རྒྱ་ནག་གཞུང་གིས་ཀྲུང་དབྱང་མི་རིགས་སློབ་ཆེན་གྱི་ཡུ་གུར་བའི་དགེ་རྒན་ཆེན་མོ་ཡེ་ལེ་ཧ་མུར་རྒྱལ་ཁབ་ཁ་བྲལ་གྱི་ཉེས་མིང་འོག་ཚེ་བཙོན་གྱི་ཁྲིམས་ཐག་བཅད་ཡོད་འདུག
དབྱིན་ཇིའི་བྷེ་བྷེ་སེ་གསར་ཁང་གིས་ད་ལྟ་རང་གནས་ཚུལ་སྤེལ་བ་ལྟར་ན། རྒྱ་ནག་གཞུང་གིས་ཤིན་ཅང་ཡུ་གུར་རིགས་རང་སྐྱོང་ལྗོངས་ཝུ་རུ་མུ་ཆི་འབྲིང་རིམ་མི་དམངས་ཁྲིམས་ཁང་གིས། ཚེས་ ༡༧ དང་ ༡༨ བཅས་ཉིན་གཉིས་རིང་ཀྲུང་དབྱང་མི་རིགས་སློབ་ཆེན་གྱི་ཡུ་གུར་བའི་དགེ་རྒན་ཆེན་མོ་ཡེ་ལེ་ཧ་མུའུ་ལགས་ (Ilham Tohti) ལ་འདྲི་གཅོད་ཁྲིམས་བཤེར་བྱས་རྗེས། ཁོང་ལ་རྒྱལ་ཁབ་ཁ་བྲལ་གྱི་ཉེས་མིང་འོག་ཚེ་བཙོན་གྱི་ཁྲིམས་ཐག་བཅད་ཡོད་པར་མ་ཟད། ཁོ་རང་སྒེར་གྱི་རྒྱུ་ནོར་མཐའ་དག་གཞུང་བཞེས་བཏང་ཡོད་ཚུལ་བསྒྲགས་འདུག
དེ་རིང་ཚེས་ ༢༣ ཉིན་ཡེ་ལེ་ཧ་མུའུ་ཡི་རྒྱ་རིགས་ཁྲིམས་རྩོད་པ་ལེའུ་ཞོ་ཡན་གྱིས་སྐད་འཕྲིན་བརྒྱུད་གནས་ཚུལ་བརྒྱུད་བསྒྲགས་བྱས་པའི་ནང། སྔ་དྲོའི་ཆུ་ཚོད་ ༣།༠༠ རིང་ཁྲིམས་ཆད་ཁྱབ་བསྒྲགས་ཀྱི་ཁྲིམས་ར་ཚོགས་སྐབས་ཡེ་ལེ་ཧ་མུའུ་ཡིས་ཁྲིམས་ཆད་ལ་ངོས་ལེན་མེད་ཅེས་ཚིག་གཅིག་མ་གཏོགས་བཤད་མེད་པ་དང་། དེའི་རྗེས་ཉེན་རྟོག་པས་བཙན་གྱིས་ཁྲིམས་རའི་ཕྱི་ཕྱོགས་སུ་འཁྲིད་ཡོད་སྐོར་བཀོད་འདུག
རང་ལོ་ ༤༤ ཡིན་པའི་ཡེ་ལེ་ཧ་མུའུ་ལགས་ནི། ༡༩༦༩ ལོར་ཤིན་ཅང་ཨ་ཐུའུ་ཧྲི་རུ་སྐྱེས་བ་དང་། ས་གནས་སློབ་གྲྭ་ཆུང་འབྲིང་ཁག་འགྲིམས་རྗེས་རྒྱ་ནག་ཏུང་པེ་དགེ་ཐོན་སློབ་ཆེན་དུ་ཉེ་བའི་གཙུག་ལག་རབ་འབྱམས་པ་དང་། ཀྲུང་དབྱང་མི་རིགས་སློབ་ཆེན་དུ་གཙུག་ལག་རབ་འབྱམས་པ་སློབ་ཐོན་གནང་ཡོད་པ་དང་། ཕྱིས་སུ་ཀྲུང་དབྱང་མི་རིགས་སློབ་ཆེན་གྱི་དགེ་རྒན་ཆེན་མོའི་ཕྱག་ལས་གནང་ཡོད་འདུག་ལ། ཁོང་རྒྱ་ནག་གི་དམར་ཤོག་ཏང་གི་ཐོབ་ཐང་ཡོད་མཁན་གྱི་མི་སྣ་ཞིག་ཡིན་འདུག ༢༠༠༦ ལོར་ཁོང་གིས་ཡུ་གུར་རིགས་ཀྱི་དྲ་རྒྱ་གསར་འཛུགས་ཀྱིས། ཡུ་གུར་བའི་འགྲོ་བ་མིའི་ཐོབ་ཐང་དང་སྨྲ་བརྗོད་རང་དབང་སྲུང་སྐྱོབ་སྐོར་གྱི་རྩོམ་ཡིག་མང་པོ་སྤེལ་ཡོད་པ་དང་། སྤོབས་པ་ཆེན་པོས་པེ་ཅིན་གཞུང་གིས་ཤིན་ཅང་ཡུ་གུར་རིགས་རང་སྐྱོང་ལྗོངས་སུ་དྲག་གནོན་གྱི་སྲིད་ཇུས་ལག་བསྟར་དང་ལྟ་སྲུང་སོགས་བྱས་ཏེ་མི་མང་ལ་སུན་གཙེར་བཟོ་བཞིན་པའི་གནས་སྟངས་སོགས་གསལ་འདོན་བྱས་ཡོད་འདུག
ཁོང་གི་དྲ་རྒྱའི་ནང་ཡུ་གུར་མི་རིགས་ཀྱི་དཀའ་ངལ་དང་འབྲེལ་བའི་གནས་ཚུལ་རིགས་བཀོད་པ་ལ་བརྟེན་ནས། རྒྱ་གཞུང་གིས་ཁོང་ལ་ཐེངས་མང་པོར་འཇིགས་སྐུལ་ཉེན་བརྡ་དང་བཀག་ཉར་སོགས་བྱས་ཡོད་པར་མ་ཟད། འདི་ལོའི་ཕྱི་ཟླ་ ༡ ནང་རྒྱ་གཞུང་གིས་ཡེ་ལེ་ཧ་མུའུ་ལགས་པེ་ཅིན་དུ་ཡོད་པའི་ཁོང་གི་སྡོད་ཁྱིམ་ནས་འཛིན་བཟུང་བཙན་འཁྲིད་བྱས་པ་དང་། ཟླ་ ༧ པའི་ཟླ་མཇུག་ཝུའུ་རུ་མུའུ་ཆི་ཞིབ་དཔྱོད་ཁང་ལ་ཞུ་སྦྱོར་སོགས་བྱས་ཏེ་བཀག་ཉར་འདྲི་གཅོད་སོགས་བྱས་ཡོད་འདུག ད་ལྟའི་བར་ཨ་རི་དང་ཡུ་རོབ་རྒྱལ་ཁབ་ཁག་དང་། གཞུང་འབྲེལ་མིན་པའི་ཚོགས་པ་ཁག་བཅས་ནས་རྒྱ་ནག་གཞུང་ལ་ཁོང་ཀློད་གྲོལ་གཏོང་རྒྱུའི་རེ་སྐུལ་དང་བརྡ་ལན་ཐེངས་མང་སྤྲད་ཡོད་ཀྱང་། རྒྱ་ནག་ཕྱི་འབྲེལ་ཚན་པས་ཡེ་ལེ་ཧ་མུའུ་ཡིས་རྒྱལ་ཁབ་ཀྱི་ཁྲིམས་དང་འགལ་བའི་ལས་དོན་བསྒྲུབས་ཡོད་པའི་ནག་ཉེས་བགྲངས་ཡོད་པར་མ་ཟད། ཨ་རི་གཙོས་པའི་ཕྱིའི་རྒྱལ་ཁབ་ཁག་གིས་གནད་དོན་དེའི་ཐད་གླེང་སླེང་བྱས་པ་དེ་རྒྱལ་ཁབ་ཀྱི་བདག་དབང་ལ་ཐེ་བྱུས་བྱས་པ་ཞིག་ཡིན་པའི་བསྒྲགས་གཏམ་རིམ་པ་སྤེལ་ཡོད་འདུག
གསར་འགོད་པ། དོན་གོ
ཡུ་གུ་པའི་ཕོ་རྒོད་མི་རིགས་རྩ་མེད་བཟོ་དུས།མི་རིགས་འདིས་ཤེས་ཡོན་ཅན་དང།ལྷག་བསམ་ཅན་ཚོ་མེད་པ་གཏོང་དགོས་རེད།་བོད་དང་ཤིང་ཇང་ལྷོ་སོག་གསུམ།