ཟླ་འདིའི་ཕྱི་ཚེས་ ༡༧ ཉིན་དཀར་མཛེས་རྫོང་ནས་ཡིན་པའི་གྲྭ་བློ་བཟང་དཔལ་ལྡན་ལགས་བཙོན་འཇུག་གི་དུས་ཡུན་མ་རྫོགས་གོང་ཀློད་གྲོལ་བཏང་སྟེ་ཕ་ཡུལ་དུ་འབྱོར་ཡོད་འདུག
འདི་གར་ཆབ་སྲིད་བཙོན་ཟུར་མགོན་པོ་འཕྲིན་ལས་ལགས་ཀྱིས་གནས་ཚུལ་མཁོ་སྤྲོད་གནང་བ་ལྟར་ན། དཀར་མཛེས་རྫོང་གསེར་མཁར་ཤང་བེ་རུ་ཡུལ་ཚོ་བེ་རུ་དགོན་གྱི་གྲྭ་བློ་བཟང་དཔལ་ལྡན་ལགས་ཀྱིས། ཕྱི་ལོ་ ༢༠༠༨ ཟླ་ ༦ ཚེས་ ༡༨ ཉིན་དཀར་མཛེས་རྫོང་ཐོག་ཏུ་རྒྱ་གཞུང་གི་བཙན་གནོན་དམ་དྲག་ལ་ངོ་རྒོལ་བྱས་ཏེ། ༧རྒྱལ་བ་རིན་པོ་ཆེ་བོད་ལ་གདན་འདྲེན་ཞུ་དགོས། བོད་ལ་རང་དབང་དགོས་སོགས་ཀྱི་སྐད་འབོད་བྱས་པར་བརྟེན། དཀར་མཛེས་རྫོང་ཉེན་རྟོག་པས་ཁོང་འཛིན་བཟུང་བྱས་ཏེ་ཟླ་ ༦ ཙམ་གྱི་རིང་བཀག་ཉར་ཀྱིས་གཅར་རྡུང་མནར་གཅོད་བཏང་ཡོད་འདུག
ཕྱིས་སུ་དཀར་མཛེས་མི་མང་ཁྲིམས་ཁང་གིས་རྒྱལ་ཁབ་ཁ་བྲལ་གྱི་བྱ་སྤྱོད་སྤེལ་བའི་ཉེས་མིང་འོག ཁོང་ལ་ལོ་ ༩ ཡི་བཙོན་འཇུག་ཁྲིམས་ཐག་བཅད་དེ་ར་རྔ་ཁའི་བཙོན་ཁང་དུ་བཅུག་ཡོད་ཀྱང་། ཁོང་གིས་བཙོན་ཁང་དུ་ངལ་རྩོལ་ཧུར་ཐག་བྱས་པར་བརྟེན། ལོ་ངོ་ ༢ ཆག་ཡང་བཏང་སྟེ་ཟླ་འདིའི་ཕྱི་ཚེས་ ༡༧ ཉིན་ཀློད་གྲོལ་ཐོབ་ཡོད་པ་དང་། རྒྱ་གཞུང་གིས་ནག་ཉེས་གཡོག་མིན་ལ་མ་འཛེམས་པར་དགོན་པ་དང་ཁྱིམ་མི་གཉེན་འབྲེལ་སོགས་ཕ་ཡུལ་གྱི་སེར་སྐྱ་མི་མང་གིས་ཁོང་ལ་ཕེབས་བསུ་ཞུས་ཡོད་འདུག
གནས་ཚུལ་མཁོ་སྤྲོད་པར་ད་ལྟའི་ཆར་ཁོང་གི་སྐུ་གཟུགས་གནས་སྟངས་ག་འདྲ་ཡིན་དྲིས་པར། བཙོན་ཁང་དུ་འཚོ་བའི་ཆ་རྐྱེན་ཞན་པའི་ཁར་ལས་ཀ་ཞེ་དྲག་བྱེད་དགོས་སྟབས། ད་ལྟ་ཁོང་ཀློད་གྲོལ་བཏང་ནས་རང་ཁྱིམ་དུ་འབྱོར་ཡོད་ཀྱང་། ཕོ་ཁ་དང་གྲང་བ་ན་ཚ་སོགས་ཀྱིས་གཟུགས་པོ་བདེ་ཐང་མིན་པའི་དཀའ་ངལ་ཆེན་པོ་ཡོད་ས་རེད། ཅེས་བརྗོད་སོང་།
གསར་འགོད་པ། པདྨ་མཚོ།
