མི་ ༡༥༠ ལྷག་རྐྱེན་འདས།

རྒྱ་གར་ནུབ་བྱང་ཀ་ཤི་མིར་མངའ་སྡེའི་ནང་ཆུ་ལོག་གིས་གནོད་སྐྱོན་ཆེན་པོ་ཐེབས་ཏེ་ཉུང་མཐར་མི་གྲངས་ ༡༥༠ རྐྱེན་འདས་སུ་གྱུར་ཡོད་འདུག

རྒྱ་གར་ནུབ་བྱང་ཁུལ་གྱི་ཇ་མུ་དང་ཀ་ཤི་མིར་མངའ་སྡེའི་ནང་བདུན་ཕྲག་གཅིག་ཙམ་གྱི་རིང་བསྟུད་མར་དྲག་ཆར་བབས་པར་བརྟེན། ས་གནས་ཀྱི་ཇེ་ལོམ་གཙང་པོ་(The Jhelum river)འཕྱུར་བ་དང་ས་རུད་བྱུང་སྟེ། ལྟེ་གནས་གྲོང་ཁྱེར་སི་རི་ནཱ་གྷར་ཡོངས་སུ་ཆུས་ཁེངས་ནས་སྡོད་ཁང་དང་གཞུང་ལམ། ཟ་པ་སོགས་ལ་གནོད་སྐྱོན་ཆེན་པོ་ཐེབས་ཡོད་པ་མ་ཟད། སྨན་ཁང་ ༣ དང་གཞུང་གི་བྱིས་པའི་སྨན་ཁང་། དེ་བཞིན། དམག་སྤྱི་ཁང་བཅས་ལ་ཆུ་ལོག་གིས་གཏོར་སྐྱོན་ཚབས་ཆེན་བཟོས་ཡོད་པ་དང་། ཐེངས་འདིའི གནོད་སྐྱོན་ཁྲོད་ཉུང་མཐར་མི་གྲངས་ ༡༥༠ ལྷག་རྐྱེན་འདས་སུ་གྱུར་བ་ཤེས་རྟོགས་བྱུང་ཡོད་ཅིང་། འདས་གྲོངས་ཀྱི་གྲངས་འབོར་མུ་མཐུད་འཕར་བཞིན་ཡོད་འདུག

རྒྱ་གར་ནང་སྲིད་བློན་ཆེན་ར་ཇེ་ནཱ་ཊི་སིན་(Shri Rajnath Singh) གྱིས། ད་རེས་ཀྱི་ཆུ་ལོག་གིས་ས་གནས་ཀྱི་གྲོང་བརྡལ་སྟོང་ཕྲག་འགར་གནོད་སྐྱོན་བཟོས་ཡོད་པ་མ་ཟད། གྲོང་བརྡལ་ ༣༥༠ ཆུས་བསྣུབས་ཡོད་སྐོར་བརྗོད་འདུག་ལ། ད་ལྟའི་ཆར་དམག་མི་ ༡༢༠ དང་ཉེན་རྟོག་པའི་རུ་ཁག་ ༨ ལྷག་གིས་གནམ་གྲུ་དང་ཐད་འཕུར་གནམ་གྲུ། གྲུ་ཆུང་བཅས་ཆེད་གཏོང་གིས་མྱུར་སྐྱོབ་བྱེད་ཀྱིན་ཡོད་པ་དང་། ཡུལ་མི་སྟོང་ཕྲག་མང་པོ་གནས་སྤོ་བཞིན་ཡོད་འདུག

ཀ་ཤི་མིར་མངའ་སྡེའི་བློན་ཆེན་ཨོ་མར་ཨབ་ཌུ་ལཱས་(Omar Abdullah)གསར་འགོད་པར། སྤྱིར་བཏང་ད་ལྟ་གནས་སྟངས་སྐྱོ་བོ་ཡིན་ཡང་ངེས་པར་དུ་ཉེན་ཁ་ལས་ཐར་ཐབས་བྱེད་དགོས་སྐོར་བརྗོད་འདུག་ལ། ཡང་སི་རི་ནཱ་གྷར་ཉེན་རྟོག་ཁང་གི་ཉེན་རྟོག་པ་ཞིག་གིས། ད་ལྟའི་ཆར་ས་གནས་སུ་ཁ་པར་གྱི་བརྡ་རྟགས་ཆད་པ་མ་ཟད། ཟམ་པ་དང་གཞུང་ལམ་མང་པོར་གཏོར་སྐྱོན་ཐེབས་ཡོད་སྟབས། མི་མང་རྐྱེན་འདས་དང་ཁང་པ་རྡིབ་སྐྱོན་སོགས་ཀྱི་གནས་ཚུལ་མང་པོ་ཤེས་རྟོགས་མ་ཐུབ་པར་དཀའ་ངལ་ཧ་ཅང་ཆེན་པོའི་འོག་གནས་ཡོད་སྐོར་བརྗོད་འདུག

ཟླ་འདིའི་ཕྱི་ཚེས་ ༧ ཉིན་རྒྱ་གར་གྱི་སྲིད་བློན་ནཱ་རེན་ཌ་མུ་དྷེ་ས་གནས་སུ་ཕེབས་ཏེ། ཐེངས་འདིའི་ཆུ་ལོག་གནོད་སྐྱོན་རྒྱལ་ཡོངས་རང་བཞིན་གྱི་གོད་ཆག་ཅིག་ཡིན་ལུགས་བརྗོད་ཡོད་པ་མ་ཟད། ཀ་ཤི་མིར་གཞུང་ལ་ཨ་སྒོར་དུང་ཕྱུར་ ༡.༦༦ གིས་རོགས་རམ་གནང་ཡོད་འདུག

གསར་འགོད་པ། པདྨ་མཚོ།