སྲོལ་རྒྱུན་སོ་ནམ་འདེབས་ལས་ཁུངས་འཁྱོལ་ལམ།

སྤྱི་འཐུས་གྲོས་ཚོགས་ནང་སྲོལ་རྒྱུན་སོ་ནས་འདེབས་ལས་སྐོར་ལ་དྲི་བ་དྲིས་ལན་གནང་སྐབས་ནང་སྲིད་བཀའ་བློན་མཆོག་གིས་སྲིད་བྱུས་དེས་ཐད་ཀར་ཕན་ཐོགས་མེད་ཀྱང་བརྒྱུད་ནས་ཕན་ཐོགས་ཡོད་སྐོར་གསུངས་སོང་།

ཉིན་འདི་གར་གངས་ཅན་སྐྱིད་གཞོང་སྤྱི་འཐུས་ཚོགས་ཁང་དུ་སྐབས་བཅོ་ལྔ་པའི་གྲོས་ཚོགས་ཚོགས་དུས་ ༨ པ་ཚོགས་བཞིན་ཡོད་པ་ལྟར། ཁ་སང་གྲོས་ཚོགས་ཉིན་གཉིས་པའི་སྔ་དྲོའི་ལས་རིམ་གྱི་ཐོག་མར། ཕྱི་ལོ་ ༢༠༠༥ ནས་བཟུང་བཙན་བྱོལ་བོད་མིའི་གཞིས་ཆགས་ཁག་ཅིག་ནང་སྲོལ་རྒྱུན་སོ་ནམ་འདེབས་ལས་ཀྱི་སྲིད་བྱུས་ལག་བསྟར་བྱེད་ཀྱི་ཡོད་པའི་སྐོར་ལ་དྲི་བ་དྲིས་ལན་གནང་སོང་།

བོད་མི་མང་སྤྱི་འཐུས་ཨཅཱརྱ་ཡེ་ཤེས་ཕུན་ཚོགས་ལགས་ཀྱིས་ནང་སྲིད་བཀའ་བློན་རྒྱ་རི་སྒྲོལ་མ་མཆོག་ལ། སྐར་རྟགས་ཅན་གྱི་དྲི་བ་དོན་ཚན་ ༥ ཅན་ཞིག་བཏོན་པ་ནི། དང་པོ། སྲོལ་རྒྱུན་སོ་ནམ་འདེབས་ལས་དེ་ལག་བསྟར་བྱས་ཏེ་ལོ་ངོ་ ༡༣ ཙམ་འགྲོ་བཞིན་ཡོད་པའི་ཐོག་གཞུང་གིས་ད་བར་འགྲོ་སོང་ག་ཚོད་བཏང་ཡོད་པ་དང་། གཉིས་པ། སྲིད་བྱུས་དེར་གྲུབ་འབྲས་དང་ཕན་རླབས་ཅི་ཙམ་བྱུང་ཡོད། གསུམ་པ། བཀའ་ཤག་སྐབས་བཅུ་བཞི་པས་སྲིད་བྱུས་དེ་ལག་བསྟར་བྱེད་ཀྱིན་ཡོད་པའི་གནས་སྟངས་གང་འདྲ་ཆགས་ཡོད་མེད། བཞི་པ། སྲིད་བྱུས་དེའི་ཐད་བཀའ་ཤག་སྔོན་མ་ལས་ལྷག་གི་ལས་དོན་གང་དག་གྲ་སྒྲིག་ཡོད་མེད། ལྔ་པ། སྲིད་བྱུས་དེ་མུ་མཐུད་འཛིན་ཐུབ་ཀྱི་ཡོད་མེད། ཟེར་བ་སོགས་རེད།

གོང་གསལ་དྲི་བ་ཁག་ལ་ནང་སྲིད་བཀའ་བློན་མཆོག་གིས་ལན་ཕེབས་པའི་ནང་། དྲི་བ་དང་པོར། སྲོལ་རྒྱུན་སོ་ནམ་འདེབས་ལས་མགོ་འཛུགས་བྱས་ཏེ་ད་བར་བོད་མིའི་སྒྲིག་འཛུགས་ཀྱིས་འགྲོ་སོང་ཧིན་སྒོར་འབུམ་དྲུག་བརྒྱ་ ༦༥༦༣༡༦༨༤ ཙམ་བཏང་ཡོད་པ། དྲི་བ་གཉིས་པའི་ལན། སྲོལ་རྒྱུན་སོ་ནམ་འདེབས་ལས་ཀྱིས་ཞིང་པ་ཚོར་ཐད་ཀར་ཕན་པ་ཆེན་པོ་བྱུང་མེད་ཀྱང་སྲོལ་རྒྱུན་སོ་ནམ་གྱི་དགེ་མཚན་མང་པོ་ཞིག་མང་ཚོགས་ཀྱིས་རྟོགས་ཡོད་པ་དང་། ས་འོག་གི་ཆུ་དང་མཁའ་རླུང་། ཁོར་ཡུག་སོགས་ལ་ཕན་ཐོགས་ཆེན་པོ་བྱུང་སྟེ་ཕྱི་ནང་གི་མི་མང་པོས་སྔགས་བརྗོད་ཐོབ་ཡོད་པ། དྲི་བ་གསུམ་པའི་ལན་དུ། དེང་སྐབས་བཙན་བྱོལ་བོད་མིའི་གཞིས་ཆགས་ཁག་གི་ས་གནས་ ༡༡ དུ་ཁྱིམ་ཚང་ ༨༡༡ གི་ས་ཆ་ཨེ་ཀར་ ༢༩༦༠ ཙམ་ལ་སྲིད་བྱུས་དེ་ལག་བསྟར་བྱེད་ཀྱིན་ཡོད་པ། དྲི་བ་བཞི་པའི་ལན་དུ། བཀའ་ཤག་བཅུ་བཞི་པའི་སྲིད་བྱུས་འདིའི་ཆེད་དུ་ལས་གཞི་ཁག་ཅིག་གསར་གཏོད་བྱས་ཡོད་པ་དག་ནི། སོ་ནམ་བུན་གཏོང་ལས་གཞི་དང་། སོ་ནམ་འཕྲུལ་ལས་ཡར་རྒྱས། སྐྱེ་ལྡན་ཞིང་པ་རང་འཚོ་རུ་ཁག་སོགས་ཡོད་པ། དྲི་བ་ལྔ་པའི་ལན་དུ། ལས་གཞི་དེ་མ་འོངས་པར་མུ་མཐུད་ལག་བསྟར་ལམ་ལྷོངས་ཅི་ཙམ་ཡོང་མིན་མི་མང་གི་མཉམ་རུབ་ཅི་ཙམ་བྱེད་མིན་ལ་ཐུག་ཡོད་སྐོར་སོགས་གསུངས་ཀྱི་ལན་འདེབས་གནང་སོང་།

དེའི་རྗེས་སླར་ཡང་སྤྱི་འཐུས་ཨཅཱརྱ་ཡེ་ཤེས་ཕུན་ཚོགས་ལགས་ཀྱིས། སྲོལ་རྒྱུན་སོ་ནམ་འདེབས་ལས་ཀྱིས་ཞིང་པ་ཚོར་ཐད་ཀར་ཕན་པ་ཆེན་པོ་བྱུང་མེད་ཟེར་བ་དེ་རྒྱུ་རྐྱེན་གང་ལ་ཐུག་ཡོད་པ་དང་། ཞིང་པ་ཚོས་སྲིད་བྱུས་དེའི་དགེ་མཚན་རྟོགས་ཡོད་ན་ད་ལྟ་ལག་བསྟར་བྱེད་མཁན་མང་དུ་འགྲོ་བཞིན་ཡོད་མེད། མ་འོངས་པར་སྲིད་བྱུས་དེ་ལག་བསྟར་ལམ་ལྷོངས་ཡོང་མིན་མི་མང་གི་མཉམ་རུབ་ལ་ཐུག་ཡོད་ན། བཀའ་ཤག་གིས་སྲོལ་རྒྱུན་སོ་ནམ་འདེབས་ལས་འདི་མི་འོངས་པར་རྒྱུན་འཁྱོངས་ཐུབ་པའི་གདེང་ཚོད་ཡོད་ག་ཚོད་ཅིག་ཡོད་མེད་སོགས་དྲིས་པའི་ལན་དུ།

བཀའ་བློན་རྒྱ་རི་སྒྲོལ་མ་མཆོག་གིས། སྲོལ་རྒྱུན་སོ་ནམ་འདེབས་ལས་བྱེད་མཁན་ཚོར་ཕན་པ་ཆེན་པོ་བྱུང་མེད་ཟེར་བ་དེ་རྫས་ལུད་བེད་སྤྱོད་གཏོང་མཁན་ཚོ་ལས་གྱོང་ཆེ་བ་ཆགས་མེད་ཀྱང་། བོད་མིའི་སྒྲིག་འཛུགས་ཀྱིས་ཐོག་མར་སྲིད་བྱུས་དེར་རེ་བ་བརྒྱབ་པ་ལྟ་བུའི་གྲུབ་འབྲས་ཤིག་རག་གི་མེད་སྐོར་དང་མི་མང་གིས་སྲིད་བྱུས་དེའི་དགེ་མཚན་རྟོགས་ཏེ་དམིགས་བསལ་གྱིས་ལག་བསྟར་བྱེད་མཁན་མང་དུ་ཕྱིན་མེད་སྐོར། སོ་ནམ་བུན་གཏོང་གི་ལས་གཞི་ཟེར་བ་དེར་སྔར་ལོའི་ཕྱི་ ༩ ཚེས་ ༡༣ ཉིན་བཀའ་ཤག་གིས་བཀའ་ཁྲོལ་ཐོབ་པ་ལྟར། ད་བར་ཁྱོན་བསྡོམས་ཧིན་སྒོར་ ༡༠༢༤༥༠༠༠ ཙམ་གཏོང་གི་ཡོད་པ་དང་། དེར་ཞིང་པ་ཚོས་དོ་སྣང་ཆེན་པོ་བྱེད་ཀྱིན་ཡོད་སྐོར་སོགས་ལན་འདེབས་གནང་སོང་།

གཞན། སྤྱི་འཐུས་ཀརྨ་ཡེ་ཤེས་ལགས་ཀྱིས་གོང་གི་བརྗོད་གཞིའི་ཐོག་དྲི་བ་ཁག་ཅིག་བཏོན་པའི་ནང་། ད་བར་གཞུང་གིས་སྲིད་བྱུས་དེའི་ཐོག་ཧིན་སྒོར་འབུམ་ ༦༠༠ ལྷག་བཏང་ཡོད་པ་དེ་ས་གནས་ཁག་ ༡༡ ནང་ག་ཚོད་རེ་བཏང་ཡོད་མེད་དང་། ས་གནས་རེ་རེ་ལ་སྲོལ་རྒྱུན་སོ་ནམ་འདེབས་ལས་བྱེད་ཀྱི་ཡོད་པའི་ཞིང་ས་ཨེ་ཀར་ག་ཚོད་ཡོད་མེད་དྲི་བ་བཏོན་པར། ནང་སྲིད་བཀའ་བློན་མཆོག་གིས་དྲི་བ་དེ་དག་དུས་ཐོག་ཏུ་ལན་ཁ་གསལ་ཞུ་ཐུབ་ཀྱི་མེད་སྟབས་རྗེས་སུ་གྲོས་ཚོགས་ནང་སྙན་སྒྲོན་ཞུ་རྒྱུ་ཡིན་སྐོར་སོགས་གསུངས་སོང་།

གསར་འགོད་པ། པདྨ་མཚོ།