དེ་རིང་བོད་ཀྱི་བུད་མེད་ལྷན་ཚོགས་སླར་གསོ་བྱུང་སྟེ་ལོ་ངོ་ ༣༠ འཁོར་བའི་དུས་དྲན་ཐོག བཀའ་ཟུར་རིན་ཆེན་མཁའ་འགྲོ་མཆོག་གིས་བོད་ཀྱི་བུད་མེད་ཚོས་བསམ་བློ་རྒྱ་ཆེ་ས་ནས་གཏོང་རྒྱུ་གལ་ཆེན་ཡིན་ལ། དེ་ཡང་དང་པོ་རང་གི་ཁྱིམ་ཚང་ནས་མགོ་བརྩམས་དགོས་སྐོར་གསུངས་སོང་།
དེ་རིང་སྔ་དྲོའི་ ༧།༣༠ ཙམ་ལ་བཞུགས་སྒར་དྷ་རམ་ས་ལའི་ལྷ་རྒྱལ་རིར། བོད་ཀྱི་བུད་མེད་ལྷན་ཚོགས་བཙན་བྱོལ་ནང་སླར་གསོ་བྱུང་སྟེ་ལོ་ངོ་ ༣༠ འཁོར་བའི་དུས་དྲན་མཛད་སྒོ་ཚོགས་སོང་བ་དང་། མཛད་སྒོའི་ཐོག་བཀའ་ཟུར་རིན་ཆེན་མཁའ་འགྲོ་མཆོག་དང་བོད་མི་མང་སྤྱི་འཐུས་ཡེ་ཤེས་སྒྲོལ་མ་ལགས། སྤྱིར་ཟུར་ངག་དབང་ལྷ་མོ་ལགས། དེ་བཞིན་བུད་མེད་ལྷན་ཚོགས་དབུས་ས་གཉིས་ཀྱི་རྒྱུན་ལས་གཙོས་དྷ་ས་ཁུལ་གྱི་གཞུང་འབྲེལ་མ་ཡིན་པའི་ཚོགས་སྐྱིད་ཁག་གི་སྐུ་ཚབ་དང་། ཐང་སྟོང་གླུ་གར་ཚོགས་པ། མི་མང་བཅས་ཁྱོན་མི་གྲངས་ ༡༠༠ ཡས་མས་འཛོམས་འདུག
མཛད་སྒོའི་ཐོག་བཀའ་ཟུར་རིན་ཆེན་མཁའ་འགྲོ་མཆོག་གིས་དུས་དྲན་དང་འབྲེལ་བའི་གསུང་བཤད་གནང་སྐབས། བོད་ཀྱི་བུད་མེད་ཚོས་བསམ་བློ་རྒྱ་ཆེ་ས་ནས་གཏོང་རྒྱུ་གལ་ཆེན་པོ་ཡིན་པ་མ་ཟད། བསམ་བློ་རྒྱ་ཆེན་པོ་དེ་སོ་སོའི་ཁྱིམ་ཚང་ནས་མགོ་བརྩམས་ཏེ་སྤྱི་ཚོགས་དང་རྒྱལ་ཁབ་ལ་ཁྱབ་ཐབས་དགོས་པ་གལ་ཆེན་ཡིན་ལ། རྒྱུན་དུ་ཡ་རབས་སྤྱོད་བཟང་སོགས་བསམ་སྤྱོད་གཉིས་ཐོག་ནས་བུད་མེད་རང་གི་གཟི་བརྗིད་དང་སྤོབས་པ་སྲུང་འཛིན་བྱེད་ཐུབ་པ་ཡིན་ན། བོད་རྒྱལ་ཁབ་ལ་ཞབས་འདེགས་ཆེན་པོ་ཞུས་པ་ཡིན་ལ། རྒྱལ་ཁབ་གང་ཞིག་ལ་མཚོན་ནའང་བུད་མེད་ནི་ཧ་ཅང་གལ་ཆེན་པོ་ཆགས་ཡོད་པ་ལྟར། བོད་ཀྱི་ཆོས་དང་རིག་གཞུང་གི་ཐོག་ནས་བཤད་ནའང་ནུས་པ་འདོན་མཁན་མང་ཆེ་བ་ཁྱིམ་གྱི་ཨ་མ་ལགས་ཚོ་ཡིན་ལ། བོད་ཀྱི་རིག་གཞུང་གི་རྩ་བ་ནང་ཆོས་ཡིན་པས་ནང་ཆོས་ཤེས་པའི་ཐོག་ནས་ཉམས་ལེན་ཡག་པོ་བྱེད་ཐུབ་པ་ཡིན་ན་ངེས་པར་དུ་གྲྭ་བ་ཨ་ནེ་བྱེད་དགོས་དོན་མེད་ལ། རྟོགས་པ་མཐོན་པོ་ཡིན་མདོག་མདོག་ཡང་བྱེད་མི་དགོས་པར་མི་ཡ་རབས་ཤིག་བྱས་པ་དེས་འགྲིག་གི་ཡོད་སྐོར་དང་། ཡང་ཁོང་མོས་མི་རིགས་ཤིག་གི་ཁྱད་རྟགས་གཙོ་བོ་སྐད་ཡིག་ཡིན་སྟབས། བོད་ཀྱི་བུད་མེད་ཚོས་ངེས་པར་དུ་བོད་ཡིག་ལ་དོ་སྣང་བྱས་པའི་ཞོར་དུ། དེང་སང་བོད་པའི་སྤྱི་ཚོགས་ཁྲོད་བོད་སྐད་ནང་དབྱིན་སྐད་དང་རྒྱ་གར་སྐད་སོགས་བསྲེས་ཀྱི་ཡོད་པ་དེ་ཚོ་ཁྱོན་ནས་ཡག་པོ་མེད་པ་མ་ཟད། འདི་ལྟར་སོང་ན་མ་འོངས་པར་ལོ་རྒྱུས་ཡུན་རིང་ལྡན་པའི་བོད་སྐད་ཡིག་གཙང་མ་འདི་བརླག་པའི་ཉེན་ཁ་ཡོད་པས། དེའི་ཐད་ངེས་པར་དུ་དོ་སྣང་བྱེད་དགོས་སྐོར་སོགས་གསུངས་སོང་།
ཡང་སྐབས་དེར་བོད་ཀྱི་བུད་མེད་ལྷན་ཚོགས་ཀྱི་ཚོགས་གཙོ་བཀྲ་ཤིས་སྒྲོལ་མ་ལགས་ཀྱིས། ཡིག་ཐོག་ནས་བསྒྲགས་གཏམ་སྒྲོག་སྦྱངས་གནང་བའི་ནང་རྒྱལ་སྤྱིའི་ཚོགས་སྡེ་ཁག་ལ་འབོད་སྐུལ་གནང་དོན། གཅིག བོད་ཀྱི་དཀའ་རྙོག་སེལ་ཐབས་སུ་བཟུང་པའི་སྲིད་ཇུས་དབུ་མའི་ལམ་གཞིར་བཞག་ཐོག བོད་རྒྱ་ཞི་མོལ་ཡོང་སླད། རྒྱལ་སྤྱིའི་དྲང་བདེན་ལ་མོས་པའི་གཞུང་སྒེར་གཉིས་ཐད་ནས་རྒྱ་གཞུང་གི་མཁྲེགས་འཛིན་དང་ལོག་འགྲེལ་ལ་བདེན་པའི་གསལ་འདེབས་ཐོག གྲོལ་མོལ་འགོ་གཙུགས་དགོས་པའི་གནོན་ཤུགས་སྤྲོད་གནང་ཡོད་པ་ཞུ་རྒྱུ་དང་། གཉིས། མི་ལོ་ ༦༠ རིང་བོད་ནང་གི་དཀའ་སྡུག་གནས་སྟངས་སྤྱི་དང་། ཡང་སྒོས་དེང་སྐབས་རྒྱ་གཞུང་གིས་བོད་ནང་ཞི་དྲག་གཉིས་ཐོག་ནས་བོད་ནང་རིགས་རྒྱུད་རྩ་མེད་རིང་ལུགས་ཀྱི་སྲིད་བྱུས་སྒོ་ཀུན་ནས་སྤེལ་བཞིན་ཡོད་ན། རྒྱལ་ཚོགས་ངོས་ནས་གང་མགྱོགས་བྱང་ཆིངས་མནའ་འབྲེལ་སྒྲིག་འཛུགས་བོད་ནང་ཛ་དྲག་ཐོག་གཏོང་གནང་ཡོང་པ་འབོད་བསྐུལ་ཞུ་རྒྱུ། གསུམ། བོད་ནང་ཞི་བའི་ངོ་རྒོལ་བྱེད་ཀྱིན་པར་རྒྱ་གཞུང་གིས་ཁ་བྲལ་འཇིགས་སྐུལ་བའི་ཉེས་མིང་འོག་མནར་གཅོད་དྲག་པོ་གཏོང་བཞིན་པ་དང་། ལྷག་པར་རྒྱལ་སྤྱི་ཧྲིལ་པོའི་སྟེང་ཆེ་མཐོང་དང་བརྩི་བཀུར་ཡོད་པའི་འཛམ་གླིང་ཞི་བདེའི་དེད་དཔོན་༸གོང་ས་ཆེན་པོ་མཆོག་ལ་མ་ཉེས་ཁ་གཡོག་དང་མཚན་སྨད་ཞུ་བ་དང་། དམངས་གཙོའི་ལམ་ནས་འོས་འདེམས་བྱུང་བའི་སྲིད་སྐྱོང་བློ་བཟང་སེང་གེ་མཆོག་ཀྱང་འཇིགས་བསྐུལ་བ་ཡིན་ལུགས་བརྗོད་པ་བཅས་ནི། བོད་མི་རིགས་ལ་མཐོང་ཆུང་དང་དྲང་བདེན་གྱི་འཐབ་རྩོད་ལ་ལོག་འགྲེལ་རྒྱབ་པ་ཞིག་ཡིན་དུས་དེའི་མཇུག་འབྲས་རྒྱ་གཞུང་གིས་ཁུར་དགོས་ཡོད། ཅེས་དང་།
ཡང་བསྒྲགས་གཏམ་ནང་མུ་མཐུད་དུ། བཞི། བོད་ནང་གི་ཞི་བའི་ངོ་རྒོལ་སྤྱི་དང་། ཁྱད་པར་དུ་རྒྱ་གཞུང་གི་ཡ་ང་སྙིང་རྗེ་མེད་པའི་གདུག་རྩུབ་སྲིད་བྱུས་ཀྱི་འོག་འཚོ་གནས་མ་ཐུབ་པར་རང་ལུས་མེར་བསྲེགས་གནང་གི་ཡོད་པ་དེར། རྒྱ་གཞུང་གི་སྤྱི་འབངས་ངོས་ནས་དོན་དངོས་གསལ་རྟོགས་མ་ཐུབ་པའམ། ཡང་ན་གཞུང་ཕྱོགས་ལོག་འགྲེལ་གྱི་རྐྱེན་བྱས་པ། གང་ལྟར་དེའི་ཐད་དགོས་ངེས་ཀྱི་སེམས་ཚོར་དང་གདུང་སེམས་མཉམ་སྐྱེད་མེད་པ་ནི། ང་ཚོ་འགྲོ་བ་མིའི་རིགས་སྤྱི་ལ་གོད་ཆག་ཆེན་པོ་ཞིག་འབྱུང་ཉེ་བའི་སྣ་འདྲེན་ཡིན་ན། རྒྱལ་སྤྱིའི་གཞུང་མང་ཡོངས་ནས་ཅིས་ཀྱང་དོ་ཁུར་བྱེད་པའི་དུས་ལ་རན་པ་ཡིན་ཞུ་རྒྱུ། ལྔ། ༸ཀུན་གཟིགས་པཎ་ཆེན་རིན་པོ་ཆེ་མཆོག་གི་གཙོས་སྤྲུལ་སྐུ་བསྟན་འཛིན་བདེ་ལེགས་མཆོག་དང་། ཉེས་མེད་ཆབ་སྲིད་བཙོན་པ་ཡོངས་ཛོགས་གློད་གྲོལ་དགོས་པ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ཚན་པས་རྒྱ་གཞུང་ལ་གནོན་ཤུགས་སྤྲོད་དགོས་པའི་འབོད་བསྐུལ་ཞུ་རྒྱུ། དྲུག སྡེ་དགེ་འདན་པའི་སྡེ་དཔོན་རྒན་གཞོན་གཙོས་འཇུ་བཟུང་བྱས་པ་རྣམས་ཆ་རྐྱེན་མེད་པའི་ཐོག་འཕྲལ་དུ་ཀློད་གྲོལ་དགོས། ཞེས་བཀོད་འདུག
གསར་འགོད་པ། པདྨ་མཚོ།
དེ་འདྲ་ཡིན་ན་འཛམ་གླིང་ནང་མིའི་ནུས་ཤུགས་གཙོ་བོ་ཡིན་པར་བོད་པའི་བུད་མེད་ཚོའི་བུ་ཕྲུག་གང་གང་སྐྱེ་སྐྱོང་བྱེད་རྒྱུ་ཐོག་ཧུར་བརྩོན་བྱེད་དགོས