རྒྱལ་སྤྱིའི་གསོ་རིག་ཆེད་མཁས་པ་ཚོས་རྒྱ་ནག་གི་ནང་ཁྲོལ་འབོར་ཆེན་གྱི་འབྱུང་ཁུངས་ལ་དོཊ་པ་ཆེན་པོ་བྱེད་ཀྱི་ཡོད་པ་མ་ཟད། མི་རོ་བཅུག་པའི་ས་འོག་བང་མཛོད་ཁང་ཆེན་པོ་ཞིག་ཡོད་པར་ངོས་འཛིན་བྱེད་ཀྱི་འདུག
རྒྱ་ནག་རྒྱལ་ཡོངས་གསོ་རིག་མཐུན་ཚོགས་ཀྱི་གོ་སྒྲིག་འོག སང་ཉིན་ཕྱི་ཚེས་ ༢༩ ནས་ ༣༡ བར་རྒྱ་ནག་ཧང་ཀྲུའུ་གྲོང་ཁྱེར་དུ་དབང་པོ་བརྗེ་ལེན་གྱི་ལོ་འཁོར་ཚོགས་ཆེན་བསྡུ་རྒྱུ་ཡིན་པ་དང་། སྤྱིར་བཏང་ཚོགས་ཆེན་དེ་འདི་ལོའི་ཕྱི་ཟླ་ ༩ པའི་ཟླ་མཇུག་ཏུ་ཁྲུང་ཆིན་གྲོང་ཁྱེར་ནང་ཚོགས་གཏན་འཁེལ་ཡོད་ཀྱང་། གློ་བུར་དུ་ཚོགས་དུས་ལ་འགྱུར་བ་ཕྱིན་ཡོད་པ་མ་ཟད། རྒྱལ་ཕྱི་ནང་གི་མིའི་དབང་པོ་དང་ནང་ཁྲོལ་བརྗེ་ལེན་གྱི་ཆེད་མཁས་པ་མང་པོ་ཚོགས་ཐོག་ཏུ་གདན་འདྲེན་བྱས་མེད་སྟབས། འཛམ་གླིང་དབང་པོ་བརྗེ་ལེན་གསོ་རིག་མཐུན་ཚོགས་དང་གསོ་རིག་ཚོགས་སྡེ་ཁག་གིས་རྒྱ་ནག་གི་དབང་པོ་བརྗེ་ལེན་གྱི་གནད་དོན་ཐད་གསང་བ་ཆེན་པོ་ཞིག་སྦས་སྐོང་བྱས་ཡོད་པའི་དོགས་པ་ཤུགས་ཆེ་རུ་ཕྱིན་ཡོད་འདུག
དེའི་ཐད་ཐའེ་ཝན་དུ་ཡོད་པའི་ཆོས་འཁོར་རྩ་རླུང་སྒོམ་སྒྲུབ་པའི་ཐོབ་ཐང་ལྷན་ཚོགས་ཀྱི་མགྲིན་ཚབ་པ་ཀྲུའུ་ཝན་ཆི་ ཡིས། འདས་ལོར་ཚོགས་ཆེན་དེ་ཚ་ཚ་འུར་འུར་གྱིས་བསྡུས་ཡོད་ཀྱང་། ད་ལོར་ཁུ་སིམ་སིམ་གྱིས་བསྡུ་ཡི་ཡོད་པ་མ་ཟད། ང་ཚོས་མིའི་དབང་པོ་དང་ནང་ཁྲོལ་བརྗེ་ལེན་གྱི་ཆེད་མཁས་པ་མང་པོར་འབྲེལ་བ་བྱས་ཏེ་སྐད་ཆ་འདྲི་སྐབས། ཁོང་ཚོ་ཚོགས་ཆེན་དེའི་ཐོག་སྐད་བཏང་མ་སོང་ལ། གལ་སྲིད་སྐད་བཏང་བ་ཡིན་ནའང་ཚོགས་ཞུགས་བྱ་རྒྱུ་མིན་སྐོར་ལབ་སོང་། ཞེས་བརྗོད་འདུག
འཛམ་གླིང་དབང་པོ་བརྗེ་ལེན་གསོ་རིག་མཐུན་ཚོགས་ཀྱིས། ཐེངས་འདིའི་རྒྱ་ནག་གི་ཚོགས་ཆེན་དང་འབྲེལ་བའི་བསྒྲགས་གཏམ་ཞིག་སྤེལ་བའི་ནང་། རྒྱ་ནག་ནང་སྲོག་ཁྲིམས་བཅད་པའི་བཙོན་པ་དང་། ཆོས་ལུགས་དང་སྐད་ཡིག་རང་དབང་། དེ་བཞིན་མི་རིགས་འདྲ་མཉམ་བཅས་ཀྱི་ཆེད་དུ་ནག་ཉེས་ཕོག་པའི་བཙོན་པ་ཡི་དབང་པོ་དང་ནང་ཁྲོལ་བེད་སྤྱོད་བྱེད་བཞིན་པ་མཚམས་འཇོག་མ་བྱས་བར་དུ། ཚོགས་ཆེན་ཐོག་གདན་འདྲེན་བྱས་པའི་འཛམ་གླིང་གི་དབང་པོ་བརྗེ་ལེན་ཆེད་མཁས་པ་དང་རྒྱལ་སྤྱིའི་ཚོགས་སྡེ་ཁག་གི་མི་སྣ་ཚོས། མིའི་རིགས་ཀྱི་རྨང་གཞིའི་དཔྱོད་ཤེས་དང་གསོ་རིག་ཀུན་སྤྱོད་སློབ་གསོའི་རྩ་དོན་ལ་བརྩི་བཀུར་བྱས་ཏེ་མི་བྱེད་པ་གསུམ་བསྒྲགས་པ་ནི། དང་པོ་རྒྱ་ནག་གི་དབང་པོ་བརྗེ་ལེན་ཚོགས་ཆེན་དང་དེ་འབྲེལ་གྱི་བྱ་འགུལ་ལ་མཉམ་ཞུགས་དང་རྒྱབ་སྐྱོར་མི་བྱེད་པ། གཉིས་པ། རྒྱ་ནག་དང་མཉམ་དུ་དབང་པོ་བརྗེ་ལེན་དང་འབྲེལ་བའི་ཆེད་ལས་གང་ལའང་མཉམ་འབྲེལ་མི་བྱེད་པ། གསུམ་པ། རྒྱ་ནག་གིས་མིའི་དབང་པོ་དང་ནང་ཁྲོལ་བག་མེད་ལོངས་སྤྱོད་དང་། སྲོག་ཁྲིམས་བཅད་པའི་བཙོན་པ་དང་། དེ་བཞིན། ཆོས་ལུགས་དང་རིག་གཞུང་སྲུང་སྐྱོབ་ཆེད་ནག་ཉེས་ཕོག་པའི་བཙོན་པ་ཚོའི་ནང་ཁྲོལ་གསོན་བཀོག་བྱས་པའི་ཉེས་དོན་རིགས་ཤེས་རྟོགས་བྱུང་ཚེ། འཛམ་གླིང་དབང་པོ་བརྗེ་ལེན་གསོ་རིག་མཐུན་ཚོགས་དང་འཛམ་གླིང་གསོ་རིག་ལྷན་ཚོགས། འཛམ་གླིང་འཕྲོད་བསྟེན་ལྷན་ཚོགས། མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་བཅས་ལ་ཡར་ཞུ་བྱས་ཏེ། མཉམ་རུབ་ཀྱིས་འགྲོ་བ་མིའི་རིགས་ཀྱི་རིན་ཐང་དང་འཚོ་གནས་ཀྱི་ཐོབ་ཐང་ལ་སྲུང་སྐྱོབ་བྱེད་དགོས་ལུགས་བརྗོད་འདུག
འདས་པའི་ལོ་ངོ་བཅུ་ཕྲག་རིང་རྒྱ་གཞུང་གིས་སྲོག་ཁྲིམས་བཅད་པའི་བཙོན་པའི་དབང་པོ་དང་ནང་ཁྲོལ་བེད་སྤྱོད་བྱས་ཏེ། རྒྱལ་ཕྱི་ནང་ནས་ཁེ་སྤོགས་འབོར་ཆེན་གཉེར་ཀྱི་ཡོད་སྟབས། ཕྱི་ལོ་ ༢༠༡༣ ལོའི་རྒྱ་ནག་དབང་པོ་བརྗེ་ལེན་ཚོགས་ཆེན་སྐབས། འཛམ་གླིང་དབང་པོ་བརྗེ་ལེན་གསོ་རིག་མཐུན་ཚོགས་ཀྱི་ཚོགས་གཙོ་མཉམ་ཞུགས་ཐོག རྒྱ་ནག་གི་སྨན་ཁང་ཆེ་གྲས་ ༤༠ ལྷག་གིས་༼ཧང་ཀྲུའུ་གྲོས་ཆོད༽ཅེས་པའི་ཆོད་ཡིག་ཅིག་ལ་མིང་བཏགས་བཀོད་དེ། འདི་ལོའི་ཕྱི་ཟླ་ ༦ པ་ནས་བཟུང་སྲོག་ཁྲིམས་བཅད་པའི་བཙོན་པའི་དབང་པོ་དང་ནང་ཁྲོལ་བེད་སྤྱོད་གཏོང་བཞིན་པ་མཚམས་འཇོག་བྱ་རྒྱུ་ཡིན་སྐོར་བརྗོད་ཡོད་ཀྱང་། སྨན་ཁང་ཆེ་ཁག་གིས་གྲོས་ཆོད་དེར་སྣང་མེད་ཀྱིས་བཙོན་པའི་ནང་ཁྲོལ་བེད་སྤྱོད་མུ་མཐུད་གཏོང་བཞིན་ཡོད་པས། རྒྱལ་ཕྱིའི་ནད་པ་མང་པོ་ཆེད་དུ་རྒྱ་ནག་ནང་ནང་ཁྲོལ་བརྗེ་བར་འགྲོ་བཞིན་ཡོད་པ་མ་ཟད། རྒྱ་ནག་ནང་སྲོག་ཁྲིམས་བཅད་པའི་བཙོན་པ་ནི་ཁྲིམས་མཐུན་གྱི་དབང་པོ་དང་ནང་ཁྲོལ་བརྗེ་ལེན་གྱི་འབྱུང་ཁུངས་ལྟ་བུ་ཞིག་ཏུ་ངོས་འཛིན་བྱེད་བཞིན་ཡོད་འདུག
ཨ་རིའི་འཕྲོད་བསྟེན་ལྷན་ཁང་གི་སྙན་ཐོའི་ནང་ནང་ཁྲོལ་བརྗེ་ལེན་གྱི་དུས་ཡུན་གཏན་འབེབས་བྱས་པ་ལྟར་ན། མཁལ་མ་བརྗེ་ལེན་བྱེད་པར་ཁྱོན་བསྡོམས་ཉིན་ ༡༡༢༡ དང་། མཆིན་པ་ལ་ཉིན་ ༧༩༦། སྙིང་ལ་ཉིན་ ༢༣༠། གློ་བར་ཉིན་ ༡༠༦༨། གཤེར་མ་ལ་ཉིན་ ༥༠༡ བཅས་དགོས་ཀྱི་ཡོད་པ་རེད། ཡིན་ནའང་། རྒྱ་ནག་ནང་ནང་ཁྲོལ་བརྗེ་ལེན་གྱི་མགྱོགས་ཚད་ཚད་ལས་བརྒལ་ཡོད་པ་སྟེ་དཔེར་ན། ཐེན་ཅིན་ཤར་ཕྱོགས་དབང་པོ་བརྗེ་ལེན་ལྟེ་གནས་ཀྱིས་མཁལ་མ་བརྗེ་ལེན་བྱེད་པར་མགྱོགས་ཤོས་བདུན་ཕྲག་གཅིག་དང་། དལ་ཤོས་ཟླ་གཅིག་མི་འགོར་བ་དང་། མཆིན་པ་བརྗེ་ལེན་ལ་ཁྱོན་བདུན་ཕྲག་ ༢ ལས་མི་དགོས་ལུགས་བརྗོད་ཡོད་པ་མ་ཟད། ཧྲང་ཧེ་ཁྲང་ཀྲིན་སྨན་ཁང་གི་དབང་པོ་བརྗེ་ལེན་ཚན་པས་མཆིན་པ་བརྗེ་ལེན་ལ་ཁྱོན་བདུན་ཕྲག་ ༡ ལས་དགོས་ཀྱི་མེད་པ་རེད། དེ་ལས་ཀྱང་ཧ་ལས་དགོས་པ་ཞིག་ལ། ཐེངས་འདིའི་རྒྱ་ནག་དབང་པོ་བརྗེ་ལེན་ཚོགས་ཆེན་གྱི་མགོ་ཁྲིད་དང་ཀྲེ་དཱ་སྨན་ཁང་གི་འགན་འཛིན་ཀྲིན་སུའུ་སིན་ ཟེར་བ་མི་གཅིག་པུས། ད་ལྟའི་བར་ཁྱོན་མཆིན་པ་ ༡༠༨༠ བརྗེ་ལེན་གཤག་བཅོས་བྱས་ཡོད་པ་མ་ཟད། ཉིན་གཅིག་ནང་མཆིན་པ་ ༥ རེ་བརྗེ་ལེན་བྱས་པ་དང་། བདུན་ཕྲག་རེའི་ནང་མཆིན་པ་ ༡༡ བརྗེ་ལེན་གཤག་བཅོས་བྱས་པའི་ཟིན་ཐོ་བསྐྲུན་ཡོད་སྟབས། རྒྱལ་སྤྱིའི་གསོ་རིག་ཆེད་མཁས་པ་ཚོས་རྒྱ་ནག་གི་ནང་ཁྲོལ་འབོར་ཆེན་གྱི་འབྱུང་ཁུངས་ལ་དོགས་པ་ཆེན་པོ་བྱེད་བཞིན་ཡོད་པ་མ་ཟད། མི་རོ་བཅུག་པའི་ས་འོག་བང་མཛོད་ཁང་ཆེན་པོ་ཞིག་ཡོད་པར་ངོས་འཛིན་བྱེད་བཞིན་འདུག
ཕྱི་ལོ་ ༢༠༠༦ ལོར་རྒྱ་ནག་གི་སྨན་ཁང་ཆེ་ཁག་གིས་ཆོས་འཁོར་རྩ་རླུང་སྒོམ་སྒྲུབ་པའི་ནང་ཁྲོལ་གསོན་བཀོག་བྱས་པའི་གསང་བ་ཕྱིར་ཤོར་རྗེས། འཛམ་གླིང་དབང་པོ་བརྗེ་ལེན་གསོ་རིག་མཐུན་ཚོགས་དང་རྒྱལ་སྤྱིའི་འགྲོ་བ་མིའི་ཐོབ་ཐང་ལྷན་ཚོགས་སོགས་གཞུང་དང་ཚོགས་སྡེ་ཁག་མང་པོས་རྒྱ་ནག་ལ་སྐྱོན་བརྗོད་ཤུགས་ཆེན་བྱས་ཡོད་པ་མ་ཟད། རྒྱ་ནག་གི་གཏུམ་སྤྱོད་དེ་ལ་དངོས་ཤུགས་བརྒྱུད་གསུམ་ནས་སྔོག་བཤེར་བྱེད་མཁན་མང་དུ་ཕྱིན་སྟབས། དུས་ཡུན་ཐུང་ངུའི་ནང་ནང་ཁྲོལ་གཤག་བཅོས་ཀྱི་གྲངས་འབོར་ཕྱེད་ཙམ་མར་ཆགས་ཡོད་པ་མ་ཟད། ལོ་རེ་བཞིན་གྲངས་འབོར་མུ་མཐུད་ཉུང་དུ་ཕྱིན་ཡོད་ཀྱང་། རིམ་གྱིས་མང་ཁྲོད་དུ་ནང་ཁྲོལ་གསོན་བཀོག་གི་ཁྲིམས་འགལ་ཉེས་དོན་ཇེ་མང་དུ་འགྲོ་བཞིན་ཡོད་པ་རེད།
ཨ་རིའི་རྒྱ་ནག་གནད་དོན་ཉམས་ཞིབ་པ་ཟུར་བ་དང་གསར་འགོད་པ་གྷོ་ཋི་མཱན་(Ethan Gutmann)ལགས་ཀྱིས་བརྩམས་པའི་༼བརླགས་ཟིན་པའི་རྒྱ་ནག་གསར་པ༽ཞེས་པའི་ཞིབ་འཇུག་སྒེར་དེབ་ནང་། ཕྱི་ལོ་ ༡༩༩༤ ལོ་ནས་བཟུང་རྒྱ་ནག་ནང་མིའི་ནང་ཁྲོལ་གསོན་བཀོག་བྱེད་པའི་གཏུམ་སྤྱོད་ཀྱི་མགོ་བརྩམས་ཏེ། ༢༠༠༨ ལོའི་བར་ཉུང་མཐར་ཆོས་འཁོར་རྩ་རླུང་སྒོམ་སྒྲུབ་པ་ ༦༥༠༠༠ ལྷག་གི་ནང་ཁྲོལ་གསོན་བཀོག་བྱས་པ་གསལ་འདོན་བྱས་ཡོད་པ་མ་ཟད། བོད་དང་ཡུ་གུར། ཆོས་ལུགས་འདྲ་མིན་གྱི་མི་སྣ་སོགས་ཀྱི་ཚོགས་སྡེ་ཁག་ནི་རྒྱ་གཞུང་གིས་ནང་ཁྲོལ་གསོན་བཀོག་བྱེད་པའི་གཏུམ་སྤྱོད་ཀྱི་གནོད་འཚེ་ཕོག་ཡུལ་གཙོ་བོ་ཞིག་ཆགས་ཡོད་སྐོར་ཡང་བརྗོད་ཡོད་འདུག
གསར་འགོད་པ། པདྨ་མཚོ།
![China's Vice Minister of Foreign Affairs Sun Weidong in Tokyo, Japan in 2023 [File: Issei Kato/Pool via Reuters]](https://tibettimes.net/wp-content/uploads/2026/04/Screen-Shot-2026-04-15-at-2.32.14-PM-360x180.png)
