ཟླ་འདིའི་ཚེས་ ༢༣ ཉིན་ནས་བཟུང་༧གོང་ས་མཆོག་གིས་འཇར་མན་གྱི་གྲོང་ཁྱེར་ཧན་བྷེག་ཏུ་ཆོས་ཕྱོགས་ཀྱི་མཛད་འཕྲིན་ཁག་བསྐྱང་རྒྱུ་ཡིན་འདུག
དེ་རིང་ཉིན་གུང་ཆུ་ཚོད་ ༡།༠༠ ཡས་མས་སུ། ༧གོང་ས་མཆོག་དགའ་ལྡན་ཕོ་བྲང་གི་དྲུང་ཆེ་རྣམ་པ་དང་། བོད་མིའི་སྒྲིག་འཛུགས་བདེ་སྲུང་དྲུང་ཆེ་བཅས་གཙོས་པའི་ལས་བྱེད་དང་། དྷ་རམ་ས་ལའི་སེར་སྐྱ་མི་མང་བཅས་ཀྱིས་ཕེབས་སྐྱེལ་ཁྲོད་བཞུགས་སྒར་ནས་ཆིབས་བསྒྱུར་གནང་སོང་། ཟླ་འདིའི་ཚེས་ ༢༣ ཉིན་༧གོང་ས་མཆོག་འཇར་མན་ (Germany) གྱི་གྲོང་ཁྱེར་ཧམ་བྷེག་ (Hamburg) ཏུ་ཡོད་པའི་བྱང་ཆུབ་ཆོས་གླིང་ཆོས་ཚོགས་ཀྱིས་ཇི་ལྟར་གསོལ་འདེབས་ཞུས་དོན་ལྟར་ཆིབས་བསྒྱུར་གནང་སྟེ། དེར་ཡོད་སེར་སྐྱ་མི་མང་ལ་མི་སོ་སོའི་རང་བཞིན་ལྷན་སྐྱེས་ཀྱི་ཡ་རབས་གཤིས་བཟང་གི་རིན་ཐང་ཞེས་པའི་བརྗོད་གཞིའི་ཐོག་བཀའ་སློབ་གནང་རྒྱུ་ཡིན་པ་དང་། ཚེས་ ༢༤ དང་ ༢༥ བཅས་ཉིན་གཉིས་རིང་མང་ཚོགས་ལ་རྒྱལ་སྲས་ཞི་བ་ལྟས་མཛད་པའི་སྤྱོད་འཇུག་གི་གསུང་ཆོས། ཚེས་ ༢༦ ཉིན་གྱི་སྔ་དྲོ་སྤྱན་རས་གཟིགས་ཀྱི་བཀའ་དབང་བཅས་གནང་རྒྱུ་ཡིན་འདུག
ཐེངས་འདིའི་ཆིབས་བསྒྱུར་དང་སྟབས་བསྟུན། ༧གོང་ས་མཆོག་འཇར་མན་བོད་དོན་རྒྱབ་སྐྱོར་ཚོགས་པ་གསར་འཛུགས་གནང་སྟེ་ལོ་ ༢༥ འཁོར་བའི་མཛད་སྒོར་ཆིབས་བསྒྱུར་གྱིས་ས་གནས་བོད་མིར་བཀའ་སློབ་གནང་རྒྱུ་དང་། ༼བོད་རྒྱའི་དབར་ཞི་མཐུན་གྱི་གཞི་རྩའི་ཤེས་རྟོགས༽ཞེས་པའི་བོད་མི་དང་རྒྱ་རིགས་ཤེས་ཡོན་པ། རྒྱ་རིགས་སློབ་ཕྲུག་བཅས་ལྷན་འཛོམས་ཀྱི་ཚོགས་འདུར་ཆིབས་བསྒྱུར་གྱིས་བཀའ་སློབ་གསུང་བཤད་བཅས་མཛད་འཕྲིན་ཁག་བསྐྱང་རྒྱུ་ཡིན་འདུག
གསར་འགོད་པ། དོན་གོ
