གྱེན་ལོག་པའི་སྟོབས་ཤུགས་ཇེ་ཆེར་ཕྱིན།

ཁ་སང་ཨུ་རུ་སུར་རྒྱབ་སྐྱོར་བྱེད་མཁན་ཡུག་རེན་གྱེན་ལོག་ཤོག་ཁག་གིས་ཡུག་རེན་གྱི་གལ་འགངས་ཆེ་བའི་གྲོང་ཁྱེར་ཞིག་བཙན་བཟུང་བྱས་ཡོད་འདུག

ཨུ་རུ་སུར་རྒྱབ་རོགས་བྱེད་མཁན་ཡུག་རེན་གྱེན་ལོག་ཤོག་ཁག་གིས་ཟླ་འདིའི་ཚེས་ ༢༧ ཉིན་ཡུག་རེན་གྱི་ལྷོ་ཤར་གྲོང་ཁྱེར་ནཱོ་ཝ་ཛོ་ཝུ་སེ་ཁེ་ (Novoazovsk) ཡི་གྲུ་ཁར་གློ་བུར་འཇབ་རྒོལ་བྱས་ཏེ་གྲོང་ཁྱེར་བཙན་བཟུང་བྱས་ཡོད་པ་མ་ཟད། གྲོང་ཁྱེར་ནང་ལྕགས་འཁྲབ་འཁོར་ལོ་དང་གོ་མཚོན་སྤྲས་རླངས་འཁོར་སོགས་བཏང་སྟེ་འཇིགས་སྣང་སྐུལ་ཏེ་མང་ཚོགས་མང་པོ་ས་གཞན་ལ་ཉེན་གཡོལ་འགྲོ་བཞིན་ཡོད་སྟབས། ཁ་སང་འཇར་མན་སྲིད་བློན་ལྕམ་ཨན་གྷི་ལ་མེར་གྷལ་ (Angela Merkel)དང་ཨ་རིའི་ཕྱི་སྲིད་ལྷན་ཁང་གི་མགྲིན་ཚབ་པས་བསྒྲགས་གཏམ་སྤེལ་ཏེ། ཡུག་རེན་གྱེན་ལོག་ཤོག་ཁག་གིས་ཨུ་རུ་སུའི་རྒྱབ་སྐྱོར་ལ་བརྟེན་གྲོང་ཁྱེར་བཙན་བཟུང་བྱས་པ་ཞིག་ཡིན་སྟབས། སྲིད་འཛིན་པུ་ཊིན་གྱིས་རྒྱལ་སྤྱིའི་སྤྱི་ཚོགས་ལ་གསལ་བཤད་བྱེད་དགོས་ཚུལ་བརྗོད་ཡོད་ཀྱང་། ཡུག་རེན་གྱེན་ལོག་ཤོག་ཁག་གི་མགོ་གཙོས་ཐེངས་འདིའི་འགུལ་སྐྱོད་དེ་ནི་ང་ཚོ་རང་འགུལ་ཞིག་ཡིན་པ་ལས་དེར་ཨུ་རུ་སུ་དང་འབྲེལ་བ་གང་ཡང་མེད་སྐོར་བརྗོད་འདུག

འདིའི་ཐད་ཡུག་རེན་ཤར་ཕྱོགས་ས་ཁུལ་ཌོ་ནེ་སེ་ཁེ་ (Donetsk) ཡི་གྱེན་ལོག་ཤོག་ཁག་གི་མགོ་གཙོ་པུ་ཤི་ལིན་ (Denis Pushilin) གྱིས། “ད་ཐེངས་དམག་འཁྲུག་ཁྲོད་ཨུ་རུ་སུ་འཛུལ་ཡོད་ཚེ་ཡུག་རེན་གཞུང་གིས་ཁ་གཏད་དྲག་པོ་གཅོག་རྒྱུ་ཡིན་སྟབས་ཨུ་རུ་སུ་དང་འབྲེལ་བ་གང་ཡང་ཆགས་མེད། ང་ཚོར་སར་བྷེ་ཡ་གཙོས་རྒྱལ་ཁབ་ཁག་ཅིག་གིས་རྒྱབ་སྐྱོར་བྱེད་བཞིན་ཡོད་སྟབས་ཨུ་རུ་སུའི་རོགས་སྐྱོར་ལེན་དགོས་དོན་མེད” €™ཅེས་བརྗོད་ཡོད་ཀྱང་། འཇར་མན་སྲིད་བློན་ལྕམ་ཨན་གྷི་ལ་མེར་གྷལ་གྱིས། “ཉེ་ལམ་སྲིད་འཛིན་པུ་ཊིན་གྱིས་ཨུ་རུ་སུ་དང་ཡུག་རེན་གྱེན་ལོག་ཤོག་ཁག་བར་འབྲེལ་བ་གང་ཡང་མེད་སྐོར་བརྗོད་ཡོད་ཀྱང་། ད་ལྟ་ཨུ་རུ་སུའི་དམག་དཔུང་གིས་ཡུག་རེན་ས་ཁུལ་ནང་སིམ་འཛུལ་བྱས་ཏེ་མངོན་གསལ་གྱིས་གྱེན་ལོག་ཤོག་ཁག་ལ་རྒྱབ་སྐྱོར་བྱེད་བཞིན་ཡོད་སྟབས། དེར་ཁ་གསལ་འགྲེལ་བརྗོད་བྱེད་དགོས” ཞེས་བརྗོད་འདུག

ཨ་རིའི་ཕྱི་སྲིད་ལྷན་ཁང་གི་མགྲིན་ཚབ་པ་ལྕམ་ཇན་པཱ་སཱ་ཁེ་ (Jen Psaki) ལགས་ཀྱིས། “ཡུག་རེན་གྱེན་ལོག་ཤོག་ཁག་གི་བཙན་འཛུལ་དེ་དག་ལ་བརྟེན་ཏེ། ད་ལྟ་ཨུ་རུ་སུས་ཡུག་རེན་ཤར་ཕྱོགས་ས་ཁུལ་ཌོ་ནེ་སེ་ཁེ་ (Donetsk) དང་ཨུ་རུ་སུ་དང་ཡུག་རེན་བར་གྱི་ས་མཚམས་གྲོང་ཁྱེར་ལུ་ཧན་སེ་ཁེ་ (Luhansk) ནང་ཁྲིམས་འགལ་བྱ་སྤྱོད་སྤེལ་ཏེ་བཙན་བཟུང་བྱེད་བཞིན་ཡོད། ཨུ་རུ་སུའི་གཞུང་གིས་ཡུག་རེན་ནང་ཨུ་རུ་སུའི་དམག་མི་ཡོད་ཀྱང་། རྒྱལ་སྤྱིའི་སྤྱི་ཚོགས་ལ་དྲང་གཏམ་གང་ཡང་ཕྱིར་བསྒྲགས་བྱས་མེད་ཀྱང་། བདུན་ཕྲག་འདིའི་ནང་ཡུག་རེན་དམག་མིས་ཡུག་རེན་ས་ཁུལ་ནས་ཨུ་རུ་སུའི་དམག་མི་ ༡༠ འཇུ་བཟུང་བྱས་ཡོད་སྟབས། ད་ཆ་འབྲེལ་ཡོད་གཞུང་གིས་འགྲེལ་བརྗོད་བྱེད་དགོས་པ་ཞིག་ཆགས་ཡོད” ཅེས་བརྗོད་འདུག

༢༠༡༤ ལོའི་ཟླ་ ༤ པ་ནས་བཟུང་ད་བར་ཨུ་རུ་སུར་དགའ་མོས་བྱེད་མཁན་ཡུག་རེན་གྱེན་ལོག་ཤོག་ཁག་དང་ཡུག་རེན་གྱི་དམག་འཁྲུག་ཁྲོད་མི་ ༢༡༡༩ རྐྱེན་འདས་དང་མི་ ༥༠༤༣ ལ་རྨས་སྐྱོན་བཏང་ཡོད་པ་མ་ཟད། མི་ ༡༥༥༨༠༠ ཙམ་ཞིག་ཡུག་རེན་ནང་ཁུལ་གྱི་ས་གཞན་ལ་ཉེན་གཡོལ་དང་། ཡུལ་མི་ ༡༨༨༠༠༠ ལྷག་ཨུ་རུ་སུའི་ནང་བྲོས་བྱོལ་འགྲོ་དགོས་བྱུང་ཡོད་འདུག

ཁ་སང་ཡུག་རེན་གྱེན་ལོག་ཤོག་ཁག་གིས་བཙན་བཟུང་བྱས་པའི་ནཱོ་ཝ་ཛོ་ཝུ་སེ་ཁེ་ (Novoazovsk) གྲོང་ཁྱེར་དང་དེའི་གྲུ་ཁ་ནི། ཡུག་རེན་གྱི་ས་མཚམས་གྲོང་ཁྱེར་མཱ་རའེ་ཧྥོལ་ (Mariupol) གྱི་གྲུ་ཁ་དང་ཁེར་མེ་ཡ (Crimea) དང་འབྲེལ་ཡོད་སྟབས། གལ་ཏེ་ཡུག་རེན་གྱེན་ལོག་པས་ཨུ་རུ་སུ་དང་ཁེར་མེ་བར་ལ་གཞུང་ལམ་ཞིག་གསར་བཟོ་བྱས་ཚེ། ཁོ་ཚོས་ཡུག་རེན་དང་ཨུ་རུ་སུའི་བར་གྱི་ཨ་ཛོ་མཚོ་ (Azov ) སྟངས་འཛིན་བྱེད་སྲིད་པ་དང་། ཡུག་རེན་གྱི་བདེ་འཇགས་དང་ཐབས་ཇུས་ལ་གྲོང་ཁྱེར་དེ་གལ་འགངས་ཆེན་པོ་ཆགས་ཡོད་སྟབས། ད་ལྟ་ཡུག་རེན་དམག་དཔུང་གྱིས་མཱ་རའེ་ཧྥོལ་ (Mariupol) གྲོང་ཁྱེར་སྲུང་སྐྱོབ་བྱེད་བཞིན་ཡོད་འདུག

ཆབ་སྲིད་དབྱེ་ཞིབ་པ་ཚོས། ཐེངས་འདིར་ཡུག་རེན་གྱེན་ལོག་ཤོག་ཁག་གིས་ཡུག་རེན་གྱི་གྲོང་ཁྱེར་གལ་ཆེན་པོ་ཞིག་བཙན་བཟུང་བྱས་ཡོད་སྟབས་མ་འོངས་པར་ཡུག་རེན་གྱི་བདེ་འཇགས་ཐོག་དཀའ་ངལ་སྔར་ལས་ཆེ་རུ་འགྲོ་རྒྱུ་ཡིན་སྐོར་བརྗོད་འདུག

གསར་འགོད་པ། དོན་གྲུབ།