ཁེ་ན་ཌ་ཊོ་རོན་ཊོ་གྲོང་ཁྱེར་གྱི་ཤེས་ཡོན་ལྷན་ཚོགས་ཀྱིས་ཊོ་རོན་ཊོ་སློབ་གྲྭ་ཁག་ནང་ཁུང་ཙི་སློབ་གཉེར་ཁང་གསར་འཛུགས་བྱ་རྒྱུ་མིན་པའི་ཐག་གཅོད་བྱས་ཡོད་འདུག
ཟླ་འདིའི་ཚེས་ ༢༩ ཉིན་ཁེ་ན་ཌ་ཊོ་རོན་ཊོ་གྲོང་ཁྱེར་གྱི་ཤེས་ཡོན་ལྷན་ཚོགས་ཀྱི་འགན་འཛིན་ལྷན་ཚོགས་ཐོག རྒྱ་ནག་གི་ཁུང་ཙི་སློབ་གཉེར་ཁང་ཊོ་རོན་ཊོ་གྲོང་ཁྱེར་གྱི་སློབ་གྲྭ་ཁག་ནང་གསར་འཛུགས་བྱེད་མིན་མང་མོས་ལྟ་སྐབས། ལྷན་ཚོགས་ཀྱི་ཚོགས་མི་ ༢༢ ཡོད་པའི་ཁྲོད་ནས་ཚོགས་མི་གཉིས་ཀྱི་མ་གཏོགས་གཞན་ཚང་མས་འཛུགས་འདོད་མེད་པའི་འོས་བླུགས་ཡོད་སྟབས། ཊོ་རོན་ཊོ་ཁུལ་དུ་ཁུང་ཙི་སློབ་གཉེར་ཁང་གསར་དུ་འཛུགས་རྒྱུ་མིན་པ་མ་ཟད། ད་སྔ་ཡོད་བཞིན་པ་དག་ལའང་མཉམ་ལས་མཚམས་འཇོག་བྱ་རྒྱུ་ཡིན་པའི་ཐག་གཅོད་བྱས་ཡོད་འདུག
འདིའི་ཐད་ཊོ་རོན་ཊོ་ཤེས་ཡོན་ལྷན་ཚོགས་ཀྱིས། “ང་ཚོས་ཁུང་ཙི་སློབ་གཉེར་ཁང་གི་དགོས་འདུན་ཁག་བསྒྲུབ་རྒྱུ་ཁག་པོ་ཆགས་ཡོད་སྟབས། ང་ཚོས་དེ་རིང་ནས་བཟུང་ཁུང་ཙི་སློབ་གཉེར་ཁང་དང་མཉམ་ལས་བྱེད་མཚམས་འཇོག་རྒྱུ་ཡིན” ཞེས་བརྗོད་འདུག ཚེས་ ༣༠ ཉིན་རྒྱ་ནག་གཞུང་གིས། “ཊོ་རོན་ཊོ་གྲོང་ཁྱེར་གྱི་ཤེས་ཡོན་ལྷན་ཚོགས་ཀྱིས་ཁུང་ཙི་སློབ་གཉེར་ཁང་དང་མཉམ་ལས་བྱ་རྒྱུ་མིན་སྐོར་ཐག་གཅོད་བྱས་པ་དེ་ནི། རྒྱ་ནག་གཞུང་ལ་ཕྱོགས་ལྷུང་གི་ལྟ་ཕྱོགས་འཛིན་པ་ཞིག་ཡིན་སྟབས་ང་ཚོས་ངོས་ལེན་བྱེད་ཐབས་མེད་པ་ཞིག་རེད”ཅེས་བརྗོད་འདུག
༢༠༠༤ ལོར་རྒྱ་གཞུང་ཤེས་རིག་ལྷན་ཁང་གི་འཛིན་སྐྱོང་འོག་ཁུང་ཙི་སློབ་གཉེར་ཁང་གསར་འཛུགས་བྱས་པ་ནས་བཟུང་། ད་བར་འཛམ་གླིང་རྒྱལ་ཁབ་ཁག་ ༡༢༣ ནང་སློབ་གཉེར་ཁང་ ༤༦༥ དང་། ཆེད་སྦྱོང་འཛིན་གྲྭ་ ༧༠༠ ལྷག་བཙུགས་ཏེ། རྒྱ་ནག་གི་རིག་གཞུང་དང་སློབ་གསོ་རྒྱལ་སྤྱིར་ཁྱབ་བསྒྲགས་འབད་བརྩོན་བྱེད་བཞིན་ཡོད་ཀྱང་། སློབ་གཉེར་ཁང་དེ་དག་གི་སློབ་ཕྲུག་ཚོས་རྒྱ་ནག་ནང་གི་འགྲོ་བ་མིའི་ཐོབ་ཐང་དང་བོད་དོན། ཡུ་གུར་བ་སོགས་གྲངས་ཉུང་མི་རིགས་ཀྱི་གནད་དོན་གླེང་མི་ཆོག་པའི་དམ་བསྒྲགས་བྱེད་བཞིན་ཡོད་སྟབས། ཉེ་ལམ་ཨ་རི་དང་ཁེ་ན་ཌའི་ནང་གི་སློབ་གྲྭ་མང་པོ་ཞིག་གིས་ཁུང་ཙི་སློབ་གཉེར་ཁང་དང་མཉམ་ལས་མཚམས་འཇོག་བྱ་རྒྱུའི་ཐག་གཅོད་བྱས་ཡོད་འདུག
༢༠༡༣ ལོའི་ཟླ་ ༢ ཚེས་ ༧ ཉིན་ཁེ་ན་ཌ་ཨོན་ཊ་རའོ་མངའ་སྡེའི་མེག་མཱ་སེ་ཌར་ (McMaster University) གཙུག་ལག་སློབ་ཆེན་དང་། ཁེ་ན་ཌའི་རང་སྐྱོང་ས་ཁུལ་ཁེའུ་བྷག་གྱི་ཤར་བྷུག་ (Sherbrooke University) གཙུག་ལག་སློབ་ཆེན་གྱིས་ཁུང་ཙི་སློབ་གཉེར་ཁང་དང་མཉམ་ལས་བྱེད་མཚམས་བཞག་ཡོད་པ་དང་། ༢༠༡༤ ལོའི་ཟླ་ ༩ པའི་ཟླ་མཇུག་ཏུ་ཨ་རིའི་ཆི་ཁཱ་ཀོ་གཙུག་ལག་སློབ་ཆེན་དང་། ཟླ་འདིའི་ཚེས་ ༢ ཉིན་ཧྥན་ནི་སི་ནི་ཡ་མངའ་སྡེའི་གཙུག་ལག་སློབ་ཆེན་ (Pennsylvania State University) གྱིས་མཉམ་ལས་བྱེད་མཚམས་བཞག་ཡོད་འདུག
༢༠༡༤ ལོའི་ཟླ་ ༧ ཚེས་ ༡༤ ཉིན་ཨ་རིའི་གཙུག་ལག་སློབ་ཆེན་གྱི་དགེ་རྒན་ལྷན་ཚོགས་ཀྱིས་ཨ་རིའི་གཞུང་ལ་སྙན་ཞུ་ཞིག་ཕུལ་ཏེ། ཁུང་ཚི་སློབ་གཉེར་ཁང་གིས་རྒྱ་ནག་གཞུང་གི་ངོ་ཚབ་བྱས་ཏེ་ལས་ཀ་བྱེད་བཞིན་ཡོད་པ་མ་ཟད། གཙུག་ལག་སློབ་གཉེར་ཁང་གི་རང་དབང་ཅན་གྱི་སློབ་གསོའི་བྱ་གཞག་ལ་རྡོག་རོལ་གཏོང་གི་ཡོད་སྟབས། ཁུང་ཙི་སློབ་གཉེར་ཁང་དང་མཉམ་ལས་བྱེད་མཚམས་འཇོག་དགོས་པའམ་ཡང་ན་ཕྱོགས་གཉིས་ཀྱི་གྲོས་མཐུན་ལ་བསྐྱར་ཞིབ་བྱེད་དགོས་སྐོར་འཁོད་ཡོད་པ་དང་། འདི་ལོའི་ཕྱི་ཟླ་ ༩ ཚེས་ ༩ ཉིན་ཁེ་ན་ཌའི་གཙུག་ལག་སློབ་ཆེན་གྱི་དགེ་རྒན་ལྷན་ཚོགས་ཀྱིས་ཁུང་ཙི་སློབ་གཉེར་ཁང་གིས་ཁེ་ན་ཌའི་གཙུག་ལག་སློབ་ཆེན་གྱི་སློབ་གསོའི་བྱ་གཞག་ལ་ཐེ་ཇུས་བྱེད་ཀྱིན་ཡོད་པའི་སྐྱོན་བརྗོད་བྱས་ཏེ། ཁུང་ཙི་སློབ་གཉེར་ཁང་དང་མཉམ་ལས་བྱ་རྒྱུ་མིན་པའི་གྲོས་ཆོད་བཞག་ཡོད།
འདི་ལོ་ཁེ་ན་ཌའི་གྲོང་ཁྱེར་ཊོ་རོན་ཊོའི་སློབ་གྲྭ་ཁག་ཏུ་ཁུང་ཙི་སློབ་གཉེར་ཁང་གསར་འཛུགས་བྱེད་མིན་གྱི་གླེང་སློང་ཐོག་མ་བྱུང་སྐབས། རྒྱ་ནག་གི་རྩ་རླུང་སྒོམ་སྒྲུབ་པ་དང་ཁེ་ན་ཌའི་བོད་མི་དང་ཁེ་ན་ཌའི་སློབ་གསོའི་ལམ་ལུགས་ལ་རྒྱབ་སྐྱོར་བྱེད་མཁན་ཚོས་སློབ་གྲྭ་དེ་འཛུགས་མི་ཆོག་པའི་ངོ་རྒོལ་ཐེངས་མང་སྤེལ་ཡོད། ངོ་རྒོལ་ལས་འགུལ་ནང་ཞུགས་མཁན་ཁེ་ན་ཊ་བོད་རང་བཙན་སློབ་ཕྲུག་ཚོགས་པའི་ཚོགས་གཙོ་ཨུ་རྒྱན་ལགས་ཀྱིས་བརྗོད་དོན། “དོ་ནུབ་ལུག་པགས་གྱོན་པའི་སྤྱང་ཀི་སུ་ཡིན་མིན་གསལ་སྟོན་བྱས་སོང་། རྒྱ་ནག་གཞུང་གིས་ཕྱི་རྒྱལ་སློབ་གྲྭ་ཁག་ཏུ་ཁུང་ཙི་སློབ་གཉེར་ཁང་གསར་འཛུགས་བྱས་ཏེ། བོད་དོན་དང་འགྲོ་བ་མིའི་ཐོབ་ཐང་གི་གནད་དོན་གླེང་སློང་བྱ་རྒྱུའི་ངན་ཇུས་དེ། ད་ལྟ་ལམ་ལྷོང་མ་ཡོང་བར་སྒོ་རྒྱག་དགོས་ཐུག་ཡོད་སྟབས། བོད་མི་ཞིག་དང་ཊོ་རོན་ཊོ་སློབ་གྲྭའི་སློབ་ཟུར་བ་ཞིག་ཡིན་པའི་ཆ་ནས་ངས་ཤེས་ཡོན་ལྷན་ཚོགས་ཀྱི་ཚོགས་མི་ཚོས་སློབ་ཕྲུག་དང་ཤེས་ཡོན་གྱི་རང་དབང་ལ་བརྩི་སྲུང་བྱས་ཏེ། རྒྱ་ནག་གཞུང་གི་གཅིག་བསྡུད་དམར་པོའི་རིང་ལུགས་ཀྱི་གནོན་ཤུགས་ལ་མགོ་མ་བསྒུར་བར་ཐག་གཅོད་དེ་འདྲ་ཞིག་གནང་བར་ཐུགས་རྗེ་ཆེ་ཞུ་བཞིན་ཡོད།” ཅེས་བརྗོད་འདུག
ཆབ་སྲིད་དབྱེ་ཞིབ་པ་ཚོས། རྒྱ་ནག་གཞུང་གིས་འགྲོ་གྲོན་ཕོན་ཆེ་བཏང་སྟེ་རྒྱལ་སྤྱིའི་ཐོག་ཁུང་ཙི་སློབ་གཉེར་ཁང་གསར་འཛུགས་བྱས་ནས་རྒྱ་ནག་གི་ (soft power) ཁྱབ་སྤེལ་གཏོང་བཞིན་ཡོད་སྟབས། ད་ཆ་རྒྱལ་ཁབ་མང་པོས་ངོ་རྒོལ་དང་འབྲེལ་མཉམ་ལས་བྱེད་མཚམས་འཇོག་བཞིན་ཡོད་པ་ནི། རྒྱ་ནག་གཞུང་གིས་སློབ་གསོའི་བྱ་གཞག་ཁ་གཡར་སྟེ་རྒྱ་ནག་དམར་པོའི་ལྟ་བ་ཁྱབ་སྤེལ་དང་གཞན་གྱི་སློབ་གསོར་ཐེ་ཇུས་བྱེད་ཀྱི་ཡོད་པ་ལས་བྱུང་བ་ཞིག་ཡིན་སྐོར་བརྗོད་འདུག
ད་ལྟ་ཨ་རིའི་ནང་རྒྱ་ནག་གི་ཁུང་ཙི་སློབ་གཉེར་ཁང་ ༩༠ དང་། ཁེ་ན་ཊའི་ནང་ ༡༡། ཨོ་སོ་ཊོ་ལི་ཡར་ ༩། དབྱིན་ཡུལ་ནང་ ༢༥། ཧྥ་རན་སིར་ ༡༥། འཇར་མན་ནང་ ༡༥། ཨི་ཊ་ལིར་ ༡༡། ཉི་ཧོང་ནང་ ༡༣། ཀོ་རི་ཡར་ ༢༠། ཨུ་རུ་སུར་ ༡༩། ཐེ་ལན་ཌིར་ ༡༢། སི་པན་ནང་ ༦། རྒྱ་གར་ནང་ ༢། ཨབ་གྷན་ནང་ ༢ བཅས་རྒྱལ་ཁབ་ ༡༢༣ ནང་གསར་འཛུགས་བྱས་ཡོད་འདུག
གསར་འགོད་པ། དོན་གྲུབ།
