བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༣༨ སྟེང་གི་རྩོམ་སྒྲིག་པའི་གཏམ།
ཞི་ཅིན་ཕིན་རྒྱ་ནག་གི་སྲིད་འཛིན་དུ་བསྡད་རྗེས། ཁོས་རྒྱ་ནག་གཞུང་གི་ཆབ་སྲིད་རྩ་བའི་སྒྲོམ་གཞིར་འགྱུར་བ་གང་ཡང་གཏོང་ཐུབ་མེད་ཀྱང་། ནང་ཁུལ་གྱི་སྲིད་བྱུས་མང་པོ་ཞིག་ལ་བཅོས་བསྒྱུར་དག་སྒྲིག་དང་། གཞུང་གི་སྒྲིག་འཛུགས་ཁག་ཏུ་ཡན་ལག་དང་ཉིང་ལག་མང་པོ་གསར་འཛུགས་བྱས་ཡོད། དེའི་ཁྲོད་ཀྱི་གྲགས་ཆེ་ཤོས་གཅིག་ལྐོག་ཟ་རུལ་སུངས་དང་དབང་ཆ་ལོག་སྤྱོད་བྱེད་མཁན་ཚོའི་ཐོག་སྟག་དང་སྦྲང་ནག་མཉམ་རྡུང་གི་གཙང་ཕྱག་ལས་འགུལ་དེ་ཆགས་ཡོད།
ཧུའུ་ཅིན་ཐོ་ཡིས་པོ་ཞི་ལེ་འཇུས་ཏེ་ཞི་ཅིན་ཕིན་གྱི་ཟ་སྐལ་དུ་བཞག་ཡོད་པ་ལྟར། ཞི་ཅིན་ཕིན་སྲིད་འཛིན་དུ་བསྡད་དེ་ལོ་གཉིས་མ་ཟིན་ཙམ་གྱི་རིང་ལ་རྒྱ་ནག་དབུས་གཞུང་ནས་མགོ་བཙུཊ་ཏེ། རྒྱ་ནག་གི་གྲོང་ཁྱེར་ཆེ་ཁག་དང་མངའ་སྡེ་ཁག་གི་མཐོ་རིམ་དཔོན་རིགས། རིམ་གྱིས་ས་ཁུལ་དང་མཐའ་ཁུལ་དུ་ཞིབ་བཤེར་བྱས་ཡོད་པ་དང་། ད་ལྟ་གྲངས་ཉུང་མི་རིགས་ས་ཁུལ་གྱི་གྲོང་ཁྱེར་ཁག་དུའང་ཞིབ་བཤེར་བཀག་སྡོམ་གྱི་ཆར་འདབས་ཟམ་ཟིམ་རེ་འབབ་མགོ་ཚུགས་ཡོད་འདུག
དེང་སྐབས་བོད་ནང་གི་ལས་བྱེད་ཚོས་རླངས་འཁོར་རྫིག་པོ་གཏོང་རྒྱུ་དང་། གསོལ་སྟོན་སོགས་སུ་རྒྱས་སྤྲོས་ཆེན་པོ་བྱེད་པར་ཞེད་སྣང་སྐྱེ་བཞིན་ཡོད་པ་དང་། ཐ་ན་དུས་ཆེན་དང་མཛད་སྒོ་སོགས་སུའང་ཕན་ཚུན་གྱི་ནང་དུ་འགྲོ་བ་དང་ལེགས་སྐྱེས་སྤྲོད་རེས་བྱེད་པ། ཐུགས་སྤྲོ་འདུ་འཛོམ་རིགས་ལ་འཛེམ་ཟོན་བྱེད་ཀྱིན་ཡོད་འདུག གྲོང་ཁྱེར་ཁག་གི་སྐར་མ་རིམ་པའི་མགྲོན་ཁང་དང་ཟ་ཁང་། གླུ་གར་རོལ་རྩེད་ཁང་། བོད་ཁུལ་གྱི་དབྱར་སྐྱིད་གླིང་ག་སོགས་ཀྱི་དཔལ་འབྱོར་ཡོང་འབབ་ཉམས་ཆག་ཕྱིན་ཏེ་སྦྱིན་བདག་ཚོ་སྐད་ངན་ཤོར་གྱིན་ཡོད་ཚོད་འདུག
རྒྱ་ནག་གི་ལྐོག་ཟ་རུལ་སུངས་དང་དབང་ཆ་ལོག་སྤྱོད་ཀྱི་འབྱུང་ཁུངས་གཙོ་བོ་གཉིས་ལ་ངོས་འཛིན་བྱེད་ཆོག གཅིག་ནི་མཐོ་རིམ་དཔོན་རིགས་ནང་ཁུལ་གྱི་དབང་ཆའི་འཐབ་རྩོད་ཡིན་ལ། གཞན་དེ་ནི་ཆོས་འཁོར་རྩ་རླུང་སྒོམ་སྒྲུབ་དང་། བོད་དང་ཡུ་གུར། སོག་པོ་བཅས་ཀྱི་རང་དབང་རྩོད་ལེན་ཐོག་དྲག་གནོན་དང་རྡུང་རྡེག་གཏོང་བའི་བྱ་འགུལ་དེ་ཆགས་ཡོད། འདི་ལ་དབུས་ཀྱི་རུལ་སུངས་འབྱུང་ཁུངས་དང་ས་གནས་ཀྱི་རུལ་སུངས་འབྱུང་ཁུངས་ཞེས་བཏཊ་ཀྱང་ཆོག གནད་དོན་འདི་དག་བརྒྱུད་དེ་མགོ་རྒྱ་ནག་དབུས་ཆབ་སྲིད་སྡེ་ཚན་གྱི་རྒྱུན་ལས་ཀྲུག་ཡུང་ཁཱང་ནས། མཇུག་གྲངས་ཉུང་མི་རིགས་ཀྱི་ས་གནས་ཁག་གི་དཔོན་རིགས་དང་མང་ཚོགས་དཀྱུས་མའི་ཁྲོད་ཀྱི་གསང་ཉུལ་བའི་བར། ཤོག་བུ་སྣུམ་གྱིས་ཟིན་པ་ལྟར་ལྐོག་ཟ་རུལ་སུངས་དང་དབང་ཆ་ལོག་སྤྱོད་ཀྱིས་ཁྱབ་ཡོད། དེ་ནི་རྒྱ་ནག་གཞུང་གིས་ཆབ་སྲིད་བརྟན་བརླིང་ཨང་དང་པོར་འཇོག་པའི་སྲིད་བྱུས་ཀྱི་བར་སྟོང་དེ་ཡང་ཡིན་སྲིད།
རྒྱ་གཞུང་གིས། རྒྱལ་ཁབ་བརྟན་བརླིང་ཡོང་བ་ལ་དང་པོ་མཐའ་མཚམས་བརྟན་བརླིང་ཡོང་དགོས་པ་དང་། མཐའ་མཚམས་བརྟན་བརླིང་ཡོང་བར་བོད་ལྗོངས་བརྟན་བརླིང་དམིགས་འབེན་དུ་འཛིན་དགོས་ཞེས་པའི་སྲིད་བྱུས་འདིའི་འོག་ནས་བོད་ཁུལ་གྱི་མི་ཉེས་མེད་ལ་ཉེས་འཛུགས་དང་། མི་མང་གི་ཟ་འཐུང་ཚུན་གྱི་འགུལ་སྐྱོད་མཐའ་དག་ཆབ་སྲིད་ཀྱི་ངོ་བོར་བསྒྱུར་ཏེ། བྱེད་ཐབས་དེ་ལྐོག་ཟ་རུལ་སུངས་དང་དབང་ཆ་ལོག་པར་སྤྱོད་པའི་ལམ་ཁ་བདེ་ཤོས་དང་གོ་སྐབས་བཟང་ཤོས་སུ་བཟུང་ཡོད།
རྒྱ་གཞུང་གིས་གྲངས་ཉུང་མི་རིགས་ཐོག་འཛིན་པའི་ནོར་འཁྲུལ་ཅན་གྱི་སྲིད་བྱུས་དང་། ཆབ་སྲིད་རྩ་འཛུགས་བརྟན་བརླིང་གི་ཞེད་སྣང་འདིའི་འོག བོད་དང་གྲངས་ཉུང་མི་རིགས་ས་ཁུལ་ལ་མཚོན་ན། ན་ནིང་ད་ལོའི་ལྐོག་ཟ་རུལ་སུངས་ཞིབ་བཤེར་གྱི་བྱ་འགུལ་ཁྲོད་ནས་ལྐོག་ཟ་རུལ་སུངས་གསར་པ་དང་། དབང་ཆ་ལོག་སྤྱོད་གཙང་ཕྱག་ཁྲོད་ནས་དབང་ཆ་ལོག་སྤྱོད་འཕར་མ་འབྱུང་རྒྱུའི་ཉེན་ཁ་ཤིན་ཏུ་ནས་ཀྱང་ཆེའོ།།
