རྒྱ་གར་གཟའ་མིག་དམར་སྟེང་སླེབས།

གཟའ་ལྷག་པའི་ཉིན་རྒྱ་གར་གྱི་མཁའ་དབྱངས་ཚན་རྩལ་ལྟེ་གནས་ཤིག་གིས་འདས་པའི་ཟླ་བཅུའི་གོང་ནས་བཏང་བའི་མིས་བཟོས་འཕྲུལ་སྐར་དེ་བདེ་ལེགས་ངང་གཟའ་ཆེན་མིག་དམར་སྟེང་བབ་ཡོད་འདུག

ན་ནིང་ཕྱི་ཟླ་ ༡༡ པའི་ཚེས་ ༥ ཉིན་རྒྱ་གར་ལྷོ་ཕྱོགས་ཨན་ཌིར་མངའ་སྡེའི་ནང་ཡོད་པའི་སཱ་ཊེ་ཞི་ཟླ་བན་བར་སྣང་བསྟི་གནས་ཁང་ (Satish Dhawan Space centre) དུ། རྒྱ་གར་བར་སྣང་ཞིབ་འཇུག་ཚོགས་པ་ (ISRO) ཡིས། གཟའ་ཆེན་མིག་དམར་གྱི་འཁོར་ལམ་འགྲུལ་བཞུད་ (MOM) དམ་མན་གྷེལ་ཡན་ (Mangalyaan) མི་བཟོས་འཕྲུལ་སྐར་ཞེས་པ་ཞིག་བཏང་ཡོད་པ་དེས་ཉིན་ ༣༠༠ རིང་སྤྱི་ལེ་ས་ཡ་ ༦༥༠ ལྷག་འཕུར་སྐྱོད་བྱས་ཏེ། ཕྱི་ཚེས་ ༢༤ ཉིན་གཟའ་ཆེན་མིག་དམར་སྟེང་འབྱོར་ནས་ལེགས་འགྲུབ་བྱུང་ཡོད་འདུག

སྐབས་དེར་རྒྱ་གར་གྱི་སྲིད་བློན་མུ་དྷི་གཙོས་འབྲེལ་ཡོད་བློན་ཆེན་ཁག་ཅིག་བར་སྣང་བསྟི་གནས་སུ་འཛོམས་ཏེ་གཟིགས་ཞིབ་དང་རྟེན་འབྲེལ་ཞུས་ཡོད་པ་དང་། གཞན། ཨ་རིའི་ནཱ་སཱ་ཚོགས་པ་གཙོས་འཛམ་གླིང་ནང་གི་བར་སྣང་ཞིབ་འཇུག་ཚོགས་པ་དང་ཚན་རིག་པ་མང་པོས་རྒྱ་གར་གྱི་ཚན་རིག་པ་ཚོར་གདེང་འཇོག་ཆེན་པོ་བྱས་ཡོད་པ་དང་རྒྱ་ ནག་གཞུང་གིས་ཀྱང་འཚམས་འདྲི་བྱས་ཡོད་འདུག

སྲིད་བློན་མུ་དྷི་ཡིས་ “དེ་རིང་རྒྱ་གར་གྱིས་ལོ་རྒྱུས་གསར་བ་ཞིག་བཟོས་པ་རེད། ལོ་རྒྱུས་ཀྱི་ཉིན་མོར་ཚན་རིག་པ་ཚོ་དང་མི་མང་ལ་རྟེན་འབྲེལ་ཞུ་བཞིན་ཡོད། གལ་སྲིད་ང་ཚོས་ལྐོག་གྱུར་འཚོལ་ཞིབ་ལ་ཉེན་ཁར་འཛེམས་ན་མིའི་རིགས་ལ་ཡར་རྒྱས་མེད། ད་ལྟ་ང་ཚོར་རླབས་ཆེན་གྱི་བྱས་རྗེས་ཡོད་སྟབས། ང་ཚོས་ངེས་པར་དུ་འཛམ་གླིང་མི་མང་ལ་འཇིག་རྟེན་ཁམས་ཀྱི་ལྐོག་གྱུར་ཤེས་རྟོགས་བྱེད་པར་རོགས་རམ་བྱེད་དགོས”ཞེས་བརྗོད་འདུག

བར་སྣང་ཞིབ་འཇུག་ཁང་གི་འགན་འཛིན་ར་རྡ་ཀུ་རེ་ཞི་ནན་ (Dr K Radhakrishnan) ལགས་ཀྱིས་དགའ་སྤྲོ་ཆེན་པོས་ཚན་རིག་པ་ཚོར་བསྔགས་བརྗོད་དང་འབྲེལ། རྒྱ་གར་ནི་ཨེ་ཤ་ཡའི་རྒྱལ་ཁབ་ཚོའི་ཁྲོད་གཟའ་མིག་དམར་སྟེང་སྐྱོད་མཁན་ཐོག་མ་ཆགས་པ་དང་། གཟའ་མིག་དམར་ལ་ཞིབ་འཇུག་བྱེད་མཁན་གྱི་ཚོགས་པ་ཨང་ ༤ པ་ཆགས་ཡོད་ཅེས་བརྗོད་འདུག

ད་ལྟའི་བར་ཨ་རིའི་བར་སྣང་ཞིབ་འཇུག་ཚོགས་པ་ནཱ་སཱ་ (NASA) དང་ཨུ་རུ་སུའི་བར་སྣང་མནའ་འབྲེལ་ཚོགས་པ། ཡུ་རོབ་བར་སྣང་ཞིབ་འཇུག་ཚོགས་པ་བཅས་ཀྱིས་མ་གཏོགས་གཟའ་མིག་དམར་ཐོག་མིས་བཟོས་འཕྲུལ་སྐར་གཏོང་ཐུབ་ཀྱི་མེད་ཀྱང་། ཐེངས་འདིར་རྒྱ་གར་བར་སྣང་ཞིབ་འཇུག་ཚོགས་པས་རང་རྐྱ་ཐུབ་པའི་ཐོག་གཟའ་མིག་དམར་ཐོག་མི་བཟོས་འཕྲུལ་སྐར་བཏང་ནས་རྒྱ་གར་གྱི་ཚན་རིག་ལག་རྩལ་བདེན་དཔང་བྱས་ཡོད་པ་མ་ཟད། ཨ་སྒོར་ས་ཡ་ ༧༤ ཡི་འགྲོ་གྲོན་བཏང་བ་དེ་ནི་ཨ་རིའི་ནཱ་སཱའི་འགྲོ་གྲོན་གྱི་ལྡབ་བཅུ་ལས་ཆུང་བ་ཡོད་འདུག

ལྡི་ལིར་རྟེན་གཞི་བྱས་པའི་བར་སྣང་ཞིབ་འཇུག་པ་ར་ཇཱ་གྷོ་པཱ་ལན་ (Rajesswari P Rajagopalan)ལགས་ཀྱིས། ད་རེབ་ཀྱི་ལས་དོན་དེས་རྒྱལ་ཁབ་གཞན་དག་ལ་གནས་ཚུལ་གསར་བ་མཁོ་སྤྲོད་བྱ་ཐུབ་པ་མ་ཟད། རྒྱ་གར་གྱིས་སོ་སོའི་ཚན་རྩལ་གྱི་ནུས་སྟོབས་ཡོད་པ་རྒྱ་ནག་ལ་ར་སྤྲོད་བྱས་པ་རེད་ཅེས་བརྗོད་ཡོད་འདུག ༢༠༡༡ ལོར་རྒྱ་ནག་གིས་གཟའ་མིག་དམར་སྟེང་མི་བཟོས་འཕྲུལ་སྐར་གཏོང་བར་འབད་བརྩོན་ བྱས་ཀྱང་བར་སྣང་ནས་ཆགས་སྐྱོན་ཤོར་ཡོད་འདུག

མན་གྷེལ་ཡན་ (Mangalyaan) མི་བཟོས་འཕྲུལ་སྐར་འདི་མི་འགྱང་བར་ཨ་རིས་གཟའ་མིག་དམར་སྟེང་བཏང་བའི་མི་བཟོས་འཕྲུལ་སྐར་མཱ་བན་ (Maven) དང་ཨོ་ཌིས་སེད་ (Odyssey) རེ་ཁོན་ནིན་སེན་སེ་ (Reconnaissance) ཡུ་རོབ་ཀྱི་མཱར་སི་གཟའ་མིག་དམར་གྱི་ཕོ་ཉ་བཅས་ཀྱི་འཁོར་ལམ་ནང་མཉམ་ཞུགས་བྱ་རྒྱུ་ཡིན་འདུག

གསར་འགོད་པ། ལྷ་སྐྱབས་རྒྱལ།