ཀྲུང་གོའི་ཁྱད་ཆོས་ཀྱི་དམངས་གཙོ།

བོད་ཀྱི་དུས་བབ་གསར་ཤོག་སྤྱིའི་འདོན་ཐེངས་ ༦༤༣ སྟེང་གི་རྩོམ་སྒྲིག་པའི་གཏམ།

དེང་སྐབས་གནས་ཚུལ་ཡ་མཚན་ཅན་མང་པོ་ཞིག་གཅིག་རྗེས་གཉིས་མཐུད་དུ་ཡོང་གི་འདུག ཁག་ཅིག་ཁ་གསལ་ཁུངས་དག་གི་ངོ་བོའི་ཐོག་ནས་གཞུང་འབྲེལ་བརྒྱུད་ལམ་ཁག་ནས་ཡོང་གི་འདུག རིགས་ཤིག་མངོན་པར་མི་གསལ་བའི་ཚུལ་གྱིས་སྤྱི་ཚོགས་དྲ་འབྲེལ་དག་བརྒྱུད་ནས་ཡོང་གི་འདུག ཞི་ཅིན་ཕིན་རྒྱ་ནག་གི་སྲིད་འཛིན་དུ་བསྡད་པ་ནས་བཟུང་གནས་ཚུལ་ཡ་མཚན་ཅན་འདི་རིགས་ཀྱང་མགོ་བཙུགས་སོང་། ན་ནིང་དང་ད་ལོར་ཞི་ཅིན་ཕིན་གྱི་ཞུ་དྲག་གི་སྲིད་བྱུས་མང་པོ་ཞིག་ཁྱབ་སྤེལ་བཏང་བ་དང་མཉམ་དུ། གནས་ཚུལ་ཡ་མཚན་ཅན་དེ་རིགས་ཀྱང་སྔར་ལས་རྣམ་གྲངས་མང་བ་དང་འགྲོས་མགྱོགས་པ། སྤྱི་ཚོགས་དང་བར་ཐག་ཉེ་བ། མི་མང་གི་བློ་ལ་འབབ་པོའི་ཚུལ་དུ་ཡོང་གི་འདུག

གནས་ཚུལ་དེ་དག་གི་ཐོག་མའི་ཡོང་སྟངས་དེ། ཞི་ཅིན་ཕིན་གྱི་ཨ་ཕ་ཞི་ཀྲུང་ཞོན་ལ་ཆོས་དད་ཡོད་ཚུལ་དང་༧རྒྱལ་བ་པཎ་ཆེན་གཉིས་དང་འབྲེལ་བ་བཟང་རབས། ཞི་ཅིན་ཕིན་ཡང་ཨ་རིར་སློབ་སྦྱོང་བྱས་མྱོང་ཡོད་སྟབས་རང་དབང་དམངས་གཙོའི་བག་ཆགས་ཡོད་སྐོར་སོགས་ནས་མགོ་བཙུགས་སོང་། འདི་དག་བོད་ཕྱོགས་ནས་བཟོས་པའི་གནས་ཚུལ་ཡ་མཚན་ཅན་དག་ཡིན་ཡང་། ཡོང་སྟངས་ཀྱི་ཐད་ནས་ཞི་ཅིན་ཕིན་གྱི་ “ཀྲུང་གོའི་རྨི་ལམ”དང་། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་འབོད་སྒྲ་ཆེ་རུ་བཏང་བ་དང་མཉམ་དུ་བསླེབས་སོང་།

སྔར་ལོའི་ཕྱི་ཟླ་དྲུག་པ་ཡས་མས་ནས་མགོ་བཙུགས་ཏེ་མཚོ་སྔོན་མང་ར་ས་ཁུལ་དུ་༧གོང་ས་མཆོག་གི་སྐུ་པར་སྒྲིག་གཤོམ་བྱེད་ཆོག་པ་དང་༧གོང་ས་མཆོག་ལ་མཚན་སྨད་ཞུ་མི་ཆོག་པ། དགོན་སྡེ་ཁག་ནང་གནས་ཚུལ་ཅི་ཞིག་བྱུང་ཡང་དགོན་པའི་འབྲེལ་ཡོད་ཀྱི་བཀའ་འཁྲོལ་མེད་པར་ཉེན་རྟོག་པ་དང་དམག་མི་ཐད་ཀར་དཀོན་ནང་འཛུལ་མི་ཆོག་ཚུལ་སོགས་གྲགས་ཤིང་། སྲིད་ཇུས་དེ་སི་ཁྲོན་དཀར་མཛེས་དང་ལྷ་ས་དགའ་ལྡན་སོགས་སུའང་མགོ་བཙུགས་ཚུལ་སྤྱི་ཚོགས་དྲ་འབྲེལ་ཁག་ཏུ་ཁྱབ་བརྡལ་ཆེན་པོ་ཕྱིན།

ཟླ་འགའི་གོང་ཞི་ཅིན་ཕིན་ཡུ་རོབ་ཏུ་གཟིགས་སྐོར་སྐབས་ནང་ཆོས་ནི་འགྲོ་བ་མིའི་རིགས་ལ་ཕན་བདེ་སྒྲུབ་བྱེད་ཅིག་ཡིན་སྐོར་དང་། ཉེ་ལམ་རྒྱ་ནག་དབུས་མི་རིགས་ལས་དོན་ཚོགས་འདུའི་སྟེང་ཞི་ཅན་ཕིན་གྱིས་རྒྱ་རིགས་ཆེན་པོའི་རང་ལུགས་ལ་ངོ་རྒོལ་བྱེད་དགོས”ཟེར་བ། ད་དུང་མཐའ་དབུས་མེད་པར་ལྐོག་ཟ་རུལ་སུངས་དང་དབང་ཆ་སྒེར་སྤྱོད་ལ་རྒོལ་བ། ཁྲིམས་ཀྱི་ནུས་པ་མཐོ་རུ་བཏང་ནས་ཁྲིམས་ཀྱིས་མི་དམངས་སྐྱོང་བ་དང་། ཁྲིམས་སྐྱོང་སྲིད་གཞུང་འཛུགས་དགོས་པ་སོགས་གཞུང་འབྲེལ་བརྒྱུད་ལམ་ཁག་ནས་ཤུགས་ཀྱིས་བསྒྲགས་ནས་ནན་གྱིས་སྐུལ་ཡོད།

བདུན་ཕྲག་འགའི་སྔོན་ལ་༧གོང་ས་མཆོག་རྒྱ་ནག་རི་བོ་རྩེ་ལྔར་ཕེབས་འཆར་སྐོར་དྷ་ས་དང་པེ་ཅིན་བར་ནང་མོལ་འགྲོ་བཞིན་ཡོད་སྐོར་དང་། ཞི་ཅིན་ཕིན་གྱིས་བོད་ནང་གི་བོད་མི་ཚོ་ཕྱི་རྒྱལ་ཁག་ཏུ་འགྲོ་ཆོག་པའི་ལག་འཁྱེར་སྤྲོད་རྒྱུའི་ཐག་གཅོད་བྱས་ཡོད་ཚུལ། ཞི་ཅིན་ཕིན་གྱིས་༧གོང་ས་མཆོག་ལ་དད་གུས་དང་ནོར་འཁྲུལ་ངོས་ལེན་བྱས་སྐོར། ད་དུང་དགོད་བྲོ་བ་ཞིག་ལ་ཞི་ཅིན་ཕིན་གྱིས་ཉ་སྲོག་བསླུ་གཏོང་གི་ཡོད་པ་རེད་ཟེར་བའི་པར་འགའ་དང་བཅས་གནས་ཚུལ་ཁྱབ་བསྒྲཊ་ཆེན་པོ་འགྲོ་བཞིན་འདུག

ཡ་མཚན་ཅན་གྱི་གནས་ཚུལ་འདི་དག་ཡོངས་རྫོགས་མདོར་བསྒྲིལ་ན། རྒྱ་ནག་གཞུང་གིས་ “བོད་རེ་བས་འཕུང” ཞེས་པའི་ལྟ་གྲུབ་འདི་གཞི་རྩར་བཟུང་ཐོག མངོན་གསལ་དང་མངོན་གསལ་མིན་པ་ཅི་རིགས་ཀྱི་ཐབས་ལམ་སྤྱད་དེ་ཁྱབ་སྤེལ་གཏོང་བཞིན་པའི་གཞུང་འབྲེལ་གྱི་སྲིད་བྱུས་ཤིག་རེད་ཟེར་ཆོག་ཅིང་། སྦྱོང་བརྡར་དང་ཚོད་ལྟ་རང་བཞིན་གྱི་སྲིད་བྱུས་སམ། བྱེད་ཐབས་འདི་དག་ལ་བོད་གཙོས་པའི་གྲངས་ཉུང་མི་རིཊ་ཁག་དང་རྒྱ་ནག་མི་མང་ཚོར་རེ་བ་དང་ཕན་ཐོཊ་རྩ་བ་ནས་མེད་པ་ཞིག་མིན་ལ། རེ་བ་དང་ཡིད་ཆེས་ཆེན་པོ་རྒྱག་རིན་ཡོད་པ་ཞིག་ཀྱང་མིན།

འདི་ལ་འཕྲལ་ཕུགས་རྒྱང་གསུམ་གྱི་དམིགས་ཡུལ་དང་འཆར་གཞི་མང་པོ་ཡོད། འཕྲལ་དུ་རྒྱ་ཆེའི་མི་དམངས་མང་ཚོགས་དང་། ལྷག་པར་དུ་གྲངས་ཉུང་མི་རིཊ་ཚོ་ཞི་ཅིན་ཕིན་ལ་རེ་བའི་ངང་ནས་ཁོའི་ལས་དོན་ལམ་ལྷོངས་ཡོང་ཆེད་དང་། ཕུཊ་སུ་རྒྱ་ནག་དམར་ཤོག་ཚོགས་པ་དང་དམར་ཤོག་ཚོགས་པའི་དབང་ཆ་མུ་མཐུད་བརྟན་བརླིང་ཡོང་ཐབས། རྒྱང་རིང་བོའི་ཆ་ནས་རྒྱལ་སྤྱི་དང་རྒྱལ་ནང་གི་འགྱུར་ལྡོག་དང་། ལོ་རྒྱུས་ཀྱི་ཤིང་རྟ་ཆེན་མོའི་འཁོར་ཤུགས་སོགས་ལ་བརྟེན་ཏེ། རྒྱལ་སྤྱིར་མངོན་གསལ་མིན་པ་དང་རྒྱལ་ནང་ལ་བརྡབ་གསིག་མེད་པའི་ཐོག་ནས་བཅོས་བསྒྱུར་ཆེན་པོ་ཞིག་གམ། “ཀྲུང་གོའི་ཁྱད་ཆོས་ཀྱི་དམངས་གཙོའི” ལམ་བུ་ཞིག་གི་ཐོག་ལ་སྟ་གོན་བྱས་པ་མཚོན་ནོ།།