དེ་རིང་ཉི་ཧོང་དང་རྒྱ་ནག ལྷོ་ཀོ་རི་ཡ་གསུམ་གྱི་ཕྱི་འབྲེལ་བློན་ཆེན་མཉམ་དུ་འཛོམས་ཏེ། མ་འོངས་རྒྱལ་ཁབ་གསུམ་གྱི་མཉམ་འབྲེལ་ཡར་རྒྱས་དང་མགོ་ཁྲིད་བར་གྱི་འབྲེལ་མོལ་སོགས་ཀྱི་ཐོག་གྲོས་བསྡུར་གནང་གི་ཡོད་འདུག
དེ་རིང་ཕྱི་ཚེས་ ༡༡ ཉིན་གྱི་སྔ་དྲོ་ཉི་ཧོང་གི་ཕྱི་འབྲེལ་བློན་ཆེན་སོ་གྷེ་ཡ་མྰ་ཇེན་ཧྥི་ (Sugiyama JinFu) ལཊ་དང་། རྒྱ་ནག་ཕྱི་འབྲེལ་ཚན་པའི་བློན་ཆེན་གཞོན་པ་ལེའུ་ཀྲིན་མེན་ (LiuZhenmin)། ལྷོ་ཀོ་རི་ཡའི་ཕྱི་འབྲེལ་བློན་ཆེན་(Li jing Xiu) བཅས་ཀོ་རི་ཡའི་རྒྱལ་ས་སེ་འོལ་ (Seoul) རུ་འདུ་འཛོམས་ཏེ། མ་འོངས་པར་རྒྱལ་ཁབ་གསུམ་བར་གྱི་མཉམ་འབྲེལ་ལ་ཤུགས་སྣོན་བྱ་ཐབས་དང་། ཆེས་མཐོའི་དབུ་ཁྲིད་བར་གྱི་ཐུག་འཕྲད་བཅས་གནད་དོན་ཁག་གི་ཐོག་གྲོས་བསྡུར་གནང་གི་ཡོད་འདུག
ཉི་ཧོང་དང་རྒྱ་ནག ཀོ་རི་ཡ་གསུམ་གྱི་ཕྱི་འབྲེལ་བློན་ཆེན་བར་གྱི་ཚོགས་འདུ་དེ། ཟླ་ ༡༠ རེའི་མཚམས་སུ་ཚོགས་ཀྱི་ཡོད་འདུག་ལ། ཐེངས་འདིའི་ཚོགས་འདུའི་ཐོག་རྒྱལ་ཁབ་གསུམ་གྱི་ཕྱི་འབྲེལ་བློན་ཆེན་ཚོས་རྒྱལ་ཁབ་གསུམ་གྱི་དཔལ་འབྱོར་དང་རིག་གནས། མི་དང་མིའི་བར་གྱི་འབྲེལ་ལམ་སོགས་ཀྱི་ཐོག་མཉམ་འབྲེལ་གྱི་ཐབས་ཇུས་འདོན་རྒྱུ་དང་། རྒྱལ་ཁབ་གསུམ་གྱི་ཆེས་མཐོའི་དབུ་ཁྲིད་མཇལ་འཕྲད་སོགས་གནད་དོན་ཁག་གི་ཐོག་གྲོས་བསྡུར་བྱེད་ཀྱི་ཡོད་པ་མ་ཟད། མ་འོངས་པར་རྒྱལ་ཁབ་གསུམ་བར་ཁོར་ཡུག་དང་དྲ་རྒྱའི་བདེ་འཇགས་ཐོག་མཉམ་འབྲེལ་བྱ་རྒྱུའི་གྲོས་བསྡུར་གནང་གི་ཡོད་འདུག
ཐེངས་འདིའི་རྒྱལ་ཁབ་གསུམ་གྱི་ཕྱི་འབྲེལ་བློན་ཆེན་མ་ཐུག་ཡར་སྔོན་གྱི་ཉིན་གཉིས་སྔོན་སྟེ། ཟླ་འདིའི་ཚེས་ ༩ ཉིན་ཉི་ཧོང་གི་དཔལ་འབྱོར་བློན་ཆེན་ཨེ་མེལ་རེ་ (Amari) དང་། རིག་གནས་ཚན་རིག་བློན་ཆེན་བྷོ་ཝུན་ཝེ་ལེ་ཇི་ (Bowen Village) གཉིས་རྒྱ་ནག་ཐེན་ཅིན་གྲོང་ཁྱེར་དུ་གཟིགས་སྐོར་གནང་གི་ཡོད་པ་མ་ཟད། ཚེས་ ༡༠ ཉིན་ཁོང་གཉིས་འཛམ་གླིང་དཔལ་འབྱོར་གླེང་སྟེགས་ཀྱི་དབུ་ཁྲིད་གསར་བའི་ལོ་འཁོར་ཚོགས་ཆེན་ཐོག་མཉམ་ཞུགས་གནང་སྟེ། ཉི་ཧོང་དཔལ་འབྱོར་བློན་ཆེན་གྱིས་ཉི་ཧོང་གི་དཔལ་འབྱོར་དང་ནོར་སྲིད་བཅས་སྲིད་ཇུས་ཀྱི་སྐོར་ནས་གཏམ་བཤད་གནང་ཡོད་འདུག
ཉེ་བའི་དུས་ནས་བཟུང་ཉི་ཧོང་གཞུང་གིས། རྒྱ་ནག་དང་ལྷོ་ཀོ་རི་ཡའི་དེ་སྔོན་གྱི་འབྲེལ་བར་བསྒྱུར་བཅོས་དང་། འབྲེལ་ལམ་རྒྱ་སྐྱེད་གཏོང་རྒྱུ་ཧུར་བརྩོན་གནང་གི་ཡོད་འདུག ཟླ་འདིའི་ཚེས་ ༡༠ ཉིན་གྱི་གསར་འགོད་ལྷན་ཚོགས་ཤིག་གི་ཐོག་ཉི་ཧོང་བློན་ཆེན་ལྷན་ཚོགས་ཀྱི་འགན་འཛིན་ཁེན་ཡེ་ཝེ་ (Kan Yi Wei) ཡིས། འཛམ་གླིང་གི་དཔལ་འབྱོར་ཨང་གཉིས་པ་དང་ཨང་གསུམ་པ་ཡིན་པའི་རྒྱལ་ཁབ་ཁག་གི་ཚོགས་འདུ་ཚོགས་པར། ངེས་པར་དུ་ཕན་ཚུན་བར་འོས་ཤིང་འཚམ་བསམ་ཚུལ་བརྗེ་རེས་བྱེད་རྒྱུ་ཧ་ཅང་གལ་ཆེན་ཡིན་པ་མ་ཟད། རྒྱ་ནག་གཞུང་གི་ངོས་ནས་ཀྱང་དེའི་ཕྱོགས་ལ་བརྡ་ལན་ཞིག་སྤྲོད་དགོས་པའི་རེ་སྐུལ་གནང་ཡོད་འདུག
ཉི་ཧོང་དང་རྒྱ་ནག་གི་འབྲེལ་ལམ་ཐད་ཁོ་ཊོ་ཞེས་པའི་གསར་ཁང་ (Kyodo News) གིས་གསར་འགྱུར་ཞིག་སྤེལ་ཏེ། ཉེ་བའི་ཆར་ཉི་ཧོང་གི་ཆེས་མཐོའི་མགོ་ཁྲིད་ཚོས། རྒྱ་ནག་གཞུང་ཕྱོགས་ནས་ཉི་ཧོང་གི་སྲིད་བློན་ཨ་པེ་ (Abe) རྒྱལ་ཁབ་ཁག་གི་ཆེས་མཐོའི་དབུ་ཁྲིད་ཀྱི་ཚོགས་འདུར་ཡོང་རྒྱུའི་རེ་བ་བྱེད་ཀྱིན་པ་ཤེས་ཡོད་པ་མ་ཟད། ཟླ་འདིའི་ཟླ་མཇུག་ཏུ་ཚོགས་འཆར་ཡོད་པའི་མཉམ་འབྲེལ་རྒྱལ་ཚོགས་ཀྱི་ཚོགས་ཆེན་སྐབས། ཉི་ཧོང་གི་ཕྱི་འབྲེལ་བློན་ཆེན་ (Shore Tianwen Xiong) དང་། རྒྱ་ནག་གི་ཕྱི་འབྲེལ་བློན་ཆེན་ཝང་ཡེ་གཉིས་ཨ་རིའི་ནེའུ་ཡོག་ཏུ་ཐུག་འཕྲད་ཀྱིས་རྒྱལ་ཁབ་གཉིས་ཀྱི་ཚོང་འབྲེལ་ཐོག་གྲོལ་མོལ་དང་། ཆེས་མཐོའི་མགོ་ཁྲིད་ཐུག་འཕྲད་སྐོར་ལ་གྲོས་མོལ་བྱ་རྒྱུའི་འཆར་གཞི་ཡོད་པ་ཤེས་ཡོད་སྐོར་བཀོད་འདུག
རྒྱལ་སྤྱིའི་ཆབ་སྲིད་དཔྱད་བརྗོད་པ་ཚོས། ཉི་ཧོང་དང་རྒྱ་ནག་གི་བར་གྲུབ་འབྲས་ལྡན་པའི་གྲོས་མོལ་བྱ་དགོས་ཚེ། ཉི་ཧོང་གི་སྲིད་འཛིན་ཨ་པེ་ཡིས་ཡིད་ཆེས་ཡོད་པའི་རྒྱལ་ཁབ་བདེ་འཇགས་དོ་དོམ་ལྷན་ཁང་གི་མགོ་གཙོ་ཤོ་ཊ་རོ་ཡ་ཆེ་ (Shotaro Yachi) དང་། རྒྱ་ནག་རྒྱལ་སྲུང་ལས་ཁུངས་ཀྱི་ཨུ་ཡོན་ཡྰང་ཅེ་ཁྲིའི་བར་བྱེད་དགོས་ཀྱི་ཡོད་ཚུལ་བརྗོད་ཡོད་པ་མ་ཟད། ད་ལྟའི་རྒྱ་ནག་གི་བརྡ་ལན་སོགས་ཕྱོགས་ཡོངས་ལ་བལྟས་ཚེ། རྒྱ་ནག་ཕྱོཊ་ནས་རྒྱལ་ཁབ་གཉིས་ཀྱི་འབྲེལ་ལམ་ཐོག་སྔར་ལྷག་འབད་བརྩོན་བྱེད་ཀྱི་ཡོད་སྐོར་བརྗོད་འདུག
གསར་འགོད་པ། དོན་གོ
