དེ་རིང་ཁྲིམས་འཛིན་ལྷན་ཚོགས་ཐེངས་བཞི་པའི་དབུ་འབྱེད་མཛད་སྒོའི་ཐོག་སྤྱི་འཐུས་ཚོགས་གཞོན་མཆོག་གིས་བཙན་བྱོལ་བོད་མིའི་སྒྲིག་འཛུགས་ལ་ཁ་གཏད་གཅོག་མཁན་མང་པོ་ཡོད་སྟབས། ང་ཚོས་དྲང་པོ་དང་བདེན་པ་བྱེད་ཀྱི་མེད་པ་དང་། བོད་མི་ཚོས་སྔོན་མའི་ལམ་ལུགས་རྒྱུན་འཁྱོངས་བྱེད་ཀྱི་འདུག་ཟེར་མཁན་ཚོར་ལག་ཆ་རུ་མ་སོང་བ་ཞིག་དགོས་གསུངས་སོང་།
དེ་རིང་སྔ་དྲོའི་ཆུ་ཚོད་ ༩ ནས་བཟུང་ཉིན་གཉིས་རིང་དྷ་ས་གངས་སྐྱིད་བོད་མིའི་སྒྲིག་འཛུགས་ཆེས་མཐོའི་ཁྲིམས་ཞིབ་ཁང་གི་སྲོང་བཙན་ཚོམས་ཆེན་དུ། བཙན་བྱོལ་བོད་མིའི་ཆེས་མཐོའི་ཁྲིམས་ཞིབ་ཁང་གི་གོ་སྒྲིག་འོག ཁྲིམས་འཛིན་ལྷན་ཚོགས་ཐེངས་བཞི་པ་མགོ་འཛུགས་གནང་ཡོད་ཅིང་། སྐུ་མགྲོན་གཙོ་བོར་བོད་མི་མང་སྤྱི་འཐུས་ཚོགས་གཞོན་མཁན་པོ་བསོད་ནམས་བསྟན་འཕེལ་མཆོག་དང་། ཆེས་མཐོའི་ཁྲིམས་ཞིབ་ཁང་གི་ཁྲིམས་དཔོན་རྣམ་གཉིས། ཁྲིམས་དྲུང་བཀྲ་ཤིས་རྒྱ་མཚོ་ལགས། ས་གནས་ཁག་ ༨ ནས་ཕེབས་པའི་ཁྲིམས་ཞིབ་པ་དང་ཁྲིམས་དྲུང་བཅས་ཁྱོན་ཚོགས་བཞུགས་པ་ ༡༦ འདུ་འཛོམས་གནང་སོང་།
མཛད་སྒོའི་ཐོག་མར་སྐུ་མགྲོན་གཙོ་བོ་སྤྱི་འཐུས་ཚོགས་གཞོན་མཆོག་ནས་སྣང་གསལ་ཞལ་འབྱེད་དང་འབྲེལ། ཆེས་མཐོའི་ཁྲིམས་ཞིབ་ཁང་གིས་གསར་བཟོ་གནང་བའི་ཁྲིམས་འཛིན་དྲ་རྒྱ་དབུ་འབྱེད་གནང་རྗེས། ཁྲིམས་ཞིབ་པ་ཆེ་བ་ངག་དབང་འཕེལ་རྒྱལ་མཆོག་གིས་ཚོགས་འདུ་ངོ་སྤྲོད་གནང་དོན། ༢༠༠༩ ཟླ་ ༡༠ པར་རྒྱ་བལ་བོད་མིའི་སྤྱི་ཚོགས་ནང་ཁྲིམས་རྩོད་པའི་སྦྱོང་བརྡར་ཐེངས་དང་པོའི་ཁོངས་ནས་བོད་མིའི་ཁྲིམས་རྩོད་པའི་ལག་ཁྱེར་ཡོད་མཁན་མི་གྲངས་ ༨ མ་གཏོགས་མེད་སྟབས། ཆེས་མཐོའི་ཁྲིམས་ཞིབ་ཁང་ནས་ཕྱི་ལོ་ ༢༠༡༠ ནས་ ༢༠༡༤ བར་ལོ་ངོ་ ༥ རིང་བོད་མིའི་ཁྲིམས་རྩོད་པར་སྦྱོང་བརྡར་ཐེངས་ ༦ གོ་སྒྲིག་ཞུས་ཏེ། ད་ཆ་བཙན་བྱོལ་བོད་མའི་ཁྲིམས་དང་ལམ་ལུགས་ཀྱི་ཁྲིམས་རྩོད་པ་ཁྱོན་ ༡༥༦ ཡོད། འདས་པའི་ཉམས་མྱོང་གི་ཆ་ནས་ས་གནས་མགོ་འཛིན་རྣམ་པར་ས་གནས་ཁྲིམས་ཞིབ་པའི་ལས་འགན་གཅིག་ལྕོགས་བསྐུར་བ་དེ་ས་གནས་སོ་སོར་ཁྲིམས་ལུགས་དབང་འཛིན་གྱི་ཁྲིམས་ཞིབ་ཁང་འོག་མའི་དགོས་དམིགས་ཕན་ཐོགས་ཡོད་པ་ཞིག་བསྒྲུབ་ཐུབ་ཀྱི་མེད་པ་གསལ་པོ་ཡིན་སྟབས། རྒྱ་གར་ནང་གཅིག་ལྕོགས་ས་གནས་ཁྲིམས་ཞིབ་ཁང་ཡོངས་རྫོགས་ཕྱིར་བསྡུ་བྱེད་ཐུབ་པ་བྱུང་ཡོད་ཀྱང་། བལ་ཡུལ་ཁུལ་དུ་ཆབ་སྲིད་གནས་སྟངས་ཀྱི་ཆ་ནས་བཀའ་ཤག་གི་དགོངས་འཆར་ལྟར་གནས་སྐབས་རིང་ད་ཡོད་གཅིག་ལྕོགས་ས་གནས་ཁྲིམས་ཞིབ་ཁང་ ༤ མུ་མཐུད་བཞག་དགོས་བྱུང་བ་དང་། བོད་མིའི་ས་གནས་ཁྲིམས་ཞིབ་ཁང་ཁག་གི་འཕྲལ་སེལ་ཞུ་གཏུག་བྱ་ཡུལ་བཀོད་སྒྲིག་གི་རྩ་འཛིན་ལམ་སྟོན་གནང་ཡོད། ས་གནས་ཁྲིམས་ཞིབ་ཁང་ཁོངས་ནས་ཁ་མཆུ་ཞུ་གཏུག་བྱ་མཁན་མང་ཤོས་ལ་དྭགས་ས་གནས་ཁྲིམས་ཞིབ་ཁང་ཆགས་ཡོད། ད་བར་ཁ་མཆུ་གྲངས་ ༨ ཙམ་བྱུང་འདུག ཆེས་མཐོའི་ཁྲིམས་ཞིབ་ཁང་ནས་ས་གནས་ཁྲིམས་ཁང་སོ་སོར་ཁ་མཆུ་ཞུ་གཏུག་གི་བྱ་རིམ་མྱུར་ཚད་ཟླ་བ་ ༣ ཙམ་དང་། མང་མཐར་ཟླ་བ་ ༦ ནང་ཐག་གཅོད་ཐུབ་པའི་འབད་བརྩོན་ཞུ་དགོས་པའི་ལམ་སྟོན་བྱས་ཡོད། ཅེས་གསུངས་སོང་།
ཁོང་གིས་མུ་མཐུད་དུ་གསུངས་དོན། འཛིན་སྐྱོང་གི་ལས་དོན་བྱེད་ཕྱོགས་ཐད་ཁོང་གིས། ཉེ་བའི་ཆར་ས་གནས་ཁྲིམས་ཞིབ་པ་རྣམ་པ་སྒྲིག་མཐུན་ཡིག་རྒྱུགས་ཀྱི་ལམ་ནས་ཤེས་ཡོན་ལྡན་པ་བསྐོ་གཞག་ཐུབ་པ་བྱུང་ཡོད་པ་མ་ཟད། དེའི་ཁོངས་ནས་ཁྲིམས་ལུགས་རིག་པ་བ་གཉིས་བསྐོ་གཞག་བྱས་ཡོད། ཕྱོགས་མཚུངས་སྲི་ཞུ་བ་དྲུང་གཞོན་གྱི་ཤེས་ཚད་ལྡན་པའི་ས་གནས་ཁྲིམས་དྲུང་ ༤ སྒྲིག་མཐུན་ཡིག་རྒྱུགས་ཀྱི་ལམ་ནས་བསྐོ་གཞག་བྱས་ཡོད། ཁྲིམས་འཛིན་དྲ་རྒྱ་གསར་དུ་དབུ་འབྱེད་ཀྱིས་བོད་མིའི་ཁྲིམས་ལུགས་དང་། བཙན་བྱོལ་བོད་མིའི་སྤྱི་ཚོགས་ལ་དགོས་མཁོ་ཆེ་བའི་ཡུལ་ཁྲིམས་སྙིང་བསྡུས་རིམ་བཞིན་འདོན་སྤེལ་ཞུ་འཆར་དང་། རྗེས་ལོ་ནས་བཟུང་ལོ་རེའི་ནང་ཁྲིམས་ལུགས་དུས་དེབ་འདོན་ཐེངས་གསུམ་མམ་བཞི་དཔར་སྐྲུན་འདོན་སྤེལ་ཞུ་འཆར་ཡོད། ད་ལྟ་འགྲོ་བཞིན་པའི་རྒྱ་གར་གྱི་རྩ་ཁྲིམས་བོད་སྒྱུར་གྱི་ལས་གཞི་མུ་མཐུད་མཇུག་སྐྱོང་བྱ་རྒྱུའི་འཆར་གཞི་ཡོད། ཅེས་སོགས་གསུངས་སོང་།
དེའི་རྗེས་སྤྱི་འཐུས་ཚོགས་གཞོན་མཆོག་གིས་གཏམ་བཤད་གནང་དོན། བོད་ས་མ་ཤོར་བའི་གོང་དུ་༧གོང་ས་མཆོག་གིས་དགོངས་པ་ཆེ་བཞེས་གནང་སྟེ། ལེགས་བཅོས་ཚོགས་ཆུང་དང་འབྲེལ་གཏུགས་ཚོགས་ཆུང་གསར་འཛུགས་ཀྱིས་སྔོན་མའི་བོད་ཀྱི་ལམ་ལུགས་ལ་བསྒྱུར་བཅོས་གཏོང་རྒྱུའི་རྣམ་དཔྱོད་ཀྱི་ས་བོན་སྐབས་དེ་དུས་ནས་བསྐྲུན་ཡོད་ཀྱང་། རྗེས་སུ་རྒྱ་ནག་གི་བཙན་འཛུལ་འོག་གོ་སྐབས་དེ་བྱུང་མེད་ཀྱང་ང་ཚོ་བཙན་བྱོལ་དུ་འབྱོར་རྗེས་བསླར་ཡང་༧གོང་ས་མཆོག་གིས་དབུ་ཁྲིད་ལམ་སྟོན་འོག་ཁྲིམས་ཞིབ་ཁང་འཛུགས་ཐུབ་ཡོད་པ་འདིས་བོད་མིའི་སྒྲིག་འཛུགས་ཀྱི་ལས་དོན་དང་། མ་འོངས་བོད་ཀྱི་བདེན་མཐའ་གསལ་བའི་སྐབས་སུའང་བོད་མི་རིགས་དང་། ལྷག་པར་དུ་འཛིན་སྐྱོང་ལ་ཞབས་འདེགས་རླབས་ཆེན་ཞིག་བསྒྲུབས་ཡོད་པར་ངོས་འཛིན་བྱེད་བཞིན་ཡོད་སྐོར་གསུངས་སོང་།
ཁྲིམས་ཞིབ་ཁང་གི་མ་འོངས་ལས་དོན་བྱེད་ཕྱོགས་སྐོར་ལ། གནའ་དུས་ཁྲིམས་ཆད་གཅོད་དུས་དབང་པོ་གཅོད་བཏུབ་བྱེད་པའི་ལམ་ལུགས་རྙིང་པ་དེ་འདྲ་བོད་ཙམ་མ་ཟད། འཛམ་གླིང་གི་རྒྱལ་ཁབ་མང་པོ་ནང་དེ་འདྲ་ལག་བསྟར་བྱས་ཡོད་པ་གསལ་པོ་ཡིན་ཡང་། དེང་རབས་མིའི་རྣམ་དཔྱོད་དང་ཤེས་ཡོན་གྱི་ཚད་གཞི་མཐོ་རུ་ཕྱིན་ཡོད་སྟབས། ཉེས་ཆད་གཏོང་རྒྱུ་དེ་ཡང་མི་སྒེར་སོ་སོ་དང་འབྲེལ་བ་ཡོད་པའི་ཆབ་སྲིད་ཀྱི་ཁེ་དབང་དང་དཔལ་འབྱོར་གྱི་ཉེས་ཆད་གཅོད་རྒྱུའི་ལམ་ལུགས་དེ་ཡག་པོ་ཞེ་དྲག་རེད་བསམ་གྱི་འདུག དེར་བརྟེན། དེ་ཚོ་ཚད་མཐོ་རུ་གཏོང་རྒྱུ་གལ་ཆེན་པོ་ཆགས་ཡོད། ད་ལྟ་རྒྱལ་ཁབ་མང་པོ་ཞིག་ཏུ་སྲོག་ཁྲིམས་གཅོད་རྒྱུ་དེ་གང་ལ་གང་འཚམ་ཤུགས་ཆེན་པོ་རེད། དེ་ལ་འགག་པ་རྒྱག་མཁན་དང་དེ་དགོས་ཀྱི་འདུག་ཟེར་མཁན་གཉིས་ཀ་ཡོད་ཀྱང་། སྤྱི་ཡོངས་ནས་མིའི་རྣམ་དཔྱོད་བེད་སྤྱོད་གཏོང་རྒྱུའི་སྡིངས་ཆ་མང་པོ་ཡོད་སྟབས། ང་ཚོས་སྲོག་ཁྲིམས་གཅོད་མི་དགོས་པའི་སྤྱི་ཚོགས་ཤིག་བསྐྲུན་ཐུབ་རྒྱུའི་སྡིངས་ཆ་ཞིག་ཡོད་མེད་ཐད་ཉམས་ཞིབ་བྱེད་ཐུབ་པའི་དགོངས་པ་བཞེས་རྒྱུ་གལ་ཆེན་པོ་ཡིན། ཞེས་གསུངས་སོང་།
ཁོང་གིས་མུ་མཐུད་བཙན་བྱོལ་བོད་མིའི་རྩ་འཛིན་ཁྲིམས་ཡིག་ཡར་རྒྱས་གཏོང་ཕྱོགས་སྐོར་ལ། ད་ལྟ་ང་ཚོས་ལག་བསྟར་གནང་བཞིན་པའི་རྩ་འཛིན་ཁྲིམས་ཡིག་གསུམ་གྱི་ཡ་གྱལ་གཏུག་བཤེར་རྩ་འཛིན་དང་དཔང་རྟགས་རྩ་འཛིན་བཅས་ལ་བསྐྱར་བཅོས་གང་འདྲ་བྱེད་དགོས་མིན་ཐོག་ཚང་མས་བསམ་ཚུལ་སྤུངས་ཐུབ་ན་ཡག་པོ་ཡོང་གི་རེད་བསམ་གྱི་འདུག རྩ་བའི་ཁྲིམས་དཔོན་རྣམ་པ་མཁྱེན་རྒྱ་ཆེན་པོ་ཡིན་ཡང་། ད་རེབ་ཚོགས་ཐོག་ཏུ་སྤུངས་ཐུབ་པ་ཡིན་ན། རིམ་པས་རྣམ་པ་ཚོ་ས་གནས་ཁྲིམས་ཞིབ་གནང་སྐབས་ཕྱག་ལས་གནང་བདེ་བ་དང་། ཕྱག་ལས་དེ་ཚོ་ཡང་སོ་སོའི་ངོས་ནས་དྲང་བདེན་དང་བློ་བདེ་པོ་ཡོང་གི་རེད། དེ་བཞིན། མི་མང་ཚོས་ཀྱང་བཙན་བྱོལ་སྒྲིག་འཛུགས་དང་སོ་སོས་ཡིད་ཆེས་ཐོབ་པ་ཞིག་དགོས་རྒྱུ་ཧ་ཅང་གལ་ཆེན་པོ་རེད། གལ་ཏེ་བོད་མི་ཚོས་ཡིད་ཆེས་མ་ཐོབ་པ་དང་། སོ་སོའི་ལས་ཀ་དེ་ཡང་མཐའ་མ་འཁྱོལ་བ་ཞིག་ཆགས་ན། ༧གོང་ས་མཆོག་གི་དགོངས་གཞི་དང་བོད་མིའི་སྒྲིག་འཛུགས་ཀྱི་དམིགས་ཡུལ་དང་འགྲོ་སོང་ཆུད་ཟོས་རེད། ང་ཚོར་ཁ་གཏད་གཅོག་མཁན་མང་པོ་ཡོད་ལ། དེ་དག་ནུས་པ་ཆེན་པོ་ཤ་སྟག་ཡིན་སྟབས། ང་ཚོས་དྲང་པོ་དང་བདེན་པ་བྱེད་ཀྱི་མེད་པ་དང་། སྔོན་མའི་ལམ་ལུགས་རྒྱུན་འཁྱོང་བྱེད་ཀྱི་འདུག་ཟེར་མཁན་ཚོར་ལག་ཆར་མ་སོང་བ་ཞིག་བྱ་རྒྱུ་གལ་ཆེན་པོ་ཡིན། ཞེས་སོགས་གསུངས་རྗེས། ཁྲིམས་དྲུང་བཀྲ་ཤིས་རྒྱ་མཚོ་ལགས་ཀྱིས་ཐུགས་རྗེ་ཆེའི་གཏམ་བཤད་གནང་སོང་།
ཐེངས་འདིར་གྲོས་གཞི་ཁག་ ༤ ཡོད་པ་དག་ནི། དང་པོ། ཁྲིམས་སྒྲིག་ཁག་ལ་དགོས་ངེས་ཀྱི་བསྐྱར་བཅོས་ཇི་དགོས་དང་། གཉིས་པ། ཁྲིམས་ལུགས་དབང་འཛིན་གྱི་ཁྲིམས་ཞིབ་ཁང་རིམ་པའི་ཁྲིམས་དོན་དང་འཛིན་སྐྱོང་བྱེད་སྒོ་གོང་མཐོར་གཏོང་ཕྱོགས། གསུམ་པ། ཁྲིམས་རྩོད་པ་སྐྱེད་སྲིང་དང་ནུས་རྩལ་མཐོར་འདེགས་བྱེད་ཕྱོགས། བཞི་པ། ཁྲིམས་ལུགས་གོ་རྟོགས་སྤེལ་བའི་གནས་སྟངས་ཡར་རྒྱས་གཏོང་ཕྱོགས་བཅས་ལ་གོ་བསྡུར་སོགས་ཡིན་འདུག
གསར་འགོད་པ། དོན་གྲུབ།
![China's Vice Minister of Foreign Affairs Sun Weidong in Tokyo, Japan in 2023 [File: Issei Kato/Pool via Reuters]](https://tibettimes.net/wp-content/uploads/2026/04/Screen-Shot-2026-04-15-at-2.32.14-PM-360x180.png)
ཤར་ཕྱོགས་ཁུག་རྟས་སྲིད་སྐྱོང་ཁྲིམས་གཏུག་བྱ་འཆར་གྱི་སྐོར་ཁོང་གི་དེབ་དེའི་ནང་བཀོད་འདུག་ཟེར། ད་འོ་ན། མགྱོགས་པོར་གཏུག་བཤེར་བྱས་དང། གང་ཟག་ལ་མི་རྟོན་ཆོས་ལ་ཕལ་ཆེར་རྟོན་མདོག་ཁ་པོ་ཅིག་འདུག་ག
སྤྱི་འཐུས་ཚོགས་གཞོན་མཆོག་གི་དགོངས་པ་ཧ་ཅང་གཏིང་ཟབ་པོ་དང་རྒྱ་ཆེན་པོ་རེད་འདུག བཙན་བྱོལ་བོད་གཞུང་གི་ཁྲིམས་ཁང་གིས་ཁྲིམས་བཅོད་བཙོན་འཇུག་སོགས་ཀྱི་ནུས་པ་ཆ་ཚང་བ་ཞིག་མེད་པ་སོང་ཙང་། འཛམ་གླིང་ཐོག་སྲོག་ཁྲིམས་གཅོད་བཞིན་པ་དག་འགོག་ཐབས་ལ་ལས་འགུལ་ཞིག་སྤེལ་ཐུབ་ན་དེ་ཧ་ཅང་རླབས་ཆེན་དང་། གནས་སྟངས་གསར་པ་ཞིག་ཆགས་ཡོད་པ་རེད། དེ་མ་གཏོགས་ཁྲིམས་ཁང་གཞན་དང་འདྲ་བར་ལས་ཀ་མང་པོ་དང་ཡོད་པ་མ་རེད། དབང་ཚད་ཀྱང་ཚད་དང་ལྡན་པ་ཞིག་ཡོད་པ་མ་རེད། ཐབས་ལམ་དང་ལས་འགུལ་འདི་དག་ཐོག་དགོངས་པ་ཆེ་བཞེས་གནང་སྟེ་ལས་རིམ་བསྒྲིགས་ནས་ལས་འགུལ་ཞིག་སྤེལ་ན་ཧ་ཅང་ཁ་ཡོད་ལག་ཡོད་དང་། ༧གོང་ས་མཆོག་གི་འཚེ་མེད་ཞི་བའི་ཐབས་ལམ་དང་དགོངས་པ་ལག་ལེན་རྩེ་མཐུན་ཡོང་གི་ཡོད་པ་རེད།
ད་ཐེངས་གངས་སྐྱིད་ཀྱི་ལྐོག་ཟ་མཁན་འགའ་ལྷང་ལ་ཐོན་པའི་རེ་བ་ཡོད་