ཐ་དད་ཡིན་ས་དེར་བསམ་བློ་མ་གཏོང་། གཅིག་གྱུར་ཡིན་ས་དེར་བསམ་བློ་ཐོངས།

དེ་རིང་སྔ་དྲོར་དྷ་ས་ཐེག་ཆེན་གཙུག་ལག་ཁང་དུ་༧གོང་ས་མཆོག་གིས་ལྷོ་ཀོ་རི་ཡའི་ཆོས་ཞུ་བ་གཙོ་བོར་གྱུར་བའི་སེར་སྐྱ་མི་མང་ལ་ཉིན་གྲངས་ ༣ རིང་གི་གསུང་ཆོས་དབུ་འཛུགས་གནང་སོང་།

དེ་རིང་སྔ་དྲོར་དྷ་ས་ཐེག་ཆེན་གཙུག་ལག་ཁང་དུ། ༧གོང་ས་མཆོག་གིས་ལྷོ་ཀོ་རི་ཡའི་དད་ལྡན་ཆོས་ཞུ་པ་ ༣༥༠ ཙམ་གྱི་གཙོས་འཛམ་གླིང་གི་རྒྱལ་ཁབ་ ༥༧ ནས་ཡོང་བའི་ནང་ཆོས་དོན་གཉེར་བ་ ༩༠༠ ལྷག་དང་། དྷ་ས་ཁུལ་གྱི་སེར་སྐྱ་མི་མང་བཅས་མི་གྲངས་ ༤༠༠༠ ཙམ་ལ། མགོན་པོ་ཀླུ་སྒྲུབ་ཀྱིས་མཛད་པའི་དབུ་མ་རིན་ཆེན་ཕྲེང་བའི་གསུང་ཆོས་དབུ་འཛུགས་གནང་སོང་།

གསུང་ཆོས་དབུ་འཛུགས་མ་བྱས་གོང་དུ། ༧གོང་ས་མཆོག་གིས་དུས་རབས་ཉེར་གཅིག་པའི་ནང་ལོ་ངོ་སྟོང་ཕྲག་ནས་བརྒྱུད་པའི་ཆོས་ལུགས་རྣམས་དགོས་མཁོ་དང་འབྲེལ་བ་ཡོད་མེད་སྐོར་བཀའ་སློབ་གནང་སྐབས། ལྷོ་ཀོ་རི་ཡའི་ནང་རང་སྲོག་གཅོད་མཁན་ཡོད་མེད་བཀའ་འདྲི་གནང་སྐབས། ཀོ་རི་ཡའི་སྐད་ཀྱི་གསུང་སྒྱུར་བས་ད་སྐབས་ལྷོ་ཀོ་རི་ཡའི་ནང་ལོ་རེར་མི་ ༡༩༠༠༠ ཙམ་གྱིས་རང་ཤི་རྒྱག་གི་ཡོད་ལ། དེ་སྔོན་འཛམ་གླིང་ཐོག་རང་ཤི་རྒྱག་མཁན་མང་ཤོས་ཉི་ཧོང་ཡིན་ཡང་དེང་སྐབས་ལྷོ་ཀོ་རི་ཡ་མང་ཤོས་ཆགས་ཡོད་སྐོར་ཞུས་པར་༧གོང་ས་མཆོག་གིས། དངོས་པོ་ཡར་རྒྱས་ཆེན་པོ་ཕྱིན་པའི་ནུབ་ཕྱོགས་ལུང་པ་ཚོའི་ནང་སེམས་མ་སྐྱིད་པ་བྱེད་མཁན་མང་པོ་འདུག སེམས་མ་སྐྱིད་པ་ཡོང་བའི་རྒྱུ་རྐྱེན་གཙོ་བོ་སེམས་ནས་འཇིགས་སྣང་བྱེད་པ་དེ་ཡིན་ལ། འཇིགས་སྣང་ཡོང་བའི་རྒྱུ་རྐྱེན་མི་ཕན་ཚུན་བར་ཡིད་ཆེས་མེད་པར་དོགས་པ་བྱེད་པ་དང་། འགྲན་བསྡུར་ཞེ་དྲག་ཆེ་བ། ང་ང་ཟེར་ནས་རང་གཅིག་པུ་བསམ་བསྡད་པ་བཅས་ཀྱི་ཐོག་ནས་སེམས་ལ་དཀའ་ངལ་ཆེན་པོ་ཡོང་གི་ཡོད་པ་རེད།

སྔ་མོ་ཡིན་ན་ལ་དྭགས་དང་འབྲས་ལྗོངས་ལ་རང་ཤི་བརྒྱབ་པའི་གནས་ཚུལ་ཧ་ལམ་གོ་རྒྱུ་མེད་ཀྱང་དེང་སང་ཁ་ཤས་ཁ་ཤས་ཡོང་གི་འདུག འདས་པའི་ལོ་བཞི་བཅུ་ལྔ་བཅུའི་ནང་ལ་དྭགས་སུ་དངོས་པོ་ཡར་རྒྱས་ཞེ་དྲག་ཕྱིན་ཡོད་པ་དང་། སློབ་གྲྭ་མང་པོ་བཙུགས་ཏེ་ཤེས་ཡོན་གྱི་མཐུན་རྐྱེན་ཡང་ཤུགས་ཆེན་པོ་ཡར་རྒྱས་ཕྱིན་ཡོད་པ་རེད། ཡིན་ནའང་། སེམས་ལ་མ་སྐྱིད་པ་ཞིག་ཡོང་ནས་རང་ཤི་རྒྱག་གི་ཡོད་པས་གཅིག་གིས་འདང་གི་མེད་པ་རེད། དེར་བརྟེན་རིས་སུ་མ་ཆད་པའི་ཆོས་བརྒྱུད་དག་གིས་མིའི་སེམས་ལ་རེ་བ་ཞིག་བསྐྲུན་གྱི་ཡོད་སྟབས། དུས་རབས་ཉེར་གཅིག་པའི་ནང་འབྲེལ་བ་ཡོད་པ་དང་དགོས་མཁོ་ཡོད་པ་ཞིག་ཆགས་འདུག ཅེས་གསུངས་སོང་།

ཡང་ཆོས་བརྒྱུད་དང་རྒྱལ་ཁབ་གཅིག་པ་ཡིན་མིན་སོགས་ལ་མ་ལྟོས་པར་ནི་གཅིག་གྱུར་གྱི་འདུ་ཤེས་ཧ་ཅང་གལ་ཆེན་པོ་ཡིན་པའི་སྐོར་ལ་ཁོང་གིས། ང་ཚོ་ཚང་མའི་ཁ་ནས་ཞི་བདེ་ཞི་བདེ་ཟེར་གྱི་ཡོད་ཀྱང་འཁྲུག་པ་རྒྱག་མཁན་དང་གསོད་རེས་གཏོང་མཁན་ཞེ་དྲག་འདུག་གཱ། ཐབས་སྐྱོ་བ་ཞིག་ལ་ཆོས་ལུགས་མ་འདྲ་བ་རྒྱུ་མཚན་དུ་བྱས་ཏེ་གསོད་རེས་གཏོང་བ་དེ་དངོས་གནས་བློ་ཡུལ་ལས་འདས་པ་ཞིག་རེད། འཛམ་གླིང་འདིའི་སྒང་ལ་མི་གསོད་རེས་གཏོང་བ་ཡིས་མཚོན་པའི་འཚེ་བ་བྱེད་པ་ཟེར་བ་དེར་མི་གཅིག་གྱུར་གྱི་འདུ་ཤེས་ཡོད་ན། སོ་སོའི་ངོས་ནས་བརྩི་བཀུར་བྱེད་སའི་མི་དང་ཆོས་དད་མི་འདྲ་བ་ཡོད་པའི་མི་དེ་གཉིས་མི་ཡིན་པ་གཅིག་པ་ཡིན་པས་གཅིག་གྱུར་གྱི་འདུ་ཤེས་ཞེ་དྲག་གལ་ཆེན་པོ་རེད། འཛམ་གླིང་གི་མི་དུང་ཕྱུར་ ༧༠ ཟེར་དུས་ཆོས་ལུགས་དང་ཤ་མདོག་སོགས་ཀྱི་ཁྱད་པར་མེད་པར་འགྲོ་བ་མི་ཡིན་པ་གཅིག་པ་རེད།

ཁྱེད་རང་ཚོ་ཀོ་རི་ཡ་ལ་ཆ་བཞག་ན། ལྷོ་ཀོ་རི་ཡ་དང་བྱང་ཀོ་རི་ཡའི་མི་གཅིག་གྱུར་རེད། ཡིན་ནའང་། གཅིག་གྱུར་གྱི་འདུ་ཤེས་ལ་དོ་སྣང་ཞེ་དྲག་མ་བྱས་པར་མི་འདྲ་བའི་ཁྱད་པར་ཡོད་པ་དེ་རིམ་པ་གཉིས་པའི་ཐོག་མི་འདྲ་བ་ཐོན་ཡོང་གི་འདུག་གཱ ཤ་མདོག་མི་འདྲ་བ་དང་ཆོས་ལུགས་མི་འདྲ་བ། རྒྱལ་ཁབ་མི་འདྲ་བ་སོགས་རིམ་པ་གཉིས་པའི་སྒང་སླེབ་དུས་མི་འདྲ་བ་མང་པོ་ཡོད་པ་རེད། བསམ་བློ་ཐོངས་དང་། འཛམ་གླིང་ཐོག་རྙོག་དྲ་ཡོང་བའི་རྒྱུ་རྐྱེན་གཙོ་བོ་རིམ་པ་དང་པོ་སྟེ་མི་གཅིག་གྱུར་གྱི་འདུ་ཤེས་ཐོག་ཧ་ལམ་ཡོད་པ་མ་རེད། རིམ་པ་གཉིས་པ་མི་འདྲ་བ་མང་པོ་ཡོད་པ་དེའི་སྒང་ནས་རྙོག་དྲ་ཡོང་གི་ཡོད་པ་རེད། རྙོག་དྲ་དེ་ཚོ་སེལ་བར་ང་ཚོས་མི་གཅིག་གྱུར་ཡིན་པའི་འདུ་ཤེས་ཐོག་ཤུགས་ཏོག་ཙམ་བརྒྱབ་པ་ཡིན་ན། ག་ལེར་ག་ལེར་འགྱུར་བ་འགྲོ་བའི་རེ་བ་ཞིག་ཡོད་སྟབས། ཆོས་དད་ཡོད་ན་འདྲ་མེད་ན་འདྲ་མི་གཅིག་གྱུར་ཡིན་པའི་འདུ་ཤེས་དེ་གལ་ཆེན་པོ་ཞེ་དྲག་རེད་འདུག ཅེས་གསུངས་སོང་།

གསར་འགོད་པ། པདྨ་མཚོ།