འཕྲལ་དང་ཕུཊ་ཀྱི་ཞི་བདེ་རྟཊ་མ།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༤༢ སྟེང་གི་རྩོམ་སྒྲིག་པའི་གཏམ།

ཉེ་ཆར་དྷ་རམ་ས་ལར་༧གོང་ས་མཆོག་ལ་ཞི་བདེ་གཟེངས་རྟགས་ཐོབ་ཏེ་ལོ་ངོ་ཉེར་ལྔ་འཁོར་བའི་དུས་དྲན་མཛད་སྒོའི་སྟེང་། ཨི་རིན་གྱི་ནོ་བྷེལ་ཞི་བདེ་གཟེངས་རྟགས་ཐོབ་མཁན་ལྕམ་ཤི་རིན་ཨི་བྷ་ཌི་མཆོག་གིས་འདི་འདྲ་ཞིག་གསུངས་སོང་། ང་ཚོས་དཀའ་ཚེགས་ཆེ་བའི་གནས་སྟངས་འོག་རེ་བ་མ་བརླག་པར་སློབ་སྦྱོང་བྱས་པ་ཡིན་ན། དཀའ་ཚེགས་ཆེ་བའི་གནས་སྟངས་ཡོངས་རྫོགས་ཞོགས་པ་ཡིས་མཚན་མོ་བཅོམ་པ་ལྟར་སེལ་འགྲོ་ངེས་ཡིན།

མི་སུ་ཞིག་གིས་ཀྱང་ཉི་མ་ཤར་བར་བཀག་འགོག་མི་ཐུབ་པ་ལྟར་མི་སུ་ཞིག་གིས་ཀྱང་བདེན་པ་སྦས་སྐུང་བྱེད་མི་ཐུབ། ང་ཚོས་བཟོད་སྲན་ཁོ་ནས་ཉི་མ་ཤར་བར་བསྒུག་དགོས། ངས་ཉིན་མོ་དེ་ཡོང་བར་རེ་སྒུག་བྱེད་ཀྱིན་ཡོད་ཅིང་ཉིན་མོ་དེར་རྒྱང་ཐག་རིང་པོ་མེད་པར། དེ་རིང་ལྟར་བོད་ནང་དུ་ཏཱ་ལའི་བླ་མ་མཆོག་དབུ་བཞུགས་ཀྱིས་དུས་དྲན་སྲུང་གཙི་བྱེད་ཐུབ་པར་ཡིད་ཆེས་ཡོད་ཅེས་བོད་མི་མང་ལ་སེམས་ཤུགས་སྤར་སོང་།

ལོ་རེ་རེའི་སྙན་གྲགས་ཆེ་བའི་ནོ་བྷེལ་གཟེངས་རྟགས་ལ་ཞི་བདེ་དང་རྩོམ་རིག སྨན་རྫས་དང་དཔལ་འབྱོར། དངོས་ཁམས་དང་རྫས་འགྱུར་སོགས་སྣ་ཁ་དྲུག་ཙམ་ཡོད་པ་ལས། གཟེངས་རྟགས་གཞན་དག་གང་ཟག་ཅིག་གི་ལས་དོན་གྲུབ་འབྲས་ཁོ་ནར་དམིགས་ཏེ་སྤྲོད་བཞིན་ཡོད་ཀྱང་། ནོ་བྷེལ་ཞི་བདེ་གཟེངས་རྟགས་ལ་འཕྲལ་ཕུགས་གཉིས་ཀྱི་ཞི་བདེའི་དམིགས་ཡུལ་དང་ནང་དོན་སྣ་ཚོགས་ཡོད། གང་ཟག་ཞིག་གི་ལས་དོན་གྲུབ་འབྲས་ལ་ངོས་འཛིན་ཙམ་མ་ཟད། རླབས་ཆེ་བའི་ལས་དོན་གང་ཞིག་གི་ཐོག་སྐུལ་ལྕག་དང་། ཡང་ན་གང་ཟག་ཅིག་གིས་ཁ་གཏད་ལྕོགས་ཡུལ་དེའི་ནག་ཉེས་ལ་བརྡ་ལན་སྤྲོད་པ་སོགས་ཡིན།

ད་ལོའི་ནོ་བྷེལ་ཞི་བདེ་གཟེངས་རྟགས་དེ་མི་གཉིས་ལ་འབུལ་གཏན་འཁེལ་ཡོད། གཅིག་རྒྱ་གར་གྱི་བྱིས་པའི་ཐོབ་ཐང་རྩོད་ལེན་པ་སྐུ་ཞབས་ཀེ་ལཱ་ཤི་སཱ་ཊིར་ཐི་ལགས་དང་། གཞན་དེ་པཱ་ཀི་སི་ཐན་གྱི་བུད་མེད་ཀྱི་ཤེས་ཡོན་ཐོབ་ཐང་རྩོད་ལེན་པ་བུ་མོ་མཱ་ལཱ་ལཱ་ལགས་རྣམ་གཉིས་རེད། ཐེངས་འདིའི་གཟེངས་རྟགས་ཀྱིས་ཁོང་གཉིས་ཀྱི་ཕྱག་རྗེས་ལ་གཟེངས་བསྟོད་མཚོན་པ་མ་ཟད། པཱ་ཀི་སི་ཐན་དང་རྒྱ་གར་གཉིས་ཀྱི་མཐུན་སྒྲིལ་ལ་སྐུལ་འདེད་དང་། ལྟ་བ་མཁྲེགས་པའི་ཁ་ཆེ་དང་ཧིན་རྡུ། དེ་བཞིན། ད་ལྟའི་འཇིགས་སྐུལ་དྲག་སྤྱོད་པ་སོགས་ལ་བརྡ་ལན་སྤྲད་ཡོད།

གྱ་དགུ་ལོར་བོད་མིའི་དབུ་ཁྲིད་༧གོང་ས་མཆོག་ལ་ནོ་བྷེལ་ཞི་བདེ་གཟེངས་རྟགས་ཕུལ་བ་དེ་༧གོང་ས་མཆོག་གི་འཚེ་མེད་ཞུ་བའི་བོད་དོན་འཐབ་རྩོད་དང་། བོད་པའི་ཆོས་དང་རིག་གཞུང་གཅེས་འཛིན་ལ་ངོས་འཛིན་གནང་བ་ཞིག་ཡིན་ཞིང་། ཞོར་དུ་རྒྱ་ནག་གཞུང་ལ་འགྲམ་ལྕག་ཚ་བེར་བེར་ཞིག་གཞུས་ཡོད། དེ་བཞིན་ཉིས་སྟོང་བཅུ་ལོར་རྒྱ་རིགས་རྩོམ་པ་པོ་ལིག་ཞོ་པོ་ལ་ནོ་བྷེལ་ཞི་བདེ་གཟེངས་རྟགས་ཕུལ་བ་དེ་ཡང་། རྒྱ་ནག་མི་མང་གི་རང་དབང་ཆེད་ཚེ་སྲོག་གིས་དམར་གཞུང་ལ་བདེན་པ་རྩོད་མཁན་དག་ལ་རྒྱབ་དཔུང་དང་། སྒེར་སྤྱོད་དང་བཙན་གནོན་ལ་ཁ་གཏད་ལྕོགས་མཁན་ཚོར་སྐུལ་ལྕག་བཏང་ཡོད།

ཨ་རིའི་སྲིད་འཛིན་ཨོ་བྷ་མར་ནོ་བྷེལ་ཞི་བདེ་གཟེངས་རྟགས་སྤྲད་པ་དེར་བསམ་ཚུལ་སྣ་ཚོཊ་བྱུང་ཡོད། འགའ་རེས་ཁོང་ལ་གཟེངས་རྟཊ་དེ་སྤྲོད་རྒྱུ་སྔ་དྲཊ་པའི་བསམ་ཚུལ་ཡང་བཏོན་ཡོད། ཨོ་བྷ་མ་ནི་མི་རིཊ་ནག་པོའི་ཨ་རིའི་སྲིད་འཛིན་དང་པོ་ཡིན་པས་མཐུན་སྒྲིལ་གྱི་མཚོན་རྟཊ་དང་། བཅོས་བསྒྱུར་ཞེས་པའི་ཁོའི་སྐད་སྒྲ་དེ་ལས། ཨ་རིས་རྡུལ་ཕྲན་མཚོན་ཆ་བཀག་སྡོམ་དང་འཇིགས་སྐུལ་དྲག་སྤྱོད་པར་གདོང་ལེན། དེ་བཞིན་འགྲོ་བ་མིའི་ཐོབ་ཐང་དང་དམངས་གཙོ། རང་དབང་སོཊ་ཀྱི་རྩ་དོན་ཁག་གི་ཐོག་འཚེ་མེད་ཞུ་བའི་ཐོག་ནས་མདུན་སྐྱོད་བྱེད་དགོས་པའི་སྐུལ་མའང་ཡིན་ནོ།།