པ་ཀི་སི་ཐན་གྱི་དྲང་བདེན་ཚོགས་པའི་ཚོགས་གཙོ་ཨེམ་རན་ཁན་དང་ཆོས་དཔོན་ཏ་ཧེ་རུལ་ཁཱ་ཌར་གྱི་རྗེས་འབྲང་པ་ཚོས་སྲིད་བློན་ནཱ་ཝ་སེ་ཤཱ་རེབ་ཀྱིས་དགོངས་པ་ཞུ་དགོས་པའི་ངོ་རྒོལ་བྱེད་བཞིན་ཡོད་འདུག
འདས་པའི་བདུན་ཕྲག་གཅིག་གཉིས་གོང་ནས་པ་ཀི་སི་ཐན་གྱི་ཨེམ་རན་ཁན་ (Imran Khan) གྱིས་སྣེ་ཁྲིད་པའི་པ་ཀི་སི་ཐན་དྲང་བདེན་ཚོགས་པ་དང་ཆོས་དཔོན་ཏ་ཧེ་རུལ་ཁཱ་ཌར་ (Tahir-ul-Qadri) གྱི་རྗེས་འབྲང་པ་ ༣༠༠༠༠ ལྷག་རྒྱལ་ས་ཨེ་སི་ལམ་མཱ་བྷ་ཋའི་གཞུང་གི་ལྟེ་གནས་དང་། སྲིད་བློན་བཞུགས་ཤག ཆེས་མཐོའི་ཁྲིམས་ཁང་། གྲོས་ཚོགས་བཅས་ཀྱི་མདུན་ཐང་དུ་འཛོམས་ཏེ། ད་ལྟའི་སྲིད་བློན་ནཱ་ཝ་སེ་ཤཱ་རེབ་ཀྱིས་ལས་གནས་ནས་དགོངས་པ་ཞུ་དགོས་པའི་ངོ་རྒོལ་ཤུགས་ཆེན་བྱེད་བཞིན་ཡོད་ཅིང་། ཚེས་ ༣༠ དང་ ༣༡ བཅས་ཉིན་གཉིས་རིང་ཉེན་རྟོག་པ་དང་ངོ་རྒོལ་བའི་བར་འཁྲུག་འཛིང་ཤོར་ཏེ་མི་ ༣ རྐྱེན་འདས་དང་གཞན་མི་ ༤༠༠ ལྷག་ལ་རྨས་སྐྱོན་བཏང་ཡོད་འདུག
འདིའི་ཐད་པ་ཀི་སི་ཐན་ནང་སྲིད་བློན་ཆེན་ནེ་སར་ཨ་ལི་ཁན་ (Chaudhry Nisar Ali Khan) གྱིས། “ད་རེབ་ངོ་རྒོལ་བའི་བྱ་སྤྱོད་འདི་ནི་པ་ཀི་སི་ཐན་ལ་གྱེན་ལོག་བྱེད་རྒྱུའི་ཐབས་ཇུས་ཤིག་ཡིན་སྟབས། ཁོ་ཚོ་རྒྱལ་ཁབ་ལ་ཁ་གཏད་གཅོག་མཁན་གྱི་འཇིགས་སྐུལ་རིང་ལུགས་པ་ཞིག་རེད” ཅེས་བརྗོད་འདུག
ངོ་རྒོལ་བ་ཚོའི་ལས་འགུལ་མུ་མཐུད་ཤུགས་ཆེ་རུ་ཕྱིན་ཏེ། ཁ་སང་གཞུང་འབྲེལ་བརྙན་འཕྲིན་ཁང་བཀག་སྡོམ་བྱས་ཡོད་སྟབས། པ་ཀི་སི་ཐན་དམག་སྤྱི་ར་ཧེལ་ཤཱ་རེབ་ (Gen. Raheel Sharif) ཀྱིས་སྲིད་བློན་ནཱ་ཝ་སེ་ཤཱ་རེབ་ལ་ཐུག་འཕྲད་བྱས་ཏེ། ཁོང་གིས་ཨེམ་རན་ཁན་དང་གྲོས་བསྡུར་བརྒྱུད་དཀའ་རྙོག་སེལ་ཐབས་བྱེད་དགོས་པའི་འབོད་སྐུལ་ཞུས་པ་ལྟར་ཁས་ལེན་བྱས་ཡོད་ཀྱང་། དེ་རིང་ཨེམ་རན་ཁན་གྱིས་ནཱ་ཝ་སེ་ཤཱ་རེབ་ཀྱིས་སྲིད་བློན་གྱི་ལས་གནས་ནས་དགོངས་ཞུ་མ་བྱས་ཚེ་གྲོས་མོལ་བྱ་རྒྱུ་མིན་སྐོར་བརྗོད་ཡོད་འདུག
༡༩༩༩ ལོར་ནཱ་ཝ་ཤཱ་རེབ་ཀྱིས་པ་ཀི་སི་ཐན་གྱི་སྲིད་བློན་ཀྱི་ལས་འགན་ཁུར་སྐབས་དམག་སྦྱི་མུ་ཤཱ་རབ་ (Pervez Musharraf) དང་འབྲེལ་ལམ་ཡག་པོ་མེད་པར་བརྟེན། ཁོས་དམག་སྤྱི་མུ་ཤཱ་རབ་ཀྱི་ཐད་འཕུར་གནམ་གྲུ་བབ་མ་བཅུག་པར་ལྐོག་གསོད་བྱེད་རྩིས་བྱས་སྟབས། དཔག་དཔུང་གིས་སྲིད་བློན་ནཱ་ཝ་སེ་ཤཱ་རབ་སྣང་མེད་ཐོག་དྲག་པོའི་ཁྲིམས་གཞི་བསྡམས་ཏེ་སྲིད་དབང་མགོ་རྟིང་བསློགས་ཏེ་ནཱ་ཝ་སེ་ཤཱ་རབ་བཙོན་འཇུག་བྱས་ཡོད་པ་དང་། ༢༠༠༨ ལོའི་བར་མུ་ཤཱ་རབ་ཀྱིས་པ་ཀི་སི་ཐན་གྱི་སྲིད་དབང་བཟུང་ཡོད་ཀྱང་། དེའི་རྗེས་རྒྱལ་ཡོངས་འོས་བསྡུའི་ཁྲོད་པ་ཀི་སི་ཐན་མི་མང་ཚོགས་པར་རྒྱལ་ཁ་ཐོབ་སྟེ། ཚོགས་པའི་མགོ་ཁྲིད་དང་སྲིད་བློན་ཟུར་པ་བྷ་ནེ་ཌོ་བྷུ་ཌོ་ཡི་བཟའ་ཟླ་ཛར་དྷ་རི་ (Asif Ali Zardari) སྲིད་འཛིན་ལ་བསྐོ་བཞག་གིས་ ༢༠༡༣ ལོའི་བར་རྒྱལ་ཁབ་བསྐྱངས་ཡོད་ཀྱང་། ༢༠༡༣ ལོའི་རྒྱལ་ཡོངས་འོས་བསྡུའི་ཁྲོད་ད་ལྟའི་སྲིད་བློན་ནཱ་ཝ་སེ་ཤཱ་རེབ་ཀྱིས་སྣེ་ཁྲིད་པའི་ཚོགས་པར་རྒྱལ་ཁ་ཐོབ་སྟེ། ཁོང་བསྐྱར་དུ་སྲིད་བློན་ལ་བསྐོ་བཞག་བྱུང་ཡོད།
ཨེམ་རན་ཁན་སོགས་ཀྱིས་ ༢༠༡༣ ལོའི་རྒྱལ་ཡོངས་འོས་བསྡུའི་སྐབས་ད་ལྟའི་སྲིད་བློན་ནཱ་ཝ་སེ་ཤཱ་རེབ་ཀྱིས་དྲང་པོ་བྱས་མེད་ལུགས་སྐྱོན་འཛུགས་ཀྱིས་ངོ་རྒོལ་སྔ་རྗེས་བྱས་ཏེ་ཁོང་གིས་སྲིད་བློན་ནས་དགོངས་པ་ཞུ་དགོས་པའི་རེ་འདུན་འདོན་བཞིན་ཡོད་པ་དང་། ༢༠༡༤ ལོའི་ཟླ་ ༦ ནང་པ་ཀི་སི་ཐན་ཉེན་རྟོག་པས་ཆོས་དཔོན་ཏ་ཧེ་རུལ་ཁཱ་ཌར་གྱིས་སྣེ་ཁྲིད་པའི་པ་ཀི་སི་ཐན་མང་ཚོགས་ལས་འགུལ་ཚོགས་པའི་(Pakistan People’s Movement) ཚོགས་མི་ ༡༤ བསད་པ་མ་ཟད། བུད་མེད་ཁག་ཅིག་ལ་རྨས་སྐྱོན་བཏང་ཡོད་སྟབས་ཆོས་དཔོན་ཏ་ཧེ་རུལ་ཁཱ་ཌར་གྱིས་ད་ལྟའི་གཞུང་གི་སྲིད་དབང་མགོ་རྟིང་བསློགས་ཏེ། པ་ཀི་སི་ཐན་ནང་ཆབ་སྲིད་ལམ་ལུགས་གསར་པ་ཞིག་འཛུགས་རྒྱུའི་དམ་བཅའ་བཞག་སྟེ་གཞུང་ལ་ངོ་རྒོལ་བྱེད་བཞིན་ཡོད་འདུག
ཨེམ་རན་ཁན་དང་ཆོས་དཔོན་ཏ་ཧེ་ཀཱ་ཌར་གྱིས་སྣེ་ཁྲིད་པའི་ངོ་རྒོལ་བ་ཚོས་ནཱ་ཝ་སེ་ཤཱ་རབ་ཀྱི་གཞུང་མགོ་རྟིང་སློག་རྒྱུའི་དམིགས་ཡུལ་གཅིག་མཚུངས་མིན་ཡང་། ཟླ་འདིའི་ཚེས་ ༡ ནས་བཟུང་ངོ་རྒོལ་བ་ཚོས་གྲོས་ཚོགས་ར་བ་དང་གཞུང་གི་བསྟི་གནས་ཁང་། སྲིད་བློན་གྱི་བཞུགས་ཤག་སོགས་སུ་གཏོར་རྒོལ་དང་། གཞུང་གི་བརྙན་འཕྲིན་ཚན་པ་བཀག་སྡོམ་དང་འབྲེལ་གཞི་རྒྱ་ཆེ་བའི་ངོ་རྒོལ་ལས་འགུལ་སྤེལ་བཞིན་ཡོད་སྟབས། དེ་རིང་གྲོས་ཚོགས་གོང་འོག་གཉིས་སྐོང་ཚོགས་བྱས་ཏེ་གོ་བསྡུར་བྱས་ཡོད་ཀྱང་། ཨེམ་རན་ཁན་གྱིས་ཚོགས་པའི་གྲོས་ཚོགས་འཐུས་མི་ཚོས་གྲོས་ཚོགས་ནས་དགོངས་ཞུ་ཞུས་ཏེ། ནཱ་ཝ་སེ་ཤཱ་རེབ་ཀྱི་སྲིད་དབང་ལ་ངོ་རྒོལ་བྱས་ཡོད་པ་མ་ཟད། ཨེམ་རན་ཁན་དང་ཆོས་དཔོན་ཏ་ཧེ་ཀཱ་ཌར་གྱིས་མང་ཚོགས་ཚོར་གཞུང་ལམ་ཐོག་ཐོན་ཏེ་གཞུང་ལ་ངོ་རྒོལ་བྱེད་དགོས་པའི་བརྒྱུད་སྐུལ་དང་། ཨེམ་རན་ཁན་གྱིས་མང་ཚོགས་ཚོ་ས་ཆ་འདི་ནས་ཕྱིར་ལོག་བྱས་ཀྱང་། ང་ནཱ་ཝ་སེ་ཤཱ་རེབ་ལས་གནས་ནས་དགོངས་ཞུ་མ་བྱས་བར་འདིར་སྡོད་རྒྱུ་ཡིན་སྐོར་དང་། ཆོས་དཔོན་ཏ་ཧེ་ཀཱ་ཌར་གྱིས་ནཱ་ཝ་སེ་ཤཱ་རབ་ཀྱིས་འོས་བསྡུའི་སྐབས་དྲང་པོ་བྱས་ མེད་ལུགས་ཀྱི་གནད་དོན་ཐག་གཅོད་མ་བྱུང་བར། ལས་གནས་ལས་དགོངས་ཞུ་བྱ་དགོས་སྐོར་སོགས་བརྗོད་བཞིན་ཡོད་འདུག
ད་ལྟ་པ་ཀི་སི་ཐན་གྱི་གྲོས་ཚོགས་གོང་འོག་གི་ཚོགས་གཙོ་རྣམ་གཉིས་ཀྱིས་ནཱ་ཝ་སེ་ཤཱ་རེབ་ལ་རྒྱབ་སྐྱོར་བྱེད་བཞིན་ཡོད་པ་མ་ཟད། ཆབ་སྲིད་པ་གྲགས་ཅན་དང་གྲོས་ཚོགས་འོག་མའི་འཐུས་མི་ཨ་སན་ (Aitzaz Ahsan) གྱིས་སྲིད་བློན་ལས་གནས་ནས་དགོངས་ཞུ་དགོས་པའི་དགོས་འདུན་བཏོན་པ་དེ་ནི། རྩ་ཁྲིམས་དང་ཡོངས་སུ་འགལ་བ་ཞིག་ཡིན་སྟབས་ང་ཚོ་ཚང་མས་ནཱ་ཝ་སེ་ཤཱ་རབ་ལ་རྒྱབ་སྐྱོར་ཡོད་བརྗོད་འདུག
ཆབ་སྲིད་དབྱེ་ཞིབ་པ་ཚོས། ད་ལྟ་པ་ཀི་སི་ཐན་ནང་ཆབ་སྲིད་ཀྱི་དཀའ་རྙོག་ཤུགས་ཆེན་འཕྲད་བཞིན་ཡོད་སྟབས། མ་འོངས་པར་དམག་དཔུང་གིས་དྲག་པོའི་ཁྲིམས་གཞི་བསྡམས་ཏེ། རྒྱལ་ཁབ་ཁ་ལོ་བསྒྱུར་སྲིད་པ་ཞིག་ཡིན་སྐོར་རྗོད་བཞིན་ཡོད་འདུག
གསར་འགོད་པ། དོན་གྲུབ།
