རྒྱ་ནག་གཞུང་གིས་རྒྱལ་དར་མེར་བསྲེཊ་ཀྱི་ཉེས་མིང་འོག་ནགས་ཤོད་འབྲི་རུ་རྫོང་ཝ་ཐང་འབྲོང་ངུར་དགོན་པའི་གྲྭ་པ་དྲུག་འཛིན་བཟུང་བཀག་ཉར་བྱས་ཡོད་འདུག
འདི་གར་གནས་ཚུལ་བཏང་འབྱོར་ལྟར་ན། འདིའི་ལོའི་ཕྱི་ཟླ་ ༩ བའི་ཟླ་མཇུག་ཙམ་ལ་ནགས་ཤོད་འབྲི་རུ་རྫོང་ཤག་ཆུ་གྲོང་རྡལ། ཝ་ཐང་འབྲོང་ངུར་དགོན་བཀའ་བརྒྱུད་འཕེལ་རྒྱས་གླིང་གི་གྲྭ་པ་དྲུག་རྒྱ་གཞུང་གིས་འཇུ་བཟུང་བྱས་ཡོད་པར་མ་ཟད། ད་ཆར་དགོན་པ་དམག་གིས་བསྐོར་ཏེ་ས་གནས་ལ་དམ་དྲག་ཤུགས་ཆེར་བྱེད་ཀྱི་ཡོད་འདུག
གནས་ཚུལ་མཁོ་སྤྲོད་པས་བརྗོད་པ་ལྟར་ན། ཐེངས་འདིར་རྒྱ་གཞུང་གིས་གྲྭ་བ་དེ་དག་འཛིན་བཟུང་བྱེད་དོན། ཁོང་ཚོས་རྒྱ་གཞུང་གིས་དགོན་པའི་འདུ་ཁང་སོགས་ཀྱི་ཡང་སྟེང་དུ་བསྒྲེངས་ཡོད་པའི་རྒྱ་ནག་གི་རྒྱལ་དར་མར་ཕབས་ཏེ་མེར་བསྲེཊ་བཏང་བའི་དབང་གིས་ཡིན་འདུག་ལ། ཉེ་བའི་ཆར་གྲྭ་པ་དེ་དག་ལས་གཉིས་ཝ་ཐང་གྲོང་ནས་ཡིན་པ་དང་། གཅིག་གི་ཕ་མིང་ལ་མ་ནེ་དགྲ་འདུལ་དང་། གཅིག་གི་ཕ་མིང་ལ་འབྱུང་གནས་ཟེར་གྱི་ཡོད་པ་ཤེས་ཡོད་པ་ལས། གྲྭ་པ་གཞན་བཞིའི་མིང་དང་གྲོང་ཚོ་གང་ནས་ཡིན་མིན་སོགས་ཀྱི་གནས་ཚུལ་མ་ཤེས་པར་ལྷག་ཡོད་འདུག་ལ། ད་ལྟ་དགོན་གྲོང་གཉིས་ཀར་རྒྱ་གཞུང་གིས་དམག་མི་འགྲེམས་འཇོག་བྱས་ཏེ་དམ་དྲག་འོག་ལྷག་ཡོད་འདུག
ཝ་ཐང་འབྲོང་ངུར་དགོན་ནི། ཕྱི་ལོ་ ༡༢༥༨ ལོར་འབྲོང་ངུར་ཆོས་རྗེ་སྐུ་ཕྲེང་དང་པོ་རྒྱལ་བ་གངས་པ་རིན་ཆེན་འོད་ཟེར་གྱིས་ཕྱག་བཏབ་པའི་བཀའ་རྒྱུད་ཀྱི་དགོན་རྙིང་ཞིག་ཡིན་འདུག ༡༩༦༩ ལོར་རྒྱ་ནག་གཞུང་གིས་དགོན་པ་རྩ་གཏོར་བཏང་ཡོད་པ་མ་ཟད། དགོན་བདག་འབྲོང་ངུར་ཆོས་རྗེ་སྐུ་ཕྲེང་བཅོ་ལྔ་པ་བསྟན་འཛིན་འགྲོ་འདུལ་འབྲི་རུ་རྫོང་གི་ཟིང་འཁྲུག་སློང་མཁན་ཡིན་པའི་ཉེས་མིང་གཡོགས་ཏེ། ༡༩༧༠ ལོར་བླ་མར་འབྲི་རུ་རྫོང་དུ་སྲོག་ཁྲིམས་བཅད་ཡོད་འདུག ༡༩༨༠ ལོར་དགོན་པ་སླར་ཡང་ཉམས་གསོ་ཐུབ་པ་བྱུང་ཡོད་འདུག
གསར་འགོད་པ། དོན་གོ