གཏེར་ཁ་སྔོག་འདོན་གྱི་གནོད་སྐྱོན།

བོད་རང་སྐྱོང་ལྗོངས་མལ་གྲོ་གུང་དཀར་རྫོང་ཁོངས་སུ་ཡུན་རིང་གཏེར་ཁ་སྔོག་འདོན་བྱས་ཏེ་ཁོར་ཡུག་དང་རྒྱུག་ཆུར་འབག་བཙོག་བཟོས་རྐྱེན་མི་རྒྱུ་གཉིས་ལ་གནོད་སྐྱོན་ཆེན་པོ་ཐེབས་ཀྱི་ཡོད་འདུག

འདི་གར་སྟག་ཚང་རིག་རྒོད་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། རྒྱ་ནག་ནན་ཅིན་གཏེར་འདོན་ཁང་ཟེར་བ་ཞིག་གིས། ལོ་ངོ་ ༢༢ ཙམ་གྱི་ཡར་སྔོན་ནས་བཟུང་བོད་རང་སྐྱོང་ལྗོངས་མལ་གྲོ་བཟི་སྦུག་ལུང་པའི་གཡུ་ཁུང་དང་ཞ་ཁུང་།རྒྱ་མའི་ནང་གཏེར་ཁ་སྔོན་འདོན་ཤུགས་ཆེན་བྱེད་བཞིན་ཡོད་པ་མ་ཟད། རྒྱ་གཞུང་གིས་བཟི་སྦུག་ལུང་པའི་མདོ་ཁ་གྲོང་ཚོ་ལོ་འགའི་སྔོན་ནས་བཙན་གྱིས་གནས་སྤོ་རུ་བཅུག་སྟེ་ལོ་གཅིག་ལྷག་ཙམ་རིང་གུར་ནང་དུ་བསྡད་བཅུག་ཡོད་པ་དང་། དེ་བཞིན། རྒྱ་མའི་ནང་ནས་ཀྱང་སྒོ་ཕྱུགས་སྟོང་ལ་ཉེ་བ་ཡོད་པའི་འབྲོག་པ་རུ་ཁག་ ༤ ཙམ་གནས་སྤོ་རུ་བཅུག་ཡོད་འདུག དང་ཐོག་རྒྱ་གཞུང་གིས་གྲོང་མི་རྣམས་གནས་སྤོ་བྱེད་དོན་ནི་ས་ཞིང་འདེབས་ལས་གོང་འཕེལ་གཏོང་ཕྱིར་ཡིན་སྐོར་བརྗོད་ཡོད་ཀྱང་། ད་ལྟའི་ཆར་ཞིང་ལས་འདེམས་འཛུགས་ཀྱི་འཆར་གཞི་གང་ཡང་ལག་བསྟར་བྱས་མེད་པ་མ་ཟད། སྔོན་ཆད་མདོ་ཁ་གྲོང་ཚོའི་དུད་ཁྱིམ་རེར་ས་ཞིང་རྨུད་ ༡༠ ལས་བརྒལ་བ་ཡོད་ཀྱང་། ད་སྐབས་རྨུད་ ༢ རེ་ལས་མེད་པའི་ཁར། ད་ལོའི་ལོ་ཏོག་སྨིན་ཚད་ཀྱང་ཧ་ཅང་ཞན་པ་སོགས་མི་མང་གི་འཚོ་བར་དཀའ་ངལ་ཆེན་པོ་འཕྲད་བཞིན་ཡོད་པ་དང་། དཀའ་ངལ་དེ་མདོ་ཁ་གྲོང་ཚོ་གཅིག་པུ་ཙམ་མ་ཡིན་པར་མལ་གྲོའི་ལུང་བ་ཚང་མར་ད་ལོའི་ལོ་ཏོག་ཧ་ལམ་ལེན་རྒྱུ་མེད་པའི་ཚོད་དུ་གྱུར་ཡོད་འདུག

དེ་བཞིན། ལུང་པ་དེ་ནས་འབབ་པའི་རྒྱུག་ཆུ་དེ་སྔོན་ཆད་ཡུལ་མི་དང་སྒོ་ཕྱུགས་ཀྱི་འཐུང་ཆུ་མེད་དུ་མི་རུང་བ་ཞིག་ཡིན་ཡང་། དེང་སྐབས་རྒྱུག་ཆུ་དེར་འབག་བཙོག་ཐེབས་ནས་མི་དང་སྒོ་ཕྱུགས། ཆུ་གནས་སྲོག་ཆགས་བཅས་ལ་འཆི་སྐྱོན་གྱི་གནོད་འཚེ་ཡོང་གི་ཡོད་སྟབས། ས་གནས་མི་མང་གིས་ལོ་ ༥ ཙམ་གྱི་ཡར་སྔོན་ནས་བཟུང་ས་གནས་སྲིད་གཞུང་ལ་ཁོར་ཡུག་སྲུང་སྐྱོབ་དགོས་པའི་རེ་སྐུལ་རིམ་པར་ཞུས་ཡོད་ཀྱང་སྲིད་གཞུང་གིས་སྣང་མེད་དུ་བཞག་པར་བརྟེན། འདི་ལོའི་ཕྱི་ཟླ་ ༩ ཚེས་ ༢༣ ཉིན་ཡུལ་མི་ ༡༠༤༠ ལྷག་ཙམ་ས་གནས་སྲིད་གཞུང་གི་སྒོ་ཁར་འཛོམས་ཏེ། རྒྱུག་ཆུ་གཙང་བཟོ་དང་ཁོར་ཡུག་ལ་སྲུང་སྐྱོབ་བྱེད་དགོས་པའི་ཞུ་སྐུལ་བྱས་ཡོད་འདུག ཕྱིས་སུ་སྲིད་གཞུང་གིས་ཚན་རིག་བརྟག་དཔྱད་པ་ཡིན་ཟེར་བའི་མི་འགའ་ཁྲིད་ཡོང་སྟེ། དཀའ་ངལ་དེ་ཚོ་རང་བྱུང་གི་གནོད་པ་ཞིག་ལས་གཏེར་ཁ་སྔོག་འདོན་བྱས་པའི་རྐྱེན་གྱིས་མིན་སྐོར་གྱི་འཁྱོག་བརྗོད་བྱས་ཏེ་དོན་འབྲས་གང་ཡང་ཐོན་མེད་པ་རེད།

ཡང་གནས་ཚུལ་མཁོ་སྤྲོད་པས། ད་སྐབས་ས་གནས་དེ་གའི་ཡུལ་མི་ཚོས་སྲིད་གཞུང་ལ་མུ་མཐུད་ཞུ་གཏུག་བྱེད་བཞིན་ཡོད་པ་ལྟར། རྒྱ་གཞུང་གིས་གཏེར་སྔོག་ལས་གཞི་གང་མགྱོགས་ཀྱིས་མཚམས་འཇོག་མ་བྱས་ཚེ། རྒྱུག་ཆུ་འབག་བཙོག་གི་དཀའ་ངལ་དེ་མདོ་ཁ་གྲོང་ཚོ་དང་གནས་སྣང་སྒང་། ཁ་རྒྱ། བཀྲིས་སྒང་སོགས་ཀྱི་དཀའ་ངལ་ཙམ་མ་ཡིན་པར་རིམ་གྱིས་ལྷ་སའི་སྐྱིད་ཆུ་དང་། དེ་ནས་བོད་ཁུལ་གྱི་ཡུལ་ལུང་ཧ་ཅང་མང་བོའི་ས་ཞིང་དང་འཐུང་ཆུ། རང་བྱུང་ཁོར་ཡུག་སོགས་ལ་ཡང་འབག་བཙོག་ཐེབས་ཏེ། མི་རྒྱུ་གཉིས་ལ་གནོད་འཚེ་ཐེབས་རྒྱུ་ཡིན་སྐོར་བརྗོད་བྱུང་།

གཏེར་ཁ་སྔོག་འདོན་གྱི་ལས་གཞི་དེ་ཕྱི་ལོ་ ༡༩༩༢ ཙམ་ནས་མགོ་འཛུགས་བྱས་ཡོད་པ་དང་། ད་ལྟའི་ཆར་ས་གནས་དེར་གཏེར་ཁ་སྔོག་འདོན་བྱེད་མཁན་མི་གྲངས་ ༡༠༠༠༠ ལྷག་ཡོད་འདུག དེ་སྔོན་བོད་ལྗོངས་ཉིན་རེའི་ཚགས་པར་གྱིས་ད་དུང་ཡང་གཏེར་ཁ་སྔོག་ཡུལ་ལ་རྒྱ་ཁྱོན་སྤྱི་ལེ་ ༡༠༠༠༠ ལྷག་ཙམ་ཡོད་སྐོར་བརྗོད་ཡོད་ཀྱང་། དེང་སྐབས་དེ་ལས་རྒྱ་ཆེ་རུ་ཕྱིན་ཡོད་པ་དང་། ཕྱི་ལོ་ ༢༠༡༢ ལོའི་ཟླ་ ༩ ཚེས་ ༡༨ གཏེར་ཁ་སྔོག་འདོན་གྱི་ལས་གཞི་ཐེངས་གཉིས་པ་མགོ་འཛུགས་བྱས་ཡོད་པ་དང་། ཕྱི་ལོ་ ༡༩༩༣ ལོར་བོད་ལྗོངས་ཉིན་རེའི་ཚགས་པར་གྱིས་ས་གནས་དེར་ཟངས་དང་རག ཞ་ཉི་དང་རྡུལ་ཕྲན་མཚོན་བྱའི་རྫས་རིགས་སོགས་སྔོག་འདོན་བྱེད་བཞིན་ཡོད་སྐོར་བསྒྲགས་ཡོད་ཀྱང་། དེང་སྐབས་ལྕགས་རིགས་སྔོག་འདོན་བྱེད་ཀྱི་ཡོད་ཟེར་བ་ཙམ་ལས་གཞན་ཕྱིར་བསྒྲགས་བྱེད་ཀྱི་མེད་པ་མ་ཟད། གཏེར་ཁ་སྔོག་སར་ཡུལ་མི་གཅིག་ཀྱང་འགྲོ་རུ་མ་བཅུག་པར་བཀག་སྡོམ་ནན་པོ་བྱེད་བཞིན་ཡོད་འདུག

གསར་འགོད་པ། པདྨ་མཚོ།