བོད་རིཊ་མགོ་ཁྲིད་གནས་དབྱུང་བཏང་།

བོད་ཁུལ་གྱི་ལྐོག་ཟ་རུལ་སུངས་རྟོག་ཞིབ་ཁྲོད་བོད་རིགས་མགོ་ཁྲིད་ ༣ ལས་གནས་ནས་ཕུད་པ་དང་། གཅིག་ཏང་ནང་ནས་ཕྱིར་འབུད་བཏང་ཡོད་འདུག

ཁ་སང་རྒྱ་ནག་ཤིན་ཧྭ་གསར་ཁང་གིས་གནས་ཚུལ་སྤེལ་ཏེ། བོད་རང་སྐྱོང་ལྗོངས་ཆབ་མདོ་ས་ཁུལ་དཔའ་ཤོད་རྫོང་སློབ་གསོ་ཁང་གི་མགོ་ཁྲིད་ཟུར་པ་དོན་ལྡན་ཟེར་བ་ཞིག་གིས། རྒྱལ་ཁབ་ཀྱི་ཁྲིམས་དང་འགལ་བའི་ནག་ཉེས་ཚབས་ཆེན་བཟོས་ཏེ་ཏང་ནང་ནས་ཕྱིར་འབུད་བཏང་ཡོད་པ་མ་ཟད། ཁྲིམས་འཛིན་ལས་ཁུངས་ལ་རྩིས་སྤྲོད་བྱས་ནས་ཐག་གཅོད་བྱ་རྒྱུ་ཡིན་ལུགས་དང་། དེ་བཞིན། ལྷ་ས་གྲོང་ཁྱེར་སྟོད་ལུང་བདེ་ཆེན་རྫོང་ཡབ་མདའ་གྲོང་ཚོའི་མགོ་ཁྲིད་གཞོན་པ་ཀྲང་ལིང་ཡུན་ཟེར་བ་ཞིག་ཀྱང་ཏང་ནང་ནས་ཕྱིར་འབུད་བཏང་སྟེ། ཁྲིམས་འཛིན་ལས་ཁུངས་ལ་རྩིས་སྤྲད་ཡོད་སྐོར་བསྒྲགས་འདུག

ཡང་རྒྱ་ནག་སྒྲིག་ཁྲིམས་ཞིབ་བཤེར་ལྷན་ཁང་གི་དྲ་བའི་ཐོག་གནས་ཚུལ་སྤེལ་བ་ལྟར་ན། བོད་རང་སྐྱོང་ལྗོངས་བཟོ་ལས་ཆ་འཕྲིན་ཁང་གི་ཁེ་ལས་འབྲིང་ཆུང་ཚན་པའི་མགོ་ཁྲིད་ཕེང་ཀང་ལིང་ཟེར་བ་ཞིག་ལ། ཁྲིམས་འགལ་གྱི་དོགས་གཞིའི་འོག་ཞིབ་བཤེར་བཞིན་ཡོད་པ་དང་། གཞན་ཡང་། ལྷ་ས་གྲོང་ཁྱེར་མལ་གྲོ་གུང་དཀར་རྫོང་ཐང་སྐྱ་གྲོང་ཚོའི་མགོ་ཁྲིད་ཚུལ་ཁྲིམས་དང་། ཉིང་ཁྲི་ས་ཁུལ་ཉིང་ཁྲི་རྫོང་ཞིང་ལས་སྡེ་བའི་མགོ་ཁྲིད་གཞོན་པ་ཆུང་བདག་ཚེ་རིང་། དེ་བཞིན། གཞིས་ཀ་རྩེ་གྲོང་ཁྱེར་(jiang luo)དགོན་པ་དོ་དམ་ཁང་གི་འགན་འཛིན་ཆུང་བདག་དང་། ནག་ཆུ་རྫོང་གི་ལྷ་སར་བཅའ་སྡོད་དོན་གཅོད་ཁང་གི་འགན་འཛིན་ཉི་མ་ཚེ་རིང་བཅས་ལ་ཁྲིམས་འགལ་གྱི་ནག་ཉེས་འོག ཏང་ནང་ནས་ཕྱིར་འབུད་གཏོང་བའི་ཉེན་བརྡ་བཏང་ཡོད་པ་མ་ཟད། ཉིང་ཁྲི་ས་ཁུལ་རྫ་ཡུལ་རྫོང་ཞིང་ཕྱུག་སྡེ་བའི་ཚན་རྩལ་ཁང་གི་མགོ་ཁྲིད་ཟླ་བ་དོན་འགྲུབ་དང་། ནག་ཆུ་རྫོང་ཤང་མོ་(xiang mao)གྲོང་ཚོའི་མགོ་ཁྲིད་གཞོན་པ་བཀྲ་ཤིས་དོན་འགྲུབ། སི་ཁྲོན་རྔ་བ་ཁུལ་འབར་ཁམས་རྫོང་ཕྱུག་སྨན་ཁང་གི་སེམས་ཅན་འཕྲོད་བསྟེན་ལྟ་ཞིབ་ཁང་གི་ལས་བྱེད་བློ་བརྟན་བཅས། ཁྲིམས་འགལ་གྱི་ཉེས་མིང་འོག་ལས་གནས་ནས་ཕྱིར་འབུད་བཏང་ཡོད་འདུག

འདི་གའི་གསར་འགོད་པས་ཨ་རིའི་སྐུ་ཚབ་དོན་གཅོད་ཁང་གི་རྒྱ་རིགས་འབྲེལ་མཐུད་པ་ཀུན་དགའ་བཀྲ་ཤིས་ལགས་སུ། བོད་ཁུལ་གྱི་ལྐོག་ཟ་རུལ་སུངས་རྒོལ་རྡུང་ཐད་ཡིག་ཐོག་ནས་དགོངས་ཚུལ་དྲིས་པར། རྒྱ་ནག་གི་ལྐོག་ཟའི་སྐོར་གླེང་སྐབས། ཁ་ཤས་ཀྱིས་ཞི་ཅིན་ཕིན་གྱིས་ལྐོག་ཟ་རུལ་སུངས་ཀྱི་སྣང་ཚུལ་ལ་རྡུང་རྡེག་གཏོང་རྒྱུ་དེ་ནི། དབང་ཆ་འཐབ་རྩོད་ཀྱི་ཆེད་དུ་ཡིན་འདྲའི་དཔྱད་བརྗོད་བྱེད་ཀྱི་ཡོད་པ་འདི་ལ་ང་རང་མོས་མཐུན་མེད། ལྐོག་ཟའི་གནད་དོན་མེད་པ་བཟོ་མ་ཐུབ་པ་ཡིན་ན། རྒྱ་ནག་དམར་ཤོག་གནས་ཐབས་མེད་པས་ཞི་ཅིན་ཕིན་གྱིས་ལྐོག་ཟ་རུལ་སུངས་ལ་རྡུང་རྡེག་མ་གཏོང་ཀ་མེད་ཆགས་ཡོད། འོན་ཀྱང་། ད་ལྟའི་དཀའ་ངལ་ནི་ལྐོག་ཟ་རུལ་སུངས་ལ་རྡུང་རྡེག་གཏོང་སྟངས་ཀྱི་འབྲེལ་ཡོད་ཁྲིམས་སྒྲིག་མེད་པ་འདི། ཞི་ཅིན་ཕིན་ལ་འཕྲད་པའི་དཀའ་ངལ་ཆེ་ཤོས་ཤིག་ཡིན་སྟབས། རིམ་བཞིན་ཁྲིམས་སྒྲིག་གཏན་འབེབས་དང་། ལྷག་པར་དུ་དཔོན་རིགས་ཀྱི་རྒྱུ་ནོར་གཞུང་ལ་ཕྱི་གསལ་ནང་གསལ་གྱི་ལམ་ལུགས་ཞིག་བསྐྲུན་རྒྱུ་དེ་ལྐོག་ཟ་གཙང་སེལ་ཐུབ་མིན་གྱི་འགག་རྩ་རེད། སྤྱིར་བཏང་མི་ཚོས་བོད་ནང་གི་ལྐོག་ཟའི་དངུལ་དང་རྒྱུ་ནོར་གྱི་རིན་འབབ་དེ་རྒྱ་ནག་དང་བསྡུར་ན་གྲངས་འབོར་ཆེན་པོ་མ་རེད། ཡིན་ན་ཡང་རྒྱ་ནག་ནང་ལྐོག་ཟ་གཙང་སེལ་གྱི་ཚ་རླབས་ཤིག་འཕྱུར་བའི་སྐབས་དེར། བོད་ནང་དུའང་དེའི་ཤུགས་རྐྱེན་བསླེབ་རྒྱུ་གདོན་མི་བཟའ་བས། ལྐོག་ཟ་བྱེད་པའི་ཆ་རྐྱེན་ཡོད་མཁན་བོད་རིགས་ལས་བྱེད་པ་ཚོས་ཐུགས་གཟབ་གནང་རྒྱུ་གལ་ཆེན་པོ་རེད། ལྐོག་ཟ་ནི་མི་རུང་བའི་བྱ་བ་ཞིག་དང་། ལྷག་པར་དུ་བོད་ཀྱི་རིག་གཞུང་གི་ཆ་ནས་བཤད་ཀྱང་། དེ་ནི་བཟང་སྤྱོད་དང་འགལ་བ་ཞིག་ཡིན་སྟབས། མ་འོངས་པར་བོད་རིགས་ལྐོག་ཟ་བྱེད་མཁན་ཚོས་མཚམས་འཇོག་བྱེད་རྒྱུ་དང་། ལྐོག་ཟ་མི་བྱེད་མཁན་ཚོས་རང་ཉིད་ལྐོག་ཟའི་ནང་མི་ཚུད་པ་བྱེད་རྒྱུ་ནི་ཧ་ཅང་གལ་ཆེན་པོ་རེད་བསམ་གྱི་ཡོད། ཅེས་བརྗོད་སོང་།

གསར་འགོད་པ། པདྨ་མཚོ།