སྲིད་སྐྱོང་ཕྱོགས་སྐྱོད།

ཟླ་འདིའི་ཚེས་ ༢༡ ནས་ཕྱི་ཟླ་ ༩ ཚེས་ ༡ བར་སྲིད་སྐྱོང་བློ་བཟང་སེང་གེ་མཆོག་ལྡི་ལི་དང་འཇར་མན། ཨ་རི་བཅས་སུ་གཞུང་འབྲེལ་ཕྱོགས་སྐྱོད་གནང་རྒྱུ་ཡིན་འདུག

བོད་མིའི་སྒྲིག་འཛུགས་ཀྱི་དྲ་རྒྱར་གནས་ཚུལ་སྤེལ་བ་ལྟར་ན། ཁ་སང་ཚེས་ ༢༡ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག བཞུགས་སྒར་དྷ་རམ་ས་ལ་ནས་རྒྱ་གར་གྱི་རྒྱལ་ས་ལྡི་ལིར་ཕྱོགས་ཕེབས་གནང་སྟེ་ཉིན་གསུམ་རིང་གནད་ཡོད་མི་སྣ་མཇལ་འཕྲད་གནང་རྒྱུ་ཡིན་པ་དང་། ཚེས་ ༢༧ ཉིན་འཇར་མན་གྱི་གྲོང་ཁྱེར་ཧན་བྷེག་ཏུ་ (Hamburg) ཕེབས་ཏེ་ས་གནས་གནད་ཡོད་མི་སྣར་མཇལ་འཕྲད་དང་། ༼བོད་རྒྱའི་དབར་གྱི་ཞི་མཐུན་གྱི་གཞི་རྩའི་ཤེས་རྟོགས༽ཞེས་པའི་ཚོགས་འདུར་མཉམ་ཞུགས་བཅས་གནང་རྒྱུ་ཡིན་འདུག

ཚེས་ ༢༧ ཉིན་སྲིད་སྐྱོང་མཆོག་ཨ་རིའི་གྲོང་ཁྱེར་བྷོ་སི་ཌོན་དུ་ཕེབས་ཏེ་ས་གནས་གནད་ཡོད་མི་སྣར་མཇལ་འཕྲད་གནང་རྒྱུ་དང་། ཚེས་ ༢༩ ཉིན་ཨ་རིའི་རྒྱལ་ས་ཝ་ཤིན་ཊོན་ཌེ་སེར་ (Washington D.C) གནད་ཡོད་མི་སྣར་མཇལ་འཕྲད་དང་ས་གནས་ཀྱི་ལས་འཆར་ནང་མཉམ་ཞུགས་གནང་རྒྱུ་ཡིན་འདུག ཕྱི་ཟླ་ ༩ ཚེས་ ༡ ཉིན་ཕྱིར་བཞུགས་སྒར་དུ་ཕེབས་རྒྱུ་ཡིན་འདུག

དེ་བཞིན། ཟླ་འདིའི་ཚེས་ ༢༣ ཉིན་ནས་བཟུང་བོད་མི་མང་སྤྱི་འཐུས་ཚོགས་གཙོ་སྤེན་པ་མཆོག་གིས་སྣེ་འཁྲིད་འོག སྤྱི་འཐུས་ཐུབ་བསྟན་ལུང་རིགས་ལགས་དང། སྤྱི་འཐུས་བསོད་ནམས་རྒྱལ་མཚན། སྤྱི་འཐུས་རྣམ་དག་གཙུག་ཕུད་བཅས་ལ་གྲུབ་པའི་ཚོགས་ཆུང་ཞིག་ཨོ་སི་ཊོ་ལི་ཡར་ཕེབས་ཏེ། བདུན་ཕྲག་གཅིག་རིང་ཨོ་སི་ཊོ་ལི་ཡའི་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་མིར་མཇལ་འཕྲད་དང་། ཨོ་སི་ཊོ་ལི་ཡའི་རྒྱལ་ས་སེ་ཌེ་ནེ་གཙོས་པའི་མངའ་སྡེ་ཁག་གསུམ་དུ་འཚམས་གཟིགས། བོད་ནང་གི་ཁོར་ཡུག་སྲུང་སྐྱོབ་སྐོར་གྱི་བགྲོ་གླེང་ཐོག་མཉམ་ཞུགས་བཅས་གནང་རྒྱུ་ཡིན་འདུག

གསར་འགོད་པ། དོན་གོ