ང་ཚོའི་ལུས་སེམས་གཉིས་ཀར་དཀའ་ངལ་ཆེ་ཡང་སྤྱི་དོན་གྱི་འགན་འཁྲི་དུས་ནམ་ཡང་བརྗེད་མི་སྲིད་པ་མ་ཟད་ང་ཚོ་རང་ཉིད་ཀྱི་འགྲོ་འདུག་སྤྱོད་གསུམ་ལའང་དོ་སྣང་དང་གཟབ་ནན་བྱེད་ངེས་ཡིན།
ཁ་སང་ཡུ་རོབ་སྦེལ་ཇམ་ནང་བོད་མི་སྐྱབས་བཅོལ་རག་གི་མེད་པའི་ཚོགས་པའི་ངོས་ནས་གསར་འགོད་གསལ་བསྒྲགས་ཤིག་སྤེལ་ཏེ། ཕྱི་ལོ་ ༢༠༡༣ ཟླ་ ༩ ཚེས་ ༡ ཉིན་ནས་ད་བར་སྦེལ་ཇམ་ནང་བོད་མི་སྐྱབས་བཅོལ་དུ་འབྱོར་ཏེ་ཡིག་ཆ་རག་མེད་མཁན་ ༣༤༢ ཙམ་ཡོད་པ་ལས། ༢༢༣ ཙམ་ལ་སྦེལ་ཇམ་གཞུང་གིས་སྐྱབས་བཅོལ་སྤྲོད་རྒྱུ་མིན་པའི་ཐག་གཅོད་བྱུང་ཡོད་པ་དང་། གཞན་མི་ ༡༥༠ ཙམ་སྦེལ་ཇམ་ནང་བསྡད་ཀྱང་མི་ཆོག་པའི་གནས་བབ་འོག འགྲོ་ས་སྡོད་ས་མེད་པ་དང་། ཐ་ན་ཉིན་རེའི་འཚོ་བར་ཡང་དཀའ་ངལ་འཕྲད་བཞིན་ཡོད་ཀྱང་། ༧གོང་ས་མཆོག་གི་བཀའ་སློབ་ལམ་སྟོན་དང་བོད་མིའི་སྒྲིག་འཛུགས་ཀྱི་འབྲེལ་ཡོད་ཀྱི་ཐུགས་འཁུར་རྒྱབ་སྐྱོར་འོག ད་ལྟའི་བར་དཀའ་ངལ་དེའི་འོག་སེམས་ཁམས་ནད་པ་དང་ར་བཟི་བ་དང་། རྐུན་རྐུ་བ་སོགས་མ་རབ་བྱ་སྤྱོད་རིགས་བྱུང་མེད་པ་དང་། མ་འོངས་པར་ཡང་དེ་རིགས་མི་འབྱུང་ཚུལ་འཁོད་འདུག
གསལ་བསྒྲགས་ནང་འཁོད་དོན། ང་ཚོར་སྐྱབས་བཅོལ་མི་སྤྲོད་པའི་རྒྱུ་མཚན་གཙོ་བོ་ནི། དང་པོ་ང་ཚོས་སྐྱབས་བཅོལ་དང་པོ་རྒྱ་གར་དུ་ཞུས་འདུག་ཅེས་པ་དང་། གཉིས་པ་ང་ཚོར་ RC དང་IC འདུག་པ་དང་རྒྱ་གར་དུ་སྲུང་སྐྱོབ་དང་གནས་བབ་ཡག་པོ་འདུག་ཅེས་སོགས། མདོར་ན་རྒྱ་གར་དུ་བོད་པ་ཚོར་དཀའ་ངལ་མི་འདུག་ཅེས་པ་དེ་རེད། ང་ཚོར་དཀའ་ངལ་འཕྲད་པ་ནས་བཟུང་བོད་མིའི་སྒྲིག་འཛུགས་བཀའ་སྤྱི་གཉིས་དང་། ས་གནས་སྐུ་ཚབ་དོན་གཅོད་བཅས་སུ་འབྲེལ་བ་བྱས་དང་བྱེད་བཞིན་པ་དང་། ང་ཚོའི་དཀའ་ངལ་བྱུང་བའི་ཕྱོགས་ཡོངས་ཀྱི་གནས་བབ་ཆ་ཚང་རང་གཞུང་བཀའ་སྤྱི་གཉིས་དང་འབྲེལ་ཡོད་དོན་གཅོད་བཅས་ལ་དུས་ཐོག་སྙན་གསན་དང་ལམ་སྟོན་ཞུ་བཞིན་ཡོད་ལ། ད་བར་གཞུང་ངོས་ནས་ཀྱང་ཐུགས་ཁུར་ཆེན་པོའི་ངང་ནས་ལྟ་རྟོག་དང་། དཀའ་ངལ་སེལ་ཐབས་ལ་འབད་བརྩོན་གནང་དང་གནང་བཞིན་པར་ང་ཚོས་སྙིང་ཐག་པ་ནས་ཐུགས་རྗེ་ཆེ་ཞུ་བ་དང་། མ་འོངས་པར་ཡང་རང་གཞུང་ཁོ་ན་ལ་ཡིད་ཆེས་དང་རེ་བ་བྱེད་ཀྱིན་ཡོད།
ང་ཚོ་རྒྱུན་ལས་རང་ངོས་ནས་ཀྱང་སོ་སོ་རང་མགོ་ཐོན་གྱི་ཡོད་མིན་ལ་མ་ལྟོས་པར། བོད་མིའི་རྩ་དོན་དང་འབྲེལ་བའི་ཐོག་ནས་ས་གནས་ཀྱི་མཉམ་འབྲེལ་རྒྱལ་ཚོགས་ཀྱི་ཆེ་མཐོའི་སྐྱབས་བཅོལ་ལྷན་ཁང་དང་། རྒྱལ་སྤྱི་རིང་བཞིན་ཚོགས་པ་མང་དག་ཅིག་ལ་བོད་མི་སྤྱིའི་གནས་བབ་དང་། ལྷག་པར་བོད་ནང་གི་བོད་མིའི་འགྲོ་བ་མིའི་ཐོབ་ཐང་གི་གནས་བབ་སོགས་ཞུ་གཏུག་དང་འབྲེལ་ས་གནས་ཀྱི་སྐྱབས་བཅོལ་རག་མིན་གྱི་དཀའ་ངལ་སྐོར་ཞུ་བཞིན་ཡོད།
ཉེ་ཆར་གསར་འགྱུར་བརྒྱུད་ལམ་ཁག་ཅིག་ཏུ་དེང་སང་ཡུ་རོབ་ཁུལ་དུ་སྐྱབས་བཅོལ་རག་མིན་གྱི་དཀའ་ངལ་ལ་བརྟེན་ཏེ། བོད་མི་མང་པོ་ཞིག་སེམས་ཁམས་ནད་པར་གྱུར་བ་སོགས་གནས་ཚུལ་འཐོན་བཞིན་འདུག་པ་དང་། ང་ཚོར་ཡང་ཐོག་མར་དཀའ་ངལ་འཕྲད་སྐབས་གནས་ཚུལ་དེ་རིགས་བསླེབ་སྲིད་པའི་ཉེན་ཁ་མཐོང་སྟེ་རང་གཞུང་གི་འབྲེལ་ཡོད་ཚོས་ལམ་སྟོན་སློབ་གསོ་བྱུང་སོང་ཡང་། རང་རེས་ཡིད་ཆེས་བྱེད་ས་༸གོང་ས་མཆོག་གི་བཀའ་སློབ་ལམ་སྟོན་དང་། རང་གཞུང་འབྲེལ་ཡོད་དང་བཅས་པས་ང་ཚོར་རྒྱབ་སྐྱོར་དང་ལྟ་རྟོག་བཅས་ལ་བརྟེན་ཏེ། ད་བར་ང་ཚོའི་ཁྲོད་སེམས་ཁམས་ནད་པ་དང་ར་བཟི་བ། རྐུན་འཕྲོག་བྱེད་མཁན་སོགས་ཀུན་སྤྱོད་མ་རབ་རིགས་བྱུང་མེད་ལ། མ་འོངས་པར་ཡང་ང་ཚོའི་ལུས་སེམས་གཉིས་ཐོག་ནས་བོད་མི་རིགས་ཀྱི་ཞབས་འདྲེན་དུ་འགྲོ་རིགས་མི་འབྱུང་བར་རེ་བ་དང་ཡིད་ཆེས་བྱེད་ཆོག འདི་ནི་ང་ཚོས་དཀའ་ངལ་གདོང་ལེན་བྱས་པའི་རྒྱལ་ཁ་ཞིག་ལ་ཡང་བརྩི་ཆོག་པར་འདོད།
དེང་སྐབས་ང་ཚོ་སྦེལ་ལྗམ་གཅིག་པུ་མ་ཡིན་པར་ཡུ་རོབ་ཁུལ་སོགས་ཕྱོགས་སོ་སོར་བོད་མིར་སྐྱབས་བཅོལ་མ་རག་པའི་དཀའ་ངལ་འཕྲད་བཞིན་པར་གདུང་སེམས་མཉམ་བསྐྱེད་ཡོད་པ་དང་། ང་ཚོས་སུད་སུ་དང་ཧོ་ལན་ཌི་སོགས་ཀྱི་དཀའ་ངལ་འཕྲད་ཡུལ་ཁག་ཅིག་ལ་སྒྲིག་འཛུགས་ཡོད་མེད་དང་། འབྲེལ་བ་བྱེད་ས་རག་མིན་ཚོད་ལྟ་མང་པོ་བྱས་ཀྱང་དེ་ལྟར་གང་ཡང་རག་མ་སོང་བས། རྗེས་ཕྱོགས་ཡུ་རོབ་ཁུལ་གྱི་བོད་མི་སྐྱབས་བཅོལ་ཡིག་ཆའི་ཐད་དཀའ་ངལ་ཡོད་མཁན་ཚང་མ་མཉམ་རུབ་ཡོང་ན་ཡག་པོ་ཡོད་སྐོར་འཁོད་འདུག
ད་ལྟའི་ང་ཚོ་རྒྱུན་ལས་ཀྱི་ངོས་ནས་བོད་མིའི་སྒྲིག་འཛུགས་དང་འབྲེལ་ཡོད་དོན་གཅོད་དང་། དེ་མིན་ས་གནས་ཀྱི་བོད་མིའི་ཚོགས་སྡེ་ཁག་དང་། མི་སྒེར་བཅས་འབྲེལ་ཡོད་མང་པོ་ཞིག་ལ་དུས་ནས་དུས་སུ་རེ་སྐུལ་གང་ཞུས་པ་ལ། ཚང་མས་རྒྱབ་སྐྱོར་དང་གདུང་སེམས་མཉམ་སྐྱེད་གནང་བར་ཐུགས་རྗེ་ཆེ་ཞུ་བ་ཡིན། ཞེས་སོགས་འཁོད་འདུག
