རྒྱ་ནག་དབུས་ཞིབ་བཤེར་ཨུ་ཡོན་ལྷན་ཁང་གིས་ལྐོག་ཟའི་ཉེས་མིང་འོག་དབུས་དམར་ཤོག་དམག་དོན་ལྷན་ཁང་གི་འགན་འཛིན་གཞོན་པ་ཟུར་པ་ཀོ་པོ་ཞོན་ལ་ཞིབ་བཤེར་བྱེད་མགོ་ཚུགས་འདུག
ཟླ་འདིའི་ཚེས་ ༡༢ ཉིན་ཧོང་ཀོང་འགྲོ་བ་མིའི་ཐོབ་ཐང་དང་དམངས་གཙོའི་བརྡ་འཕྲིན་ལྟེ་གནས་ཁང་གིས་སྙན་ཐོ་ཞིག་བཏོན་པའི་ནང་། ད་ལྟ་རྒྱ་ནག་དབུས་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་གིས། རྒྱ་ནག་དབུས་དམར་ཤོག་སྤྱི་ཁྱབ་དམག་དོན་ལྷན་ཁང་གི་དམག་སྤྱི་གཞོན་པ་ཟུར་པ་ཀོ་པོ་ཞོན་ལ་ཞིབ་བཤེར་བྱེད་ཀྱི་ཡོད་ཚུལ་བསྒྲགས་ཡོད་པར་མ་ཟད། རང་ལོ་ ༧༢ ཡིན་པའི་ཀོ་པོ་ཞོན་གྱིས་ལྐོག་དངུལ་བླངས་ཏེ་མི་གཞན་གྱི་གོ་གནས་སྤར་བའི་ཁྲིམས་འགལ་གྱི་བྱ་སྤྱོད་སྤེལ་བའི་དོགས་གཞིའི་འོག་ཞིབ་བཤེར་བྱེད་མགོ་ཚུགས་ཡོད་པ་དང་། འདི་ལོའི་ཕྱི་ཟླ་ ༧ པར་ཁོའི་བུ་དང་བུའི་བཟའ་ཟླ་གཉིས་ཀྱང་རང་ཁྱིམ་དུ་འཛིན་བཟུང་གིས་ད་ཆར་དབུས་གཞུང་གིས་འདྲི་གཅོད་ཞིབ་བཤེར་བྱེད་ཀྱི་ཡོད་ཚུལ་བསྒྲགས་འདུག
སྙན་ཐོའི་ནང་། ཉེ་བའི་དུས་ནས་བཟུང་རྒྱ་ནག་དམར་ཤོག་ཚོགས་པས་གཙོ་འཛིན་གཉིས་ཀྱི་ལམ་ལུགས་ཤིག་ལག་བསྟར་བྱས་ཏེ། དམག་དོན་དང་འབྲེལ་བའི་རིགས་དང་དམག་དཔུང་ནང་ཁུལ་གྱི་མགོ་ཁྲིད་སོགས་ཀྱི་གོ་གནས་སྤར་བར་ངེས་པར་དུ་དབུས་དམར་ཤོག་ཚོགས་པའི་དམག་དོན་མགོ་ཁྲིད་གཞོན་པ་གཉིས་ཀྱི་མོས་མཐུན་བཀའ་འཁྲོལ་འོག་ཐག་གཅོད་བྱེད་དགོས་ཀྱི་ཡོད་སྟབས། གོ་གནས་སྤར་བའི་ཆེད་དུ་ལྟག་སྒོར་འཇུག་མཁན་ཚོས་ཀྱང་ངེས་པར་དུ་དབུས་དམར་ཤོག་དམག་དོན་ལྷན་ཁང་གི་དམག་སྤྱི་གཞོན་པ་གཉིས་ཀར་ལེགས་སྐྱེས་འདྲ་མིན་ཕུལ་དགོས་པའི་གནས་སྟངས་ཆགས་ཡོད་ཚུལ་སོགས་བཀོད་འདུག
འདི་ལོའི་ཕྱི་ཟླ་ ༦ པར་ཀོ་པོ་ཞོན་གྱི་ལས་རོགས་རྒྱ་ནག་དབུས་དམར་ཤོག་དམག་དོན་ལྷན་ཁང་གི་འགན་འཛིན་གཞོན་པ་ཟུར་པ་ཞི་ཚེ་ཧུའུ་ལྐོག་ཟའི་ནག་ཉེས་འོག་དམར་ཤོག་གི་ཚོགས་མི་ནས་ཕྱིར་འཕུད་བཏང་ཡོད་པར་མ་ཟད། དབུས་སྒྲིག་ཁྲིམས་ཞིབ་བཤེར་ཨུ་ཡོན་ལྷན་ཁང་ལ་རྩིས་སྤྲོད་ཀྱིས་ཐག་གཅོད་བྱེད་དགོས་པའི་བཀོད་ཁྱབ་བཏང་ཡོད་པ་དང་། ད་ཆར་རྒྱ་ནག་ནང་ཁུལ་དུ་དེ་སྔོན་ནས་ཞིབ་བཞེར་བྱེད་བཞིན་པའི་རྒྱ་ནག་དམར་ཤོག་ཆབ་སྲིད་རྒྱུན་ལས་ཁང་གི་མགོ་གཙོ་ཀྲིག་ཡོན་ཁང་དང་ཞི་ཚེ་ཧུའུ་གཉིས་ལ་སྡོད་ཁང་བཟོ་བསྐྲུན་སོགས་རྒྱ་སྒོར་ས་ཡ་ ༡༠༠ ལས་བརྒལ་བའི་ལྐོག་ཟའི་གནས་ཚུལ་ཡོད་པའི་ཚོད་རྩིས་བྱེད་ཀྱི་ཡོད་འདུག
རྒྱ་ནག་གི་མགོ་ཁྲིད་ཞི་ཅིན་ཕིན་གྱི་མཐོ་རིམ་དཔོན་རིགས་ནང་ཁུལ་དུ་ལྐོག་ཟ་རུལ་སུངས་ཀྱི་གནད་དོན་ཞིབ་བཤེར་བྱེད་བཞིན་པའི་ཐད་རྒྱལ་སྤྱིའི་ཆབ་སྲིད་དཔྱད་བརྗོད་པ་ཚོས། ཞི་ཅིན་ཕིན་གྱིས་ཀྲིག་ཡོན་ཁང་ལ་ཞིབ་བཤེར་བྱས་པ་དེས་ཞི་ཡི་དབང་ཆ་སྲ་བརྟན་ཆགས་ཡོད་སྐོར་བརྗོད་ཀྱི་ཡོད་པར་མ་ཟད། ཉེ་ལམ་རྒྱ་ནག་མཐོ་རིམ་དཔོན་རིགས་ཁག་ཅིག་པེ་ཏེ་ཧེ་རུ་ཚོགས་འདུ་ཚོགས་སྐབས། ཧྲང་ཧེ་གྲོང་ཁྱེར་གྱི་མགོ་གཙོ་ཝང་ཙོན་ནན་གློ་བུར་འཛིན་བཟུང་བྱས་པ་དེས་ཞི་ཅིན་ཕིན་གྱིས་ལྐོག་ཟའི་གནད་དོན་གྱི་གཙོ་གནད་ཅང་ཙེ་མིན་གྱི་ཧྲང་ཧེ་རུ་བཟུང་བའི་དབང་ཆའི་རྨང་གཞིའི་ཐོག་ཁ་ཕྱོགས་ཀྱི་ཡོད་ཚུལ་དང་། ཁོང་གི་ཐེངས་རྗེས་མའི་ཞིབ་བཤེར་གྱི་དམིགས་ཡུལ་གཙོ་བོ་རྒྱ་ནག་གི་སྲིད་འཛིན་ཟུར་པ་ཅང་ཅེ་མིན་དང་། ཙིན་ཆེན་ཧོན་ཐེས་པའི་ཧྲང་ཧེ་ཚོགས་པའི་ཕྱོགས་གཏོགས་ཀྱི་མཐོ་རིམ་མགོ་ཁྲིད་དག་ཡིན་སྐོར་བརྗོད་ཀྱི་ཡོད་འདུག
གསར་འགོད་པ། དོན་གོ
