བཀའ་བརྒྱུད་དོན་འགྲུབ་ལགས་ཁྲིམས་ཞིབ་པ་ཆེ་བར་བསྐོ་བཞག

སྐབས་བཅོ་ལྔ་པའི་བོད་མི་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༨ པའི་ཉིན་གཉིས་པར། འོས་མི་འདེམས་སྒྲུག་ཚོགས་ཆུང་གིས་དབུས་གཙང་སྤྱི་འཐུས་ལས་ཐོག་པདྨ་འབྱུང་གནས་ལགས་དང་། བོད་མིའི་སྒྲིག་འཛུགས་སྤྱི་ཁྱབ་རྩིས་ཞིབ་འགན་འཛིན་བཀའ་བརྒྱུད་དོན་འགྲུབ་ལགས་རྣམ་གཉིས་འོས་མིར་མཚན་འདོན་གནང་ཡོད་པ་ལྟར། དེ་རིང་སྔ་དྲོའི་ཆུ་ཚོད་ ༡༡།༤༠ ཙམ་གྱི་ཐོག སྤྱི་འཐུས་ཚོགས་གཙོ་སྤེན་པ་ཚེ་རིང་མཆོག་གིས་འོས་མི་གཉིས་མིང་དང་ལོ་རྒྱུས་མདོར་བསྡུས་གྲོས་ཚོགས་ནང་སྙན་སྒྲོན་ཞུས་པ་བརྒྱུད། གྲོས་ཚོགས་ནང་གསང་བའི་འོས་བསྡུ་གནང་བ་བརྒྱུད་བཀའ་བརྒྱུད་དོན་འགྲུབ་ལགས་སུ་འོས་གྲངས་ ༡༩ དང་། པདྨ་འབྱུང་གནས་ལགས་སུ་འོས་གྲངས་ ༡༤ བཅས་ཐོབ་སྟེ། བཀའ་བརྒྱུད་དོན་འགྲུབ་ལགས་བོད་མིའི་སྒྲིག་འཛུགས་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བར་བསྐོ་བཞག་བྱུང་སོང་།

བཀའ་བརྒྱུད་དོན་འགྲུབ་ལགས་ནི། ཕྱི་ལོ་ ༡༩༥༧ ལོར་སྟོད་མངའ་རིས་སུ་ཕ་ཚེ་བརྟན་དོན་འགྲུབ་ལགས་དང་མ་བསོད་ནམས་མཚོ་མོ་གཉིས་ཀྱི་བུར་སྐྱེས་ཡོད་པ་དང་། ཕྱི་ལོ་ ༡༩༥༩ ལོར་ཕ་མ་སྤུན་མཆེད་དང་ལྷན་བཙན་བྱོལ་དུ་འབྱོར། ཕྱི་ལོ་ ༡༩༦༥ ལོར་སིམ་ལ་གཏན་སློབ་ཏུ་འཛུལ་ཞུགས་ཀྱིས་འཛིན་གྲྭ་ ༦ པ་བར་སློབ་སྦྱོང་གནང་ཡོད་པ་དང་། དེ་ནས་རིམ་བཞིན་མོན་གྷོར་གཞིས་ཆགས་སློབ་གྲྭར་འཛིན་གྲྭ་ ༩ པ་དང་། མ་སུ་རི་གཏན་སློབ་ཏུ་འཛིན་གྲྭ་ ༡༠ པ་ཐོན། ཕྱི་ལོ་ ༡༩༧༦ ལོར་རྡོར་གླིང་གཏན་སློབ་ནས་འཛིན་གྲྭ་ ༡༡ ཐོན་རྗེས། ཕྱི་ལོ་ ༡༩༧༦ ནས་ ༡༩༧༩ བར་སི་རི་མཐོ་སློབ་ཏུ་ཕྱིན་ཏེ་མཐར་ཕྱིན། ཕྱི་ལོ་ ༡༩༨༠ ལོར་གཞུང་ཞབས་ནང་ཚུད་དེ་ ༡༩༨༡ ལོའི་ཕྱི་ཟླ་ ༦ པ་བར་སྤྱི་ཁྱབ་རྩིས་ཞིབ་ལས་ཁུངས་ཀྱི་གཞོན་དྲུང་གནང་ཡོད་པ་དང་། དེ་རྗེས་ལོ་ ༣ རིང་བྷང་ལོར་དུ་(K. V Hariharan & company Charter Accountant )ཆེས་མཐོའི་རྩིས་ཞིབ་པའི་ཉམས་གསོའི་སྦྱོང་བརྡར་གནང་། དེ་ནས་རྩིས་ཞིབ་ལས་ཁུངས་ཀྱི་རྒན་དྲུང་དང་དྲུང་གཞོན། ཟུང་དྲུང་། དྲུང་འཕར། དྲུང་ཆེ་བཅས་སུ་རིམ་བཞིན་གནས་འཕར་བྱས་ཡོད་པ་དང་། དེ་རྗེས་ལོ་གཅིག་རིང་ཨ་རིའི་རོ་ཆི་སུ་ཊིར་(The University of Rochester)མཐོ་སློབ་དུ་རྩིས་དང་དཔལ་འབྱོར་རིག་པའི་ཐོག་སློབ་སྦྱོང་གནང་། ཕྱི་ལོ་ ༢༠༠༢ ནས་ ༢༠༠༤ བར་རྩིས་ཞིབ་ཁང་གི་དྲུང་ཆེའི་འགན་འཁུར་བ་དང་། ༢༠༠༤ ལོའི་ཕྱི་ཟླ་ ༩ པ་ནས་ ༢༠༡༤ ལོའི་ཕྱི་ཟླ་ ༩ པ་བར་སྤྱི་ཁྱབ་རྩིས་ཞིབ་ཀྱི་འགན་འཛིན་བཅས་གནང་ཡོད་པ་རེད།

གསར་འགོད་པ། པདྨ་མཚོ།