འོས་བསྡུའི་འགན་འཛིན་གསར་པ་བསྐོ་བཞག

དེ་རིང་སྔ་དྲོར་གྲོས་ཚོགས་ནང་ད་ལྟའི་འཕྲོད་བསྟེན་དྲུང་ཆེ་ཤོ་ཟུར་བསོད་ནམས་ཆོས་འཕེལ་ལགས་བོད་མིའི་སྒྲིག་འཛུགས་ཀྱི་རང་དབང་ལྡན་པའི་སྡེ་ཚན་འོས་བསྡུ་ལྷན་ཁང་གི་འགན་འཛིན་ལ་བསྐོ་བཞག་གནང་སོང་།

དེ་རིང་སྔ་དྲོའི་ཆུ་ཚོད་ ༡༡། ༤༥ སྟེང་གངས་སྐྱིད་སྤྱི་འཐུས་ཚོགས་ཁང་དུ་། སྐབས་ ༡༥ པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་ ༨ པའི་ཉིན་གསུམ་པར། འོས་མི་འདེམས་སྒྲུག་ཚོགས་ཆུང་གིས་འོས་བསྡུ་ལྷན་ཁང་གི་འོས་བསྡུའི་འགན་འཛིན་བསྐོ་བཞག་ཆེད། ད་ལྟའི་འཕྲོད་བསྟེན་ལས་ཁུངས་ཀྱི་དྲུང་ཆེ་ཤོ་ཟུར་བསོད་ནམས་ཆོས་འཕེལ་ལགས་དང་ཤེས་རིག་དྲུང་ཆེ་སྟོབས་རྒྱལ་ཚེ་རིང་ལགས་རྣམ་གཉིས་འོས་མིར་མཚན་འདོན་གནང་རྗེས། སྤྱི་འཐུས་ཚོགས་གཙོ་མཆོག་གིས་འོས་མི་གཉིས་ཀྱི་མི་ཚེ་ལོ་རྒྱུས་མདོར་བསྡུས་རེ་གྲོས་ཚོགས་ནང་སྙན་སྒྲོན་དང་འབྲེལ། གྲོས་ཚོགས་ནང་ཡོད་པའི་སྤྱི་འཐུས་ ༣༩ ཡིས་གསང་བའི་འོས་བསྡུ་གནང་སྟེ། འཕྲོད་བསྟེན་དྲུང་ཆེ་ཤོ་ཟུར་བསོད་ནམས་ཆོས་འཕེལ་ལགས་ལ་འོས་གྲངས་ ༢༠ དང་ཤེས་རིག་དྲུང་ཆེ་སྟོབས་རྒྱལ་ཚེ་རིང་ལགས་སུ་འོས་གྲངས་ ༡༦ བཅས་ཐོབ་སྟེ། ཤོ་ཟུར་བསོད་ནམས་ཆོས་འཕེལ་ལགས་བོད་མིའི་སྒྲིག་འཛུགས་ཀྱི་འོས་བསྡུ་ལྷན་ཁང་གི་འགན་འཛིན་དུ་བསྐོ་བཞག་གནང་སོང་།

ཐེངས་འདིའི་གསང་བའི་འོས་བསྡུ་ཁྲོད་འོས་ཤོག་སྟོང་པ་གཅིག་དང་འོས་ཤོག་སྟེང་ཀླད་ཀོར་བྲིས་པ་གཉིས་བཅས་འོས་ཤོག་གསུམ་རྩིས་མེད་བཏང་ཡོད་འདུག

ཤོ་ཟུར་བསོད་ནམས་ཆོས་འཕེལ་ལགས་ནི། ༡༩༥༨ ལོའི་ཟླ་༧ ཚེས་ ༦ ཉིན་དབུས་གཙང་ས་ཁུལ་དུ་སྐྱེས་ཏེ་བཙན་བྱོལ་ནང་འབྱོར་ཏེ་རྡོར་གླིང་གཏན་སློབ་ནང་སློབ་གྲྭ་ཐོན་ཡོད་པ་དང་། ༡༩༧༩ ལོར་ཅན་དྷི་གྷར་མཐོ་སློབ་དུ་དབྱིན་ཡིག་དང་རྒྱལ་རབས། དཔལ་འབྱོར་བཅས་ཀྱི་ཐོག་སློབ་མཐར་ཕྱིན་རྗེས། ༡༩༨༠ ནས་ ༡༩༨༡ ལོའི་བར་རྡོར་གླིང་ཁུལ་གྱི་ས་གནས་གཞོན་ནུའི་ཚོགས་གཞོན་དང་རྒྱུན་ལས། དགེ་རྒན་དང་དེ་བཞིན། གཞུང་དང་གཞུང་འབྲེལ་མིན་པའི་ཚོགས་པ་ཁག་ནང་དང་བླངས་ཞབས་ཞུ་ཞུས་ཡོད་པ་དང་། ༡༩༨༢ ལོར་བོད་གཞུང་གི་སྲི་ཞུ་བའི་དྲུང་གཞོན་གནས་རིམ་ཐོག་བསྐོ་བཞག་གནང་ནས་བཟུང་བཞུགས་སྒར་དྷ་ས་བདེ་དོན་དང་བདེ་སྲུང་ཡན་ལག་གཅིག་ལྕོགས་དང་། ལྡི་ལི་བདེ་དོན་དང་ལྡི་ལིར་བོད་གནས་བསྐྱར་ཞིབ་ཁང་གི་རྩིས་པ་ཕྱག་ལས་བཅས་གནང་ཡོད་ཅིང་། ༡༩༨༩ ལོར་རྒན་དྲུང་གནས་རིམ་གནས་སྤོར་དང་སྦྲགས། རྡེ་ར་རྡུན་དོན་འགྲུབ་གླིང་ཉེ་འཁྲིས་སུ་གཞིས་ཆགས་གསར་འཛུགས་ཀྱི་ལས་དོན་དང་འབྲེལ། འབྲུག་ནས་འབྱོར་མཁན་བོད་མི་ཚོའི་ས་གནས་མགོ་འཛིན་གནང་མྱོང་ཡོད་ལ།  ༡༩༩༣ ནས་ ༢༠༡༠ ལོར་ཁོང་བོད་མིའི་སྒྲིག་འཛུགས་ཀྱི་དྲུང་གཞོན་ལས་རོགས་དང་དྲུང་གཞོན། ཟུང་དྲུང་། དྲུང་འཕར་ལ་སོགས་ཀྱི་གནས་རིམ་བསྐོ་བཞག་དང་སྦྲགས། དྷ་ས་ས་གནས་མགོ་འཛིན་དང་བོད་གཞུང་ཟློས་གར་ཚོགས་པའི་འགན་འཛིན་བཅས་སོགས་ཀྱི་ཕྱག་ལས་གང་མང་གནང་རྗེས། ༢༠༡༢ ལོའི་ཟླ་ ༢ ཚེས་ ༦ ཉིན་འཕྲོད་བསྟེན་ལས་ཁུངས་ཀྱི་དྲུང་ཆེར་བསྐོ་བཞག་གནང་ནས་བཟུང་ད་ལྟའི་བར་ཕྱག་ལས་གནང་དང་གནང་ཡོད་འདུག

གསར་འགོད་པ། ལྷ་སྐྱབས་རྒྱལ།