སི་ཁྲོན་རྔ་བ་ཁུལ་ཁྱུང་མཆུ་རྫོང་གི་ཚོང་པའི་ལྷན་ཚོགས་ཀྱིས་ནོར་དང་སྐམ་ཤའི་རིན་གོང་མར་ཆག་ཏུ་བཅུག་སྟེ་འབྲོག་མང་གི་ཡོང་སྒོར་གྱོང་གུད་ཆེན་པོ་ཐེབས་བཞིན་ཡོད་པར་བརྟེན། ཟླ་འདིའི་ཕྱི་ཚེས་ ༡༨ ཉིན་འབྲོག་པ་མང་ཚོགས་ཀྱིས་རྫོང་སྲིད་གཞུང་ལ་བསྐྱར་དུ་ཞུ་གཏུག་བྱས་འདུག
ཕ་ཡུལ་ཁྱུང་མཆུ་ནས་ཡིན་པའི་ཆབ་སྲིད་བཙོན་ཟུར་ཤེལ་དགེ་ལགས་ཀྱིས་འདི་གར་གནས་ཚུལ་མཁོ་སྤྲོད་གནང་བ་ལྟར་ན། སི་ཁྲོན་རྔ་བ་ཁུལ་ཁྱུང་མཆུ་རྫོང་ཚོང་པའི་ལྷན་ཚོགས་ཀྱིས། འདི་ལོར་ཁྱུང་མཆུ་རྫོང་གི་ནོར་ཉོ་ཚོང་གི་དུས་ཡུན་ཕྱིར་འགྱངས་བྱས་པ་དང་། རྫོང་ཤ་རིགས་ལས་སྣོན་བཟོ་གྲྭ་དང་ངན་འབྲེལ་བྱས་ཏེ་རྫོང་ཡོངས་ཀྱི་སྒེར་གཉེར་བཤས་ར་ ༡༣ བཙན་གྱིས་སྒོ་རྒྱག་ཏུ་བཅུག་ཡོད་པ་མ་ཟད། ནོར་དང་སྐམ་ཤའི་རིན་གོང་ཡང་མར་ཆག་ཏུ་བཅུག་ནས་འབྲོག་པ་མང་ཚོགས་ཀྱི་དཔལ་འབྱོར་ཐད་གྱོང་གུད་ཆེན་པོ་ཐེབས་ཀྱི་ཡོད་པར་བརྟེན། ཁྱུང་མཆུ་རྫོང་འབྲོང་མང་གིས་རྫོང་སྲིད་གཞུང་ལ་དེ་སྔོན་ནས་ཞུ་གཏུག་བྱས་ཡོད་པ་ལྟར། ཟླ་འདིའི་ཕྱི་ཚེས་ ༡༨ ཉིན་བསྐྱར་དུ་དགོས་འདུན་དོན་ཚན་ ༤ བཏོན་ཏེ་ཞུ་གཏུག་བྱས་ཡོད་འདུག
འབྲོག་མང་གི་ཞུ་གཏུག་ཡི་གེའི་ནང་། འབྲོག་མང་ལ་མཚོན་ན་ཕྱུག་ཟོག་གི་རིན་གོང་ནི་འབྲོག་མང་ཀྱི་ཁ་གསོ་བྱེད་དང་རྒྱབ་འགེབས་བྱེད། བུ་ཕྲུག་གི་སློབ་ཡོན། ནད་པའི་སྨན་ཡོན་སོགས་འཚོ་གནས་དང་ཁ་བྲལ་ཐབས་མེད་པའི་དཔལ་འབྱོར་གྱི་ཡོང་སྒོ་གཅིག་པུ་དེ་ཡིན་ཡང་། ད་ལོར་ནོར་གྱི་རིན་གོང་མར་ཆག་སྟེ་འབྲོག་མ་མང་ཚོགས་ལ་གྱོང་གུད་ཆེན་པོ་ཐེབས་ཀྱི་ཡོད། དེའི་རྒྱུ་རྐྱེན་གཙོ་བོ་ནི་རྩ་འཛུགས་མི་སྣས་དངོས་ཤུགས་བརྒྱུད་གསུམ་ནས་དབང་ཆ་བཀོལ་སྤྱོད་ཀྱིས་ཁྱུང་མཆུ་རྫོང་གི་ནོར་ནག་ཚོང་རའི་འཕེལ་རྒྱས་ལ་སྟངས་འཛིན་དང་། ཕྱི་ནས་ཡོང་བའི་ནོར་ཚོང་བ་ཚོར་རྒོལ་རྡུང་བཏང་སྟེ་ཚོང་ར་མེད་པར་བཟོས་ཡོད་པ་མ་ཟད། ཚོགས་སྒེར་གྱིས་གཉེར་བའི་བཤས་ར་ཁག་ ༡༣ བཙན་གྱིས་སྒོ་རྒྱག་ཏུ་བཅུག་ཡོད་པས་རེད། ཅེས་དང་།
ཡང་མུ་མཐུད་དུ། འདས་ལོར་ནོར་ཤ་རྒྱ་མ་གང་ལ་རྒྱ་སྒོར་ ༢༥ ནས་ ༢༧ བྱས་ཡོད་པ་དང་། གྲོས་ཆོད་ལྟར་ན་ཕྱི་ཟླ་ ༥ པ་ནས་བཟུང་འབྲོག་མང་ཚོས་རང་འགུལ་གྱིས་ནོར་ཚོང་བྱེད་ཆོག་ཀྱང་། ད་ལོར་ཕྱི་ཟླ་ ༨ པ་བསླེབས་རྗེས་གཞི་ནས་ཁྱུང་མཆུ་རྫོང་ཤ་རིགས་ལས་སྣོན་བཟོ་གྲྭ་བརྒྱུད་དེ་ནོར་ཚོང་གི་སྒོ་ཆུང་ཆུང་ཞིག་ཕྱེས་ཏེ། སྐམ་ཤ་རྒྱ་མ་ ༡༣༠ ཡན་གྱི་ཚོང་བྱས་ན་རྒྱ་མ་གང་རེར་རྒྱ་སྒོར་ ༢༣ སྤྲོད་ཀྱི་ཡོད་པ་དང་། རྒྱ་མ་ ༡༠༠ མན་གྱི་སྐམ་ཤ་རྒྱ་མ་གང་རེར་རྒྱ་སྒོར་ ༢༠ ནས་ ༢༡ ཡིན་པ་མ་ཟད། ན་ནིང་ནོར་ནག་འབྲིང་ཙམ་ཞིག་ལ་རྒྱ་སྒོར་ ༤༠༠༠ ཡིན་ཡང་། ད་ལོར་ ༣༠༠༠ ལ་མར་ཆག་ཡོད། ནོར་དང་ཤ་ཡི་རིན་གོང་འདི་ལྟར་མར་ཆག་པ་དང་ཚོང་ར་བཀག་སྡོམ། དེ་བཞིན། མི་མང་ལ་བརྙས་བཅོས་གཉའ་གནོན་བཅས་ཀྱི་བྱེད་ཐབས་དེས་གོང་རིམ་གྱི་འབྲོག་ཕན་སྲིད་བྱུས་ལ་རྒྱབ་འགལ་བྱས་ཡོད་པ་མ་ཟད། ཁྱུང་མཆུ་རྫོང་གི་རྒྱ་ཆེའི་འབྲོག་པ་མང་ཚོགས་ཀྱི་དཔལ་འབྱོར་ཐད་གྱོང་གུད་ཚབས་ཆེན་བཟོ་བཞིན་ཡོད་པར་བརྟེན། ང་ཚོས་བསྐྱར་དུ་རྫོང་སྲིད་གཞུང་ལ་ཞུ་གཏུག་བྱས་ཀྱང་། འབྲེལ་ཡོད་མི་སྣས་མི་མང་གི་ཞུ་གཏུག་ལ་ཉན་འཇོག་བྱ་རྒྱུ་ལས་ལྡོག་སྟེ། གོ་སྐབས་བཟུང་ནས་མ་འོངས་ལག་བསྟར་བྱེད་འཆར་གྱི་འབྲོག་ཕན་ལས་འཆར་གྱིས་མི་མང་ལ་གཉའ་གནོན་དང་ཞུ་གཏུག་མཚམས་འཇོག་དགོས་པའི་བཀའ་རྒྱ་བཏང་བྱུང་། གསལ་བོ་ཤེས་རྟོགས་དགོས་པ་ཞིག་ལ་འདི་ནི་མང་ཚོགས་ཀྱི་ཁྲིམས་མཐུན་ཁེ་དབང་ཡིན་པས། ང་ཚོས་ངེས་པར་དུ་གོང་རིམ་ལ་ཞུ་གཏུག་བྱ་རྒྱུ་ཡིན། ཞེས་བཀོད་འདུག
ཞུ་གཏུག་ཡི་གེའི་ནང་འབྲོག་མང་གིས་དགོས་འདུན་དོན་ཚན་བཞི་བཏོན་པའི་དང་པོ་ནི། ཚོགས་པ་དང་མི་སྒེར་གྱི་བཤས་ར་དག་ལ་རྒྱུན་ལྡན་ལྟར་ཚོང་ལས་གཉེར་དུ་འཇུག་དགོས་པ་མ་ཟད། མང་ཚོགས་ལ་རང་དབང་གིས་ནོར་ཚོང་རྒྱག་པའི་ཁོར་ཡུག་བསྐྲུན་དགོས། གཉིས་པ། སྲིད་གཞུང་གིས་ཕྱི་ནས་ཡོང་བའི་ཚོང་པ་དག་གི་མིས་བཟོས་ཤ་རིགས་དང་འཆི་སྐྱོན་བྱུང་བའི་ནོར་ཤ་རིགས། དེ་བཞིན། ན་ཚ་ཅན་གྱི་ཤ་རིགས་ཉོ་ཚོང་བྱེད་པར་བཀག་འགོག་ཆེད་ཞིབ་བཤེར་གཟབ་ནན་བྱེད་དགོས། གསུམ་པ། ཁྱུང་མཆུ་རྫོང་ཚོང་པའི་ལྷན་ཚོགས་ཀྱིས་མི་མང་གི་རང་དབང་ནོར་ཚོང་ལ་ཐེ་གཏོགས་བྱེད་བཞིན་པ་བཀག་འགོག་དགོས། བཞི་པ། སྲིད་གཞུང་ནས་སྐམ་ཤའི་རིན་གོང་སྔར་ལོ་ལས་འཕར་སྣོན་བྱེད་པར་རྒྱབ་སྐྱོར་ཡོང་བར་རེ་སྐུལ་ཞུ། ཞེས་བཀོད་འདུག
ཁྱུང་མཆུ་རྫོང་ཚོང་པའི་ལྷན་ཚོགས་ཟེར་བ་དེ་ནི་གོང་རིམ་མགོ་ཁྲིད་ཀྱིས་གྲུབ་པའི་ལྷན་ཚོགས་ཤིག་ཡིན་པ་དང་། དང་ཐོག་ཚོགས་པ་དེས་མང་ཚོགས་ཀྱི་དཔལ་འབྱོར་འཕེལ་རྒྱས་ལ་ལམ་བུ་གསར་པ་ཞིག་བཏོད་ཐུབ་པའི་དྲིལ་བསྒྲགས་བྱས་ཏེ། ཁྱུང་མཆུ་རྫོང་གི་མགོ་ཁྲིད་དང་བླ་མ། བོད་རྒྱ་གཉིས་ཀྱི་ཚོང་པ་བཅས་མི་གྲངས་ ༡༦༥ ལྷག་གིས་རང་བདག་གི་མ་རྐང་བཞག་སྟེ། ཚོགས་པ་དེའི་ནང་མཉམ་ཞུགས་བྱས་ཡོད་ཀྱང་། ཉེ་སྔོན་སི་ཁྲོན་ཁྲིན་ཏུའུ་རུ་སྐོང་ཚོགས་བྱས་པའི་ཚོང་པའི་ལྷན་ཚོགས་ཀྱི་ཚོགས་ཆེན་ཐོག ཞིང་ཆེན་དང་ཁུལ་རིམ་པའི་འབྲེལ་ཡོད་མི་སྣ་དང་། ཁྱུང་མཆུ་རྫོང་གི་དམར་ཤོག་དྲུང་ཆེ་ཧེ་བྷོ། རྫོང་དཔོན་འཇམ་དབྱངས་བློ་གསལ། དེ་བཞིན་རྫོང་དཔོན་གཞོན་པ་འོད་གསལ་སོགས་མཉམ་ཞུགས་བྱས་ཐོག འབྲོག་པ་མང་ཚོགས་ཀྱིས་རང་དབང་གིས་ནོར་ཚོང་རྒྱག་རྒྱུར་ཚོད་འཛིན་བྱས་ཡོད་པ་མ་ཟད། སྲིད་གཞུང་གི་ཁེ་ཕན་གཉེར་ཆེད་སྒེར་གྱི་བཤས་ཚོང་ར་བ་རྣམས་བཙན་གྱིས་སྒོ་རྒྱག་དགོས་པ་སོགས་ཀྱི་ངན་བྱུས་གཏན་འབེབས་བྱས་ཡོད་འདུག
གསར་འགོད་པ། པདྨ་མཚོ།
