ཁྱོད་ཀྱིས་ཤེས་དགོས་པའི་གནད་དོན་དྲུག

༄༅།། ཁྱོད་ཀྱིས་༧གོང་ས་མཆོག་ལ་ངོ་རྒོལ་བྱེད་མཁན་ཚོའི་སྐོར་ཤེས་དགོས་པའི་གལ་ཆེའི་དོན་ཚན་དྲུག

བསྟན་རྡོར་གྱིས་བརྩམས། གཡག་ཕྱུག་ཕུན་ཚོགས་ཆོས་འཕེལ་གྱིས་བསྒྱུར།

ད་ལྟ་ང་ཚོའི་དུས་ཀྱི་མགོ་འཁྲིད་ཉུང་ཤས་ཤིག་ལ། འཛམ་གླིང་ཁྱོན་ཡོངས་ཀྱི་གུས་བཀུར་དང་མཚན་སྙན་ཆེན་པོ་ཐོབ་ཡོད་པའི་གྲས་ཀྱི་གཅིག་ནི། སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་ཡིན། ཁོང་གིས་ངལ་བ་འཛེམས་མེད་ཀྱི་འཚོ་བའི་དྲང་བདེན་དང་རྒྱལ་སྤྱིའི་འགན་འཁུར། ཆོས་ལུགས་རིས་མེད་ཀྱི་ཀུན་སྤྱོད་སློབ་གསོ་དང་འཆམ་མཐུན། ད་དུང་འཚེ་མེད་ཞི་བའི་ལྟ་གྲུབ་གོང་འཕེལ་གཏོང་བར་བྱས་པའི་བརྒྱུད་རིམ་དེའི་ཁྲོད་ནས། སྐྱེ་འགྲོ་མང་པོའི་སྡུག་བསྔལ་སེལ་ཐུབ་པ་བྱུང་ཡོད་ལ། འཛམ་གླིང་ཁྱོན་ཡོངས་ཀྱི་བདེ་སྐྱིད་ཡང་སྐྲུན་པར་མཛད་རྗེས་ཆེན་པོ་བཞག་དང་འཇོག་བཞིན་ཡོད།

ཡིན་ན་ཡང་། ཉེ་བའི་ཆར་༧གོང་ས་མཆོག་ཨ་རིའི་ཨ་ལ་བ་མ་དང་པེ་རེན་སེ་ཀྲོན། དེ་ནས་སྦོས་ཊོན་དང་ནེའུ་ཡོག་སོགས། (Alabama to Princeton to Boston to New York ) ས་གནས་མང་པོ་ཞིག་ལ། འཚམས་གཟིགས་དང་སྐོར་སྐྱོད་བྱས་སྐབས། ཁོང་ལ་ངོ་རྒོལ་བྱེད་མཁན་ཤོག་ཁག་ཁྱད་མཚར་ཞིག་གིས། མི་འབོར་སྟོང་ཕྲག་མང་པོ་འཐོམ་དུ་བཅུག་ཡོད་པ་རེད། དེར་བརྟེན། ངོ་རྒོལ་བྱེད་མཁན་འདི་དག་སུ་ཡིན་ནམ། ཁོ་ཚོ་གང་ནས་སླེབས་ཡོད་དམ། ཁོ་ཚོས་༧རྒྱལ་བ་རིན་པོ་ཆེ་ལ་གང་ཞིག་སློང་འདོད་ཡོད། ཁོ་ཚོའི་ལས་འགུལ་དེའི་རྒྱབ་ལ་ཚོགས་པ་སུ་ཞིག་གི་ཁེ་ཕན་སིམ་ནས་བསྡད་ཡོད་དམ།

༄༅།། གཤམ་ལ་ཁྱེད་རང་གི་༧གོང་ས་མཆོག་ལ་ངོ་རྒོལ་བྱེད་མཁན་ཚོའི་སྐོར་ཤེས་དགོས་པའི་གལ་ཆེའི་དོན་ཚན་དྲུག་ནི།

 ༡༽ ཁོ་ཚོ་ནི་དགེ་ལུགས་པའི་ལྟ་གྲུབ་ཕྱོགས་རིས་བྱེད་མཁན་ཚོ་རེད།

ངོ་རྒོལ་བྱེད་མཁན་དེ་དག་ནི། ནང་པའི་ཆོས་ཀྱི་ཐལ་སྤྱོད་རིང་ལུགས་པའི་ཁོངས་སུ་གཏོགས་ཤིང་། རྒྱལ་ཆེན་ཤུགས་ལྡན་ལ་དད་པ་དང་རི་བོ་དགེ་ལུགས་པའི་ལྟ་གྲུབ་ཆོས་བརྒྱུད་གཞན་ལས་མཐོ་བ་འཛིན་མཁན་གྲས་ཡིན། བོད་པའི་ནང་ཆོས་ནང་། དགེ་ལུགས་དང་ས་སྐྱ། རྙིང་མ། བཀའ་བརྒྱུད། ཇོ་ནང་སོགས་ཆོས་བརྒྱུད་ཆེན་པོ་ལྔ་ཡོད་པ་རྣམས་ལས། དགེ་ལུགས་པའི་གྲུབ་མཐའི་ནང་ཁོ་ཚོས་(འདིར་ཤུགས་ལྡན་ཚོགས་པ་ལ་གོ) ཤོག་ཁག་ཆུང་ཆུང་ཞིག་བཟོས་ཏེ། གནའ་ནས་རྒྱལ་ཆེན་ཤུགས་ལྡན་རང་ཉིད་ཀྱི་ལྷ་སྲུང་ལ་བསྟེན་པ་དང་། ཚོགས་མི་ཚོར་ཆོས་བརྒྱུད་གཞན་གྱི་དཔེ་ཆ་དང་བླ་མར་སློབ་གཉེར་བྱ་རྒྱུར་བཀག་འགོག་བྱེད་ཀྱིན་ཡོད། འདི་འདྲའི་རྩོད་རྙོག་མང་བའི་དགེ་ལུགས་པའི་ལྟ་གྲུབ་ཕྱོགས་རིས་ཅན་འདིས་(འདིར་དགེ་ལུགས་པ་སྤྱི་ཡོངས་དང་མ་ནོར་བ་གྱིས།) ལོ་ངོ་བརྒྱ་ཕྲག་མང་པོར། བོད་པ་ཚོར་ཆོས་ལུགས་ཕན་ཚུན་དབྱེ་དབྱེད་བྱ་རྒྱུའི་དངངས་འཚབ་ཅིག་སློང་གི་ཡོད་པ་དང་། ༧གོང་ས་མཆོག་གིས་དཀའ་ངལ་དེ་སེལ་ཆེད་དེ་སྔོན་དོལ་རྒྱལ་དམ་བསྒྲགས་བྱས་ཡོད་ཅིང་། ཁོང་གི་སྔོན་ཐོན་དང་བཅོས་བསྒྱུར་ལྡན་པའི་སྲིད་བྱུས་དེ་ལ་བརྟེན་ཏེ། ཆོས་བརྒྱུད་གཞན་གྱི་བླ་ཆེན་དང་མཉམ་དུ་སློབ་སྦྱོང་བྱས་ཏེ་ཕན་ཚུན་འདྲ་མཉམ་གྱི་ངང་ནས་འཚོ་གནས་ཐུབ་རྒྱུར་རེ་སྐུལ་གནང་གི་ཡོད། འོན་ཀྱང་ཁོང་གི་ཆོས་ལུགས་ཕན་ཚུན་འཆམ་མཐུན་བྱ་རྒྱུའི་དགོངས་པ་ཟབ་མོ་དེ་ནི་དོལ་རྒྱལ་རྗེས་འབྲང་པ་ཚོས་ངན་དམོད་བྱ་རྒྱུའི་གཞི་རྩར་འགྱུར་ཡོད་འདུག

༢༽ ཁོ་ཚོས་༧གོང་ས་མཆོག་ལ་ “ སྲིད་དབང་སྒེར་འཛིན་པ་” ཞེས་འུད་སྒྲོག་བྱས་པ། ངོ་རྒོལ་བྱེད་མཁན་ཚོས། ༧གོང་ས་མཆོག་ལ་“དེང་དུས་འཛམ་གླིང་ནང་གི་སྲིད་དབང་སྒེར་འཛིན་པ་གདུག་རྩུབ་ཆེ་ཤོས་” ཞེས་ནག་ཉེས་སྐྱོན་འཛུགས་བྱས་ཡོད་པ་རེད། གནད་དོན་དེས་ད་ལྟ་ཁོ་ཚོ་འཚོ་གནས་བྱེད་སའི་ཡུལ་དེ། ཕྱིན་ཅི་ལོག་པ་དང་མགོ་འཁོར་བསླུ་བྲིད་ཐེབས་པའི་འཛམ་གླིང་ཞིག་ཡིན་པ་གསལ་པོར་སྟོན་གྱིན་ཡོད་དེ། གནས་ཚུལ་ངོ་མ་ནི། ད་ལྟ་ཁོ་ཚོའི་ཚོགས་པའི་ནང་ལོགས་ཀྱི་བཀའ་གདམས་པ་གསར་མ་(New Kadampa Tradition) ཟེར་བ་དེ་ནི། རང་ཉིད་ཙམ་གྱིས་བྲིས་པའི་དེབ་མ་གཏོགས་གཞན་ཆོས་ལུགས་བླ་ཆེན་སུ་གང་གི་དེབ་ཀློག་མི་ཆོག་ཅེས་བཀའ་སྒྲོག་མཁན་མགོ་འཁྲིད་ཅིག་གི་འཛིན་སྐྱོང་བྱེད་བཞིན་ཡོད་ལ། ཉེ་སྔོན་༧གོང་ས་མཆོག་ལ་ངོ་རྒོལ་བྱེད་མཁན་གྱི་བཀའ་གདམས་པ་གསར་མའི་ཡ་གྱལ་ནུབ་ཕྱོགས་ཤུགས་ལྡན་ཚོགས་པ་(Western Shugden Society)ཟེར་བ་དེ་ནི། ཕྱི་རྒྱལ་གྱི་ (Westboro Baptist Church (WBC) ཞེས་པ་ཡེ་ཤུའི་ཆོས་བརྒྱུད་ཀྱི་སྒྲིག་འཛུགས་གང་གི་ཁོངས་སུ་ཡང་མི་གཏོགས་པར། ཐལ་སྤྱོད་རིང་ལུགས་པའི་ལྟ་བ་མཁྲེགས་འཛེན་བྱེད་མཁན་གྱི་ཚོགས་པ་དང་གཅིག་མཚུངས་ཡིན། བཀའ་གདམས་པ་གསར་མས་༧གོང་ས་མཆོག་ལ་ངོ་རྒོལ་བྱེད་སྟངས་ཐད་མུ་མཐུད་ཤེས་འདོད་ཡོད་རིགས་རྣམས་འབྲེལ་ཐག་འདི་ལ་སྣུན། http://buddhism-controversy-blog.com/2014/07/18/the-new-kadampa-tradition-and-the-dalai-lama/

༣༽ “༧གོང་ས་མཆོག་ནི་ཁ་ཆེ་ཡིན་ཞེས་ངན་དམོད་བྱས་པ། ”

ཉེ་སྔོན་༧གོང་ས་མཆོག་ལ་དོལ་རྒྱལ་རྗེས་འབྲང་པ་ཚོས། ཁ་ཆེ་ཞེས་ངན་དམོད་བྱས་ཡོད། དང་པོ་དེར་ཁ་ཆེ་ཞེས་མིང་བེད་སྤྱོད་བྱས་པ་ཙམ་གྱིས། ཁ་ཆེའི་མི་རིགས་ལ་མཐོང་ཆུང་དང་མི་རིགས་འཐེན་འཁྱེར་གྱི་ལྟ་བ་ཞིག་ཤུགས་ཀྱིས་འཁྱེར་ཡོང་གི་ཡོད་ལ། མ་གཞི་བྱས་ན། འཛམ་གླིང་ནང་མཚན་སྙན་གྲགས་ཡོད་པའི་ནང་པ་ཞིག་ལ། ཁ་ཆེ་ཡིན་ཚུལ་ངན་དམོད་བྱས་པ་འདི། དགོད་བྲོ་བའི་གནས་ལས་འཛམ་གླིང་མི་མང་གིས་དོ་སྣང་བྱ་རིན་གང་ཡང་མེད་ན་ཡང་། ཁོ་ཚོས་ད་དུང་༧གོང་ས་མཆོག་ལ་ “ཏཱ་ལའི་བླ་མ་རྫུན་མ་” ཡིན་ཚུལ་འུད་སྒྲོག་བྱས་པ་དེ། གཅིག་བྱས་ན། ཁོ་ཚོར་ཏཱ་ལའི་བླ་མ་དངོས་གནས་ཤིག་སྟོན་རྒྱུ་ཡོད་ཀྱང་སྲིད། འདི་ཡང་སྙིང་སྐལ་བཟང་རྒྱ་མཚོ་ཟེར་བའི་ཁོ་རང་གི་ཚོགས་པའི་ནང་། རང་ཉིད་ཀྱིས་བྲིས་པའི་དེབ་དང་རྩོམ་ཡིག་མ་གཏོགས་ཀློག་མི་འཇུག་མཁན་གྱི་མགོ་འཁྲིད་འདི། ཏཱ་ལའི་བླ་མ་དངོས་གནས་དེ་ཡིན་ནམ་ཡང་ན། ཁོ་ཚོ་པེ་ཅིན་གཞུང་ནས་མགྱོགས་མྱུར་ཏཱ་ལའི་བླ་མ་དངོས་གནས་ཞིག་ངོས་འཛིན་བྱ་རྒྱུར་ངང་སྒུག་བྱེད་ཀྱིན་ཡོད་དམ།

༤༽ དགེ་ལུགས་ཐལ་སྤྱོད་རིང་ལུགས་པ་ཚོར་རྒྱ་ནག་གཞུང་ནས་རོགས་སྐྱོར་བྱས་པ།

ཕྱི་ལོ་ ༡༩༩༧ ལོར་བོད་འབངས་ཡོངས་ཀྱིས་བཀུར་བའི་སྐྱེས་ཆེན་དམ་པ་ཞིག་གིས་ཤུགས་ལྡན་ལ་དད་པ་བྱས་ན་ནང་པ་སངས་རྒྱས་པའི་ཆོས་ལུགས་ངོ་མའི་ལམ་ལུགས་དང་ཚད་གཞི་ལས་བརྒལ་ཡོད་སྐོར་སྐྱོན་བརྗོད་བྱས་སྐབས། ཁོང་དང་ཁོང་གི་དགེ་ཕྲུག་གཉིས་ཆ་ལྐོག་གསོད་བྱས་ཡོད་ལ། དེ་མ་ཐག་མི་གསོད་ལག་དམར་དེ་དག་ཤར་སེ་རྒྱ་གར་ནས་བྲོས་ཏེ། མཐའ་མ་རྒྱ་ནག་ནང་བདེ་འཇགས་ངང་འཚོ་སྡོད་བྱས་ནས་བསྡད་ཡོད། གནས་ཚུལ་དེ་བྱུང་ནས་རྒྱ་གར་ཉེན་རྟོག་པས། མི་གསོད་གྱོད་གཞི་དེའི་འབྱུང་ཁུངས་ཤུགས་ལྡན་ཚོགས་པ་དང་འབྲེལ་བ་ཡོད་པ་དང་། རྒྱལ་སྤྱིའི་སྐོར་སྲུང་ལྷན་ཚོགས་(Interpol)ཀྱི་ངོས་ནས་ཀྱང་རྒྱ་ནག་གཞུང་ལ་ཡིག་ཆ་དམར་པོ་(ཡིག་ཆ་དམར་པོ་ཞེས་པ་རྒྱལ་ཡོངས་དབུས་དོན་གཅོད་ལས་ཁུངས་(National Central Bureau)ཀྱི་བརྒྱུད་ནས་ནག་ཉེས་ཅན་འཇུ་བཟུང་བྱ་རྒྱུའི་བཀའ་རྒྱ་ཕབ་པར་གོ དབྱིན་སྐད་དུ། (Red Notice) ཞེས་ཟེར།) ཞིག་བཏང་ཡོད་པ་རེད། པེ་ཅིན་གཞུང་ལ་ཆ་མཚོན་ན། ཤུགས་ལྡན་དང་འབྲེལ་བའི་རྩོད་རྙོག་དེ་གོ་སྐབས་བཟང་པོ་ཞིག་ལ་བརྩིས་ཏེ། དགེ་ལུགས་ཐལ་སྤྱོད་རིང་ལུགས་པ་དེ་དག་ལ་རྒྱབ་སྐྱོར་བྱས་ཏེ། བོད་མི་ཕན་ཚུན་བར་ཞེ་འཁོན་བསྐྲུན་ཐབས་དང་། ༧གོང་ས་མཆོག་དང་བོད་པའི་རྩ་དོན་རྨང་ནས་འགོག་ཐབས་བྱེད་ཀྱིན་ཡོད། བྱེད་སྟངས་དེ་ཁོ་ཚོའི་ཁ་བྲལ་དང་དབང་བསྒྱུར་གྱི་སྲིད་ཇུས་(divide-and-rule policy)དང་ཏག་ཏག་མཐུན་གྱིན་ཡོད། རྒྱ་ནག་གཞུང་གིས་ཤུགས་ལྡན་ཚོགས་པ་རྣམས་ལ། མ་དངུལ་གྱི་རྒྱབ་སྐྱོབ་ག་ཚོད་བྱེད་ཀྱིན་ཡོད་མེད་ཤེས་འདོད་ཡོད་མཁན་ཚོས་དྲ་ཐག་འདིར་སྣུན། http://buddhism-controversy-blog.com/2010/02/21/chinas-involvement-in-the-dorje-shugden-controversy/

༥༽ ཁོ་ཚོས་ངོ་རྒོལ་བྱེད་སའི་གཞི་ནོར་བ།

ངོ་རྒོལ་བྱེད་མཁན་འདིའི་གྲས་ཕལ་ཆེ་བ་ཞིག ཨ་རི་དང་ཡུ་རོབ་ནང་སྡོད་མཁན་བོད་པའི་གྲྭ་བ་དང་གནོད་འཚེ་ཕོག་ཡུལ་ཡིན་མདོག་མདོག་གི་ངོ་འབག་རྫུན་མ་ཞིག་གྱོན་ནས་བསྡད་ཡོད། ནུབ་ཕྱོགས་རྒྱལ་ཁབ་ཀྱི་ཁེ་དབང་ལྡན་པའི་མི་སེར་(སྒེར་གྱི་རང་དབང་རྩོད་ཆོག་པ་ལ་གོ) དེ་དག་གིས། དམག་མི་དང་ཉེན་རྟོག་པའི་དཔུང་ཤུགས་སོགས་གང་ཡང་མེད་པ་དང་། ཁྱིམ་མེད་སྐྱབས་བཅོལ་ཡིན་པའི་༧གོང་ས་མཆོག་ལྟ་བུ་ཞིག་གིས་ཆོས་དད་རང་དབང་སྤྲོད་ཀྱིན་མི་འདུག་ཅེས་ནག་ཉེས་སྐྱོན་འཛུགས་བྱས་པ་འདི་ཁུངས་མེད་པའི་གཏམ་ཞིག་ཡིན་པའི་མ་ཚད་དངོས་གནས་གདུག་རྩུབ་ཆེ་བ་རང་ཡིན་ནོ།། གཡོ་ཁྲམ་འདིའི་གྲས་ནི། ༧གོང་ས་མཆོག་གི་བཅོས་བསྒྱུར་ལྡན་པའི་སྲིད་བྱུས་དག་དང་ཡོངས་སུ་འགལ་ནས། ཁོ་ཚོས་དུས་རྒྱུན་སྲུང་སྐྱོབ་བྱེད་ཀྱིན་ཡོད་མདོག་མདོག་གི་དགེ་ལུགས་པའི་ཆོས་བརྒྱུད་དམ་གཙང་དེ་བསྲེ་ལྷད་འགྲོ་རྒྱུའི་ཉེན་ཚབས་འཕར་མ་ཞིག་ཀྱང་སྐྲུན་གྱིན་ཡོད། ངོ་རྒོལ་བྱེད་མཁན་འདི་ཚོ་༧རྒྱལ་བ་རིན་པོ་ཆེ་དང་འབྲེལ་བའི་ཚོགས་པ་དང་ལྟེ་གནས་ཁང་གང་ལ་ཡང་འབྲེལ་བ་མེད་ལ། གལ་ཏེ་ཁོང་གི་ཁོ་ཚོའི་རང་དབང་འགོག་ཐབས་བྱས་ཀྱང་། ཁོང་གིས་དེ་གནང་གི་མ་རེད། ཁོ་ཚོར་ཆོས་དད་རང་དབང་མ་སྤྲད་པར་མུ་མཐུད་དམ་བསྒྲགས་དང་བཙན་གནོན་བྱེད་མཁན་ངོ་མ་དེ་ནི། ཡག་ཉེས་སོགས་གང་ཡང་མ་ཤེས་པར་འཛུལ་ཞུགས་བྱས་སའི་ཁོ་ཚོའི་ཚོགས་པ་ཁྱད་མཚར་དེའི་མགོ་འཁྲིད་དགེ་བཤེས་སྐལ་བཟང་རྒྱ་མཚོ་རེད། ཚོགས་མི་ཞིག་གིས་བཀའ་གདམས་པ་གསར་མའི་བྱ་སྤྱོད་ངོ་མའི་སྐོར་ལ་བྲིས་པའི་ཁུངས་སྐྱེལ་དཔང་ཡིག་ལྟ་བུའི་རྩོམ་ཡིག་དེ་གཟིགས་ན་འབྲེལ་ཐག་འདིར་སྣུན། http://buddhism-controversy-blog.com/tag/nkt-survivor/

༦༽ ངོ་རྒོལ་བྱེད་མཁན་ཚོས་བོད་ཀྱི་རྩ་དོན་འགོག་ཐབས་དང་རྒྱ་ནག་གི་ཁེ་ཕན་སྲུང་ཐབས་ལ་དམིགས་པ། རྒྱ་ནག་གཞུང་དང་བཀའ་གདམས་པ་གསར་མས་སྐྱོན་ཚིག་བེད་སྤྱོད་བྱེད་སྟངས་ཐད། འདྲ་མཚུངས་ཀྱི་དཔེ་མང་པོ་ཞིག་ཡོད་དེ། འབྲེལ་ཡོད་གཉིས་ཀ་ནས། ༧གོང་ས་མཆོག་ཨ་རིའི་གསང་བའི་ལས་ཁུངས་ཀྱི་མྱུལ་མ་དང་ན་ཛི་(Nazi) ཞེས་འབོད་ཡོད་ལ། ཕྱི་ལོ་ ༡༩༥༩ ལོའི་སྔོན་གྱི་བོད་འདི་ཞིང་བྲན་རྒྱུད་འཛིན་ལམ་ལུགས་ཀྱི་རྒྱལ་ཁབ་ཅིག་ཡིན་ཞེས་བསྙོན་འཛུགས་བྱེད་ཀྱིན་ཡོད། ཁོ་ཚོས་(སྐབས་འདིར་རྒྱ་ནག་དང་ཤུགས་ལྡན་ལ་གོ་དགོས།) ཁྱེད་རང་ལ་༧གོང་ས་མཆོག་ཨ་རིའི་གསང་བའི་ལས་ཁུངས་ཀྱིས་(CIA) སྐྱོབ་པ་རེད་ཅེས་འུད་སྒྲོག་བྱས་ཏེ། སྐད་ཆ་དེའི་རྒྱབ་ལ། ཁོ་ཚོས་ད་དུང་ཡང་ཁྱེད་རང་ལ་རྒྱ་ནག་གཞུང་གིས། བོད་མི་རྣམས་༧གོང་ས་མཆོག་ནས་བཅིངས་བཀྲོལ་བཏང་བ་རེད་ཅེས་ཨུ་ཚུགས་ཀྱི་ཡིད་ཆེས་བྱས་འཇུག་གིན་ཡོད། ཁོ་ཚོས་ད་དུང་། “༧གོང་ས་མཆོག་ཨ་རིའི་གསང་བའི་ལས་ཁུངས་མེད་ན་སྐྱོབ་ཐུབ་ཀྱི་མ་རེད། ”ཅེས་པའི་འདོད་ཚུལ་འདི། མ་དག་རྒྱུན་འབྱམས་ཀྱི་བཅོས་སྒྲུང་ཞིག་ཡིན་པ་དང་། འདིས་རང་ཉིད་ཀྱི་ལུས་སྲོག་འབེན་དུ་བཙུགས་ནས་༧གོང་ས་མཆོག་ལྷ་ས་ནས་རྒྱ་གར་བར་སྣེ་ལེན་ཞུ་མཁན་གྱི་བོད་ཀྱི་དཔའ་རྟུལ་རྣམས་ཀྱི་མཛད་རྗེས་ལ་རྫུན་བཟོ་དང་འདས་པའི་ལོ་རྒྱུས་རྣམས་འཁྱོག་བཤད་བྱེད་ཀྱིན་ཡོད། དེར་བརྟེན། བཀའ་གདམས་པ་གསར་བ་དང་༧གོང་ས་མཆོག་ལ་ངོ་རྒོལ་བྱེད་མཁན་འདི་དག་ནི། དགེ་ལུགས་ཀྱི་ལྟ་གྲུབ་ཕྱོགས་རིས་བྱེད་མཁན་ཙམ་ཞིག་མ་ཡིན་པར། ཁོ་ཚོ་ནི་རྒྱ་ནག་གཞུང་གིས་བོད་ཀྱི་གནས་སྟངས་ལ་འཁྱོག་བཤད་དང་། བོད་མིའི་རང་དབང་གི་འཐབ་རྩོད་འདི་ཁྲིམས་མཐུན་མེད་པ་བཟོ་རྒྱུའི་གཞི་རྒྱ་ཆེ་བའི་འཆར་གཞི་དང་མེད་དུ་མི་རུང་བའི་ལག་ཆ་གལ་ཆེན་ཞིག་ཡིན། ཤུགས་ལྡན་དང་འབྲེལ་བའི་ལོ་རྒྱུས་རྒྱབ་ལྗོངས་སྐོར་མུ་མཐུད་གཏིང་ཟབ་ཤེས་འདོད་ཡོད་པ་རྣམས་བོད་རིག་ཉམས་ཞིབ་པ་ཐེ་རེ་གྲོ་ཊིན་(Thierry Dodin) དང་། མཁས་དབང་རོ་སྦོཊ་ཐར་མན་(Robert Thurman) ལགས་ཀྱི་དཔྱད་རྩོམ་ཁག་གཟིགས་རོགས་གནང་།

བསྒྱུར་མཆན། འདས་པའི་ཟླ་བ་ཁ་ཤས་སྔོན་ལ། ཤུགས་ལྡན་དང་རྒྱ་ནག་གཞུང་གཉིས་ནས་ངན་སེམས་ཁོག་བཅངས་ཀྱིས། མི་བདེན་རྫུན་བསྒྲིགས་བྱས་ནས་མུ་མཐུད་༧གོང་ས་མཆོག་ལ་ངོ་རྒོལ་བྱས་སྐབས། ང་ཚོ་བོད་པ་ཚོས་ནམ་ཡང་སེམས་ཤུགས་དང་རྒྱབ་སྐྱོར་ཙམ་གྱིས་རྒྱུན་མ་བསྐྱངས་པར། བསྲེགས་བཅད་བརྡར་གསུམ་གྱི་སྒོ་ནས་གནས་ཚུལ་མང་པོ་ཞིག་ལ་རྒྱུས་ལོན་བྱ་རྒྱུ་ཤིན་ཏུ་ནས་གལ་གནད་ཆེ་སྟབས། འདིར་བསྟན་རྡོར་ལགས་ཀྱིས་གོ་བདེ་བའི་ལམ་ནས་ཤུགས་ལྡན་དང་དེ་འབྲེལ་རྒྱ་ནག་གཞུང་གི་བོད་ཐོག་སྲིད་ཇུས་འཛིན་སྟངས་ཐད་དཔྱད་རྩོམ་གནད་ལ་འཁེལ་བ་ཞིག་བྲིས་འདུག་པས། རྒྱ་ཆེའི་ཀློག་པ་པོ་ཚོས་དགྱེས་གཟིགས་གནང་རོགས། ཞོར་དུ་བསྒྱུར་རྩོམ་འདི་མ་གཏོགས་འབྲེལ་ཐག་གཞན་རྣམས་དབྱིན་ཡིག་ཐོག་རང་སོར་གནས་ཡོད།

མ་རྩོམ་གྱི་འབྲེལ་ཐག http://www.huffingtonpost.com/tenzin-dorjee/6-things-to-know-about-th_b_6104716.html