ལྷ་ས་ནས་ཉིང་ཁྲི་བར་ལྕགས་ལམ་བཟོ་རྒྱུ་རེད།

ཁ་སང་རྒྱ་ནག་གཞུང་གིས་ཨ་སྒོར་ཐེར་འབུམ་དྲུག་གི་འགྲོ་གྲོན་བཏང་སྟེ་ ༢༠༢༢ ནང་ཚུད་དུ་ལྷ་ས་ནས་ཀོང་པོ་ཉིང་ཁྲི་བར་ལྕགས་ལམ་བཟོ་སྐྲུན་ལེགས་འགྲུབ་བྱ་རྒྱུ་ཡིན་སྐོར་བསྒྲགས་འདུག

ཁ་སང་རྒྱ་ནག་འཕེལ་རྒྱས་དང་བཅོས་སྒྱུར་ལྷན་ཁང་གིས་ཨ་སྒོར་ཐེར་འབུམ་ ༦ གི་འགྲོ་སོང་བཏང་སྟེ། ལྷ་ས་ནས་རྒྱ་གར་ཨ་རུ་ནཱ་ཅལ་མངའ་སྡེའི་ས་མཚམས་ལ་ཉེ་བའི་ཀོང་པོ་ཉིང་ཁྲི་ས་ཁུལ་བར་སྤྱི་ལེ་ ༤༠༢ ཡོད་པའི་མེ་འཁོར་ལྕགས་ལམ་བཟོ་སྐྲུན་བྱ་རྒྱུ་ཡིན་སྐོར་དང་། ལྕགས་ལམ་དེ་མ་འོངས་པའི་ལོ་ ༧ གྱི་ནང་ཚུད་དུ་ལེགས་འགྲུབ་བྱས་ཏེ་མེ་འཁོར་ཤར་གཏོང་བྱ་རྒྱུ་ཡིན་ཚུལ་བསྒྲགས་འདུག

འདིའི་ཐད་བོད་རང་སྐྱོང་ལྗོངས་མེ་འཁོར་འགྲིམ་འགྲུལ་ལས་ཁང་གི་འགན་འཛིན་གཞོན་པ་ཡང་ཡུ་ལིན་ (YangYulin) གྱིས། “ལྷ་ས་ནས་ཉིང་ཁྲི་བར་གྱི་མེ་འཁོར་ལྕགས་ལམ་འདིས་མངའ་ཁུལ་གྱི་འགྲིམ་འགྲུལ་དང་སྐྱེལ་འདྲེན་འཕེལ་རྒྱས་ལ་ནུས་པ་ཆེན་པོ་འཐོན་ཐུབ་པ་མ་ཟད། བོད་དང་རྒྱ་ནག་གི་ས་ཁུལ་རྣམས་གོང་བུ་གཅིག་སྒྲིལ་ལའང་ཕན་ཐོགས་ཆེན་པོ་ཡོང་ངེས་ཡིན།” ཞེས་བརྗོད་འདུག

ལྷ་ས་ནས་ཉིང་ཁྲི་བར་གྱི་ལྕགས་ལམ་དེར་ཆ་སྙོམས་ཆུ་ཚོད་གཅིག་མེ་འཁོར་སྤྱི་ལེ་ ༡༦༠ ཙམ་ལ་རྒྱུག་ཐུབ་ཀྱི་ཡོད་པ་མ་ཟད། ཤུལ་རོང་ (Xierong) ནས་ལྷ་ས་བར་གྱི་སྤྱི་ལེ་ ༣༢ ཙམ་ལ་གློག་ལམ་བརྒྱུད་ཤར་སྐྱོད་བྱ་རྒྱུ་ཡིན་ཞིང་། འདི་ནི་རྒྱ་ནག་གཞུང་གི་ལོ་ལྔའི་འཆར་གཞི་བཅུ་གཉིས་པ་ཟེར་བ་ལས་བོད་རང་སྐྱོང་ལྗོངས་ཁོངས་ཀྱི་ལས་འཆར་གལ་ཆེན་ཞིག་ཡིན་སྐོར་ཡང་བསྒྲགས་འདུག

ད་ལོའི་ཟླ་ ༧ ཚེས་ ༢༥ ཉིན་བོད་རང་སྐྱོང་ལྗོངས་འགྲིམ་འགྲུལ་ལས་ཁང་གི་འགན་འཛིན་གཞོན་པ་ཡང་ཡུ་ལིན་གྱིས། ༢༠༡༦ ལོར་མཚོ་བོད་ལྕགས་ལམ་གྱི་སྣེ་གཉིས་སུ་གྱེས་ཏེ་སྣེ་གཅིག་བལ་ཡུལ་དང་སྣེ་གཞན་དེ་རྒྱ་གར་དང་འབྲུག བལ་ཡུལ་བཅས་ཀྱི་ས་མཚམསས་བར་མཐུད་དེ་ ༢༠༢༠ ལོར་ཁྱིམ་མཚེས་རྒྱལ་ཁབ་དེ་དག་གི་ས་མཚམས་བར་མེ་འཁོར་ཤར་གཏོང་ཐུབ་པ་བྱ་རྒྱུ་ཡིན་ཞེས་བརྗོད་ཡོད་ལ། ཁ་སང་ཁོས་སླར་ཡང་གཞིས་རྩེ་ནས་འབྲུག་གི་ས་མཚམས་གྲོ་མོ་རྫོང་བར་དང་། གཞིས་རྩེ་ནས་བལ་ཡུལ་ས་མཚམས་སྐྱིད་གྲོང་རྫོང་དང་གཉའ་ལམ་རྫོང་བར་ལྕགས་ལམ་བཟོ་རྒྱུའི་འཆར་འགོད་ཟིན་ཏེ་ལས་གཞི་གང་མགྱོགས་མགོ་འཛུགས་བྱ་རྒྱུ་ཡིན་སྐོར་བརྗོད་འདུག

རྒྱ་གར་བྱང་ཤར་མཐའ་མཚམས་ཁུལ་དུ་རྒྱ་ནག་གི་དམག་མིས་ཡང་ཡང་བཙན་འཛུལ་བྱེད་བཞིན་ཡོད་པ་མ་ཟད། མཐའ་མཚམས་སུ་དམག་དཔུང་རྒྱ་སྐྱེད་དང་། ལམ་ཁ་བཟོ་བ་དང་ཆུ་རགས་འཛུགས་སྐྲུན་སོགས་ཀྱི་ལས་གཞི་འདྲ་མིན་སྤེལ་བཞིན་ཡོད་སྟབས། ཟླ་ ༡༠ ཚེས་ ༡༤ ཉིན་རྒྱ་གར་རྒྱལ་ཡོངས་མངའ་སྡེའི་བདག་སྐྱོང་ནང་སྲིད་བློན་ཆེན་ཀེ་རན་རི་ཇི་ཇུ་ (Kiren Rijiju) ཡིས་ཧིན་སྒོར་ཁྲག་ཁྲིག་ ༤ བཏང་སྟེ། ཨ་རུ་ནཱ་ཅལ་མངའ་སྡེའི་ཝི་ཇའེ་ནཱ་གྷར་ (Vijaynagar) ནས་རྒྱ་དཀར་ནག་གཉིས་ཀྱི་ས་མཚམས་མོན་རྟ་དབང་གི་མཱ་གྷོ་ཐིང་བུ་ (Mago-Thingbu) བར་རིང་ཚད་སྤྱི་ལེ་ ༢༠༠༠ ལྷག་གི་གཞུང་ལམ་གསར་རྒྱག་བྱ་རྒྱུ་ཡིན་སྐོར་བརྗོད་པ་དང་། ཚེས་ ༢༤ ཉིན་རྒྱ་གར་ནང་སྲིད་ལས་ཁུངས་ཀྱིས་ཧིན་སྒོར་འབུམ་ ༡༠༧༥ ཡི་འགྲོ་གྲོན་བཏང་སྟེ་ཨ་རུ་ནཱ་ཅལ་གྱི་ས་མཚམས་ཁག་ཏུ་ས་མཚམས་སྐོར་སྲུང་ས་ཚིགས་ཁག་ ༥༤ ཙམ་རྒྱག་རྒྱུ་ཡིན་པ། ཕྱི་ཚེས་ ༢༨ ཉིན་ཨ་རུ་ནཱ་ཅལ་དང་བོད་ཀྱི་ས་མཚམས་ཁུལ་དུ་སྲུང་སྐྱོབ་བྱེད་མཁན་གྱི་དམག་མི་ ༡༢༠༠༠ ཙམ་འཕར་སྣོན་བྱ་རྒྱུ་ཡིན་སྐོར་སོགས་བསྒྲགས་ཡོད།

ཁ་སང་རྒྱ་ནག་གཞུང་དམག་དོན་ལྷན་ཁང་གི་མགྲིན་ཚབ་པ་ཡང་ཡུ་ཆོན་ (Yang Yujun) གྱིས། རྒྱ་གར་གྱིས་ས་མཚམས་ཁུལ་དུ་འཁྲུག་རྐྱེན་སློང་གཞིའི་བྱ་སྤྱོད་རིགས་མི་སྤེལ་རྒྱུར་རེ་བ་བྱེད་བཞིན་ཅེས་བརྗོད་པ་དང་འབྲེལ། ལྷ་ས་ནས་ཨ་རུ་ནཱ་ཅལ་མངའ་སྡེའི་ས་མཚམས་ས་ཁུལ་ཉིང་ཁྲི་བར་ལྕགས་ལམ་བཟོ་སྐྲུན་བྱ་རྒྱུ་ཡིན་སྐོར་བརྗོད་འདུག

རྒྱ་གཞུང་གིས་ཨ་སྒོར་ཐེར་འབུམ་ ༢།༡༦ གི་འགྲོ་སོང་བཏང་ནས་ལྷ་ས་ནས་གཞིས་རྩེ་བར་དང་། ཁ་སང་ཨ་སྒོར་ཐེར་འབུམ་ ༤༠ ཡི་འགྲོ་གྲོན་བཏང་སྟེ་ལྷ་ས་ནས་ཉིང་ཁྲི་ས་ཁུལ་བར། ནང་སོག་གི་བྱང་ཕྱོགས་ས་ཁུལ་ཨུར་ཌོ (Ordo) ནས་རྒྱ་ནག་ཅང་ཞི་ཞིང་ཆེན་ཅིན་ཨན་གྲོང་ཁྱེར་བར། ཧྲན་ཞི་ཞིང་ཆེན་གྱི་བྱང་ཕྱོགས་ཏ་ཏུང་(Datong) གྲོང་ཁྱེར་ནས་ཧེད་པེ་ཞིང་ཆེན་ནས་ཀྲང་ཅ་ཀོ་ (Zhangjiakou) རང་སྐྱོང་ས་ཁུལ་བར་བཅས་སུ་ལྕགས་ལམ་བཟོ་སྐྲུན་བྱ་འཆར་ཡོད་འདུག

༢༠༠༦ ལོར་རྒྱ་གཞུང་གིས་མཐོ་ཚད་ལ་རྒྱ་མཚོའི་ངོས་ནས་མི་ཊར་ ༥༠༠༠ ལྷག་དང་རིང་ཚད་ལ་ཀི་ལོ་མི་ཊར་ ༡༡༤༢ ཡོད་པའི་ན་གོར་མོ་ནས་ལྷ་ས་བར་གྱི་ལྕགས་ལམ་བཟོ་སྐྲུན་བྱས་ཡོད་པ་དང་། ༢༠༡༤ ལོའི་ཟླ་ ༨ ཚེས་ ༡༦ ཉིན་མཐོ་ཚད་རྒྱ་མཚོའི་ངོས་ནས་མི་ཊར་ ༣༦༠༠ ནས་ ༤༠༠༠ བར་དང་། རིང་ཚད་ལ་སྤྱི་ལེ་ ༢༥༣ དང་འབབ་ཚུགས་ ༡༣ ཙམ་ཡོད་པའི་ལྷ་ས་ནས་གཞིས་རྩེ་བར་གྱི་མེ་འཁོར་ཤར་གཏོང་བྱས་ཏེ། མེ་འཁོར་གྱིས་ཆུ་ཚོད་གཅིག་ལ་ཆ་སྙོམས་སྤྱི་ལེ་ ༡༢༠ ཙམ་ལ་རྒྱུག་ཐུབ་ཀྱི་ཡོད་འདུག

༢༠༠༥ ལོར་བོད་ནང་ལོ་གཅིག་ལ་ཡུལ་སྐོར་སྤྲོ་འཆམ་པ་ས་ཡ་ ༡།༨ ཙམ་ཡོང་གི་ཡོད་པ་དང་། ༢༠༠༦ ལོར་རྒྱ་གཞུང་གིས་ཨ་སྒོར་ཐེར་འབུམ་འགའི་འགྲོ་གྲོན་བཏང་སྟེ་ན་གོར་མོ་ནས་ལྷ་ས་བར་གྱི་མཚོ་བོད་ལྕགས་ལམ་བཟོ་སྐྲུན་བྱས་རྗེས། ཉུང་མཐར་ལོ་རེར་སྤྲོ་འཆམ་པ་ས་ཡ་ ༡༠ ཙམ་བོད་ནང་ཡོང་གི་ཡོད་པ་དང་། ན་ནིང་ལོར་རྒྱ་ནག་ནས་ཡུལ་སྐོར་སྤྲོ་འཆམ་པ་ ༡༢།༩ ལྷག་བསླེབས་ཏེ། ལོ་རེའི་ཆ་སྙོམས་ཡོང་འབབ་རྒྱ་སྒོར་ཐེར་འབུམ་ ༣༤ ནས་ཐེར་འབུམ་ ༨༠ ལ་འཕར་ཡོད་འདུག

གསར་འགོད་པ། དོན་གྲུབ།