སྐལ་བཟང་རྣམ་རྒྱལ།
སྐབས་བཅོ་ལྔ་པའི་བོད་མི་མང་སྤྱི་འཐུས་ལྷན་ཚོགས་ཀྱི་གྲོས་ཚོགས་ཚོགས་དུས་བརྒྱད་པའི་སྐབས་ཤེས་ཡོན་སྲིད་བྱུས་དང་འབྲེལ་བའི་ཐོག་ཤུགས་ཆེའི་བགྲོ་གླེང་བྱས་སོང་། སྤྱི་འཐུས་རྒྱུན་ལས་ཀྱིས་གྲོས་ཚོགས་ནང་ཤེས་ཡོན་སྲིད་བྱུས་དང་འབྲེལ་བའི་གྲོས་ཆོད་གྲོས་འཆར་བསྣམས་ཕེབས་པ་དང་། དེར་སྲིད་སྐྱོང་མཆོག་ནས་དགག་བྱ་གནང་མིན་ལ་མ་ལྟོས་པར་གྲོས་ཚོགས་རྭ་བའི་ནང་བསླེབས་པ་ཙམ་དུ་མ་ཟད། དེའི་ཐད་གྲོས་ཚོགས་འཐུས་མི་མང་པོས་བགྲོ་གླེང་གི་ཆ་ཤས་བཞེས་པ་དང་། ཤེས་ཡོན་སྲིད་བྱུས་ལག་བསྟར་ཇི་ཞུས་ཐད་རྟོག་ཞིབ་ཚོགས་ཆུང་འཛུགས་རྒྱུ་ཡང་གཏན་འབེབས་བྱུང་ཡོད།
སྐུ་ངོ་སྲིད་སྐྱོང་མཆོག་དང་གསར་བསྐོས་བཀའ་བློན་ནས་ཤེས་ཡོན་སྲིད་བྱུས་དང་འབྲེལ་བའི་ལས་ཁུངས་མཐོ་ཤོས་ཤེས་ཡོན་ལྷན་ཚོགས་ཀྱི་ཚོགས་གཙོའི་ཞབས་སྟེགས་དེ་ཤེས་ཡོན་སྲིད་བྱུས་གསར་གཏོད་གནང་མཁན་གྱི་ཁྲི་ཟུར་ཟམ་གདོང་རིན་པོ་ཆེ་མཆོག་ལ་ཕུལ་ཡོད་པ་དེ་ནས་ཀྱང་ཤེས་རིག་ལས་ཁུངས་ནས་ཤེས་ཡོན་སྲིད་བྱུས་ལ་ཆེ་མཐོང་ག་ཚོད་བྱེད་ཀྱི་ཡོད་པ་གསལ་པོ་ཡིན་ཚུལ་གསུངས་ཡོད། སྤྱི་འཐུས་འགའ་ཤས་ནས་ཀྱང་དེ་དེ་བཞིན་ཡིན་པའི་ཡི་རངས་བསྔགས་བརྗོད་གནང་ཡོད་པ་རེད།
ད་ནི་གུས་པས་བོད་མི་མང་སྤྱི་འཐུས་ལྷན་ཚོགས་ནས་ཆེད་འཛུགས་གནང་འཆར་གྱི་ཤེས་ཡོན་སྲིད་བྱུས་ལག་བསྟར་རྟོགས་ཞིབ་ཚོགས་ཆུང་གི་ཚོགས་མི་རྣམ་པར་རེ་སྐུལ་ཞུ་རྒྱུ་ཞིག་ཡོད། སྤྱིར་སྐུ་ངོ་སྤྱི་འཐུས་རྣམ་པ་ནི་མི་མང་གི་འཐུས་མི་མཁྱེན་པའི་མངའ་བདག་ཞེ་གཅིག་ཏུ་སོང་། སངས་རྒྱས་ལ་ཀ་ཁ་སློབ་དགོས་དོན་མེད་ཀྱང་སྐྱེ་བོ་བློན་མུན་ཅན་བདག་གི་ཞུ་འདོད་པ་ཁག་གཅིག་མ་ཞུ་ཀ་མེད་རེད་འདུག རིང་མིན་རྟོགས་ཞིབ་ཚོགས་ཆུང་ནས་ལས་འཆར་དབུ་འཛུགས་གནང་སྐབས། ཐུབ་པའི་ངོ་ལ་འགྲམ་ལྕག་དང་། མི་ཐུབ་མགོ་བོར་བྱིལ་བྱིལ། ཞེས་པའི་དཔེ་དོན་དུ་མ་བཏང་པར། ད་རེས་ཀྱི་རྟོག་ཞིབ་དེ་ཤེས་རིག་བློན་ཆེན་ལྷན་ཁང་དང་དེའི་ཁྱབ་ཁོངས་སུ་ལྡིང་སྐོར་བརྒྱབ་ནས་མ་བསྡད་པར་གྲོས་འཆར་གྱི་སྔོན་གླེང་ནང་བཙན་བྱོལ་བོད་མིའི་སློབ་གྲྭ་ཁག་ཆ་ཚང་སྲིད་བྱུས་གཅིག་གི་འོག་བསྐྱོད་ཐུབ་པ་ཡོང་ཐབས་ལ་རེ་བ་ཆེན་པོ་བཅངས་པ་བཞིན་འབྱུང་འགྱུར་སྲིད་བྱུས་ལག་བསྟར་ཐུབ་ཐབས་ཀྱི་རེ་བ་མེད་ཀྱང་། དེ་ལྟར་མ་ཡོང་བའི་རྒྱུ་མཚན་གང་ཡིན་བྱུང་རབས་ཀྱི་དེབ་ཐེར་ནང་འཁོད་ཐུབ་པའི་ཆེད་དུ་ངེས་པར་དུ་ཁ་གསལ་བཟོ་ཐུབ་པ་གནང་རོགས།
ཤེས་ཡོན་ལྷན་ཚོགས་འདི་བཞིན་ཤེས་ཡོན་སྲིད་བྱུས་ལག་བསྟར་ཞུ་སྒོ་སྤྱི་དང་། ལྷག་པར་བཙན་བྱོལ་བོད་མིའི་ཤེས་ཡོན་དང་འབྲེལ་ཅན་རང་དབང་ལྡན་པའི་ལས་ཁུངས་མཐོ་ཤོས་ཀྱི་ངོ་བོར་བཀའ་ཤག་སྐབས་གོང་མས་གཟེངས་བསྟོད་ཀྱིས་དབུ་བཙུགས་གནང་ཡོད་ཀྱང་། དེའི་བར་ནས་བཀའ་ཤག་གོང་མའི་ལས་ཡུན་རྫོགས་པར་བརྟེན་ཤེས་རིག་བློན་ཆེན་ལྷན་ཁང་གི་ཡན་ལག་གི་ངོ་བོར་ལྷག་པ་རེད། ཡིན་ནའང་ཁྲི་ཟུར་ཟམ་གདོང་རིན་པོ་མཆོག་ལ་ཤེས་རིག་ལྷན་ཁང་ནས་ཤེས་ཡོན་ལྷན་ཚོགས་ཀྱི་ཚོགས་གཙོའི་ཞབས་སྟེགས་ཕུལ་ཡོད་པས་ཁོང་གིས་རེ་ལྟོས་བཅངས་ཡུལ་ཤེས་ཡོན་སྲིད་བྱུས་ལག་བསྟར་དང་འབྲེལ་བའི་ལས་ཁུངས་མཐོ་ཤོས་དེ་སླར་ཡང་ཁོང་རང་ཉིད་ཀྱི་ཕྱག་ཏུ་སོན་པ་རེད། འོན་ཀྱང་ད་ལྟའི་བར་ཤེས་ཡོན་ལྷན་ཚོགས་ནི་མིང་ཙམ་བརྡ་ཙམ་གྱི་ངོ་བོར་ལུས་ཡོད་ཅིང་འདི་ལྟར་གྱུར་བའི་ལན་པ་སུ་ལ་ཡོད་མེད་ཡང་བསྐྱར་ཞིབ་འཇུག་མཐིལ་ཕྱིན་པ་ཞིག་དགོས་པ་འདུག
དེ་ཙམ་དུ་མ་ཟད་སྤྱི་ཚོགས་ནང་གླེང་གཞི་ཞིག་ཡོད་པ་ནི་ཟམ་གདོང་རིན་པོ་ཆེས་བྱུང་རབས་ཀྱི་དེབ་ཐེར་ནང་འཁོད་པའི་དོན་དུ་རྣམ་འགྱུར་ཙམ་མཛད་པ་ལས་ཕྱག་བསྟར་དོན་འཁྱོལ་ཡོང་ཐབས་ལ་རེ་བ་དང་ཐུགས་འདོད་ཀྱང་དེ་ཙམ་མེད་ཚུལ་དང་། ཤེས་ཡོན་སྲིད་བྱུས་ཀྱི་སྔོན་གླེང་ནང་དུའང་ཟུར་ཙམ་གསལ་འཁོད་ཡོད་ཅེས་དང་། ཤེས་ཡོན་ལྷན་ཚོགས་དེ་ཡང་ཤེས་རིག་ལྷན་ཁང་གི་ཡན་ལག་མིང་བརྡ་ཙམ་གྱི་ངོ་བོར་འཇོག་མཁན་ཡང་ཁྲི་ཟུར་གང་ཉིད་ཡིན་ཚུལ་ཤོད་ཀྱི་ཡོད་པ་རེད།
སྤྱི་འཐུས་རྒྱུན་ལས་ཀྱི་གྲོས་ཆོད་གྲོས་འཆར་གྱི་སྔོན་གླེང་ནང་བཙན་བྱོལ་བོད་མིའི་སློབ་གྲྭ་ཁག་ཆ་ཚང་སྲིད་བྱུས་གཅིག་གི་འོག་བསྐྱོད་ཐུབ་པ་ཡོང་ཐབས་ལ་རེ་བ་ཆེན་པོ་བཅངས་ཡོད་ཀྱང་དོན་འབྲས་སྨིན་རྒྱུ་ཧ་ཅང་ཁག་པོ་རེད། གཞི་རྒྱ་ཆེ་བའི་བོད་ཁྱིམ་སློབ་གྲྭའི་ཁྱབ་ཁོངས་ནས་ལ་དྭགས་བྱང་ཐང་ས་ཁུལ་གྱི་སློབ་གྲྭ་གཅིག་ཙམ་ལ་ལོ་ངོ་བཅུ་ལ་ཉེ་བའི་རིང་ཚོད་ལྟའི་ལག་བསྟར་བྱས་པའི་རྣམ་འགྱུར་ཙམ་སྟོན་པ་དེ་ཡང་ཤེས་རིག་ལྷན་ཁང་འོག་གི་སློབ་གྲྭ་ཁག་བཅུ་ཙམ་ནང་ཤེས་ཡོན་སྲིད་བྱུས་ལག་བསྟར་བྱས་པ་ལས་གཟི་བརྗིད་དང་ངོ་སོ་ཆེ་བ་ཡོད་པ་རེད།
ལར་ནས་བོད་ཁྱིམ་ནས་ཤེས་ཡོན་སྲིད་བྱུས་འདི་ལ་བྱང་ཁུལ་གྱི་སློབ་གྲྭའི་ནང་ལག་བསྟར་ཚོད་ལྟ་གནང་བ་འདི་ནས་ཀྱང་ཤེས་ཡོན་སྲིད་བྱུས་ལ་ཆེ་མཐོང་ཇི་ཙམ་གནང་ཡོད་པ་གསལ་པོ་མཁྱེན་ཐུབ། ཆེ་མཐོང་འདིར་དཔེ་ཞིག་བཞག་ན་སྐབས་གོང་མའི་བཀའ་ཁྲི་མཁས་དབང་ཟམ་གདོང་རིན་པོ་ཆེ་དང་། སྐབས་འདི་པའི་སྲིད་སྐྱོང་མཁས་དབང་བློ་བཟང་སེང་གེ་གཉིས་སྲིད་སྐྱོང་དང་བཀའ་ཁྲི་ནས་ལ་བྱང་ས་ཁུལ་གྱི་ས་གནས་མགོ་འཛིན་ལ་བསྐོས་པ་འདྲ་པོ་བྱུང་འདུག འོན་ཀྱང་བོད་ཁྱིམ་གྱི་འགན་འཛིན་ལྷན་ཚོགས་ཀྱི་ཚོགས་གཙོ་མཁས་དབང་བློ་བཟང་སེང་གེ་ཡིན་པ་རེད།
ད་དུང་ང་ཚོའི་སྤྱི་ཚོགས་ནང་གླིང་གཞི་ཚབས་ཆེན་ཞིག་ཡོད་པ་ནི། འབྲེལ་ཡོད་མི་སྣ་གནད་ཆེན་འགའ་ཤས་ནས་༸གོང་ས་༸སྐྱབས་མགོན་ཆེན་པོ་མཆོག་ནས་ཐོག་མཐའ་བར་གསུམ་དུ་ཤེས་ཡོན་སྲིད་བྱུས་ལ་ཐུགས་མོས་མེད་ཚུལ་དང་། དེར་བརྟེན་ཁྱབ་ཁོངས་འགའ་ཤས་ནས་དང་ལེན་བྱེད་ཀྱི་མེད་ཚུལ་གྱི་ལབ་གླེང་ཞིག་ཀྱང་འདུག རང་ངོས་ནས་བསམ་བློ་གཏོང་སྐབས་སྐད་ཆ་འདི་ནི་ཁུངས་མེད་ཀྱི་གཏམ་འཆལ་ཞིག་ཏུ་ངོས་འཛིན་ཞུ་གི་ཡོད་ཀྱང་ངས་ངོས་འཛིན་བྱས་པས་གང་ཡང་ཕན་ཐོགས་མེད་སྟབས་གསལ་པོ་བཟོ་རྒྱུ་གལ་ཆེན་པོ་ཡིན།
གལ་སྲིད་དེ་ལྟར་ཡིན་ན་ཤེས་ཡོན་སྲིད་བྱུས་ཀྱི་ཆེད་དུ་བརྗོད་པའི་གཏམ་རིང་པོ་དེའི་མཇུག་ཏུ་ཤེས་ཡོན་སྲིད་བྱུས་འདི་བཞིན་ལེགས་གྲུབ་བྱུང་བ་ནི་༸གོང་ས་༸སྐྱབས་མགོན་ཆེན་པོ་མཆོག་ནས་ཐོག་མཐའ་བར་གསུམ་དུ་ལམ་སྟོན་བཀའ་སློབ་གནང་བ་ལས་བྱུང་བ་ཞིག་ཡིན་པ་གསལ་པོ་འཁོད་འདུག དེས་ན་རྟོག་ཞིབ་ཚོགས་ཆུང་ནས་གནད་དོན་འདི་ཚོར་ངེས་པར་དུ་ཐུགས་སྣང་ཞིབ་ཚགས་གནང་སྟེ་༸གོང་ས་༸སྐྱབས་མགོན་ཆེན་པོའི་མཚན་གནས་ཁ་ལ་འཁྱེར་ཏེ་སྤྱི་དོན་ཁྱད་གསོད་བྱེད་མཁན་དེ་ཚོར་འགྲམ་ལྕག་ཚ་ཐག་གཅོད་ཅིག་ཞུ་རྒྱུ་གལ་ཆེ་བ་མཐོང་གི་འདུག་པས་དགོངས་འཇགས་ཞུ།། །།
ད་དུང་ཞུ་ཡ་གཅིག་ལ། དགེ་རྒན་གྱིས་བོད་ཡིག་གནས་ཚད་ཡག་པོ་མེད་པ་དང་། དགེ་རྒན་གྱིས་བོད་སྐད་གཙང་མ་བཤད་མི་ཤེས་ཚུལ་འདི་བརྗོད་དུས། དོན་དངོས་ཐོག་ཤེས་ཡོན་བྱུས་ལ་རྒྱབ་སྐྱོར་གནང་པ་རེད། གང་ཡིན་ཞེ་ན། ད་སྐབས་ཀྱི་དགེ་རྒན་དང་ལས་སྣེ་རྣམས་པའི་བོད་ཡིག་གནས་ཚད་སྐྱོ་བོ་དང་། བོད་སྐད་གཙང་མ་བཤད་ཤེས་ཀྱི་མེད་པ་བདེན་པ་ཡིན་ཚེ། དེ་ཡིད་སྨོན་དང་། དགའ་བསུ་གནང་མཁན་བོད་མི་རྣམ་དག་ཞིག་ཡོད་མི་སྲིད། དེར་བརྟེན་མ་འོངས་པར་ཡང་བོད་དོན་ཆེད་སྐུ་གྲོངས་པའི་རྒྱལ་གཅེས་དཔའ་བོ་དཔའ་མོ་རྣམས་ཀྱི་རེ་འདུན་འགྲུབ་པ་དང་། བོད་མི་ལྷད་མེད་ཞིག་གིས་དགའ་བསུ་དང་། བསྔགས་བརྗོད་ཐོབ་དགོས་ན། མ་འོངས་བའི་འགོ་ཁྲིད་དང་། དགེ་རྒན་རྣམས་པར་བོད་ཡིག་གི་ཤེས་རྒྱ་དང་། བོད་སྐད་ཀྱི་སྦྱང་ཆ་ཐོན་པ་དགོས་ངེས་ཅན་རེད། ་དེ་ཡོང་པ་ལ་ཤེས་ཡོན་སྲིད་བྱུས་ལས་གཞན་པས་ཐབས་ལམ་ཞིག་ངས་རྩ་ནས་མ་མཐོང་། ད་དུང་རྒྱུན་དུ་སྐད་ཡིག་ནི་མི་རིགས་ཀྱི་བླ་སྲོག་ཡིན་པ་དང་། བོད་མི་རིགས་གནས་དགོས་ན་སྐད་ཡིག་ལ་ཐུག་ཡོད་ཟེར་བ་དེ་ཚོ་བདེན་པ་ཡིན་ན། ཤེས་ཡོན་སྲིད་བྱུས་་ཐོག་འབད་བརྩོན་ལྷོད་མེད་གནང་རོགས།
ཤེས་ཡོན་སྲིད་བྱུས་གླེང་བ་ནི་མི་རིགས་ཀྱི་ཕུགས་མདུན་གླེང་བ་ཡིན་པས། འདི་གླེང་མཁན་རྣམས་པར་དགའ་བསུ་དང་། ལེགས་གསོལ་ཡོད། སྐད་ཡིག་འདི་མི་རིགས་ཀྱི་བླ་སྲོག་ཡིན་པ་དང་། བོད་མི་རིགས་གནས་དགོས་ན་སྐད་ཡིག་ལ་ཐུག་ཡོད་ཟེར་བ་དེ་ཚོ་བདེན་པ་ཡིན་ན། ཤེས་ཡོན་སྲིད་བྱུས་ལ་ཐོག་འབད་བརྩོན་གནང་རོགས།
གང་ལྟར་ཤེས་ཡོན་སྲིད་བྱུས་ཐོག་གཅིག་མཇུག་གཉིས་མཐུད་ཀྱིས་རྩོམ་ཡིག་སྤེལ་བ་འདིས་རྒྱ་ཆེའི་མང་ཚོགས་ཁྲོད་སེམས་ཚོར་ཆེན་པོ་ཡོད་པའི་རྟགས་མཚན་གསལ་སྟོན་བྱས་ཤིང་། བོད་ཡིག་འཚོ་རྟེན་དུ་བྱེད་ཀྱང་། བོད་ཡིག་ལ་དྲིན་མི་ཚོར་བའི་གྲོས་ཚོགས་འཐུས་མི་བསམ་མེད་རེ་འགས། “ཤེས་ཡོན་སྲིད་བྱུས་གླེང་བ་དེ་ཀུན་སློང་ཡག་པོ་མེད་”ཚུལ་གླེང་བར་ཡང་། འགྲམ་ལྕགས་ཚ་ཐག་ཆོད་ཅིག་གཞུས་པ་རེད།
མདོར་ན་ཤེས་ཡོན་སྲིད་བྱུས་གླེང་བ་ནི་མི་རིགས་ཀྱི་ཕུགས་མདུན་གླེང་བ་ཡིན་པས། འདི་གླེང་མཁན་གྱི་ཀུན་སློང་ལ་དོགས་པ་ཡོད་ཟེར་མཁན་ཚོའི་ཀུན་སློང་ལ་དོགས་པ་ཆེན་པོ་ཡོད།
བརྒྱ་བཤད་ཚིག་གི་རྩ་བ་ནི། ཐོག་དང་པོ། འཛམ་གླིང་རྒྱལ་ཁབ་སོ་སོའི་ནང་སྤྱོད་བཞིན་པའི་སྐད་གཉིས་སློབ་གསོའི་སྐོར་ཞིབ་འཇུག་མཐིལ་ཕྱིན་པ་ཞིག་བྱོས། དེ་ནས་སོ་སོར་འཚམ་པའི་སྐད་གཉིས་སློབ་གསོའི་ལམ་ལུགས་ཤིག་གཏན་འབེབས་བྱོས། དེ་རྗེས་གཡག་ཞར་གྱི་རྩྭ་ཟ་བའི་དཔེ་སུ་མི་འགྱུར་བར། སྐད་གཉིས་སློབ་གསོའི་བསླབ་གཞི་ཆ་ཚང་བ་ཞིག་བསྒྲིགས། དེ་ལའང་རྒྱ་གར་རྒྱལ་ཡོངས་ཀྱི་མཐོ་སློབ་ཁག་ནང་དཔུང་བ་མཉམ་གཤིབ་ཀྱིས་འགྲོ་ཐུབ་པ་ཞིག་དགོས་པ་གནད་ཀྱི་དམ་པ་ཡིན། རྒྱ་གར་གྱི་སློབ་གསོའི་སྒྲོམ་གཞིའི་འགྲོས་དང་ཁ་བྲལ་ཏུ་གྱུར་བའི་སློབ་གསོའི་སྒྲོམ་གཞི་ཞིག་བཙུགས་ཀྱང་ཕུང་བའི་རྒྱུ་མེད་ཡོད་མི་སྲིད། དེ་ནི་ལྟག་ཆུ་ཆད་པའི་རྫིང་བ་བུ་ཞིག་དང་འདྲ་བར། འབྲེལ་ཡོད་གནས་སྡོད་སྤྱི་ཚོགས་ནང་ནས་རྒྱང་ཕུད་དུ་བཏང་སྟེ་དྭ་ཕྲུག་གི་ངོ་བར་འགྱུར་འགྲོ། ཐ་ན་མི་རིགས་ཀྱི་ལས་དོན་གཡུག་ཤོག སོ་སོའི་ལྟོ་དོན་ཀྱང་མི་འཁྱོངས་བའི་རིགས་ཚོགས་ཤིག་ལས་མ་འདས།
གཉིས་པ། དཔྱད་ཀྱང་སྒྲུབ་སྟེ་གྲུབ་པའི་སྐད་གཉིས་སློབ་གསོའི་ལམ་ལུགས་ཏེ་ལག་ཏུ་བསྟར་མཁར་གྱི་དཔུང་སྡེ་ཤིག་གསོ་སྐྱོང་བྱེད་དགོས། དེ་ལ་ཐོག་མར་སྐད་གཉིད་སློབ་གསོའི་དགེ་རྒན་གྱི་དཔུང་སྡེ་ཡང་དག་པ་ཞིག་བསྐྱེད་བསྲིང་བྱེད་དགོས། དེ་ཡོང་བ་སྐད་གཉིས་སློབ་གསོའི་དགེ་ཐོན་སློབ་གྲྭ་ཞིག་འཛུགས་དགོས། དེ་ཡོང་མི་ཐུབ་ན་དམའ་མཐར་ཡང་སྐད་གཉིས་སློབ་གསོའི་དགེ་འོས་ཆེད་ལས་འཛིན་གྲྭ་ཞིག་ངེས་པར་དུ་འཛུགས་དགོས། རབ་ཡིན་ན་རྒྱ་གར་གྱི་མཐོ་སློབ་ཞིག་དང་མཉམ་འབྲེལ་གྱིས་འཛུགས་དགོས། དེ་མི་ཡོང་ན་ཏཱ་ལའི་བླ་མ་མཐོ་སློབ་དང་ས་རཱ། ཝ་རཱ་ཎ་སི་སོགས་དང་མཉམ་འབྲེལ་གྱིས་འཛུགས་དགོས། བརྒྱུད་ལམ་དེ་ནས་སྐད་གཉིས་དགེ་རྒན་གྱི་དཔུང་སྡེ་ཞིག་བསྐྱེད་བསྲིང་བྱེད་དགོས། དེའང་ལའང་རིག་ཚན་སོ་སོ་བར་ཆེད་དུ་སྐད་གཉིས་དགེ་རྒན་བསྐྱེད་བསྲིང་བྱེད་དགོས། མ་མཐར་ཡང་རྩིས་དངོས་རྫས་གསུམ་གཙོས་ཚན་རྩིས་སྡེ་ཚན་གཅིག་དང་། ས་རྒྱུས་ལོ་རྒྱུས་ཆབ་སྲིད། སྤྱི་ཚོགས་ཚན་རིགས། སོགས་གཙོས་སྡེ་ཚན་གཅིག་བཅས་ཁག་གཉིས་སུ་བགོས་སྟེ་སྐད་གཉིས་དགེ་རྒན་བསྐྱེད་བསྲིང་བྱེད་དགོས།
གོང་གསལ་རིམ་པ་དེ་གཉིས་གྲུབ་རྗེས། ད་གཟོད་སྐད་གཉིས་དགེ་རྒན་སློབ་ཐོན་གྱི་རིམ་པ་ལྟར། སློབ་གྲྭ་སོ་སོའི་གཞི་རིམ་འཛིན་གྲྭ་འོག་ནས་མགོ་བརྩམས་ཏེ། རིམ་པ་གོང་མ་བར་རིམ་པས་སློབ་ཁྲིད་ལག་བསྟར་བྱེད་དགོས། ༼འདིའི་རིམ་པ་འདི་དཔེ་སྟོན་སློབ་གྲྭ་གཙོས་སློབ་གྲྭ་ཁག་ཅིག་ནང་འགྲོ་བཞིན་པ་རེད། ཡིན་ནའང་། དགེ་རྒན་དཔུང་སྡེ་ཚད་ལྡན་མ་རེད།༽
གོང་གསལ་ཁག་གྱི་ཁྲོད་ནས། དཀའ་ལས་ཁག་ཤོས་ཏེ་ཚད་ལྡན་གྱི་སྐད་གཉིས་དགེ་རྒན་དཔུང་སྡེ་བསྐྱེད་བསྲིང་བྱ་རྒྱུ་དེ་ཆགས་ཡོད་པ་དང་། ཆེས་གནད་འགག་དང་ཉེན་ཁ་ལྡན་པའི་ལས་དོན་དེ། སྐད་གཉིས་སློབ་གསོའི་སྒྲོམ་གཞི་དང་བསླབ་དེབ་ཆགས་ཡོད། དེ་ལ་ནོར་འཁྲུལ་ཤོར་ཚེ་སྤྱི་ཚོགས་ལ་ཕན་ཐོག་རྒྱུའི་ཚབ་ཏུ་གནམ་ལ་མི་ཤོངས་པའི་ནག་ཉེས་ཆེན་པོ་གསོག་ངེས།
དེ་མ་གཏོགས། ཆབ་སྲིད་པ་ཀྲོག་ཀྲོག་འགའ་དང་། མགོ་ལ་བཙན་གྱི་མཁས་པའི་རྭ་བཙུགས་པའི་རང་སྣང་འགའ། རྣ་མེད། མིག་མེད། ཡིད་མེད་པའི་ཚུལ་ཏུ་རུབ་འཚོགས་བརྒྱབ་སྟེ། དྲན་ཚོར་གློ་བུར་བ་དང་། སེམས་ཤུགས་སྐད་ཅིག་མ་ཙམ་གྱིས་སྒྲུབ་པའི། ཁ་སྟོང་བའི་ནང་གི་ཚིག་སྟོང་བ་ལྟ་བུའི་གཞི་ལམ་འབྲས་གསུམ་དང་སྦྱོར་དངོས་རྗེས་གསུམ་མི་ཚང་བའི་སྒྲོམ་གཞི་ཡ་མ་བླ་ཞིག་གིས་ཡོང་གི་མ་རེད། (རྣར་མི་འགྲོ་ན་ད་ལྟའི་ཤེས་ཡོན་སྲིད་བྱུས་ཀྱི་བསླབ་གཞི་དང་སློབ་ཁྲིད་དམིགས་ཚད་དག་གི་བརྗོད་བྱ་དང་། བརྡ་དང་ཐ་སྙད་འདེམས་བསྒྲིགས་སོགས་ལ་ཅིག་ལྟོས་དང་།)
ད་ལྟའི་ཤེས་ཡོན་སྲིད་བྱུས་ཀྱི་དགེ་རྒན་དག་གི་སྤུས་ཚད་ནི་ཧ་ལས་པའི་ཞན་པོ་རེད། དགེ་རྒན་དེ་དག་གིས་སོ་སོའི་ངོས་ནས་ཀྱང་། རིག་ཚན་ཆེད་ལས་པའི་བརྡ་དང་ཐ་སྙད་པར་ཞོག ཐ་ན་སྤྱིར་བཏང་གི་འགྲོ་འདུག་ཟ་འཐུང་ཙམ་གྱི་བོད་སྐད་གཙང་ཞིག་ཀྱང་བཤད་ཤེས་ཀྱི་མི་འདུག དེ་འདྲའི་དགེ་རྒན་དཔུང་ཁག་ཅིག་གིས་བསྐྱངས་པའི་སློབ་ཕྲུག་ཏག་ག་འདྲ་ཡིན་རྒྱུ་རེད། (རྣར་མི་འགྲོ་ན། དཔེ་སྟོན་སློབ་གྲྭའི་དགེ་རྒན་དག་དང་མཉམ་དུ་ཁ་བརྡ་བྱོས་དང་། ཁོ་ཚོས་སློབ་ཕྲུག་ཚོར་ཁ་བརྡ་བྱེད་པའི་གཏམ་ལ་ཉོན་དང་། སྐད་ཆའི་ཁྲོད་ཀྱི་གནད་ཚིག་དག་གི་བརྒྱ་ཆའི་ ༦༠ ཡན་བོད་སྐད་མ་རེད། སྐད་ཆ་ཧྲིལ་པོ་ར་མ་ལུག་གི་སྐད་རེད། )
ད་ལྟའི་ཤེས་ཡོན་སྲིད་ཇུས་ཀྱི་བསླབ་དེབ་དང་སློབ་ཁྲིད་དཔྱད་ཡིག་དག་གཙོས་འཛིན་སྐྱོང་སྒྲོམ་གཞི་དང་། དགེ་རྒན་དཔུང་སྡེ་འདི་འདྲ་ཞིིག་གི་འོག ལམ་ལུགས་ལོགས་སུ་བགར་ནས་བསྐྱེད་སྲིང་བྱེད་པ་ལས། བོད་སྐད་ཡིག་གཅིག་པུའི་སྒང་ཤུགས་བརྒྱབ་སྟེ། གཞན་པའི་རིག་ཚན་དག་དབྱིན་ཡིག་གི་ལམ་ནས་ཁྲིད་ན་ཡག་ཤོས་རེད། འདི་མུར་ཕྱིན་ཚེ་མཐར་༼རྒྱུ་ཤ་མི་ལ་མེད་པ། རྒྱུ་ཁུ་ཁྱི་ལ་མེད་པ༽ཞིག་གི་འགྱུར་རྒྱུར་ཉེན་ཁ་འདུག
ཤེས་ཡོན་སྲིད་བྱུས་ནི་མི་རིགས་ཤིག་གི་རིན་ཐང་དང་། མི་རིགས་ཤིག་གི་ཚེ་སྲོག་དང་འབྲེལ་བ་ཡོད་པ་ལོས་ཡིན། རྒྱུ་མཚན་དེ་ལ་བརྟེན་ནས་བཀའ་ཁྲི་ཟམ་གདོང་ཚང་གིས་གསར་གཏོད་གནང་བ་རེད། ཡི་ཡང་བོད་ཁྱིམ་ཁག་གི་ཡན་ལག་དང་ཉིང་ལག་དག་ཏུ་ལག་བསྟར་གནད་ལ་སྨིན་པོ་ཞིག་བྱུང་མ་ཐུབ་པ་འམ་ཡང་ན་འགོག་རྐྱེན་ཆེ་ཤོས་དེ་ནི་ཨ་མ་རྗེ་བཙུན་པདྨ་ལགས་དང་འབྲེལ་བ་ཡོད་པ་རེད།
སྤྱིར་ཤེས་ཡོན་སྲི་ལག་བསྟར་གནང་ཡུལ་དཔེ་བསྟོན་སློབ་གྲྭ་ལྟ་བུར་མཚོན་ན་སློབ་ཕྲུག་ཚོའི་ཀུན་སྤྱོད་དང་ཤེས་ཡོན་གང་ཐད་ནས་སློབ་ཕྲུག་གཞན་ལས་ཁྱད་དུ་འཕགས་པ་ཞིག་ཡོང་བཞིན་པ་ནི་མངོན་སུམ་ལ་བསྙོན་མི་ནུས་པ་གྱུར་ཡོད། དཔེ་ན་ཁྱིམ་ཚང་གཅིག་གི་ནང་ནས་བུ་ཕྲུག་གཉིས་ལས་གཅིག་དཔེ་བསྟོན་སློ་གྲྭ་དང་། གཅིག་སློབ་གྲྭ་གཞན་པར་ཡོད་མཁན་ཕ་མ་མང་པོས་མཐོང་ཐོས་མྱོངས་གསུམ་ཡོད་པའི་སྒོ་ནས་དཔེ་བསྟོན་སློབ་གྲྭ་ཡག་པོ་ཡོད་པ་ངོས་འཛིན་མི་བྱེད་ཀ་མེད་དུ་གྱུར་ཡོད།
ད་ལྟའི་འཛིན་སྐྱོང་གིས་ལག་ལེན་གང་འདྲ་གནང་གི་ཡོད་མིན་གསལ་པོ་ཞུ་མ་ཤེས་ཀྱང་། སྤྱི་ཚོགས་ནང་དུ་གླེང་ཕྱོགས་མང་པོ་ཡོང་གི་ཡོད་པ་ནི་དངོས་ཡོད་རེད། དེ་མིན་༸གོང་ས་མཆོག་དང་ཟམ་གདོང་རིན་པོ་ཆེ་རྣམ་པ་གཉིས་ལ་ཤེས་ཡོད་སྲིད་ཇུས་དང་འབྲེལ་བའི་སྒོ་ནས་ཟུར་ཟ་དང་ངན་རྨོད་ག་ཚོད་བྱས་ཀྱང་། རང་གི་དེ་ཉིད་ཕྱི་རུ་གསལ་བྱེད་ཙམ་ལས་དྲང་བདེན་ཞིག་ལ་ཡིན། དཔེ་ན་རྩོམ་ཡིག་འདིའི་ནང་དུ་ཆ་མཚོན་ནའང་སྤྱི་ཚོགས་དྲྭ་འབུ་ཚོས་བཤད་ཡམ་མང་པོ་ཞིག་ལུང་འདྲེན་ཐོག་གནད་ཡོད་མི་སྣ་ཚོས་བསམ་ཚུལ་ཡིན་ཁུལ་དང་། ད་དུང་དགོས་མེད་ཀྱི་གཏམ་རྙོག་ཡང་མང་པོ་སྤུངས་འདུག་པར་བརྟེན་དྲང་བདེན་གྱི་སྒོ་ནས་བསམ་ཚུལ་ཞུས་པ་ཡིན།། །།
ཁ་བཤད་ཆུ་ཡི་རྦོ་བ་ལག་ལན་གསེར་གྱི་ཐེག་པ་ཟེར་བ་བཞིན་སྤྱི་འཐུས་རྒྱུན་ལས་གྲོས་ཆ་དེ་ལག་ལན་ཐོག་གང་འདྲ་ཞིག་འགྲོ་མན་ལྟས་མོ་ཡོད། མང་ཚོགས་རྒྱབ་སྐྱོར་ཐོབ་ཆེད་ཙམ་ལས་གང་ཡང་མ་མཐོང་།