དེ་རིང་སྔ་དྲོར་དྷ་ས་ཐེག་ཆེན་གཙུག་ལག་ཁང་དུ་༧གོང་ས་མཆོག་གིས་ལྷོ་ཤར་ཨེ་ཤ་ཡའི་དད་ལྡན་གཙོས་ཆོས་ཞུ་བ་ ༦༠༠༠ ཙམ་ལ་ཉིན་གསུམ་རིང་གི་གསུང་ཆོས་དབུ་འཛུགས་ཐོག འཛམ་གླིང་ཐོག་གི་དཀའ་ངལ་ཚང་མ་མིས་བཟོས་པ་ཡིན་པས་དེ་དག་སེལ་ཐབས་ཀྱང་མི་ཡིས་བྱེད་དགོས་སྐོར་གསུངས་སོང་།
དེ་རིང་སྔ་དྲོའི་ཆུ་ཚོད་ ༨ ཡོལ་ཙམ་ལ་དྷ་ས་ཐེག་ཆེན་ཆོས་གླིང་གཙུག་ལག་ཁང་དུ། ༧གོང་ས་མཆོག་གིས་རྒྱ་ནག་སྐམ་ས་ཆེན་མོ་དང་སིང་ག་པོར་། ཐའེ་ལན་ཊི། ཝའེ་ཋི་ནམ། ཉི་ཧོང་། ཀོ་རི་ཡ། ཐའེ་ཝན་སོགས་ལྷོ་ཤར་ཨེ་ཤ་ཡའི་རྒྱལ་ཁབ་ཁག་བཅས་ནས་ཕེབས་པའི་དད་ལྡན་ཆོས་ཞུ་བ་ ༨༠༠ ཙམ་གྱི་གཙོས་འཛམ་གླིང་གི་རྒྱལ་ཁབ་ ༦༢ ཙམ་ནས་ ནང་ཆོས་དོན་གཉེར་བ་དང་། དྷ་ས་ཁུལ་གྱི་སེར་སྐྱ་མི་མང་བཅས་ཁྱོན་མི་གྲངས་ ༦༠༠༠ ཙམ་ལ་རྒྱལ་སྲས་ཞི་བ་ལྷས་མཛད་པའི་བྱང་ཆུབ་སེམས་དཔའི་སྤྱོད་པ་ལ་འཇུག་པའི་གསུང་ཆོས་དབུ་འཛུགས་གནང་སོང་བ་དང་། ཉིན་ ༣ རིང་གི་སྔ་དྲོའི་ཆུ་ཚོད་ ༨ ནས་ ༡༢ བར་དབྱིན་སྐད་དང་རྒྱ་སྐད། ཉི་ཧོང་སྐད། ཀོ་རི་ཡའི་སྐད་སོགས་སྐད་རིགས་མི་འདྲ་བ་ ༦ ནང་ཐད་གཏོང་གནང་གི་འདུག
གསུང་ཆོས་ཀྱི་ཐོག་མར་༧གོང་ས་མཆོག་གིས་དཀའ་ངལ་སེལ་ཐབས་བྱེད་པ་དེ་ཚེ་འདིའི་དོན་དག་ཡིན་པ་ལས་ཚེ་ཕྱི་མ་སོགས་བཤད་མི་དགོས་བའི་སྐོར་བཀའ་སློབ་གནང་དོན། ད་ལྟ་ང་ཚོ་དུས་རབས་ཉེར་གཅིག་པའི་ནང་སླེབ་བསྡད་ཡོད་པ་དང་། དུས་རབས་ཉི་ཤུ་པའི་ནང་དམག་འཁྲུག་སོགས་དཀའ་ངལ་མང་པོ་ཞིག་ཡོད་པ་དེ་ཚོ་ང་ཚོ་མིས་བཟོས་པ་ཞིག་རེད། ད་ལྟ་དུས་རབས་ཉེར་གཅིག་པའི་མགོ་བརྩམས་པའི་དུས་ཡིན་ཞིང་། ད་དུང་ཡང་མིས་བཟོས་པའི་དཀའ་ངལ་ཡོང་གི་ཡོད་པ་རེད། ཐ་ན་ཆོས་ལུགས་དད་པ་མ་འདྲ་བའི་ཐོག་ནས་ཀྱང་དཀའ་ངལ་བཟོས་ཡོང་གི་ཡོད་པ་རེད། དཀའ་ངལ་དེ་ཚོ་མིས་བཟོས་པ་ཡིན་དུས་མི་རང་ཉིད་ཀྱིས་སེལ་ཐབས་བྱ་རྒྱུ་མ་གཏོགས་ཐབས་ཤེས་གཞན་ཡོད་པ་མ་རེད། མིས་དཀའ་ངལ་བཟོས་པ་དེ་དཀའ་ངལ་བཟོ་འདོད་བྱས་ཏེ་དྭང་དུ་བླངས་ནས་བཟོས་པ་ཞིག་མ་རེད།
ཡིན་ནའང་བསམ་བློ་གཏོང་སྟངས་མ་འདྲ་པ་དང་བསམ་བློ་གུ་དོག་པའི་གནས་སྟངས་འོག་དཀའ་ངལ་འཕྲད་ཡོང་གི་ཡོད་པ་རེད། རང་ཉིད་ཀྱི་བདེ་སྡུག་གི་ཉམས་མྱོང་རྣམས་དཔེར་བླངས་ཏེ་གཞན་ཀྱང་བདེ་བ་འདོད་ཅིང་སྡུག་བསྔལ་མི་འདོད་པ་ཡིན་པར་བསམ་བློ་མང་ཙམ་འཁོར་བ་ཡིན་ན། མིས་བཟོས་པའི་དཀའ་ངལ་དེ་ཉུང་དུ་འགྲོ་ངེས་རེད། དཔེར་ན་ང་ཚོ་ནང་པ་སངས་རྒྱས་པ་ཞིག་ཡིན་ན། འཛམ་གླིང་གི་མི་གྲངས་དུང་ཕྱུར་ ༧༠ ཡི་བདེ་སྡུག་སྐོར་སྐད་ཆ་བཤད་དུས། སངས་རྒྱས་བཅོམ་ལྡན་འདས་དང་དགེ་འདུན་དཀོན་མཆོག སྐྱེས་བ་ཕྱི་མ་སོགས་བསམ་མི་དགོས་ལ། ལྷ་དང་ཨན་ལཱ་སོགས་ཀྱང་བསམ་དགོས་པ་མ་རེད། གང་ལྟར་དངོས་ཡོད་གནས་ཚུལ་དེ་ང་རང་ཚོ་མིས་བཟོས་པའི་དཀའ་ངལ་རྣམས་ངོས་ཟིན་པ་བྱུང་ན། འཛམ་བུ་གླིང་འདི་སྐྱིད་པོ་ཡོང་གི་རེད། མིས་བཟོས་པའི་དཀའ་ངལ་མང་པོ་སླེབ་ཡོང་དུས་མི་མང་པོར་ཐད་ཀར་ལུས་ལ་དཀའ་ངལ་འཕྲད་ཀྱི་མེད་ཀྱང་། སེམས་ལ་དངངས་སྐྲག་ཡོང་ནས་མ་སྐྱིད་པ་ཡོང་གི་ཡོད་སྟབས། དཀའ་ངལ་སེལ་བ་དེ་ང་རང་ཚོའི་དོན་དག་རེད། ཚེ་འདིའི་དོན་དག་རེད། ཚེ་ཕྱི་མའི་སྐད་ཆ་བཤད་དགོས་པ་མ་རེད་དེ་ཐག་རིང་པོ་རེད། ཅེས་གསུངས་སོང་།
ཡང་ཁོང་གིས་ཆོས་ལུགས་འདྲ་མིན་གྱི་དགོས་མཁོའི་སྐོར་ལ་གསུངས་དོན། འཛམ་གླིང་ཐོག་ཆོས་ལུགས་ཀྱི་ལྟ་གྲུབ་ཐོག་ནས་མ་འདྲ་བ་མང་པོ་ཡོད་ཀྱང་། དེ་ཚོ་ཚང་མའི་མཐར་ཐུག་གི་དམིགས་ཡུལ་ནི་མི་བྱམས་བརྩེ་ལྡན་པ་ཞིག་བྱེད་དགོས་པ་དེ་ཡིན་ལ། ལྟ་གྲུབ་མ་འདྲ་བ་དེ་ཚོས་གཙོ་བོ་བྱམས་བརྩེས་ཀུན་ནས་བསླངས་བའི་མི་ཞིག་ཡོང་བར་དམིགས་པ་གཅིག་མཚུངས་རེད། དངོས་ཡོད་གནས་ཚུལ་ལའང་བཅོམ་ལྡན་འདས་མ་བྱོན་གོང་ནས་ཆོས་ལུགས་མ་འདྲ་བ་མང་པོ་ཡོད་པ་དང་། ད་ལྟའང་འཛམ་བུ་གླིང་འདིའི་ཐོག་ཆོས་ལུགས་མ་འདྲ་བ་མང་པོ་ཡོད་པ་རེད། ཆོས་ལུགས་དེ་ཚོ་ཆོས་ལུགས་གཅིག་བཟོ་བ་ཟེར་བ་དེ་ཡོང་སྲིད་པ་ཞིག་མ་རེད་ལ། ཡོང་དགོས་བའང་མི་འདུག གང་ཡིན་ཟེར་ན། སངས་རྒྱས་བཅོམ་ལྡན་འདས་རང་ཉིད་ཀྱི་གདུལ་བྱའི་ནང་དུའང་ཁམས་དང་དབང་པོ། མོས་པ་བཅས་ཀྱི་ཁྱད་པར་ཡོད་པ་ལྟར་ཐབས་ཀྱི་ཆ་ནས་ཐེག་པ་གསུམ་དང་། ཤེས་རབ་ཀྱི་ཆ་ནས་གྲུབ་མཐའ་སྨྲ་བ་བཞི་གསུངས་ཡོད་པ་དང་། དེ་ཚོ་རེ་རེའི་ནང་དུའང་མ་འདྲ་བའི་ཁྱད་པར་ཡོང་གི་ཡོད་སྟབས། བཅོམ་ལྡན་འདས་ཀྱིས་ཀྱང་གདུལ་བྱའི་ཁམས་དང་མོས་བ་ལ་བརྟེན་ནས་གསུངས་ཡོད་པ་ལས། ཁྱེད་རང་གི་བློ་ལ་བབ་ན་རེད་མ་བབ་ནའང་རེད། ངའི་ལྟ་གྲུབ་འདི་ཡིན་ཟེར་ནས་གསུངས་ཡོད་པ་མ་རེད།
དེའི་ཐོག་ནས་ང་ཚོས་ག་རེ་བསླབ་བྱ་ལེན་ཐུབ་པ་རེད་ཟེར་ན། འཛམ་གླིང་ཐོག་ཆོས་དད་ཡོད་མཁན་དུང་ཕྱུར་ ༦༠ ཡོད་པའི་ནང་ཁམས་དང་མོས་པ་སྣ་ཚོགས་ཡོད་པ་དེར་ཐབས་ལམ་མི་འདྲ་བའི་ཐོག་ནས་བྱམས་བརྩེ་སྤེལ་དགོས་པ་དེ་རེད། ཆོས་ཟེར་བ་དེ་སེམས་འཁྲུག་བསྡད་པའི་སྐབས་ཀྱི་སྨན་ལྟ་བུ་ཡིན་སྟབས། སེམས་འཁྲུག་སྟངས་མ་འདྲ་བ་སྣ་ཚོགས་ཡོད་དུས། དེ་ཚོ་རེ་རེར་སོ་སོ་དང་འཚམ་པའི་སྨན་ཞིག་དགོས་ཀྱི་ཡོད་པར་བརྟེན། ཆོས་ལུགས་ཀྱི་ཐོག་ནས་མ་འདྲ་བ་མང་པོ་དགོས་ཀྱི་ཡོད་པ་རེད། གཙོ་བོ་ཚང་མས་ཡ་རབས་དང་སེམས་པ་བཟང་པོ་བྱེད་ཐུབ་ན་འགྲིག་འདུག་གི་ཡོད་པ་རེད། ཅེས་སོགས་གསུངས་སོང་།
