དེ་རིང་སྔ་དྲོར་བོད་མི་མང་སྤྱི་འཐུས་ལྷན་ཚོགས་དབུ་འཛུགས་གནང་སོང་ལ། ཐེངས་འདིར་བོད་མིའི་སྒྲིག་འཛུགས་ལྷན་ཁང་ཁག་གི་ལས་བསྡོམས་བསྐྱར་ཞིབ་གཙོས། བོད་ནང་གི་ཛ་དྲག་གནས་སྟངས་ཐོག་བགྲོ་གླེང་གྲོས་ཆོད་དང་། མང་ཚོགས་རྩིས་ཁྲ་ཚོགས་ཆུང་གི་སྙན་ཐོར་གཟིགས་ཞིབ། དེ་བཞིན་རྒྱ་ནག་གི་སྲིད་འཛིན་རྒྱ་གར་དུ་གཟིགས་སྐོར་དང་། དོལ་རྒྱལ་བའི་བྱེད་ཕྱོགས་བཅས་ཀྱི་ཐོག་བགྲོ་གླེང་བྱེད་འཆར་ཡོད་འདུག
དེ་རིང་སྔ་དྲོའི་ཆུ་ཚོད་ ༩།༣༠ ཐོག སྐབས་བཅོ་ལྔ་བའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ བརྒྱད་པ་གངས་སྐྱིད་གྲོས་ཚོགས་ཚོང་ཁང་དུ་དབུ་འཛུགས་གནང་སོང་། ཚོགས་འདུའི་ཐོག་སྤྱི་འཐུས་ཚོགས་གཙོ་གཞོན་གཉིས་ཀྱིས་གཙོས་པའི་སྤྱི་འཐུས་རྣམ་པ་དང་། སྲིད་སྐྱོང་མཆོག་གིས་དབུས་པའི་བཀའ་བློན་རྣམ་པ། དེ་བཞིན། ཟུར་ཉན་དུ་བོད་མི་སྒྲིག་འཛུཊ་ལྷན་ཁང་ཁག་གི་དྲུང་ཆེ་རྣམ་པ་དང་གསར་འགོད་པ། དོ་སྣང་ཅན་གྱི་མི་སྣ་བཅས་འཛོམས་འདུག
གྲོས་ཚོགས་དབུ་འཛུགས་ཀྱི་ཐོག་མར་ཚང་མ་སྐུ་བཞེངས་ཐོག་བོད་རྒྱལ་ཁབ་ཆེན་པོའི་རྒྱལ་གླུ་བཏང་རྗེས། བོད་ནང་གི་རང་ལུས་མེར་བསྲེཊ་གཙོས་པའི་བོད་བསྟན་སྲིད་ཆེད་བློས་གཏོང་གནང་མཁན་རྣམས་ཀྱི་ཆེད་གཞུང་འབྲེལ་མྱ་ངན་གྲོས་ཆོད་གྲོས་འཆར་དང་། འདི་ལོའི་ཕྱི་ཟླ་ ༤ ཚེས་ ༤ ཉིན་འདས་གྲོངས་སུ་ཕྱིན་པའི་སྤྱི་ཟུར་བླ་བྲང་འཇིགས་མེད་རྒྱ་མཚོ་ལགས་ངག་བཅད་མྱ་ངན་བཅས་གྲུབ་རྗེས། བོད་ནང་གི་ཛ་དྲག་གནས་སྟངས་སྐོར་གྱི་གཞུང་འབྲེལ་གྲོས་ཆོད་གྲོས་འཆར་ཐོག་བགྲོ་གླེང་དབུ་འཛུགས་གནང་ཡོད་ཅིང་། ཉིན་རྒྱབ་ནས་བཟུང་མང་ཚོགས་རྩིས་ཁྲ་ཚོགས་ཆུང་སྐབས་ལྔ་བའི་ལས་བསྡོམས་དང་སྙན་ཐོ་གྲོས་ཚོགས་ལ་སྙན་སྒྲོན་ཞུ་འཆར་ཡོད་པ་དང་། ཚེས་ ༡༦ ཉིན་རྒྱ་ནག་གི་སྲིད་འཛིན་ཞི་ཅིན་ཕིན་རྒྱ་གར་ནང་གཟིགས་སྐོར་གནང་བཞིན་པའི་སྐོར་ལ་བགྲོ་གླེང་བཅས་གནང་འཆར་ཡོད་འདུག
གྲོས་ཚོགས་དབུ་འཛུགས་ཀྱི་གཏམ་བཤད་གནང་སྐབས་སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས། ད་རེབ་ང་ཚོ་གྲོས་ཚོགས་ཚོགས་བཞིན་པ་དང་དུས་མཚུངས་སུ། ང་ཚོའི་གནས་ཡུལ་རྒྱ་གར་ནང་རྒྱ་ནག་གི་སྲིད་འཛིན་ཞི་ཅིན་ཕིན་གཟིགས་སྐོར་ཐོག་མ་གནང་གི་ཡོད་པ་རེད། ང་ཚོ་བོད་པའི་དཀའ་རྙོག་དང་འབྲེལ་བའི་གནད་དོན་གླེང་རྒྱུ་དང་དོ་སྣང་ཡོང་བར། འཛིན་སྐྱོང་བཀའ་ཤག་གིས་ཏན་ཏན་ལས་འཆར་བསྒྲིགས་ཡོད་རྒྱུ་རེད་ལ། ཆབ་སྲིད་ཀྱི་འགན་དབང་ཡོད་སྟབས་བསྒྲིགས་དགོས་པ་ཞིག་ཀྱང་ཆགས་ཡོད། ལས་དོན་བང་བསྒྲིགས་པ་ལྟར་ཕྱག་བསྟར་ཡོང་གི་རེད་བསམ་གྱི་ཡོད། སྤྱི་འཐུས་ལྷན་ཚོགས་ཀྱི་ངོས་ནས་སྲིད་འཛིན་ཞི་ཅིན་ཕིན་རྒྱ་གར་ནང་ཕེབས་སྐབས། སྤྱིར་རྒྱ་ནག་ནང་འགྱུར་བ་མང་པོ་ཞིག་འགྲོ་བསྡད་ཡོད་པའི་ཐད་བཟང་ངན་གཉིས་ཕྱོགས་ནས་འགྲེལ་བཤད་རྒྱག་མཁན་ཡོད་མིན་ལ་མ་ལྟོས་པར། ང་ཚོ་བོད་པའི་ལས་འགན་གཙོ་བོ་བོད་ནང་འཕྲད་བཞིན་པའི་ཛ་དྲག་གི་གནས་སྟངས་དང་། མཐར་ཐུག་བོད་དོན་བདེན་སེལ་རྒྱུ་གཉིས་གཙོ་བོ་ཆགས་བསྡད་ཡོད། འཛམ་གླིང་ནང་ད་ལྟའི་རྒྱ་ནག་སྲིད་འཛིན་ལ་རེ་བ་རྒྱག་མཁན་མང་པོ་ཡོད་པ་རེད། ང་ཚོའི་ངོས་ནས་ཞི་ཅིན་ཕིན་ལ་བཟང་ཕྱོགས་ནས་བལྟས་ཏེ་བོད་དོན་ཐོག་རེ་བ་བཟང་ཕྱོགས་ཤིག་བསླེབ་རྒྱུ་དང་། ད་རེབ་རྒྱ་གར་ནང་བསླེབ་པའི་སྐབས་འདིར་ང་ཚོས་རྒྱ་ནག་གི་སྲིད་འཛིན་ལ་ཞུ་དོན་གཙོ་བོ། གཞན་པས་རེ་བ་རྒྱག་བཞིན་པ་ལྟར་ང་ཚོས་ཀྱང་། སྲིད་འཛིན་ཞི་ཅིན་ཕིན་དབུས་པའི་དབུ་ཁྲིད་རྣམ་པས་བོད་དོན་ལ་དོ་སྣང་ཤུགས་ཆེན་གནང་རྒྱུ་དང་། ལྷག་པར་དུ་སྲིད་འཛིན་རང་གིས་འགན་འཁུར་ཏེ་བོད་ནང་གི་གནས་སྟངས་ལ་ཞིབ་འཇུག་བྱེད་རྒྱུ་དང་། མཐར་ཐུག་བོད་མིའི་དཀའ་ངལ་སེལ་རྒྱུའི་ཐབས་ལམ་༧གོང་ས་མཆོག་གི་དགོངས་གཞི་གཞིར་བཟུང་དབུ་མའི་ལམ་གྱི་ཐོག་ནས་སེལ་ཐུབ་པའི་རེ་བ་ཞུ་བཞིན་ཡོད། རྒྱ་ནག་གི་རྩ་ཁྲིམས་ནང་འཁོད་པ་གཞིར་བཟུང་རྒྱ་ནག་ཁྱོན་ཡོངས་ཀྱི་གྲངས་ཉུང་མི་རིགས་ཚོར་བདག་པོ་རྒྱག་རྒྱུ་དང་དཀའ་ངལ་སེལ་རྒྱུ། བདག་སྐྱོང་བྱ་རྒྱུ་གལ་ཆེན་པོ་ཆགས་འདུག་ཅེས་གྲོས་ཚོགས་ཀྱི་སྡིངས་ཆ་འདིའི་ཐོག་ནས་ཞུ་རྒྱུའི་འདོད་པ་བྱུང་། ཅེས་གསུངས་བྱུང་།
ཚོགས་གཙོ་མཆོག་གིས། སྤྱི་འཐུས་ལྷན་ཚོགས་ཀྱི་ངོས་ནས་ལྡི་ལི་རྒྱ་ནག་གཞུང་ཚབ་བརྒྱུད། རྒྱ་ནག་སྲིད་འཛིན་ལ། རྒྱ་ནག་གཞུང་གིས་བོད་དེ་སྤྱི་ཚོགས་རིང་ལུགས་ཀྱི་ལམ་ལུགས་འོག་ལྷ་ཡུལ་ལྟ་བུར་བསྒྱུར་ཡོད་ཅེས་བཤད་པ་ལྟར། དངོས་ཡོད་གནས་ཚུལ་རྟོག་ཞིབ་ཆེད་སྤྱི་འཐུས་ལྷན་ཚོགས་ཀྱི་སྐུ་ཚབ་ཅིག་བོད་ནང་ཡོང་ཆོག་པ་ཞུ་ཞེས་ཞུས་ཡོད། དེ་མཚོན་དོན་ཙམ་མིན་པར་དོན་དངོས་སུ་བོད་པའི་དཀའ་རྙོག་སེལ་བར་རྒྱལ་སྤྱིའི་མི་སྣ་བོད་ནང་ཡོང་འཇུག་གི་མེད་ཀྱང་། བོད་པ་རང་བོད་ནང་རྟོག་ཞིབ་ཆེད་ཡོང་འཇུག་དགོས་ཀྱི་འདུག་ཅེས་ལྷག་བསམ་རྣམ་དག་གིས་ཞུས་ཀྱང་། ད་བར་བཟང་ཕྱོགས་ཀྱི་བརྡ་ལན་གང་ཡང་འབྱོར་མ་སོང་། ད་རེབ་ཀྱི་སྡིངས་ཆ་འདིའི་ཐོག་རྒྱ་གར་གཞུང་ལ་ང་ཚོ་ཡིད་ཆེས་བརྟན་པོ་ཡོད། བློ་ཆ་ཚང་ཞིག་ཁེལ་གྱི་ཡོད། བོད་མིའི་དཀའ་རྙོག་ཐད་རྒྱ་གར་གཞུང་གིས་ད་ལྟའི་བར་རོགས་རམ་མཐུན་འགྱུར་ཆ་ཚང་གནང་ཡོད། མ་འོངས་པར་དེ་ལས་ལྷག་མ་བྱུང་ཡང་། ཞན་དུ་རྩ་བ་ཉིད་ནས་འགྲོ་རྒྱུ་རེད་བསམ་པ་དྲན་གྱི་མེད། དེར་བརྟེན། རྒྱ་ནག་གི་སྲིད་འཛིན་རྒྱ་གར་དུ་ཕེབས་པའི་སྐབས་སུ་རྒྱ་གར་ངོས་ནས་བོད་པའི་རེ་བ་སྟོང་ཟད་དུ་གཏོང་གི་རེད་བསམ་པ་དྲན་གྱི་མེད། རྒྱ་ནག་གི་སྲིད་འཛིན་རྒྱ་གར་ནང་ཡོང་དོན་གཙོ་བོ་ཚོང་འབྲེལ་དང་། དེ་མིན་ས་མཚམས་དང་བོད་པའི་གནད་དོན་ཐོག་གླེང་རོགས་གནོངས་ཞེས་ཞུ་བཞིན་ཡོད། གླེང་སློང་གནང་སྟེ་རྒྱ་གར་གྱིས་བོད་ཐོག་འཛིན་པའི་སྲིད་བྱུས་ཀྱང་ཁ་གསལ་དུ་བཏང་སྟེ། བོད་རྒྱའི་དཀའ་རྙོག་སེལ་རྒྱུར་རམ་འདེགས་གནང་རོགས་གནོངས་ཞེས་འབོད་སྐུལ་ཞུ་བཞིན་ཡོད། གང་ཡིན་ཞེ་ན། བོད་རྒྱའི་དཀའ་རྙོག་སེལ་བའི་ལྡེ་མིག་༧གོང་ས་མཆོག་ཆགས་ཀྱི་ཡོད་པ་རེད། རྒྱ་དཀར་ནག་གི་འབྲེལ་བ་དམ་ཟབ་ཡོང་བ་དང་། ཡར་རྒྱས་སོགས་ཀྱི་ཐོག་བོད་པའི་དཀའ་རྙོག་སེལ་བ་ཡིན་ན་དེ་ལྡེ་མིག་གཙོ་བོ་ཆགས་ཀྱི་ཡོད་པ་རེད་བསམ་གྱི་ཡོད། དེར་བརྟེན། ད་རེབ་རྒྱ་གར་གཞུང་གི་ཆེས་མཐོའི་མི་སྣ་རྒྱ་ནག་གི་མགོ་ཁྲིད་དང་མཇལ་སྐབས་ང་ཚོས་རེ་བ་ཆེན་པོ་བྱེད་ཀྱི་ཡོད་ཅེས་ཞུ་བཞིན་ཡོད། ད་རེབ་གྲོས་ཚོགས་སྐབས་སྲིད་འཛིན་ཞི་ཅིན་ཕིན་རྒྱ་གར་ནང་གཟིགས་སྐོར་དུ་ཡོང་གི་ཡོད་སྟབས། ཚེས་ ༡༦ ཉིན་གྲོས་ཚོགས་ནང་དེའི་ཐད་བགྲོ་གླེང་གནང་རྒྱུའི་ལས་རིམ་ཞིག་བང་བསྒྲིགས་ཡོད། སྐབས་དེར་བཀའ་ཤག་གི་ངོས་ནས་དགོངས་ཚུལ་གང་འདྲ་ཡོད་ཀྱང་གསུང་ཆོག་པའི་གོ་སྐབས་བསྐྲུན་རྒྱུ་ཡིན། དེ་མིན་བོད་ནང་གི་ཛ་དྲག་གནས་སྟངས་ཐོག་གདུང་སེམས་མཉམ་སྐྱེད་ཀྱི་གྲོས་ཆོད་གྲོས་འཆར་ཕེབས་ཀྱིན་ཡོད་པ་རེད། ཅེས་གསུངས་བྱུང་།
གྲོས་ཚོགས་ཀྱི་ལས་རིམ་ཐད་ཚོགས་གཙོ་མཆོག་གིས། མང་ཚོགས་རྩིས་ཁྲ་ཚོགས་ཆུང་གི་རྩིས་སྙན་ཟིན་པའི་རྗེས་སུ་བཀའ་ཤག་གིས་མཇུག་སྐྱོང་ལག་བསྟར་བྱས་པ་དེར་སྤྱི་འཐུས་རྒྱུན་ལས་ཀྱིས་དུས་ཚོད་མང་པོ་བཏང་ནས་གཙང་མ་གང་བཟོས་ཟིན་པ་དང་། གང་ལྷག་ཡོད་པ་དེ་གྲོས་ཚོགས་ནང་སྙན་སྒྲོན་ཡོང་གི་རེད། རྩ་བའི་འདི་ལྟར་བལྟ་སྐབས་ལས་དོན་ཆུང་ཚགས་ལྟ་བུ་ཡོད་ཀྱང་། ལོ་མང་པོའི་རྩིས་རྙོག་ལྷག་བསྡད་ཡོད་སྟབས། འཛིན་སྐྱོང་དང་སྤྱི་འཐུས་ངོས་ནས་དུས་ཚོང་མང་པོ་བཏང་དགོས་པ་ཆགས་ཀྱི་ཡོད། གང་ལྟར། མང་ཚོགས་རྩིས་ཁྲ་ཚོགས་ཆུང་སྐབས་ལྔ་བའི་ལོ་གཅིག་ལྷག་རིང་གི་ཕྱག་ལས་དང་། སྤྱི་འཐུས་རྒྱུན་ལས་ངོས་ནས་མཇུག་སྐྱོང་བྱེད་སྐབས་འཛིན་སྐྱོང་གི་ལས་ཀྱི་སྣེ་མོ་བ་དང་ལས་བྱེད་ཚོའི་ངོས་ནས་གཟབ་གཟབ་དང་། དོ་སྣང་ཆེན་པོས་ས་གནས་རེ་རེ་ལ་འབྲེལ་བ་བྱས་རྗེས་གནད་དོན་མང་པོ་གཙང་མ་ཆགས་ཐུབ་པ་བྱུང་སོང་། རྩིས་རྙོག་ ༡༧༠༠ ལྷག་བྱུང་ཡོད་པའི་ཁྲོད་ནས་མང་ཚོགས་རྩིས་ཁྲ་ཚོགས་ཆུང་སྐབས་ལྔ་བས་གཙང་བཟོ་དང་། སྤྱི་འཐུས་རྒྱུན་ལས་ཀྱིས་མཇུག་སྐྱོང་བྱས་རྗེས་ལས་ཁུངས་ ༣༢ ལྷག་ལ་ལྟ་རྒྱུ་བྱུང་མེད། དེ་མིན་གྱི་ལས་ཁུངས་ཁག་ཚང་མས་རྩིས་རྙོག་ལྷག་ཡོད་པ་ ༧༤ མ་གཏོགས་མེད། མ་འོངས་པར་གནད་དོན་དེ་དག་ཐོག་སྐབས་ཐོག་རང་ལ་གཙང་མ་བཟོ་རྒྱུ་ཧ་ཅང་གལ་ཆེན་པོ་རེད། དེའི་ཐད་འཛིན་སྐྱོང་གི་ངོས་ནས་ཐུགས་སྣང་གནང་དགོས་ཀྱི་འདུག་ལ། རྩིས་ཞིབ་ལྷན་ཁང་གི་ངོས་ནས་ཀྱང་དུས་ཐོག་ལ་རྩིས་ཞིག་བྱེད་ཐུབ་པ་བྱེད་རྒྱུ་ཧ་ཅང་གལ་ཆེན་པོ་རེད། ཅེས་གསུངས་སོང་།
བཙན་བྱོལ་སྤྱི་ཚོགས་ཀྱི་འགྱུར་བའི་ཐད་ཁོང་གིས། ད་ལྟའི་ཆར་ང་ཚོའི་སྤྱི་ཚོགས་ལ་འགྱུར་བ་ཤུགས་ཆེན་པོ་ཞིག་འགྲོ་བཞིན་འདུག ལྷག་པར་དུ་བོད་མི་ཁག་ཅིག་ལ་སྐྱབས་བཅོལ་ཡིག་ཆ་མ་རག་པར་དཀའ་ངལ་འཕྲད་བསྡད་པ་ཁག་ཅིག་ཡོད་པ་རེད། གནད་དོན་དེའི་ཐོག་བཀའ་ཤག་དང་སྤྱི་འཐུས་ལྷན་ཚོགས་ངོས་ནས་དོ་སྣང་མེད་པ་དང་། སྣང་མེད་བཞག་པ་རྩ་བ་ཉིད་ནས་མ་རེད། གྲོས་ཚོགས་ཚོགས་དུས་བདུན་པའི་སྤྱི་འཐུས་བཞུགས་མོལ་ཚོགས་འདུའི་སྐབས། གྲོས་ཚོགས་ནང་གནད་དོན་དེ་གླེང་བ་ཡིན་ན་དགེ་སྐྱོན་ག་རེ་ཡོད་མེད་ཐོག་སྐད་ཆ་བྱུང་སྟེ། མི་གླེང་རྒྱུ་བྱས་པ་རེད། ད་རེབ་གྲོས་ཚོགས་ནང་མང་ཚོགས་སྔོན་ལ་བཀའ་སྤྱི་ལྷན་རྒྱས་ཚོགས། སྤྱི་འཐུས་རྒྱུན་ལས་ནང་གོ་བསྡུར་རིམ་པ་བྱས་ཏེ། ད་ལྟའི་གནས་བབ་ལ་བསྟུན་ནས་གང་གནང་ཐུབ་པ་དེ་འཛིན་སྐྱོང་གི་ངོས་ནས་བྱུང་རྐྱེན་དང་། ད་ཆར་གནས་སྟངས་གང་འདྲ་ཆགས་ཡོད་མེད་ཀྱི་གསལ་བཤད་སྤྱི་འཐུས་རྒྱུན་ལས་ལ་བྱུང་ཡོད་ལ། ད་ནས་བཟུང་ག་རེ་གནང་དགོས་ཡོད་མེད་ཀྱི་བང་ཡང་བསྒྲིགས་ཡོད་པ་རེད། དཀའ་ངལ་འཕྲད་བསྡད་མཁན་ཚོར་ཁག་མི་འདུག སོ་སོར་དཀའ་ངལ་འཕྲད་སྐབས་སྡུག་བསྔལ་དེ་ལས་ཆེ་བ་ཞིག་ཡོད་པ་མ་རེད། ད་བར་འཛིན་སྐྱོང་དང་སྤྱི་འཐུས་ལ་འབྲེལ་བ་གནང་གི་ཡོད་པ་རེད། ཡང་ཁག་ཅིག་གིས་གྲོས་ཚོགས་ནང་གླེང་རོགས་གནོངས། གྲོས་ཚོགས་ནང་གླེང་བ་ཡིན་ན། གནད་དོན་སེལ་ཐུབ་ཀྱི་ཡོད་པ་དེ་འདྲ་གསུང་མཁན་མང་པོ་ཡོང་གི་འདུག སྤྱི་འཐུས་རྒྱུན་ལས་དང་སྤྱི་འཐུས་མང་པོ་ཞིག་ལ་ཞལ་པར་མ་འབྱོར་བ་ཡོད་མ་རེད། བཀའ་ཤག་ལའང་འབྱོར་ཡོད་པ་རེད། ཡིན་ནའང་། བསམ་བློ་ཞིབ་ཏུ་བཏང་ན། གྲོས་ཚོགས་ནང་གླེང་བ་ཡིན་ན། དཀའ་ངལ་སེལ་རྒྱུ་ཕར་ཞོག སྒེར་སོ་སོར་གནོད་ཀྱིན་པའི་གནས་སྟངས་ཆགས་ཀྱི་ཡོད་སྟབས། ད་རེབ་གྲོས་ཚོགས་ནང་གླེང་མི་དགོས་པའི་ཐག་གཅོད་བྱུང་ཡོད། ཅེས་གསུངས་སོང་།
དོལ་རྒྱལ་སྐོར་ལ་ཚོགས་གཙོ་མཆོག་གིས། བར་ལམ་དོལ་རྒྱལ་གྱི་གནས་ཚུལ་མང་པོ་འབྱུང་བཞིན་འདུག དེའི་ཐོག་ཚོགས་གཙོས་བཤད་ཡོད་ལ་སྤྱི་འཐུས་ཚོ་ཕྱོགས་སྐྱོད་ཀྱི་སྐབས་སུའང་བཤད་ཡོད་པ་རེད། བཀའ་ཤག་གི་ངོས་ནས་ཀྱང་གསུང་ཡོད་རྒྱུ་རེད་བསམ་ཡོད། དེང་སང་བོད་ནང་དོལ་རྒྱལ་བསྟེན་མཁན་ཚོས་ལས་རིགས་མང་པོ་ཞིག་སྤེལ་བསྡད་པ་ང་ཚོ་ཚང་མས་ཤེས་བཞིན་པ་རེད། དེའི་སྐོར་ལ་བོད་ནང་དང་ཕྱིར་ཡོད་པའི་བོད་མི་ཚོས་གང་གཟབ་གནང་རྒྱུ་དང་། གནད་དོན་གང་ཡོད་པ་དེ་རྟོགས་ཐུབ་རྒྱུ། དེ་ལ་བརྟེན་ནས་སོ་སོའི་ལས་ཕྱོགས་དང་ལངས་ཕྱོགས་དགོངས་པ་བཞེས་རྒྱུ་ཧ་ཅང་གལ་ཆེན་པ་ཆགས་ཀྱི་འདུག ཁོང་ཚོ་དངུལ་དང་ཁེ་ཕན་གྱི་ཆེད་དུ་ལས་འགུལ་ཤུགས་ཆེ་རུ་དང་། ངོ་ཚ་དང་ཁྲེལ་གཞུང་གང་ཡང་མེད་པ་བྱེད་བསྡད་ཀྱི་ཡོད་པ་དེ་བོད་མི་སྤྱི་བོ་གནམ་བསྟན་ཡོངས་ཀྱིས་ཤེས་ནས་གདོང་ལེན་གང་འདྲ་གནང་དགོས་མིན་ཤེས་དགོས་རྒྱུ་ཧ་ཅང་གལ་ཆེན་པོ་རེད། ཅེས་གསུངས་སོང་།
ཐེངས་འདིའི་གྲོས་ཚོགས་ཚོགས་དུས་ཧྲིལ་བོར་དགོངས་པ་ཆ་ཚང་ཞུ་མཁན་སྤྱི་འཐུས་ ༣ དང་བྱུང་ཡོད་འདུག
གསར་འགོད་པ། དོན་གོ
རྒྱ་ཡི་མགོ་པ་ཞིས་ལ་ངོ་རྒོད་མྱུར་གྲ་སྒྲིག་བྱེདདགོས་དེ་ནི་དབང་ལུང་པ་ཡོད་གོ་སྐབས་དེ་མ་ཤོར་པར་བྱེད་དགོས་ང་ཚོས་རྒྱ་མིའི་མགོ་པའི་མདུན་དུ་ཐལ་པ་སྤར་མོ་གང་གཏོར་ཐུབ་ན་ཐུབ་རེད་སྐད་ལོག་ཚིག་ཅིག་རྒྱག་ཐུབ་ན་ཐུབ་རེད།དེ་མ་གཏོགས།རྒྱ་མིའི་ཡག་པོ་བྱེད་མི་སྲིད།