱས་ཡོད་པ་མ་ཟད། སྡེ་མི་ཚོར་དྲག་གནོན་བྱས་ཏེ་མི་ ༡༠ ཡས་མས་ཤིག་ལ་རྨས་སྐྱོན་ཚབས་ཆེན་བཟོས་ཡོད་འདུག

ཟླ་འདིའི་ཕྱི་ཚེས ༡༡ ཉིན་གྱི་མཚན་མོའི་ཆུ་ཚོད་ ༡༢ ཙམ་ལ། དཀར་མཛེས་ཁུལ་སེལ་ཤུལ་རྫོང་འདན་མ་ཡུལ་ཚོ་ཤུག་པ་གྲོང་པའི་སྡེ་དཔོན་དབང་གྲགས་ཞུ་བ་ཞིག་འཛིན་བཟུང་བྱས་ཡོད་སྟབས། ཕྱི་ཚེས་ ༡༢ ཉིན་བོད་མི་བརྒྱ་ཕྲག་ལྷག་ས་གནས་སྲིད་གཞུང་གི་སྒོ་འགྲམ་དུ་འདུ་འཛོམས་བྱས་ཏེ། སྡེ་དཔོན་དབང་གྲགས་ལགས་ལ་ནག་ཉེས་གང་ཡང་མེད་པས་འཕྲལ་དུ་ཀློད་གྲོལ་གཏོང་དགོས་པའི་འབོད་སྐུལ་གནང་སྐབས། སྲིད་གཞུང་གིས་བརྡ་ལན་གང་ཡང་མ་སྤྲད་པར་ཉེན་རྟོག་པ་དང་དམག་མི་མང་པོ་ཆེད་གཏོང་གིས་མི་མང་ལ་དྲག་གནོན་བྱས་ཏེ། བོད་མི་ ༡༠ ཡས་མས་ཤིག་ལ་རྨས་སྐྱོན་ཚབས་ཆེན་བཟོས་ནས་སྨན་ཁང་དུ་བསྐྱལ་ཡོད་ཀྱང་། ད་ལྟའི་ཆར་ཤི་གསོན་གང་ཡིན་དང་ས་གནས་ཀྱི་གནས་སྟངས་སོགས་ཤེས་རྟོགས་ཐུབ་ཀྱི་མེད་པ་རེད།

སྡེ་དགེ་དྲ་བའི་ཐོག་གནས་ཚུལ་སྤེལ་བ་ལྟར་ན། རྒྱ་ནག་ནས་དཔོན་པོ་ཁག་ཅིག་སེར་ཤུལ་རྫོང་ལ་ལྟ་སྐོར་དུ་ཡོང་འཆར་ཡོད་སྟབས། ཉེ་ཆར་རྫོང་དང་ཁུལ་རིམ་པ་ནས་འདན་མའི་ཕྱོགས་ཀྱི་ཤུག་པ་སྡེ་བ་སོགས་ནས་གླུ་གར་འཁྲབ་སྟོན་པ་ཡོང་དགོས་པའི་བཀོད་ཁྱབ་བཏང་ཡོད་པ་མ་ཟད། གླུ་གར་སྦྱོང་བརྡར་སྐབས་ཞབས་བྲོ་བ་བུ་མོ་ཁ་ཅིག་ལ་ཁུལ་གྱི་དཔོན་པོ་འགས་བརྙས་བཅོས་བྱས་ཡོད་འདུག ཕྱིས་སུ་བུ་མོ་དེ་ཚོས་ཤུག་པ་སྡེ་བའི་སྡེ་དཔོན་དབང་དྲག་ལགས་ལ་ཁོང་ཚོར་བརྙས་བཅོས་བྱས་པའི་གནས་ཚུལ་བཤད་ཡོད་སྟབས། སྡེ་དཔོན་དབང་གྲགས་ལགས་ཀྱིས་ཁུལ་དཔོན་ཚོས་དེ་འདྲའི་མཐོང་ཆུང་བརྙས་བཅོས་བྱེད་དོན་ཅི་ཡིན་ཞེས་གཞུང་གི་ལས་བྱེད་ཚོར་གནས་ལུགས་བཤད་སྐབས། ཁོང་ཚོའི་བར་རྩོད་པ་ཤོར་ཡོད་པ་མ་ཟད། ལས་བྱེད་ཚོས་ཉེ་ཆར་འདན་མའི་རྟ་རྒྱུགས་བསང་གསོལ་གྱི་སྲོལ་རྒྱུན་བྱེད་སྒོ་ཁག་ལ། རྫོང་དང་ཁུལ་རིམ་པས་ཆོག་མཆན་སྤྲད་མེད་པས་ཁྲིམས་འགལ་ཡིན་སྐོར་གྱི་ཉེས་འཛུགས་བྱས་ཡོད་ཀྱང་། དབང་གྲགས་ལགས་ཀྱིས་བསང་གསོལ་དང་རྟ་རྒྱུགས་ནི་གནའ་ནས་བོད་ལ་དར་བའི་ཆོས་ལུགས་དང་སྲོལ་རྒྱུན་གྱི་བྱེད་སྒོ་གལ་ཆེན་ཞིག་ཡིན་སྟབས། ཆོས་ལུགས་དད་པ་རང་མོས་ཡིན་པས་སྲོལ་རྒྱུན་གྱི་བྱེད་སྒོ་ཁག་ཁྲིམས་འགལ་ཡིན་པ་ངོས་ལེན་མེད་ལུགས་བརྗོད་ཡོད་འདུག

སྐབས་དེར་དབང་གྲགས་ལགས་འཛིན་བཟུང་བྱས་མེད་ཀྱང་། ཟླ་འདིའི་ཕྱི་ཚེས་ ༡༡ ཉིན་གྱི་མཚན་མོ་བོད་ནང་གི་ཆུ་ཚོད་ ༡༢ ཙམ་ལ། རྒྱ་གཞུང་ཉེན་རྟོག་པས་སྡེ་དཔོན་དབང་གྲགས་ལགས་རང་ཁྱིམ་ནས་གསང་བའི་བཙན་ཁྲིད་བྱས་ཡོད་པ་དང་། ཕྱི་ཚེས་ ༡༢ ཉིན་མི་མང་གིས་སྡེ་དཔོན་བཙན་ཁྲིད་བྱས་པ་ཤེས་རྟོགས་བྱུང་སྟེ། བོད་མི་བརྒྱ་ཕྲག་ལྷག་ལོ་ཕྱུག་ས་ཁུལ་གྱི་སྲིད་གཞུང་མདུན་དུ་འདུ་འཛོམས་ཀྱིས། ང་ཚོའི་སྡེ་དཔོན་ཉེས་མེད་ཐོག་བཙན་ཁྲིད་བྱས་པ་འཕྲལ་དུ་ཀློད་གྲོལ་གཏོང་དགོས་ཞེས་སྐད་འབོད་བྱེད་སྐབས། རྒྱ་གཞུང་གིས་སེར་ཤུལ་རྫོང་ཐོག་ནས་དམག་མི་མང་པོ་ཆེད་གཏོང་གིས། མི་མང་ཁྲོད་གང་བྱུང་དུག་རྫས་གཡུགས་པ་དང་མེ་མདའ་བརྒྱབ་སྟེ། དབང་གྲགས་གི་བུ་དང་སྤུན་མཆེད་གཉིས་ལ་མདེའུ་གཉིས་རེ་ཕོག་པ་སོགས་བོད་མི་བཅུ་ཡས་མས་ཤིག་ལ་རྨས་སྐྱོན་ཚབས་ཆེན་བཟོས་ཡོད་སྟབས། ད་ལྟའི་ཆར་སྐྱེ་རྒུ་མདོ་དང་རྒྱ་ནག་ནང་སོགས་སུ་རྨས་མ་ཚོར་སྨན་བཅོས་བྱེད་བཞིན་ཡོད་ཀྱང་། སྲོག་ཉེན་ལས་སྐྱོབ་ཐབས་ཡོད་མེད་ཤེས་རྟོགས་ཐུབ་ཀྱི་མེད་པ་རེད།

ཁ་སང་ཚེས་ ༡༢ ཉིན་གྱི་དགོང་མོར་བསྐྱར་དུ་གནས་ཚུལ་འབྱོར་ཏེ། ཉིན་དེའི་མཚན་གུང་སླར་ཡང་དམག་མིའི་རླངས་འཁོར་མང་པོ་སྡེ་བའི་ནང་བསླེབས་ཡོད་སྟབས། ཡུལ་མི་མང་པོ་འཛིན་བཟུང་བྱ་སྲིད་པའི་གནས་ཚུལ་ཐོན་ཡོད་ཀྱང་། ད་ལྟའི་ཆར་སྐབས་དེར་བོད་མི་འཛིན་བཟུང་བྱས་ཡོད་མེད་དང་ས་གནས་ཀྱི་གནས་སྟངས་སོགས་གསལ་བོ་ཤེས་རྟོགས་ཐུབ་མི་འདུག

སྡེ་དཔོན་དབང་གྲགས་ལགས་ལོ་ན་ ༤༥ ཙམ་ཡིན་ཞིང་། རྒྱུན་དུ་མི་མང་ཉམ་ཐག་དང་གཞན་གྱི་བརྙས་བཅོས་ཐེབས་པ་ཚོར་རྒྱབ་སྐྱོར་དང་རོགས་རམ་གང་ཐུབ་གནང་མཁན་ཞིག་ཡིན་འདུག

གཞན་ཡང་། ལོ་ ༢ ཀྱི་གོང་བོད་ནང་རང་ལུས་མེར་བསྲེགས་ཀྱི་དོན་རྐྱེན་བྱུང་བའི་སྐབས་དང་བསྟུན་ཏེ། རྒྱ་གཞུང་གིས་སེར་ཤུལ་རྫོང་ཐོག་ཏུ་གླུ་གར་སྤྲོ་ཚོགས་ཤིག་བསྡུས་ཏེ་བོད་མི་མང་པོར་དགའ་སྐྱིད་འཁྲབ་སྟོན་བྱེད་དུ་བཅུག་ཡོད་པ་ལྟར། སྐབས་དེར་ཤུག་པ་སྡེ་བའང་སྤྲོ་ཚོགས་ཐོག་ཞུགས་དགོས་པའི་བཀོད་ཁྱབ་བཏང་ཡོད་ཀྱང་། སྡེ་བའི་བོད་མི་ཚོས་གདུང་སེམས་མཉམ་སྐྱེད་མཚོན་ཆེད་སྲིད་གཞུང་གི་བཀའ་ཁྱབ་དང་ལེན་བྱས་མེད་པ་རེད།