དེ་རིང་ཕྱི་དྲོར་དགུ་བཅུ་གསུམ་གྱིས་འདན་མ་ཁུལ་གྱི་ཛ་དྲག་གནས་སྟངས་ཐད་གདུང་སེམས་མཉམ་སྐྱེད་ཀྱི་མར་མེའི་ཁྲོམ་སྐོར་ཞིག་གོ་སྒྲིག་བྱས་ཏེ། གངས་ལྗོངས་ས་མཐོའི་སྟེང་སླར་ཡང་རིག་གསར་གྱི་རླུང་འཚུབ་ལངས་པ་ཞེས་པའི་བསྒྲཊ་གཏམ་སྤེལ་སོང་།
དེ་རིང་ཕྱི་དྲོའི་ཆུ་ཚོད་ ༦ པ་ཡོལ་ཙམ་ལ། དྷ་ས་མེག་གྷན་དུ་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་གོ་སྒྲིག་འོག འདན་མ་ཁུལ་གྱི་ཛ་དྲག་གནས་སྟངས་ཐད་གདུང་སེམས་མཉམ་སྐྱེད་མཚོན་ཆེད། མེག་གྷན་རླངས་འཁོར་འབབ་ཚིགས་ནས་མགོ་འཛུགས་ཀྱིས་མར་མེའི་ཁྲོམ་སྐོར་བྱས་རྗེས། དྷ་ས་ཉི་མ་སློབ་གྲྭའི་ར་སྐོར་ནང་བོད་དབྱིན་གཉིས་ཐོག་ནས་གངས་ལྗོངས་ས་མཐོའི་སྟེང་སླར་ཡང་རིག་གསར་གྱི་རླུང་འཚུབ་ལངས་བ་ཞེས་པའི་བསྒྲགས་གཏམ་སྤེལ་སོང་བ་དང་། སྐབས་དེར་བོད་ཀྱི་དགུ་བཅུ་གསུམ་ལས་འགུལ་ཚོགས་པའི་ཚོགས་གཙོ་པ་སངས་ཚེ་རིང་ལགས་དང་ཚོགས་གཞོན་ལྷ་རྒྱ་རི་རྣམ་རྒྱལ་སྒྲོལ་དཀར་ལགས་གཉིས་ཀྱི་གཙོས་རྒྱུན་ལས་དང་། ཚོགས་མི་སོགས་དྷ་ས་ཁུལ་གྱི་སེར་སྐྱ་མི་མང་དང་བོད་དོན་རྒྱབ་སྐྱོར་བ་བཅས་ཁྱོན་མི་གྲངས་ ༡༠༠ ཙམ་འདུ་འཛོམས་གནང་སོང་།
ཚོགས་གཙོ་པ་སངས་ཚེ་རིང་ལགས་ཀྱིས། རྒྱ་གཞུང་གིས་ ༡༩༥༩ ལོར་བོད་ས་ཡོངས་རྫོགས་བཙན་བཟུང་བྱས་ཏེ། བོད་ཀྱི་སྣོད་བཅུད་གཉིས་ལ་གཏོར་སྐྱོན་ཚབས་ཆེན་བཟོས་དང་བཟོ་བཞིན་པའི་སྐོར་འགྲེལ་བརྗོད་དང་འབྲེལ། ཡིག་ཐོག་ནས་བསྒྲགས་གཏམ་སྒྲོག་སྦྱངས་གནང་བའི་ནང་། ཐེངས་འདིའི་རྒྱ་ནག་གུང་ཁྲན་ཏང་གི་གདུག་རྩུབ་ཅན་གྱི་བྱ་སྤྱོད་ལ་འཛམ་གླིང་མཉམ་འབྲེལ་རྒྱལ་ཚོགས་ཀྱི་གཙོས་འགྲོ་བ་མིའི་ཐོབ་ཐང་ལས་ཁུངས་ཁག་དང་། དྲང་བདེན་དང་ཞི་བདེར་དད་པའི་འཛམ་གླིང་མི་མང་རྣམས་ཀྱིས། ད་ལྟའི་བོད་ནང་གི་ཛ་དྲག་གནས་སྟངས་དེ་དག་ལས་མྱུར་དུ་གྲོལ་ཐུབ་པར་རྒྱབ་སྐྱོར་གྱིས་རྒྱ་ནག་གུང་ཁྲན་ཏང་གཞུང་ལ་གནོན་ཤུགས་སྤྲོད་གནང་ཡོང་བ་དང་། ལྷག་པར་རྒྱ་ནག་གུང་ཁྲན་ཏང་གི་དཔོན་རིགས་ཚོས་བོད་ཚུད་པའི་གྲངས་ཉུང་མི་རིགས་སྟེང་བཟུང་བའི་གདུག་རྩུབ་ཆེ་བའི་བྱ་སྤྱོད་དེ་དག་ཕྲལ་དུ་མཚམས་འཇོག་དགོས་པ་དང་། སེར་ཤུལ་རྫོང་འདན་མ་ཡུལ་ཚོའི་སྡེ་དཔོན་དབང་གྲགས་ཀྱི་གཙོས་ཉེས་མེད་འཛིན་བཟུང་བྱས་པའི་ཡུལ་མི་རྣམས་འཕྲལ་དུ་ཀློད་གྲོལ་དགོས། རྨས་སྐྱོན་ཕོག་པའི་རྨས་མ་ཚོར་མྱུར་དུ་སྨན་བཅོས་མཐུན་རྐྱེན་ཆ་ཚང་བསྐྲུན་དགོས་ཞེས་འབོད་སྐུལ་གྱི་བསྒྲགས་གཏམ་འདི་སྤེལ། ཞེས་བཀོད་འདུག
གསར་འགོད་པ། པདྨ་མཚོ།
