དབྱིན་ཡུལ་བོད་ཀྱི་སྐུ་ཚབ་དོན་གཅོད་ཐུབ་བསྟན་བསམ་འགྲུབ་མཆོག་གི་ཚབ་དུ་ཆོས་འཕེལ་ཚེ་རིང་ལགས་བསྐོ་བཞག་གནང་ཡོད་འདུག
ཉེ་ལམ་བོད་མིའི་སྒྲིག་འཛུགས་འཛིན་སྐྱོང་བཀའ་ཤག་གིས་གསལ་བསྒྲགས་ཤིག་སྤེལ་ཏེ། དབྱིན་ཡུལ་བོད་ཀྱི་སྐུ་ཚབ་དོན་གཅོད་ཁང་གི་དོན་གཅོད་ཐུབ་བསྟན་བསམ་འགྲུབ་མཆོག་གི་ཚབ་དུ། དབྱིན་ཡུལ་དོན་གཅོད་ཁང་གི་ལས་བྱེད་བགྲེས་པ་ཆོས་འཕེལ་ཚེ་རིང་ལགས་བསྐོ་བཞག་གནང་ཡོད་པ་དང་། འདི་ལོའི་ཕྱི་ཟླ་ ༩ ཚེས་ ༡ ཉིན་ནས་བཟུང་ཁོང་གིས་དངོས་སུ་དབྱིན་ཡུལ་དོན་གཅོད་ཀྱི་ལས་འགན་འཁུར་རྒྱུ་ཡིན་ཚུལ་བཀོད་ཡོད་འདུག
ཆོས་འཕེལ་ཚེ་རིང་ལགས་ནི། ༡༩༧༢ ལོར་རྒྱ་གར་ནང་སྐྱེས་པ་དང་། ༡༩༨༢ ལོར་བོད་ཕྲུག་ཁྱིམ་སྡེས་དབྱིན་ཡུལ་གྱི་ཕེ་ཌེར་ལོ་ཛེ་ཁྱིམ་སྡེ་ (Pestalozzi Village) ཞེས་པའི་སློབ་གྲྭར་བྱིས་པ་བརྒྱད་བཏང་བའི་གྲས་ཀྱི་གཅིག་ཡིན་འདུག ༡༩༩༦ ལོར་སློབ་གྲྭར་སྤྱི་དམངས་འཛུགས་སྐྲུན་འཆར་འགོད་ཀྱི་ཕྱག་ཁྱེར་བླངས་རྗེས། ༡༩༩༧ ནས་ ༡༩༩༩ ལོའི་བར་བོད་གནས་འབྲེལ་མཐུད་ཁང་དུ་ལས་ཀ་བྱས་ཡོད་པ་དང་། ༡༩༩༩ ནས་ ༢༠༠༤ ལོའི་བར་དབྱིན་ཡུལ་བོད་མིའི་སྤྱི་ཚོགས་ཀྱི་དྲུང་ཆེའི་ལས་འགན་འཁུར་འདུག ༢༠༠༥ ནས་ ༢༠༠༨ ལོའི་བར་རྒྱལ་སྤྱིའི་བོད་དོན་རྒྱབ་སྐྱོར་འབྲེལ་མཐུད་པ་དང་། ༢༠༠༨ ལོ་ནས་ ༢༠༡༣ བར་བོད་མིའི་སྒྲིག་འཛུགས་ཕྱི་འབྲེལ་ལས་ཁུངས་ཀྱི་གསར་འགོད་འབྲེལ་མཐུད་པ། ༢༠༡༤ ལོ་ནས་ད་བར་དབྱིན་ཡུལ་སྐུ་ཚབ་དོན་གཅོད་ཁང་གི་དམིགས་བསལ་ལས་འཆར་འབྲེལ་མཐུད་པའི་ལས་འགན་བཅས་འཁུར་ཡོད་འདུག
གསར་འགོད་པ། དོན་གོ
