ད་ལྟའི་བོད་ནང་གི་དབང་འཛིན་པ་གླེང་བ།

དེ་རིང་ཕྱི་དྲོར་གངས་སྐྱིད་གཉའ་ཁྲི་ཚོགས་ཁང་དུ་ད་ལྟའི་བོད་ནང་གི་དབང་འཛིན་པའི་གནས་སྟངས་སྐོར་གཏམ་བཤད་གནང་སྐབས་བོད་རིགས་དབང་འཛིན་པའི་གྲངས་འབོར་ཉུང་ཉུང་ཡིན་སྐོར་བརྗོད་སོང་།

དེ་རིང་ཕྱི་དྲོའི་ཆུ་ཚོད་ ༤ པ་ཙམ་ལ། གངས་སྐྱིད་གཉའ་ཁྲི་ཚོགས་ཁང་དུ་བོད་ཀྱི་སྲིད་བྱུས་ཉམས་ཞིབ་ཁང་གི་གོ་སྒྲིག་འོག འདི་ལོའི་ཕྱི་ཟླ་ ༤ ནང་ཉམས་ཞིབ་ཁང་གིས་བཏོན་པའི་༼ད་ལྟའི་བོད་ནང་གི་དབང་འཛིན་པ༽ཞེས་པའི་བོད་དང་འབྲེལ་བའི་ཁུལ་དང་གྲོང་ཁྱེར་ནས་ལྗོངས་དང་ཞིང་ཆེན་རིམ་པ་བར་གྱི་དཔོན་རིགས་ངོ་སྤྲོད་ཀྱི་དེབ་དང་འབྲེལ་ཏེ། བོད་མིའི་སྒྲིག་འཛུགས་ཀྱི་སྲི་ཞུ་བ་ཚོར་གཏམ་བཤད་ཚོགས་འདུ་ཞིག་སྐོང་ཚོགས་གནང་སོང་བ་དང་། ཚོགས་འདུའི་ཐོག་བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན་ཐུབ་བསྟན་བསམ་འཕེལ་ལགས་དང་། དཔེ་དེབ་རྩོམ་སྒྲིག་པ་དང་ཉམས་ཞིབ་ཁང་གི་གྲོས་སྟོན་པ་ཨཱ་ཅཱརྱ་བློ་བཟང་ལགས་དང་བདེ་སྲུང་དྲུང་ཆེ་འཕགས་པ་ཚེ་རིང་ལགས། དེ་བཞིན་སྲི་ཞུ་བ་བཅས་ཁྱོན་མི་གྲངས་ ༡༠༠ མ་ཟིན་ཙམ་འདུ་འཛོམས་གནང་འདུག་པ་དང་། དཔེ་དེབ་རྩོམ་སྒྲིག་པ་གཉིས་ཀྱིས་དེབ་དང་འབྲེལ་བའི་གཏམ་བཤད་གནང་ཚར་རྗེས་དང་དྲི་བ་དྲིས་ལན་བཅས་གནང་སོང་།

ཚོགས་ཐོག་ཏུ་དཔེ་དེབ་རྩོམ་སྒྲིག་པ་འཕགས་པ་ཚེ་རིང་ལགས་ཀྱིས། རྒྱ་གཞུང་གིས་བོད་ནང་རང་ཁྱིམ་རང་བདག་གི་དབང་ཆ་ཚང་མ་སྤྲོད་ཀྱི་ཡོད་ལུགས་བརྗོད་ཀྱང་། བོད་རིགས་འདུས་སྡོད་ཁུལ་རང་སྐྱོང་ལྗོངས་གཅིག་དང་ཞིང་ཆེན་ ༤ ཡི་དམར་ཤོག་ཚོགས་པ་དང་སྲིད་གཞུང་། མང་འཐུས། སྲིད་གྲོས་བཅས་ཀྱི་ནང་ཞིབ་འཇུག་བྱེད་སྐབས། བོད་རང་སྐྱོང་ལྗོངས་ཀྱི་དམར་ཤོག་ཚོགས་པའི་རྒྱུན་ལས་ ༡༥ ནང་བོད་རིགས་ ༦ དང་། སྲིད་གཞུང་གི་དཔོན་པོ་ ༡༤ ནང་བོད་རིགས་ ༨ ། མང་འཐུས་ ༡༢ ནང་བོད་རིགས་ ༧། སྲིད་གྲོས་དཔོན་པོ་ ༡༧ ནང་བོད་རིགས་ ༡༣ ཡོད་པ་དང་། དེ་བཞིན། སི་ཁྲོན་ཞིང་ཆེན་གྱི་དམར་ཤོག་རྒྱུན་ལས་ ༡༢ ནང་རྒྱ་མིང་ཅན་གྱི་བོད་རིགས་གཅིག སྲིད་གཞུང་དཔོན་པོ་ ༩ ནང་བོད་རིགས་གཅིག་ཀྱང་མེད་པ་དང་། མང་འཐུས་མི་ ༧ ནང་རྒྱ་མིང་ཅན་གྱི་བོད་རིགས་གཅིག སྲིད་གྲོས་མི་ ༡༡ ནང་བོད་རིགས་གཅིག་ཀྱང་མེད་པ་རེད། ཀན་སུའུ་ཞིང་ཆེན་དམར་ཤོག་རྒྱུན་ལས་ ༡༣ ནང་བོད་རིགས་གཅིག སྲིད་གཞུང་གི་དཔོན་པོ་ ༧ གྱི་ནང་བོད་རིགས་མེད་པ་དང་། མང་འཐུས་མི་ ༧ ཀྱི་ནང་བོད་རིགས་གཅིག སྲིད་གྲོས་མི་ ༩ ནང་བོད་རིགས་གཅིག་ཡོད་པ་དང་། མཚོ་སྔོན་ཞིང་ཆེན་དམར་ཤོག་རྒྱུན་ལས་ ༡༣ ནང་བོད་རིགས་ ༢། སྲིད་གཞུང་དཔོན་པོ་ ༩ ཡི་ནང་བོད་རིགས་ ༡། མང་འཐུས་ ༧ གྱི་ནང་བོད་རིགས་ ༡། སྲིད་གྲོས་དཔོན་པོ་ ༡༠ ཡི་ནང་བོད་རིགས་ ༣ ལས་མེད་པ་དང་། བོད་ཁུལ་སྤྱི་ཡོངས་ཀྱི་དབང་འཛིན་པའི་ནང་བོད་རིགས་དཔོན་པོའི་གྲངས་འབོར་ཅུང་མང་ཤོས་དེ་བདེ་ཆེན་བོད་རིགས་རང་སྐྱོང་ཁུལ་ཡིན་སྐོར་དང་། ད་ལོར་འདོན་སྤེལ་བྱས་པའི་དེབ་དེའི་ནང་ཡོད་པའི་དཔོན་རིགས་རེ་ཟུང་འཕོ་འགྱུར་བཏང་ཟིན་ཡང་གྲངས་འབོར་ཐད་འགྱུར་བ་ཕྱིན་མེད་སྐོར་སོགས་བརྗོད་སོང་།

རྩོམ་སྒྲིག་པ་ཨཱ་ཅཱརྱ་བློ་བཟང་ལགས་ཀྱིས་ཕྱི་ལོ་ ༡༩༦༠ ནས་བཟུང་རྒྱ་གཞུང་གིས་རྒྱ་ནག་ནང་ལོགས་ནས་རྒྱ་རིགས་མང་པོ་བོད་ཁུལ་དུ་གནས་སྤོ་བྱས་ཡོད་པ་མ་ཟད། ཉེ་སྔོན་ལོ་ངོ་ ༢༠ འཁོར་བའི་དུས་དྲན་ཞིག་སྐོང་ཚོགས་བྱས་ཏེ། ཕྱི་ལོ་ ༡༩༩༥ ནས་ད་ལྟའི་བར་དུ་རྒྱ་ནག་ནས་བོད་སྐྱོར་གྱི་ལས་བྱེད་ ༦༠༠༠ བོད་ནང་དུ་བཏང་ཡོད་ལུགས་བརྗོད་ཀྱི་ཡོད་པ་དང་། འཛམ་བུ་གླིང་གང་དུ་བལྟས་པ་ཡིན་ནའང་རོགས་པ་བྱེད་མཁན་ཞིག་གིས་དབང་ཆ་འཛིན་གྱི་མེད་སྟབས། དབང་ཆ་བོད་མི་རང་ལ་འཛིན་དུ་བཅུག་ནས་རོགས་པ་བྱས་ན་སྙིང་རྗེ་བོ་ཡོད་པ་རེད། ཡིན་ནའང་། ཁོ་ཚོས་དེ་ལྟར་མ་བྱས་པར་དབང་ཆ་ཚང་མ་ཁོ་རང་ཚོས་འཕྲོག་སྟེ་ལོ་ ༣ ནང་ཕྱིར་རྒྱ་ནག་ཏུ་ལོག་དགོས་ཀྱི་ཡོད་ཀྱང་། ཁོ་ཚོ་མང་པོ་ཞིག་ཕྱིར་མ་ལོག་པར་མུ་མཐུད་དབང་ཆ་བཟུང་ནས་བསྡད་ཡོད་པས། བོད་རིགས་སློབ་སྦྱོང་ཡོད་མཁན་ཚོར་བོད་ནང་ནས་ལས་ཀ་མ་རག་པར་རྒྱ་ནག་ནང་དུ་མར་འགྲོ་བཞིན་ཡོད་པ་རེད། རྒྱ་གཞུང་གིས་རྒྱ་ནག་ནང་ལོགས་ཀྱི་མི་མང་པོ་བོད་དུ་གནས་སྤོ་རྒྱུར་སྐུལ་འདེད་གཏོང་བཞིན་ཡོད་པ་མ་ཟད། མཐུན་རྐྱེན་བསྐྲུན་ཏེ་བོད་ནང་གཞིས་ཆགས་སུ་འཇུག་བཞིན་ཡོད་པ་རེད། རྒྱ་ནག་ནང་གི་ལས་བྱེད་བོད་ལ་ཡོང་མཁན་ཡོད་ན་དེ་ལ་སྲིད་གཞུང་གིས་དམིགས་བསལ་མང་པོ་ཡོད་པ་རེད། ཁོ་ཚོར་གླ་ཆ་དང་གུང་གསེང་མང་བ་ཡོད་པ་མ་ཟད། ཁོ་ཚོའི་ཁྱིམ་མི་དང་བྱིས་པ་སོགས་ལའང་དམིགས་བསལ་གྱི་མཐུན་རྐྱེན་མང་པོ་ཞེ་དྲག་ཡོད་པ་རེད། ཡིན་ནའང་། ང་ཚོ་ཁྱེད་ཚོར་རོགས་པ་བྱེད་དུ་ཡོང་ནས་མཁའ་དབུགས་ཀྱིས་མ་འདང་བར་མི་མང་པོ་འདི་འདྲ་ཞིག་ཤི་སོང་ཟེར་གྱི་ཡོད་པ་རེད། དངོས་གནས་བྱས་ན་བོད་མི་གསོ་སྐྱོང་བྱས་པ་ཡིན་ན་དཀའ་ལས་དེ་འདྲ་རྒྱག་དགོས་དོན་ཡོད་པ་མ་རེད། ཡིན་ནའང་། ཁོ་ཚོས་དེ་བྱེད་ཀྱི་ཡོད་པ་མ་རེད། བོད་རིགས་གཞོན་སྐྱེས་མང་པོ་ཞིག་མར་རྒྱ་ནག་ནང་གཏོང་བཞིན་ཡོད་པ་དང་། རྒྱ་ནག་ནང་གི་མི་མང་པོ་ཞིག་ཡར་བོད་ནང་དུ་གཏོང་བཞིན་ཡོད་པ་དེ་ཁོ་ཚོའི་ལས་འགུལ་རེད། ཅེས་དང་། དེ་བཞིན་རྒྱ་ནག་དབུས་དམར་ཤོག་ཚོགས་པའི་རྒྱུན་ལས་ ༧ གྱི་ནང་ད་ལྟའི་བར་བོད་སོགས་གྲངས་ཉུང་མི་རིགས་ཀྱི་དཔོན་རིགས་གཅིག་ཀྱང་མེད་ལ། བུད་མེད་ཡང་གཅིག་ཀྱང་བྱུང་མེད་སྐོར་སོགས་བརྗོད་སོང་།

གསར་འགོད་པ། པདྨ་མཚོ།