དེ་རིང་སློབ་གྲྭ་ཁག་གི་སློབ་སྤྱི་དང་དགེ་ཆེའི་དམིགས་བསལ་ཚོགས་འདུའི་ཐོག་ཤེས་རིག་དྲུང་ཆེ་དངོས་གྲུབ་ཚེ་རིང་ལགས་ཀྱིས་སྲིད་སྐྱོང་མཆོག་གིས་ཚོགས་འདུ་སྔ་རྗེས་ཐོག་ཤེས་ཡོན་སྲིད་བྱུས་དེ་རང་ལག་བསྟར་རྒྱུན་འཁྱོངས་བྱེད་རྒྱུ་ཡིན་གསུངས་པ་མ་ཟད། ཤེས་རིག་ལས་ཁུངས་ཀྱི་ནང་མོལ་ཚོགས་འདུར་ཡང་བཀའ་གསལ་པོ་གནང་ཡོད་སྟབས། མང་ཚོགས་ཚོས་ཤེས་ཡོན་སྲིད་བྱུས་ལག་ལེན་བསྟར་ཕྱོགས་ཐད་ཐེ་ཚོམ་དང་དོགས་པ་གནང་དགོས་དོན་མེད་ཟེར།
དེ་རིང་སྔ་དྲོའི་ཆུ་ཚོད་ ༩།༣༠ ནས་བཟུང་སང་ཉིན་བར་གངས་སྐྱིད་གཉའ་ཁྲི་ཚོགས་ཁང་དུ་ཤེས་རིག་ལས་ཁུངས་ཀྱི་གོ་སྒྲིག་འོག ཤེས་ཡོན་སྲིད་བྱུས་ཕྱག་བསྟར་གནང་ཡུལ་སློབ་གྲྭ་ཁག་གི་སློབ་སྤྱི་དང་དགེ་ཆེ་སོགས་ཀྱི་དམིགས་བསལ་ཚོགས་འདུ་ཞེས་པ་ཞིག་སྐོང་ཚོགས་གནང་ཡོད་ཅིང་། སྐུ་མགྲོན་གཙོ་བོར་ཤེས་རིག་དྲུང་ཆེ་དངོས་གྲུབ་ཚེ་རིང་ལགས་དང་སྟོབས་རྒྱལ་ཚེ་རིང་ལགས་གཙོས། སམ་བྷོ་ཊའི་སྤྱི་ཁྱབ་འགན་འཛིན་ཀརྨ་ཆུང་བདག་ལགས་དང་དྷ་ས་བོད་ཁྱིམ་ཤེས་ཡོན་སྤྱི་ཁྱབ་འགན་འཛིན་བསོད་ནམས་སྒྲོལ་དཀར་ལགས། ཤེས་ཡོན་སྲིད་བྱུས་ལག་བསྟར་གནང་ཡུལ་སམ་བྷོ་ཊ་དང་བོད་ཁྱིམ་ཁྱབ་ཁོངས་སློབ་གྲྭ་ཁག་ ༡༠ ཡི་སློབ་སྤྱི་དང་དགེ་ཆེ་ ༡༢ དང་། དེ་བཞིན། ཤེས་རིག་ལས་ཁུངས་ཀྱི་ཚན་པ་ཁག་གི་འགན་འཛིན་རྣམ་པ་དང་བོད་ཀྱི་ཐེབས་རྩའི་འགན་འཛིན་སྐུ་ཞབས་བྷོབ་ལགས་བཅས་འདུ་འཛོམས་གནང་སོང་།
ཚོགས་འདུའི་ཐོག་མར་སྐུ་མགྲོན་གཙོ་བོ་ཤེས་རིག་དྲུང་ཆེ་རྣམ་གཉིས་ནས་སྣང་གསལ་མར་མེ་ཞལ་འབྱེད་དང་། ༧གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེར་མཇལ་དར་སྒྲོན་འབུལ་གནང་རྗེས། ཤེས་རིག་དྲུང་ཆེ་སྟོབས་རྒྱལ་ཚེ་རིང་ལགས་ཀྱིས་ཕེབས་བསུའི་གསུང་བཤད་གནང་དོན། དེ་རིང་ཚོགས་འདུ་འདི་སྐོང་དགོས་དོན་ནི་བར་ལམ་བཙན་བྱོལ་བོད་མིའི་ཤེས་ཡོན་སྲིད་བྱུས་འདི་གཏན་འབེབས་གནང་སྟེ། ལོ་བཅུ་ཕྲག་གཅིག་མ་ཟིན་ཙམ་འགྲོ་བཞིན་ཡོད་རེད། བརྒྱུད་རིམ་འདིའི་ནང་ལ་དེ་སྔའི་ལམ་སྲོལ་ཞིག་གི་ཐོག་ནས་ལམ་སྲོལ་གསར་པ་ཞིག་གི་ཐོག་འགྲོ་དགོས་སྟབས། དེ་འདྲའི་གནས་བབ་ཐོག་ལ་ཐུབ་དང་མ་ཐུབ་དང་། ཡང་ཁ་ཤས་ཤིག་ནང་འཚམ་དང་མ་འཚམ་གྱི་གནས་སྟངས་ཀྱི་ཆ་ནས་རྩ་བའི་ཤེས་ཡོན་སྲིད་བྱུས་འདི་བཙན་བྱོལ་བོད་མིའི་སློབ་གྲྭ་ཡོངས་རྫོགས་ནང་ལག་ལེན་བསྟར་དགོས་པ་ཞིག་ཆགས་ཡོད་ཀྱང་། ད་བར་ཕྱི་ནང་གི་འགལ་རྐྱེན་མང་པོ་ཞིག་ལ་ལྟོས་ཏེ་ལག་ལེན་བསྟར་ཐུབ་ཡོད་པ་མ་ རེད། ཐོག་མར་ཤེས་ཡོན་སྲིད་བྱུས་འདི་ལག་བསྟར་བྱ་རྒྱུའི་བཀའ་མོལ་བྱུང་སྐབས་ཤེས་ཡོན་སྲིད་བྱུས་འདི་ལག་བསྟར་བྱས་ཏེ། མ་འོངས་པར་བོད་པའི་ན་གཞོན་ཚོའི་མདུན་ལམ་དང་ཤེས་ཡོན་གྱི་ཁ་ཕྱོགས་ཐད་ཕན་འབྲས་གང་འདྲ་ཡོད་མེད་རྟོག་ཞིབ་ཆེད་དཔེ་སྟོན་སློབ་གྲྭ་ཆེད་བཙུགས་དང་འབྲེལ། རིམ་པས་སམ་བྷོ་ཊའི་ཁྱབ་ཁོངས་ཀྱི་སློབ་གྲྭ་ཁག་ནང་ལག་བསྟར་གནང་ཡོད་པ་དང་། ཉེ་ལམ་ལ་དྭགས་ཁུལ་ལའང་གཞི་རིམ་འོག་མ་ནས་བཟུང་མགོ་འཛུགས་བྱས་ཡོད་པ་མ་ཟད། ཤེས་རིག་ལས་ཁུངས་ངོས་ནས་ཀྱང་ཟབ་སྦྱོང་མང་པོ་ཕུལ་བ་སོགས་བྱུང་ཡོད་ཀྱང་། དེ་དག་གིས་ནུས་པ་དང་གྲུབ་འབྲས་གང་ཐོན་ཡོད་མེད་ཚོགས་འདུ་འདིའི་ནང་དུས་རྒྱུན་ནས་ཤེས་ཡོན་སྲིད་བྱུས་ཀྱི་དགོངས་དོན་གཞིར་བཟུང་ལག་བསྟར་དང་འབྲེལ་མཛད་འགན་གཙོ་བོ་བཞེས་མཁན་རྣམ་པ་ཕེབས་ཡོད་སྟབས། ད་བར་ལག་བསྟར་བྱས་པའི་གྲུབ་འབྲས་དང་དཀའ་ངལ་ག་རེ་བྱུང་ཡོད་མེད་ཐོག་བཀའ་སྡུར་སྦྱང་བཤད་དང་བགྲོ་གླེང་བྱེད་རྒྱུ། དེ་བཞིན། ང་ཚོས་མ་འོངས་པར་ལེགས་སྤེལ་ཉེས་འགོག་གི་ཐབས་ལམ་གང་འདྲ་གཟིགས་ཀྱི་ཡོད་མེད་བཅས་ལ་ཕན་ཐོགས་ཡོང་ཆེད་དམིགས་བསལ་ཚོགས་འདུ་ཞེས་དམིགས་བསལ་བྱས་ཏེ་སྐོང་ཚོགས་བྱས་པ་ཞིག་ཆགས་ཡོད་སྟབས། དེ་རིང་དང་སང་ཉིན་གྱི་ཚོགས་འདུའི་སྐབས་ཚང་མས་ཆ་ཤས་ཡག་པོ་ལེན་རྒྱུ་དང་། ཚོགས་འདུ་འདི་ཚོགས་པའི་གྲུབ་དོན་ལ་མ་འོངས་པར་ང་ཚོས་ཤེས་ཡོན་སྲིད་བྱུས་འདི་ལག་བསྟར་བྱེད་ཕྱོགས་ཐད་ནུས་པ་ཐོན་པའི་གོམ་སྟབས་ཤིག་སྤོ་དགོས་མིན་གྱི་དགོངས་འཆར་ས་ལམ་དང་ཁྱད་མེད་ཅིག་འཐོན་ཐུབ་རྒྱུའི་རེ་བ་རྒྱག་གི་ཡོད། ཅེས་བརྗོད་སོང་།
དེའི་རྗེས་ཤེས་རིག་དྲུང་ཆེ་དངོས་གྲུབ་ཚེ་རིང་ལགས་ཀྱིས་ཚོགས་འདུའི་ངོ་སྤྲོད་གཏམ་བཤད་གནང་དོན། སྤྱིར་བཏང་ང་ཚོས་ཚོགས་འདུ་འདི་ལས་དོན་ཚོགས་ཆུང་གི་ཚོགས་འདུའི་ངོ་བོ་ཞིག་ལ་བརྩི་ཐུབ་ན་ལས་ཀའི་ཐོག་ལ་དམིགས་མེད་དམིགས་སྐྱོང་ཡོང་རྒྱུར་ཁེ་ཕན་ཡོང་གི་རེད་བསམ་པ་ཞིག་འདུག ཤེས་ཡོན་སྲིད་བྱུས་འདི་ ༢༠༠༤ ལོའི་ཟླ་ ༩ པའི་གྲོས་ཚོགས་ཚོགས་དུས་བརྒྱད་པའི་སྐབས་གཏན་ལ་ཕབ་པ་དང་འབྲེལ། ༢༠༠༥ ལོའི་ཟླ་ ༡༠ ནང་དཔེ་སྟོན་སློབ་གྲྭ་གསར་དུ་མགོ་འཛུགས་བྱས་ཏེ། ཕལ་ཆེར་བདུན་ཕྲག་གཅིག་མ་གཏོགས་ལོ་ ༡༠ འཁོར་གྱི་ཡོད་པ་རེད། ངས་དེ་ལྟ་བུའི་གཞུང་འབྲེལ་ཤེས་ཡོན་སྲིད་བྱུས་ཀྱི་ཡིག་ཆ་ཞིག་བཀའ་ཤག་གིས་ཟིན་བྲིས་བཀོད་པ་དང་གྲོས་ཚོགས་ཀྱིས་གཏན་འབེབས་གནང་བ་དེ། རླབས་ཆེན་གྱི་བྱ་བཞག་ཅིག་རེད་བསམ་གྱི་འདུག ཤེས་ཡོན་སྲིད་བྱུས་ཀྱི་ཡིག་ཆ་འདིས་མ་འོངས་པར་ང་ཚོའི་ཤེས་ཡོན་གྱི་ལས་དོན་བྱེད་ཕྱོགས་ལ་ལམ་སྟོན་གསལ་པོ་ཞིག་བཞག་ཡོད་པར་བརྟེན། དེའི་ཐོག་ལ་ལག་བསྟར་གནང་མཁན་བཀའ་ཤག་སྐབས་ ༡༢ དང་ ༡༣། ༡༤ བཅས་ཀྱིས་འགྱུར་བ་ཞིག་ཕྱིན་ཡོད་སྟབས། མང་ཚོགས་ཁྲོད་ཤེས་ཡོན་སྲིད་བྱུས་ཀྱི་གནས་སྟངས་དང་། ལངས་ཕྱོགས་ཐོག་ལ་ག་རེ་ཆགས་ཀྱི་ཡོད་མེད་ཐད་དོགས་པ་རྣམ་རྟོག་ཡོང་སྲིད་པ་ཞིག་ཡིན་སྟབས། སྲིད་སྐྱོང་མཆོག་གིས་ཚོགས་འདུ་སྔ་རྗེས་ཐོག་བཀའ་ཤག་སྐབས་ ༡༤ པས་ཤེས་ཡོན་སྲིད་བྱུས་དེ་རང་ལག་བསྟར་རྒྱུན་འཁྱོངས་བྱེད་རྒྱུ་ཡིན་གསུངས་པ་མ་ཟད། ཤེས་རིག་ལས་ཁུངས་ཀྱི་ནང་མོལ་ཚོགས་འདུ་ལའང་བཀའ་གསལ་པོ་གནང་ཡོད་སྟབས། མང་ཚོགས་ཚོས་ཤེས་ཡོན་སྲིད་བྱུས་ལག་ལེན་བསྟར་ཕྱོགས་ཐད་ཐེ་ཚོམ་དང་དོགས་པ་གནང་དགོས་དོན་གང་ཡང་ཆགས་མེད། ཅེས་བརྗོད་སོང་།
ཤེས་ཡོན་སྲིད་ཇུས་ལག་ལེན་བསྟར་ཕྱོགས་ཀྱི་རྒྱུད་རིམ་ཐད་ཁོང་གིས། སྤྱིར་བཏང་ལས་འཆར་གང་ཡིན་ཡང་གནས་སྐབས་གསུམ་འདྲ་པོ་ཞིག་ཆགས་ཀྱི་ཡོད། དང་པོ། མགོ་འཛུགས་ཀྱི་གནས་སྐབས་དང་། གཉིས་པ། ལག་ལེན་གྱི་གནས་སྐབས། གསུམ་པ། འབྲས་བུའི་གནས་སྐབས་བཅས་རེད། དང་པོ་མགོ་འཛུགས་ཀྱི་གནས་སྐབས་དེ། ༢༠༠༤ ནས་མགོ་འཛུགས་ཏེ་ ༢༠༠༥ ལོར་སློབ་གྲྭ་དངོས་སུ་མགོ་འཛུགས་བྱས་ཡོད། སྐབས་དེར་ཕྱི་ལོགས་དང་མང་ཚོགས། ཁོར་ཡུག་བཅས་དང་འབྲེལ་བའི་ལས་ཀ་མང་པོ་ཞིག་བྱེད་དགོས་པ་ཆགས་ཀྱི་ཡོད་སྟབས། ཤེས་ཡོན་སྲིད་བྱུས་ཐོག་ལ་གོ་རྟོགས་སྤེལ་རྒྱུ་དང་སློབ་གྲྭ་མགོ་འཛུགས་བྱ་རྒྱུ། དགེ་སློབ་གྲ་སྒྲིག་བྱ་རྒྱུ་བཅས་ཀྱི་ལས་དོན་མང་པོ་ཞིག་བསྒྲུབ་དགོས་པ་ཆགས་ ཡོད། ལྷག་པར་དུ་ཤེས་ཡོན་སྲིད་བྱུས་གོ་རྟོགས་སྤེལ་སྐབས་ཕ་མར་འགྲེལ་བཤད་དང་དགེ་རྒན་ལ་ཟབ་སྦྱོང་། སློབ་མར་ངོ་སྤྲོད་གནང་དགོས་པ་བཅས་ལོ་ ༥ ཙམ་རིང་ཕྱི་ཕྱོགས་ཀྱི་ལས་དོན་ཁག་བསྒྲུབ་དགོས་པ་ཞིག་ཆགས་ཀྱི་ཡོད། གཉིས་པ། ལག་ལེན་གྱི་གནས་སྐབས་དེ་འཁེལ་གྱི་ཡོད་པ་རེད། ད་ལྟ་ང་ཚོས་ལག་ལེན་གྱི་གནས་སྐབས་ཐོག་ལ་ཤར་སྐྱོད་བྱེད་ཀྱི་ཡོད་པ་རེད་བསམ་གྱི་འདུག ལག་ལེན་གྱི་གནས་སྐབས་ནང་ཕྱི་ལོགས་སུ་བརྡིར་སྒྲ་དེ་འདྲ་སླེབས་ཀྱི་མེད་ཀྱང་། སློབ་གྲྭ་དང་དགེ་རྒན། འཛིན་སྐྱོང་བཅས་སུ་ནང་ཁུལ་གྱི་ལས་དོན་མང་པོ་ཞིག་བསླེབ་ཀྱི་ཡོད་སྟབས། ཕྱི་ལོགས་ཀྱི་མང་ཚོགས་ཁྲོད་ཤེས་ཡོན་སྲིད་བྱུས་ཀྱི་སྔོན་མའི་བརྡིར་སྒྲ་དེ་འདྲ་མེད་པར་བརྟེན། ཤེས་ཡོན་སྲིད་བྱུས་དེ་ཏག་ཏག་ལག་ལེན་བསྟར་གྱི་ཡོད་མེད་དགོངས་ཚུལ་ཡོང་གི་ཡོད་ཚེ། བཀའ་ཤག་སྐབས་ ༡༤ པས་ཤེས་ཡོན་སྲིད་བྱུས་འདི་མུ་མཐུད་ལག་བསྟར་བྱེད་བཞིན་ཡོད་པ་ལྟར། ཤེས་རིག་ལས་ཁུངས་ཀྱི་དྲུང་ཆེ་རྣམ་གཉིས་གཙོས་འབྲེལ་ཡོད་སྡེ་ཚན་ཁག་གི་འགན་འཛིན་རྣམ་པས་ལག་བསྟར་དེ་ལྟར་གནང་གི་ཡོད།
དེ་ནས་ལོ་ ༥ ནས་ ༧ བར་དེ་འབྲས་བུའི་གནས་སྐབས་ཆགས་ཀྱི་ཡོད་པ་རེད། དེའི་སྐབས་སུ་གང་འདྲ་ཆགས་ཡོད་མེད་ཐོན་ཡོང་གི་ཡོད་སྟབས། ད་ལོའི་ལོ་མགོར་དཔེ་སྟོན་སློབ་གྲྭ་ནས་འཛིན་རིམ་ ༡༠ པ་ཐོན་ཏེ། དམིགས་བསལ་མཛད་སྒོ་ཞིག་ཀྱང་ཚོགས་པ་རེད། དཔེ་སྟོན་སློབ་གྲྭ་ནས་ཐོན་པའི་སློབ་མ་དེ་ཚོ་དངོས་གནས་བོད་ཡིག་ཐོག་ལ་ཡག་པོ་ཡོད་པ་ཞིག་ང་ཚོ་སུས་བལྟས་ཀྱང་ངོས་ལེན་མ་བྱེད་ཀ་མེད་རེད། ང་ཚོ་ལག་ལེན་ཐོག་ལ་འགྲོ་དགོས་དུས་འཛིན་གྲྭ་ ༡༠ པའི་ཡིག་ཚད་གཏོང་སྐབས་དབྱིན་ཡིག་སོགས་སྐད་ཡིག་གཞན་ནང་དཔེ་སྟོན་སློབ་གྲྭའི་སློབ་མ་ཚོ་རྩེ་ཕུད་ལ་སླེབས་ཀྱི་མེད་ཀྱང་། མཇུག་ཏུའང་ལྷགས་ཀྱི་མེད་སྟབས། ལྕི་ཡང་ཞིག་བཀྱགས་པ་ཡིན་ན། བོད་ཡིག་ཡག་པོ་ཡོད་པ་ཐག་ཆོད་པ་ཞིག་ཆགས་ཡོད་པར་བརྟེན། དེ་གཉིས་ཀྱི་བར་མཚམས་ལ་གཞིགས་ཏེ་དབྱིན་ཡིག་ཞན་པ་ཡོད་ཀྱང་མ་འགྲིག་པ་གང་ཡང་མི་འདུག་བསམ་པ་ཞིག་འདུག་ཀྱང་། ང་ཚོས་དགོངས་པ་བཞེས་དགོས་པ་ཞིག་ལ་ཤེས་ཡོན་སྲིད་བྱུས་ཀྱི་དོན་ཚན་ ༨ ནང་ལ་འཛིན་རིམ་ ༡༠ ཐོན་སྐབས་སྐད་ཡིག་གཉིས་པ་དེ་བྱང་ཆུབ་པ་ཞིག་དགོས་སྐོར་གསལ་ཡོད་སྟབས། ང་ཚོས་ལག་ལེན་བསྟར་སྐབས་འཛིན་རིམ་ ༤ པ་ནས་ ༡༠ བར་གྱི་ལོ་ ༦ ནང་ཤུགས་རྒྱག་དགོས་ཀྱི་ཡོད་པ་རེད། ཤེས་ཡོན་སྲིད་བྱུས་ཀྱི་ཁྱད་ཆོས་འདྲ་པོ་དེ་གང་ལྟར་༧གོང་ས་མཆོག་གི་དགོངས་གཞི་ལྟར་འདབ་གཤོག་གཉིས་ལྡན་གྱི་བོད་མི་བཟང་པོ་ཞིག་ཅེས་པའི་དོན་སྙིང་དེ་ཆ་ཚང་ འདིའི་ནང་བསྡུས་ཡོད་སྟབས། ཐོག་མར་སྐད་ཡིག་གཉིས་པ་སློབ་རྒྱུའི་སློབ་གཞི་དེ་འཛིན་རིམ་ ༤ པ་ནས་སློབ་བཞིན་ཡོད་ཀྱང་། འཛིན་རིམ་ ༡༠ པར་སླེབ་སྐབས་སྐད་ཡིག་གཉིས་པའི་ཐོག་ལ་བྱང་ཆུབ་པ་ཞིག་དགོས་སྐོར་གསུངས་ཡོད་ པར་བརྟེན། ང་ཚོས་སྔོན་ཚུད་ནས་གྲ་སྒྲིག་བྱེད་དགོས་པ་ཞིག་ཆགས་ཡོད་རེད་བསམ་གྱི་འདུག ཅེས་བརྗོད་སོང་།
ཤེས་ཡོན་སྲིད་བྱུས་ཐོག་འགྲོ་གྲོན་གང་བཏང་ཡོད་མེད་ཐད་ཁོང་གིས། ༢༠༡༡ ལོའི་ཟླ་ ༤ ཚེས་ ༡ ནས་ ༢༠༡༤ ལོའི་ཟླ་ ༣ ཚེས་ ༣༡ བར་གྱི་བཀའ་ཤག་སྐབས་ ༡༤ པའི་དུས་ཡུན་རིང་། ཤེས་རིག་ལས་ཁུངས་ངོས་ནས་སམ་བྷོ་ཊའི་དབུས་དང་ཁྱབ་ཁོངས་སློབ་གྲྭ་ཁག་ལ་འགྲོ་གྲོན་ཧིན་སྒོར་ ༢༥༡༥༤༧༢༢༥ དང་། འབུམ་ཐར་གྱི་དགེ་རྒྱན་འོས་སྦྱོང་ཆེད་སྒོར་ ༤༡༡༩༧༦༡༩། འབུམ་ཐར་སློབ་གཉེར་ཁང་ནང་ཚན་རིག་བརྟག་དཔྱད་ཁང་ཁ་ཤས་དང་ཚོགས་ཁང་ཞིག་གསར་རྒྱག་བྱེད་བཞིན་ཡོད་པར་སྒོར་ ༡༤༥༦༠༤༤༣། ད་བར་གྱི་ཟབ་སྦྱོང་དང་དགེ་རྒན་འོས་སྦྱོང་། ཉམས་གསོག་ཆེད་སྒོར་ ༧༠༨༣༩༤༧། རིགས་ལམ་འདུ་འཛོམས་ཆེད་སྒོར་ ༩༤༠༠༨༢༡། ཤེས་ཡོན་ལྷན་ཚོགས་ཀྱི་སྤྱིར་བཏང་འགྲོ་གྲོན་ཆེད་སྒོར་ ༡༠༣༦༡༦༤༣། དེ་བཞིན། ཚན་རིག་དང་དབྱིན་ཡིག ཟློས་གར་དགེ་རྒན་གྱི་འོས་སྦྱོང་དང་ཟབ་སྦྱོང་བཅས་ལས་འཆར་ཁག་ཐོག་ཁྱོན་ ༣༢༥༦༧༣༦༩༨ ཀྱི་འགྲོ་སོང་བཏང་ཡོད། ཅེས་བརྗོད་ངོ་སྤྲོད་གནང་སོང་།
དེ་བཞིན་ཁོང་གིས་ཚོགས་ཐོག་ཏུ་དགོངས་པ་བཞེས་དགོས་པ་གང་ཆགས་ཡོད་མེད་ཐད། ཤེས་ཡོན་སྲིད་བྱུས་ཀྱི་ཡིག་ཆ་དོན་ཚན་ ༡༥ ནང་ནས་གོང་གི་དོན་ཚན་ ༥ དང་དོན་ཚན་ ༡༤ པ་བར་བརྒལ་གྱི་ཆ་རྐྱེན་དང་། ༡༥ པ་སྒྲིག་གཞི་བསྐྱར་བཅོས་ཀྱི་དོན་ཚན་ཕུད་དེ་བྱིངས་ཀྱི་དོན་ཚན་ ༨ ལ་ལག་ལེན་དངོས་གཞི་བསྟར་སྐབས། ང་ཚོས་ད་བར་ལག་ལེན་ག་ཚོད་བསྟར་ཡོད་མེད་དང་། མ་འོངས་པར་ག་རེ་བསྟར་དགོས་པ་དང་གསར་བཟོ་ག་རེ་གནང་དགོས་མིན་ཐད་བཀའ་སྡུར་གནང་དགོས་པ་ཆགས་ཡོད། ལྷག་པར་དུ་ཤེས་རིག་ལས་ཁུངས་དང་སློབ་གྲྭ་ཁག སམ་བྷོ་ཊ་དང་བོད་ཁྱིམ་ཨ་མ་བཅས་སོ་སོས་ག་རེ་བྱེད་དགོས་མིན་བཀའ་བསྡུར་གནང་སྟེ་ང་ཚོར་ལམ་སྟོན་གནང་ཐུབ་པ་ཞིག་དང་། དེ་བཞིན། འཛིན་རིམ་དྲུག་པ་ཡན་གྱི་སློབ་ཁྲིད་བརྒྱུད་ལམ་སྐད་ཡིག་གཉིས་བརྒྱུད་ནས་ཁྲིད་སྐབས་ཀྱི་ལྟ་གྲུབ་དང་ལག་བསྟར་གནང་ཕྱོགས་ཐད་གོ་བསྡུར་སྦྱང་བཤད་གནང་རྒྱུ་གལ་ཆེན་པོ་ཆགས་ཡོད། ཅེས་སོགས་བརྗོད་སོང་།
དེ་རིང་ཉིན་རྒྱབ་སློབ་གྲྭ་སོ་སོའི་ནང་ད་བར་གྱི་ཤེས་ཡོན་སྲིད་བྱུས་ལག་བསྟར་དང་འབྲེལ་བའི་གནས་སྟངས་སྙན་ཐོ་སྙན་སྒྲོན་གནང་རྗེས། ཚོགས་ཆུང་ཆ་བགོས་ཀྱིས་ཤེས་ཡོན་སྲིད་བྱུས་ལག་བསྟར་དང་འབྲེལ་བའི་དཀའ་ངལ་སེལ་ ཐབས་དང་ལག་བསྟར་མདུན་བསྐྱོད་དང་ཚགས་ཚུད་ཡོང་ཐབས། འཛིན་རིམ་དྲུག་པ་ཡན་གྱི་སློབ་ཁྲིད་བརྒྱུད་ལམ་སྐད་ཡིག་གཉིས་བརྒྱུད་ནས་ཁྲིད་སྐབས་ཀྱི་ལྟ་གྲུབ་དང་ལག་བསྟར་གནང་ཕྱོགས་བཅས་ལ་གོ་བསྡུར། སང་ཉིན་ཚོགས་ཆུང་གི་སྙན་ཐོ་སྙན་སྒྲོན་དང་གོ་བསྡུར་གནང་རྗེས། ཁྱོན་ཡོངས་ཀྱི་སློབ་གྲྭའི་འཛིན་སྐྱོང་ཚགས་ཚུད་གཏོང་ཕྱོགས་ཐད་བཀའ་མོལ་དང་འབྲེལ་གྲོས་ཆོད་གཏན་འབེབས་གནང་རྒྱུ་ཡིན་འདུག
གསར་འགོད་པ། དོན་གྲུབ།
བཀའ་ཤག་སྐབས་༡༤ཤེ་ཡོན་སྲིད་ཇུས་སྐོར་ཚོགས་འདུ་བསྡུས་པ་འདིས་འཁྲབ་སྟོན་ཙམ་ཡིན་པ་ཤེས་གསལ་རེད།དཔལ་ལྡན་སྲིད་སྐྱོང་མཆོག་ཤེས་རིག་བཀའ་བློན་གྱི་མཚན་ཡོད་ཀྱང་དཔེ་སྟོན་སློབ་གྲྭར་གཟིགས་ཞིབ་ཐེངས་གཉིས་ཙམ་རེད།ལོ་སྔོན་མ་དྷ་སྟེང་བོད་ཁྱིམ་དབུ་བརྙེད་སྐབས་ཤེས་ཡོན་སྲིད་ཇུས་སྐོར་ཟུར་ཙམ་ཡང་ལབ་ཐུབ་མེད་པ་དེས་ཤེས་ཡོན་སྲིད་ཇུས་ལག་བསྟར་དང་དར་སྤེལ་གཏོང་འདོད་མེད་པའི་རྣམ་འབྱོར་དང་འཆར་གཞི་རེད།ལྷག་དོན་སྲིད་སྐྱོང་མཆོག་བོད་ཁྱིམ་སློབ་གྲྭའི་འགན་འཛིན་ལྷན་ཚོགས་ཀྱི་ཚོགས་གཙོའི་མཚན་གནས་ཡོད་དུས་གལ་སྲིད་ཤེས་ཡོན་སྲིད་ཇུས་འདི་གལ་ཆེ་མཐོང་གི་ཡོད་ན་བོད་ཀྱི་སློབ་གྲྭ་ཁག་ལ་ལག་བསྟར་རན་ཚོད་ཡིན།་ང་ཚོ་གཞན་དབང་སྟབས་བསྟུན་འོག་ཐུགས་ཁག་ཡོད་པ་མ་རེད།གལ་ཆེ་དོན་ཆེན་ཞིག་ལ་༸གོང་ས་མཆོག་གིས་སྲིད་ཇུས་འདི་ལ་ཇི་ཙམ་རྒྱབ་སྐྱོར་ཡོད་མེད་གསལ་ཁ་མེད་པ་ཞིག་རེད།་བོད་ཁྱིམ་སློབ་གྲྭ་དང་ཨ་མ་རྗེ་བཙུན་པདྨ་ལ་གདེང་ཚོད་དང་སྤོབས་པ་ཆེན་པོས་ལག་བསྟར་མི་བྱེད་པ་དེ་རྒྱབ་ལྗོངས་ཆེན་པོ་ཞིག་ཡོད་ངེས་རེད།
༼༼ ད་ལོའི་ལོ་མགོར་དཔེ་སྟོན་སློབ་གྲྭ་ནས་འཛིན་རིམ་ ༡༠ པ་ཐོན་ཏེ། དམིགས་བསལ་མཛད་སྒོ་ཞིག་ཀྱང་ཚོགས་པ་རེད། དཔེ་སྟོན་སློབ་གྲྭ་ནས་ཐོན་པའི་སློབ་མ་དེ་ཚོ་དངོས་གནས་བོད་ཡིག་ཐོག་ལ་ཡག་པོ་ཡོད་པ་ཞིག་ང་ཚོ་སུས་བལྟས་ཀྱང་ངོས་ལེན་མ་བྱེད་ཀ་མེད་རེད། ང་ཚོ་ལག་ལེན་ཐོག་ལ་འགྲོ་དགོས་དུས་འཛིན་གྲྭ་ ༡༠ པའི་ཡིག་ཚད་གཏོང་སྐབས་དབྱིན་ཡིག་སོགས་སྐད་ཡིག་གཞན་ནང་དཔེ་སྟོན་སློབ་གྲྭའི་སློབ་མ་ཚོ་རྩེ་ཕུད་ལ་སླེབས་ཀྱི་མེད་ཀྱང་། མཇུག་ཏུའང་ལྷགས་ཀྱི་མེད་སྟབས། ལྕི་ཡང་ཞིག་བཀྱགས་པ་ཡིན་ན། བོད་ཡིག་ཡག་པོ་ཡོད་པ་ཐག་ཆོད་པ་ཞིག་ཆགས་ཡོད་པར་བརྟེན། དེ་གཉིས་ཀྱི་བར་མཚམས་ལ་གཞིགས་ཏེ་དབྱིན་ཡིག་ཞན་པ་ཡོད་ཀྱང་མ་འགྲིག་པ་གང་ཡང་མི་འདུག་བསམ་པ་ཞིག་འདུག་ཀྱང་། ང་ཚོས་དགོངས་པ་བཞེས་དགོས་པ་ཞིག་ལ་ཤེས་ཡོན་སྲིད་བྱུས་ཀྱི་དོན་ཚན་ ༨ ནང་ལ་འཛིན་རིམ་ ༡༠ ཐོན་སྐབས་སྐད་ཡིག་གཉིས་པ་དེ་བྱང་ཆུབ་པ་ཞིག་དགོས་སྐོར་གསལ་ཡོད་སྟབས། ང་ཚོས་ལག་ལེན་བསྟར་སྐབས་འཛིན་རིམ་ ༤ པ་ནས་ ༡༠ བར་གྱི་ལོ་ ༦ ནང་ཤུགས་རྒྱག་དགོས་ཀྱི་ཡོད་པ་རེད། ཤེས་ཡོན་སྲིད་བྱུས་ཀྱི་ཁྱད་ཆོས་འདྲ་པོ་དེ་གང་ལྟར་༧གོང་ས་མཆོག་གི་དགོངས་གཞི་ལྟར་འདབ་གཤོག་གཉིས་ལྡན་གྱི་བོད་མི་བཟང་པོ་ཞིག་ཅེས་པའི་དོན་སྙིང་དེ་ཆ་ཚང་ འདིའི་ནང་བསྡུས་ཡོད་སྟབས། ཐོག་མར་སྐད་ཡིག་གཉིས་པ་སློབ་རྒྱུའི་སློབ་གཞི་དེ་འཛིན་རིམ་ ༤ པ་ནས་སློབ་བཞིན་ཡོད་ཀྱང་། འཛིན་རིམ་ ༡༠ པར་སླེབ་སྐབས་སྐད་ཡིག་གཉིས་པའི་ཐོག་ལ་བྱང་ཆུབ་པ་ཞིག་དགོས་སྐོར་གསུངས་ཡོད་ པར་བརྟེན། ང་ཚོས་སྔོན་ཚུད་ནས་གྲ་སྒྲིག་བྱེད་དགོས་པ་ཞིག་ཆགས་ཡོད་རེད་བསམ་གྱི་འདུག ༽༽
བཀའ་མོལ་གནང་སྟངས་འདི་ཡག་པོ་ཞིག་མ་རེད། འདིའི་ནང་དོན་དག་མང་པོ་ཞིག་བསྟན་འདུག་ལ། ཟུར་དུ་ཤེས་ཡོན་སྲིད་བྱུས་གསར་པའི་སྐྱོན་གནས་ཤིག་ཀྱང་མངོན་ཆུང་གི་ཚུལ་དུ་བརྗོད་གང་ཐུབ་བྱས་འདུག
བོད་ཁྱིམ་ནས་ལ་དྭགས་བྱང་ཐང་ཧན་ལེར་ཤེས་ཡོན་སྲིད་བྱུས་འགོ་ཚུགས་བྱས་པ་པ་ནི། དོན་དུ་ཤེས་ཡོན་སྲིད་བྱུས་ལ་མོས་མཐུན་མེད་ཀྱང་ཁས་ལེན་ཡོད་མདོག་གི་རྣམ་འགྱུར་བསྟན་པ་ཙམ་རེད།
ཕྱིའི་ཁོར་ཡུག་ཙམ་ལས་ཤེས་ཡོན་གྱི་མཐུན་རྐྱེན་ཀ་ཡིག་ཙམ་ཡང་མེད་ས་འབྲོག་པའི་ས་ཁུལ་སྐྱོ་ཤོས་ཤིག་ན་ཤེས་ཡོན་སྲིད་བྱུས་ལག་བསྟར་ཚུགས་པ་ནི། མོས་མཐུན་གནང་མཁན་གྱི་བོད་ཁྱིམ་དང་ཁས་ལེན་ཞུ་མཁན་གྱི་ཤེས་རིག་གཉིས་ཀ་དོན་མེད་རེད།
དངོས་གནས་བོད་ཁྱིམ་ནས་ཁ་ཞེ་གཉིས་མེད་ཀྱིས་ཤེས་ཡོན་སྲིད་བྱུས་ལ་མོས་མཐུན་ཚོད་ལྟའམ་རྟག་དཔྱད་གནང་འདོད་ཡོད་ན། སྡེ་ཚན་འདི་ཤེས་ཡོན་གྱི་མཐུན་རྐྱེན་ཆ་ཚང་འཛོམས་ས་བོད་ཁྱིམ་སེ་ལ་ཁུལ་དུ་གསར་རྒྱག་མི་བྱེད་པའི་རྒྱུ་མཚན་གང་རེད།
དེས་ན། བོད་ཁྱིམ་དང་ཤེས་རིག་གཉིས་ནི་བཙན་བྱོལ་སྤྱི་ཚོགས་ཀྱི་ཤེས་ཡོན་གྱི་བསྟི་གནས་ཨ་མ་གཉིས་དེ་ཡིན་པས་དེ་གཉིས་དབར་དོན་དམ་གྱི་ཁས་ལེན་ཞིག་དང་། དོན་དངོས་ཀྱི་ལག་ལེན་ལ་རུང་བའི་བཀའ་མོལ་ཞིག་གནང་དགོས་པ་ནི་ཛ་དྲག་ཏུ་སླེབས་ཡོད་པ་རེད།
ཡང་ན། བོད་ཁྱིམ་ནས་ཤེས་ཡོན་སྲིད་བྱུས་རྩ་ནས་མོས་མཐུན་མེད་གསུངས་ཀྱང་དེ་ནི་ཧ་ཅང་འོས་ཤིང་ཕན་ཐོགས་ཆེ་བ་རེད།
བཀྲ་རྣམ་ལགས་ཀྱིས་གསུངས་པ་བདེན་གི་དེ་འདྲ་ཞིག་དགོས་ངེས་རེད།
སྤྱིར་ནས་བོད་མི་ཚོའི་ཤེས་ཡོན་ལ་དོ་འཁུར་དེ་ཙམ་མེད་པ་དང་། ལྷག་པར་དུ་གཞུང་དང་དགེ་རྒན་དང་ཕ་མ་རྣམས་ཀྱིས་ཕྲུ་གུ་སློབ་གྲྭ་ལ་བཏང་རྒྱུ་དེ་ནི་མ་འོངས་པའི་འཚོ་བ་ཡག་པོ་ཞིག་སྐྱེལ་ཐུབ་ཙམ་གྱི་རེ་བ་ཞིག་ལས་མ་འདས་པས། གཞུང་ཕྱོགས་ནས་ཀྱང་མི་མང་ངོ་གསོ་ཐུབ་ཙམ་གྱི་སྲིད་བྱུས་བཟུང་ནས་ང་ཚོའི་ཤེས་ཡོན་སྲིད་བྱུས་ལག་བསྟར་བྱེད་བཞིན་པ་རེད། དེ་འདྲ་སོང་ཙང་ད་ལྟའི་བཀའ་ཤག་ ༡༤ པར་རང་གི་ཤེས་ཡོན་གྱི་སྲིད་བྱུས་གསར་པ་ཞིག་སྟོན་རྒྱུ་མེད། མདོར་ན་དེ་ནི་བཀའ་ཁྲི་ཟུར་པ་ཤེས་ཡོན་ལྷན་ཚོགས་ཀྱི་ཚོགས་གཙོར་བསྐོས་པ་དེ་ལས་རྟོགས་ཐུབ། དེ་སྔའི་བཀའ་ཤག་གི་སྲིད་བྱུས་ལ་ཁ་ངོ་ནས་གལ་ཆེ་ལུགས་ལས་དོན་དངོས་སུ་རྒྱ་སྐྱེད་གང་ཡང་བྱུང་སོང་བསམ་གྱི་མེད། གཞུང་ཕྱོགས་ནས་སེམས་གཏིང་གི་ཤེས་ཡོན་སྲིད་བྱུས་ལ་དགའ་ཞེན་མེད་ན་འཛིན་གྲྭ་བཅུ་པའི་ཨང་གི་དང་དབྱིན་སྐད་འཕེར་མ་འཕེར་ནི་ཤེས་ཡོན་སྲིད་བྱུས་ཀྱི་དགོས་དམིགས་མ་རེད། ལྷག་པར་རྒྱ་གཞུང་སློབ་གྲ་ཁག་རང་ཁོངས་སུ་སླེབས་སྐབས་ཤེས་ཡོན་སྲིད་བྱུས་ལག་བསྟར་རྒྱ་སྐྱེད་དགོས་པ་རེད། དེ་མིན་ན་དཔེ་སྟོན་སློབ་མ་དེ་ཚོ་ཕོ་རོག་དཀར་པ་ནང་བཞིན་ལྷག་བསྡད་ཀྱི་རེད། མ་གཞི་ནས་བོད་སློབ་ཅི་ཡང་མེད་ས་གཅིག་ལ་དགེ་རྒན་འོས་སྦྱོང་སློབ་གྲྭ་བཙུགས་དགོས་དོན་གང་རེད། དགེ་རྒན་འོས་སྦྱོང་གི་ཉམས་མྱོང་ནང་སློབ་གྲྭར་དངོས་སུ་ཕྱིན་ནས་སློབ་ཁྲིད་བྱེད་རྒྱུ་དེ་གནད་འགག་ཆེན་པོ་ཞིག་ཆགས་ཡོད།
བཀའ་ཤག་གིས་ཤེས་ཡོན་སྲིད་བྱུས་ལག་བསྟར་ཚུལ་བཞིན་བྱེད་ཀྱི་ཡོད་མེད་ཀྱི་དོགས་གཞིའི་འོག་སྐད་རྒྱག་གི་ཡོད་པ་འགོག་ཐབས་སུ་ཚོགས་འདུ་འདྲ་མིན་ཚོགས། ལས་བསྡོམས་འདྲ་མིན་སྐྱོར་ནས་ཕན་ཐོགས་གང་ཡང་ཡོད་པ་མ་རེད། དཔེ་སྟོན་སློབ་གྲྭ་དང་ལ་དྭགས་བྱང་ཐང་གི་སློབ་གྲྭ་དེ་ཚོ་སྐྱོར་བསྡད་ནས་ཉི་མ་འཁྱོལ་གི་མ་རེད། དོན་དག་རྡོག་རྡོག་དེ་བཙན་བྱོལ་སྤྱི་ཚོགས་ནང་གི་སློབ་གྲྭ་ག་ཚོད་ཀྱི་སློབ་ཕྲུག་ཅི་ཙམ་ལ་ལག་བསྟར་བྱེད་ཀྱི་ཡོད་མེད་དང་། རྡ་སྟེང་བོད་ཁྱིམ་ཁྱབ་ཁོངས་སློབ་གྲྭ་ཡོངས་རྫོགས་ནང་ལག་བསྟར་ཐུབ་ཡོད་མེད། སྔོན་འགྲོ་དང་པོ་ནས་འཛིན་རིམ་ག་ཚོད་བར་ཤེས་ཡོན་སྲིད་བྱུས་ཀྱི་དགོངས་དོན་ཆ་ཚང་ལག་བསྟར་བྱེད་ཀྱི་ཡོད་མེད། སློབ་ཚན་ག་ཚོད་ཅིག་བོད་བསྒྱུར་ཞུས་ཡོད་མེད་དང་། སློབ་ཚན་དང་སློབ་ཕྲུག་གི་འཛིན་རིམ་ལ་དཔག་པའི་དགེ་རྒན་ག་ཚོད་ཅིག་གྲ་སྒྲིག་ཡོད་མེད་ཀྱི་ཐོ་གཞུང་འདི་ཡིན་ཞེས་མང་ཚོགས་ལ་གསལ་གསལ་ཐང་ཐང་གིས་བཀྲམས་ཐུབ་པ་ཡིན་ན། ད་གཟོད་མང་ཚོགས་དང་བཀའ་ཤག་གི་བར་དང་། མང་ཚོགས་དང་ཤེས་རིག་ལས་ཁུངས་བར་ཁ་མ་གསལ་བ་དང་ནམ་མ་ལངས་པའི་གནས་ཚུལ་གང་ཡང་ཡོད་པ་མ་རེད། བཀའ་ཤག་གིས་བཙུར་ནས་ལས་བསྡོམས་བསྐྱོར་དགོས་པ་དང་། སྲིད་སྐྱོང་དང་དྲུང་ཆོས་ཚོས་ཨུ་ཚུགས་ཀྱིས་མང་ཚོགས་ལ་ཁས་ལེན་བྱེད་དགོས་པ་གང་ཡང་ཡོད་མ་རེད།