ཁ་སང་ནེ་ཇི་ར་ཡའི་སློབ་གྲྭའི་ཚོགས་ཁང་དུ་འཇིགས་སྐུལ་དྲག་སྤྱོད་པས་རང་གི་ལུས་ལ་འབར་རྫས་བཏགས་ཏེ་གས་འཐོར་བྱུང་བའི་དོན་རྐྱེན་ཁྲོད་སློབ་ཕྲུག་ ༤༧ བསད་པ་དང་ ༧༩ ལྷག་ལ་རྨས་སྐྱོན་ཕོག་ཡོད་འདུག
ཁ་སང་ཕྱི་ཚེས་ ༡༠ ཉིན་གྱི་ས་གནས་ཆུ་ཚོད་ ༨།༠༠ སྟེང་ནེ་ཇི་ར་ཡ་ (Nigeria) ཡི་བྱང་ཤར་གྲོང་བརྡལ་པོལ་ཊེ་སི་ཁོམ་ (Potiskum)གྱི་འབྲིང་རིམ་ཚན་རིག་སློབ་གྲྭའི་ཚོགས་ཁང་དུ་དགེ་སློབ་ཚོས་ཞོགས་པའི་འདུ་འཛོམས་སྐབས། རང་སྲོག་བློས་གཏོང་མཁན་ཁ་ཆེ་འཇིགས་སྐུལ་དྲག་སྤྱོད་པ་ཞིག་གིས་སློབ་མའི་སྒྲིག་ཆས་གྱོན་ཞིང་རང་གི་ལུས་ལ་འབར་རྫས་བཏགས་ཏེ་སློབ་ཕྲུག་ཚོའི་ཁྲོད་གར་ཐོར་བྱུང་སྟེ་སློབ་ཕྲུག་ ༤༧ བསད་པ་དང་། གཞན་ ༧༩ ཙམ་ལ་རྨས་སྐྱོན་ཚབས་ཆེན་ཕོག་ཡོད་སྟབས། ད་ལྟའི་ཆར་ཉེན་རྟོག་པས་སློབ་གྲྭ་གནས་སྐབས་རིང་སྒོ་རྒྱག་བཅུག་སྟེ་འབར་གས་དོན་རྐྱེན་ལ་རྟོག་ཞིབ་བྱེད་བཞིན་ཡོད་འདུག
འདིའི་ཐད་སྲིད་འཛིན་ཇོན་ནཱ་ཐན་ (Goodluck Jonathan) ཡིས་འབར་གས་དོན་རྐྱེན་ཁྲོད་ཤི་རྨས་ཐེབས་པའི་ནང་མི་ཚོར་སེམས་གསོའི་དང་འབྲེལ། སྲིད་གཞུང་གིས་འཇིགས་སྐུལ་རིང་ལུགས་པ་ཚོ་རྩ་མེད་གཏོང་བར་མུ་མཐུད་དུ་ཁ་གཏད་གཅོག་གི་ཡོད་སྟབས། ཐེངས་འདིའི་དོན་རྐྱེན་དང་འབྲེལ་བའི་འཇིགས་སྐུལ་པ་དག་གང་མགྱོགས་འཛིན་བཟུང་བྱས་ཏེ་ཁྲིམས་སྦྱོར་ཚ་ནན་གཏོང་རྒྱུ་ཡིན་ཚུལ་བསྒྲགས་ཡོད་པ་དང་། ཡོབ་བྷེ་ (Yobe)མངའ་སྡེའི་སྤྱི་ཁྱབ་གྷེད་ཌེམ་ (Ibrahim Gaidam) ལགས་ཀྱིས་ཀྱང་། པོལ་ཊེ་ཁོམ་ཉེ་འཁོར་གྱི་སློབ་གྲྭ་ཁག་གནས་སྐབས་རིང་སྒོ་རྒྱག་དགོས་པའི་བཀའ་བཏང་ཡོད་པ་མ་ཟད། སྲིད་གཞུང་གིས་འཇིགས་སྐུལ་དྲག་སྤྱོད་པ་ཚོར་རྒོལ་རྡུང་བྱེད་ཐུབ་ཀྱི་མེད་པའི་སྐྱོན་བརྗོད་བྱས་ཡོད་འདུག
རྒྱལ་ཡོངས་ཉེན་རྟོག་ལས་ཁུངས་ཀྱི་མགྲིན་ཚབ་པ་ལྕམ་ལ་ཨོ་ཇོ་ཁུ་བོ་ (Immanuel OJukwu) ཡིས་གསར་འགོད་གསལ་བསྒྲགས་སྤེལ་བའི་ནང་། ད་ལྟའི་ཆར་ཉེན་རྟོག་པས་དོན་རྐྱེན་བྱུང་སའི་ཡུལ་དངོས་རྟོག་ཞིབ་བྱེད་ཀྱིན་ཡོད་ཀྱང་། དོན་རྐྱེན་འདི་ནེ་ཇི་ར་ཡའི་ནང་ཡོད་པའི་བྷོ་ཁོབ་ཧཱ་རེན་ (Boko Haram) ཁ་ཆེ་འཇིགས་སྐུལ་དྲག་སྤྱོད་ཚོགས་པ་དང་འབྲེལ་བ་ཡོད་པའི་དོགས་པ་ཡོད་ཅེས་བརྗོད་འདུག
སློབ་ཕྲུག་ཅིག་གིས་བྷེ་བྷེ་སེའི་གསར་འགོད་པར་བརྗོད་དོན། ཚོགས་ཁང་དུ་འབར་གས་དོན་རྐྱེན་བྱུང་རྗེས། སློབ་གྲོགས་མང་པོ་ཞིག་གི་མགོ་རྐང་ལག་གསུམ་གང་སར་འཐོར་བ་མཐོང་སྟབས། ང་རང་འཇིགས་སྐུལ་རིང་ལུགས་པའི་གདུག་རྩུབ་ཀྱི་བྱ་སྤྱོད་ལ་དངོས་གནས་འཇིགས་སྣང་སྐྱེས་བཅུག་སོང་ཞེས་བརྗོད་འདུག
ཟླ་སྔོན་མའི་ཚེས་ ༡༧ ཉིན་ནེ་ཇི་ར་ཡ་སྲིད་གཞུང་དང་བྷོ་ཁོབ་རེན་འཇིགས་སྐུལ་ཚོགས་པའི་བར་དམག་འཁྲུག་མི་རྒྱག་པའི་གྲོས་མཐུན་བྱུང་ཡོད་སྐོར་བརྗོད་ཀྱང་། གཟའ་འཁོར་གཉིས་རྗེས་འཇིགས་སྐུལ་ཚོགས་པའི་མགོ་ཁྲིད་ཨ་བྷོ་བྷ་ཀར་ (Abubakar Shekau) ཡིས། ཁོ་ཚོས་གཞུང་དང་ཚོགས་པ་སུ་གང་མཉམ་དུ་དམག་འཁྲུག་མཚམས་འཇོག་བྱས་པའི་གྲོས་མོལ་བྱས་མེད་ཅེས་བརྙན་ཐུང་བརྒྱུད་ནས་བསྒྲགས་ཡོད་འདུག
༢༠༠༩ ལོའི་ཕྱི་ཟླ་ ༧ པའི་ནང་ནེ་ཇི་ར་ཡའི་བྱང་ཤར་ཁུལ་དུ་ཁ་ཆེ་རྒྱལ་ཁབ་ཅིག་གསར་འཛུགས་བྱེད་ཆེད་བྷོ་ཁོབ་ཧཱ་རེན་འཇིགས་སྐུལ་ཚོགས་པ་གསར་འཛུགས་བྱས་ཡོད་པ་དང་། དེའི་རྗེས་ཁོ་ཚོས་ནེ་ཇི་ར་ཡའི་སློབ་གྲྭ་ཁག་ཏུ་སློབ་མ་ཚོས་ཁ་ཆེ་ཆོས་ལུགས་སློབ་སྦྱོང་བྱེད་དགོས་པ་ལས་རང་སྐད་ཧོ་སཱ་ (Huasa)ཐོག་ནས་ནུབ་ཕྱོགས་ཀྱི་ཤེས་ཡོན་སློབ་ཁྲིད་བྱེད་པ་སྡིག་བསགས་ཡིན་པའི་སྐྱོན་འཛུགས་འོག སྲིད་གཞུང་ལ་རྒོལ་ལན་བསློགས་ཏེ་ད་ལྟའི་བར་མི་མང་ ༥༠༠༠ ལྷག་གི་ཚེ་སྲོག་ཤོར་བ་དང་སློབ་ཕྲུག་བུ་མོ་བཙན་ཁྲིད། ཨ་རི་དང་མཉམ་འབྲེལ་རྒྱལ་ཚོགས་ལས་ཁུངས་ལ་འཇབ་རྒོལ་བྱས་མཐར། ༢༠༡༣ ལོར་ཨ་རི་གཞུང་གིས་བྷོ་ཁོབ་ཧཱ་རེན་ཚོགས་པ་ནི་ཁ་ཆེ་འཇིགས་སྐུལ་དྲག་སྤྱོད་ཚོགས་པ་ཞིག་ཡིན་པའི་གསལ་བསྒྲགས་བྱས་ཡོད།
ད་ལྟའི་ཆར་ཁ་ཆེ་འཇིགས་སྐུལ་ཚོགས་པ་འདིས་དཀྱིལ་ཤར་ཨེ་ཤ་ཡའི་རྒྱལ་ཁབ་ཨི་རག་དང་སེ་རི་ཡའི་ནང་ཡོད་པའི་ཁ་ཆེ་འཇིགས་སྐུལ་དྲག་སྤྱོད་ཚོགས་པ་ (ISIS) ལ་འབྲེལ་བ་བྱེད་བཞིན་ཡོད་འདུག
གསར་འགོད་པ། ལྷ་སྐྱབས་རྒྱལ།
