ཨ་རིའི་རླུང་འཕྲིན་གྱིས་བོད་པའི་གསར་འགྱུར་བཤད་སྲིད་དམ།

ཨ་རིའི་གྲོས་ཚོགས་འོག་མའི་ནང་བརྡ་འཕྲིན་སྐོར་ལ་གྲོས་ཆོད་ཅིག་བཞག་ཡོད་པའི་ནང་མ་འོངས་པར་ཨ་རིའི་རླུང་འཕྲིན་ཁང་གི་གསར་འགྱུར་དང་ལས་རིམ། བརྗོད་བྱ་སོགས་ལ་གཞུང་གིས་སྟངས་འཛིན་བྱ་རྒྱུ་འཁོད་ཡོད་འདུག

ཉེ་ལམ་ཕྱི་ཟླ་ ༧ ཚེས་ ༢༨ ཉིན་ཨ་རིའི་གྲོས་ཚོགས་འོག་མའི་ནང་། ༢༠༡༤ ལོའི་ཨ་རིའི་རྒྱལ་སྤྱིའི་བརྡ་འཕྲིན་བཅོས་སྒྱུར་ཁྲིམས་(H.R. 4490)ཟེར་བའི་ཁྲིམས་ཀྱི་གྲོས་གཞི་དེར། དམངས་གཙོ་ཚོགས་པ་དང་སྤྱི་མཐུན་ཚོགས་པ་གཉིས་ཀས་དགག་བྱ་གང་ཡང་མེད་པར་གྲོས་མཐུན་བྱུང་ཡོད་འདུག ཨ་རིའི་གྲོས་ཚོགས་གོང་མ་སྟེ་(Senate)གྲོས་ཚོགས་ནས་གྲོས་གཞི་དེ་ལ་མི་རིང་བར་འོས་བསྡུ་བྱ་རྒྱུ་ཡིན་པ་དང་། གལ་ཏེ་གྲོས་ཚོགས་གོང་མའི་ནང་གྲོས་མཐུན་བྱུང་བ་ཡིན་ན་ཨ་རིའི་སྲིད་འཛིན་གྱིས་གྲོས་གཞི་དེར་མིང་རྟགས་འགོད་རྒྱུ་དང་། ཉིན་དེ་ནས་བཟུང་གྲོས་ཆོད་དེ་ཨ་རིའི་ཁྲིམས་ཆགས་ཡོད་འདུག

ཨ་རིའི་གྲོས་ཚོགས་འོག་མའི་(H.R. 4490) ཞེས་པའི་གྲོས་གཞི་དེར་ནང་དོན་མང་པོ་ཞིག་ཡོད་ཀྱང་། བོད་པ་ཚོ་དང་འབྲེལ་བ་ཡོད་པའི་གནད་དོན་གཙོ་བོ་ཞིག་ནི། སྡེ་ཚན་ (SEC 124) ཞེས་པའི་ནང་། “ཨ་རིའི་རླུང་འཕྲིན་ཁང་གི་གསར་འགྱུར་དང་། ལས་རིམ། བརྗོད་བྱ་ལ་ཚོད་འཛིན་བྱ་རྒྱུ། ཁུ་བྷ་[རྒྱལ་ཁབ་]ལ་རྒྱང་སྲིང་བྱེད་པར་དམིགས་གསལ་ཡོད” (Limitation on voice of America news, programming, and content; exception for broadcasting to Cuba) ཞེས་པ་ཞིག་ཡོད་པ་དེ་ཡིན་འདུག

གོང་གསལ་གནས་ཚུལ་སྐོར་འདི་གར་རྩོམ་ཡིག་ཅིག་འབྱོར་བ་ལྟར་ན། བོད་སྐད་སྡེ་ཚན་ལ་ཆ་བཞག་ན། རྗེས་ཕྱོགས་ཨ་རིའི་རླུང་འཕྲིན་ཁང་གི་བོད་སྐད་སྡེ་ཚན་གྱི་ལས་རིམ་དེ་དག་ལ་ཨ་རིའི་གཞུང་གིས་སྟངས་འཛིན་བྱས་ཏེ། ཨ་རིའི་གཞུང་གི་ལྟ་བ་དང་སྲིད་ཇུས་རྒྱང་སྲིང་བྱེད་རྒྱུ་ཡིན་པ་ལས། ཨ་རིའི་གཞུང་གིས་བོད་ཀྱི་གསར་འགྱུར་བཤད་རྒྱུར་ཚོད་འཛིན་བྱེད་རྒྱུ་ཡིན་པ་གྲོས་གཞི་དེའི་ཤུགས་སུ་བསྟན་ཡོད་ཅིང་། ཁུ་བྷ་ལྟ་བའི་གསར་འགྱུར་ལ་རང་དབང་སྤྲད་དེ་ཚོད་འཛིན་མི་བྱེད་པ་གྲོས་གཞི་དེའི་ནང་དངོས་སུ་གསལ་ཡོད་འདུག

སྤྱིར་ཨ་རིའི་གཞུང་ལ་ (BBG) ཨ་རིའི་རྒྱང་བསྒྲགས་འཛིན་སྐྱོང་ལྷན་ཚོགས་ཞེས་པ་དེས་ཨ་རིའི་རླུང་འཕྲིན་ཁང་ལ་སྟངས་འཛིན་བྱེད་ཀྱིན་ཡོད་ཀྱང་། གྲོས་གཞི་གསར་པ་དེའི་ནང་ཨ་རིའི་རྒྱང་བསྒྲགས་འཛིན་སྐྱོང་ལྷན་ཚོགས་མེད་པར་བཏང་སྟེ། དེའི་ཚབ་ལ་གསར་དུ། རང་དབང་གསར་འགྱུར་འབྲེལ་ལམ་ལྷན་ཚོགས་(Board of the Freedom News Network)ཟེར་བ་ཞིག་འཛུགས་རྒྱུ་ཡིན་སྐོར་འཁོད་ཡོད་པ་དང་། ལྷན་ཚོགས་དེས་ཨ་རིའི་རླུང་འཕྲིན་ཁང་ལྟ་བུའི་རྒྱང་སྲིང་ལས་ཁུངས་ཁག་གི་འཛིན་སྐྱོང་ལ་སྟངས་འཛིན་བྱེད་རྒྱུ་ཡིན་པ་མ་ཟད། གསར་འགྱུར་དང་བརྗོད་བྱ་སོགས་ལ་ཡང་སྟངས་འཛིན་བྱེད་རྒྱུ་ཡིན་སྐོར་འཁོད་ཡོད་འདུག

གྲོས་ཆོད་དེའི་ནང་གི་ “གསར་འགྱུར་རང་དབང” ཞེས་པ་དེར་ཨ་རིའི་གཞུང་གིས་འགྲེལ་བཤད་ཇི་ལྟར་རྒྱག་གི་ཡོད་མེད་དོགས་གཞི་ཡིན་ཡང་། རྒྱལ་མཚམས་མེད་པའི་གསར་འགོད་མཐུན་ཚོགས་(Reporters Without Borders) ཀྱིས་ཁྲིམས་གཞི་དེ་ལ་སྐྱོན་བརྗོད་བྱས་ཡོད་འདུག དེ་བཞིན། ཨ་རིའི་ཁཱ་ལི་ཧྥོ་ཉེ་ཡའི་མངའ་སྡེའི་ (Annenberg)ཟེར་བའི་ས་ཆར་ཡོད་པའི་ལྷོ་ཁཱ་ལི་ཧྥོ་ཉེ་ཡའི་སློབ་ཆེན་གྱིས་ཀྱང་ཁྲིམས་ཀྱི་གྲོས་གཞི་དེའི་སྐོར་ལ་ཞིབ་འཇུག་བྱས་ཏེ། (USC)ཞེས་པའི་དྲ་ཚིགས་སྟེང་སྐྱོན་བརྗོད་ཀྱི་རྩོམ་ཡིག་སྤེལ་ཡོད་འདུག

འདི་གར་འབྱོར་བའི་རྩོམ་ཡིག་དེའི་མགོར་ “ཨ་རིའི་རླུང་འཕྲིན་ཁང་གིས་སྤྱི་ལོ་ ༡༩༩༠ ལོ་ནས་བཟུང་བོད་སྐད་སྡེ་ཚན་བཙུགས་ཏེ། ལོ་དུ་མའི་རིང་ལ་བོད་སྐད་རླུང་འཕྲིན་གསར་འགྱུར་བོད་དུ་མཁོ་སྒྲུབ་བྱས་ཡོད་པ་དང་། རྗེས་སུ་བརྙན་འཕྲིན་ལས་རིམ་བརྒྱུད་དེ་ཀུན་གླེང་གསར་འགྱུར་དང་ཀུན་གླེང་ལས་རིམ་ལ་སོགས་པའི་ལེ་ཚན་དུ་མར་བརྟེན་ནས། རང་དབང་མེད་པའི་བོད་ནང་གི་བོད་པ་དང་། བཙན་བྱོལ་བོད་པ་རྣམས་ལ་བོད་དང་ཕྱི་རྒྱལ་གྱི་གསར་འགྱུར་སྣ་ཚོགས་ཀྱི་ མཐུན་རྐྱེན་སྒྲུབ་སྟེ་བོད་ཕྱི་ནང་གཉིས་ལ་ཕན་པ་རྒྱ་ཆེན་པོ་ཐོབ་ཡོད། དེ་ཡང་ཨ་རིའི་གཞུང་འཛིན་ཚོགས་པ་གཉིས་མཐུན་མོང་གི་རྒྱབ་སྐྱོར་ལ་བརྟེན་ནས་བོད་སྐད་སྡེ་ཚན་འདི་བཙུགས་པ་རེད” ཅེས་འཁོད་འདུག

རྩོམ་ཡིག་གི་མཇུག་ཏུ། “གལ་སྲིད་བོད་སྐད་སྡེ་ཚན་ལྟ་བུས་ཨ་རི་དང་རྒྱལ་སྤྱིའི་གསར་འགྱུར་བཤད་པ་ལས་བོད་ཀྱི་ས་གནས་གྱི་གསར་འགྱུར་བཤད་རྒྱུ་མིན་པ་ཡིན་ཚེ། ཨ་རིའི་རླུང་འཕྲིན་ཁང་གི་བོད་སྐད་སྡེ་ཚན་གྱིས་བོད་ལ་ཕན་ཅི་ཙམ་ཐོགས་རྒྱུ་ཡིན་མིན་དྲི་བ་ཞིག་དང་། གལ་ཏེ་ཨ་རིའི་རླུང་འཕྲིན་ཁང་གི་བོད་སྐད་རླུང་འཕྲིན་དང་བརྙན་འཕྲིན་གྱིས་བོད་ཀྱི་གསར་འགྱུར་མ་བཤད་པ་ཡིན་ན། བོད་ཕྱི་ནང་གཉིས་ཀྱིས་ཕན་ཚུན་གྱི་གསར་འགྱུར་ལྟ་ཉན་མི་ཐུབ་པ་ཆགས་ངེས་ལ། ད་ལྟ་ཡིན་ན་ཨ་རིའི་ཀུན་གླེང་ལས་རིམ་ནི་བོད་ཕྱི་ནང་གཉིས་ཀྱི་གསར་འགྱུར་རྒྱུད་ལམ་ཆེ་ཤོས་ཤིག་ཆགས་ཡོད། ཆེ་བ་ཆུང་དུ་གཏོང་བཞིན་པ་དང་། ཆུང་བ་མེད་པར་བཟོ་སྲིད་པའི་གནས་ཚུལ་འདི་ལ་ཨ་རིར་ཡོད་པའི་བོད་མི་ཚོ་དང་། དབུས་བོད་མའི་སྒྲིག་འཛུགས། ཨ་རིའི་བོད་ཀྱི་དོན་གཅོད་ཁང་གི་བཅས་ཀྱིས་ལས་དོན་འདིའི་སྐོར་མཁྱེན་རྟོག་ཡོད་མེད་དང་། ཡོད་ན་དེའི་ཐད་ལས་འགུལ་ཅི་ཞིག་སྤེལ་དང་སྤེལ་འཆར་ཡོད་དམ” ཞེས་སོགས་འཁོད་འདུག