ཧི་མ་ཅལ་མི་མང་གི་གཟི་བརྗིད་ཆགས་ཡོད།

དེ་རིང་དྷ་རམ་ས་ལར་རྒྱལ་སྤྱི་རང་བཞིན་གྱི་དབྱུག་སྤོལ་འགྲན་བསྡུར་ཞིག་དབུ་འཛུགས་གནང་བའི་སྟེང་༧གོང་ས་མཆོག་ཆིབས་བསྒྱུར་བསྐྱངས་ཏེ་རྩེད་འགྲན་པ་ཚོར་འཚམས་འདྲི་གནང་སོང་།  

དེ་རིང་ཕྱི་དྲོའི་ཆུ་ཚོད་ ༢།༣༠ སྟེང་། དྷ་རམ་ས་ལར་ཡོད་པའི་ཧི་མ་ཅལ་མངའ་སྡེའི་དབྱུག་སྤོལ་རྩེད་ཐང་དུ། རྒྱ་གར་དང་ཝེད་སི་ཨིན་ཌེ་སི་ (West Indies)བར་ཉིན་བཞི་པའི་དབྱུག་རྩེད་སྤོ་ལོ་འགྲན་བསྡུར་ཞིག་མགོ་འཛུགས་བྱས་ཡོད་པའི་སྟེང་། ཧི་མ་ཅལ་མངའ་སྡེའི་དབྱུག་སྤོལ་མཐུན་ཚོགས་ཀྱིས་གདན་ཞུ་གནང་བ་ལྟར། ༧གོང་ས་མཆོག་ཆིབས་བསྒྱུར་བསྐྱངས་ཡོད་ཅིང་། རྩེད་འགྲན་གྱི་ཐོག་མར་༧གོང་ས་མཆོག་རྩེད་ཐང་དུ་ཕེབས་ཏེ་རྒྱལ་ཁབ་གཉིས་ཀྱི་དབྱུག་སྤོལ་རྩེད་མཁན་ ༤༠ ལྷག་ལ་རེ་རེ་བཞིན་འཚམས་འདྲི་དང་ཁ་བཏགས་སྒྲོན་འབུལ་ཞུས་རྗེས་རྩེད་འགྲན་དངོས་སུ་མགོ་བཙུགས་གནང་སོང་།

རྩེད་འགྲན་དབུ་འཛུགས་གནང་རྗེས་༧གོང་ས་མཆོག་གིས་ཡིད་ཙམ་ལ་གཟིགས་ཞིབ་གནང་རྗེས་ཕྱིར་བཞུགས་སྒར་ཕོ་བྲང་དུ་ཞབས་སོར་འཁོད་ཡོད་ཅིང་། ཐེངས་འདིའི་རྩེད་འགྲན་སྟེང་ཧི་མ་ཅལ་མངའ་སྡེའི་བློན་ཆེན་ཟུར་བ་སྐུ་ཞབས་པེ་རེམ་ཀུ་མར་དྷུ་མལ་ (prem kumar dhumal)མཆོག་དང་། ཧི་མ་ཅལ་མངའ་སྡེའི་དབྱུག་རྩེད་སྤོ་ལོའི་མཐུན་ཚོགས་ཀྱི་ཚོགས་གཙོ་སྐུ་ཞབས་ཨ་ནོ་རེག་ཐ་ཁུར་ (Anurag Thakur)དང་དྲུང་ཆེ་བཅས་ཕེབས་ཡོད་པ་དང་། གཞན་རྒྱ་གར་གྱི་གྲོང་ཁྱེར་དང་མངའ་སྡེའི་གཞན་ནས་ཕེབས་པའི་གཟིགས་མོ་བ་དང་། ཕྱི་རྒྱལ་བ། དེ་བཞིན་ས་གནས་མི་མང་བཅས་མི་ ༡༥༠༠༠ ལྷག་འཛོམས་ཡོད་འདུག

སྐབས་དེར་གསར་འགོད་པས་རྒྱ་གར་བ་ཨ་ཞོལ་ཊོབ་ཞི་ (Ashutosh Lakhanpal)ཞུ་བ་ཞིག་ལ། དེ་རིང་༧གོང་ས་མཆོག་དབྱུག་སྤོལ་འགྲན་བསྡུར་སྟེང་ཕེབས་པར་བསམ་ཚུལ་གང་འདྲ་ཡོད་མེད་དྲིས་པར་ཁོང་གིས། ང་ཚོ་ས་གནས་ཡུལ་མི་ཚོས་ཏཱ་མ་བླ་མ་མཆོག་ལ་དཔེ་མི་སྲིད་པའི་དད་གུས་ཆེན་པོ་བྱེད་ཀྱིན་ཡོད་པ་རེད། ཁོང་དེ་རིང་དབྱུག་སྤོལ་འགྲན་བསྡུར་གྱི་སྐུ་མགྲོན་གཙོ་བོར་ཕེབས་པར་ང་ཚོ་ཧི་མ་ཅལ་མངའ་སྡེའི་དབྱུག་སྤོལ་མཐུན་ཚོགས་དང་ཧི་མ་ཅལ་མི་མང་གི་གཟི་བརྗིད་ཆེན་པོ་ཞིག་ཆགས་ཡོད། ཅེས་བརྗོད་བྱུང་། 

རྒྱལ་སྤྱི་རང་བཞིན་གྱི་དབྱུག་སྤོལ་འགྲན་བསྡུར་ཞིག་དྷ་རམ་ས་ལར་ཚོགས་པར་ཚོར་སྣང་གང་བྱུང་དྲིས་པར། རྩེད་མོ་ཡིས་རྒྱལ་ཁབ་དང་མི་རིགས། སྤྱི་ཚོགས་བཅས་ཀྱི་བཅད་མཚམས་དང་བཀག་རྡོ་ཁག་གཏོར་ཐུབ་ཀྱི་ཡོད་སྟབས། ང་རྩེད་མོ་འདི་རིགས་ལ་དགའ་མོས་དང་གུས་བརྩི་ཆེན་པོ་བྱེད་ཀྱིན་ཡོད། གང་ཡིན་ཟེར་ན། རྩེད་མོ་རྩེད་མཁན་དང་ལྟད་མོར་ལྟ་མཁན་ཁྲོད་བྷེ་ཇེ་པེ་དང་ཀོང་རི་སེ། ཧིན་རྡི་དང་ཁ་ཆེ་ཟེར་བའི་དབྱེ་འབྱེད་གང་ཡང་མེད་པར་ཚང་མ་དགའ་དགའ་སྤྲོ་སྤྲོ་བྱེད་ཀྱིན་ཡོད་པ་རེད། རྩེད་རིགས་འདི་འདྲ་ཡང་ཡང་ཚོགས་རྒྱུ་གལ་ཆེན་པོ་རེད། ཅེས་སོགས་བརྗོད་བྱུང་།  

ཀཱང་ར་ནས་ཡོང་བའི་མིང་བརྗོད་འདོད་མེད་པའི་ལྟ་མོ་ལྟ་མཁན་སློབ་མ་ཞིག་ལ་དེ་རིང་གི་དབྱུག་སྤོལ་འགྲན་བསྡུར་རྒྱ་གར་དང་ཝེད་སི་ཨིན་ཌེ་སི་གཉིས་གང་ལ་རྒྱལ་ཁ་འཐོབ་ཀྱི་ཡོད་མེད་དྲིས་པར་ཁོང་གིས། རྒྱ་གར་དབྱུག་སྤོལ་རུ་ཁག་ལ་རྒྱལ་ཁ་འཐོབ་རྒྱུ་ཡིན་པ་གཏན་ཁེལ་རེད། གང་ཡིན་ཟེར་ན།  དེ་རིང་ཏཱ་ལའི་བླ་མ་མཆོག་དབྱུག་སྤོལ་འགྲན་བསྡུར་སྟེང་ཕེབས་ཏེ་རྒྱ་གར་གྱི་དབྱུག་སྤོལ་རྩེད་མཁན་ཚོར་བྱིན་རླབས་དམིགས་བསལ་ཞིག་གནང་ཡོད་པར་ངས་ཡིད་ཆེས་བྱེད་ཀྱིན་ཡོད་ཅེས་བརྗོད་བྱུང་།

གཞན་དྷ་ཤོད་གྱི་བུ་མོ་ནམ་ཌི་ནེ་ (Nandini Sharma)ཟེར་བ་ཞིག་བཅར་འདྲ་ཞུས་པར་ཁོ་མོས། ད་རེབ་རྒྱལ་སྤྱི་རང་བཞིན་གྱི་དབྱུག་སྤོལ་འགྲན་བསྡུར་ཞིག་དྷ་རམ་ས་ལར་ཚོགས་པ་དེ་ཧི་མ་ཅལ་མངའ་སྡེ་ཡོངས་ཀྱི་གཟི་བརྗིད་ཅིག་ཆགས་ཡོད་པ་མ་ཟད། ལྷག་པར་དུ་༧གོང་ས་ཏཱ་ལའི་བླ་མ་མཆོག་ཕེབས་པ་དེར་ལྟད་མོ་བ་ཚོ་ཧ་ཅང་དགའ་ཡོད་པ་རེད། རྩེད་འགྲན་འདི་འདྲའི་རིགས་ཀྱིས་ས་གནས་མི་མང་ལ་ཁེ་ཕན་ཆེན་པོ་ཡོང་གི་ཡོད། ངྷ་རམ་ས་ལ་འདི་ཡུལ་སྐོར་སྤྲོ་འཆམ་ལྟེ་གནས་ཤིག་ཆགས་པ་དང་མཉམ་དུ་ས་འདིའི་ཟ་ཁང་ཚོང་ཁང་དང་། མགྲོན་ཁང་སོགས་ལ་དཔལ་འབྱོར་ཡོང་འབབ་ཡག་པོ་ཡོད་པ་རེད། ཡིན་ནའང་ཚོང་པ་ཚོས་ཧམ་པ་ཆེན་པོ་བྱས་ཏེ་ས་གནས་མི་མང་ལ་དཀའ་ངལ་མ་བཟོས་ན་ཡག་པོ་ཡོད་རེད། ཅེས་བརྗོད་སོང་།

ཧི་མ་ཅལ་མངའ་སྡེའི་དབྱུག་རྩེད་སྤོ་ལོའི་རྩེད་ཐང་འདི་རྒྱ་མཚོ་ངོས་ནས་སྨི་ཌིར་ ༡༣༡༧ ཙམ་ཡོད་པ་དང་། རྒྱ་གར་རྒྱལ་ཡོངས་ལས་རྩེད་ཐང་ཁོར་ཡུག་མཛེས་ཤོས་དང་། དྲོད་གྲང་སྙོམ་ཤོས་ཀྱི་རྩེད་ཐང་སྐད་གྲགས་ཆེ་གྲས་སུ་བརྩི་བ་དང་། རྩེད་ཐང་ཡོངས་སུ་ལྟད་མོ་བ་ ༢༠༠༠༠ ལྷག་ཤོང་གི་ཡོད་འདུག

༢༠༡༢ ལོར་རྒྱ་གར་རྒྱུག་རྩེད་སྤོ་ལོ་རུ་ཁག་ (Indian Premier League) གི་དབྱུག་སྤོལ་འགྲན་བསྡུར་ཐེངས་མང་རྩེད་ཡོད་པ་དང་། གཞན་རྒྱལ་སྤྱིའི་རང་བཞིན་གྱི་དབྱུག་སྤོལ་འགྲན་བསྡུར་ (ODI)ཡང་ཐེངས་གསུམ་ཙམ་ཚོགས་ཡོད་འདུག ༧གོང་ས་མཆོག་ཐེངས་འདི་ཚུད་པའི་དབྱུག་སྤོལ་རྩེད་ཐང་དུ་ཐེངས་གསུམ་ལ་མགྲོན་གཙོ་བོར་ཆིབས་བསྒྱུར་བསྐྱངས་ཡོད་འདུག

གསར་འགོད་པ། ལྷ་སྐྱབས་རྒྱལ།