རྒྱལ་སྤྱིའི་ཉེས་དོན་ཁྲིམས་ཁང་ནས་བྱང་ཀོ་རི་ཡའི་མགོ་ཁྲིད་ཅིན་ཀྲིན་ཨིན་ལ་འདྲི་གཅོད་བྱེད་པའི་གྲོས་ཆོད་དེར་རྒྱ་ནག་གཞུང་གིས་མོས་མཐུན་བྱས་མི་འདུག
ཟླ་འདིའི་ཕྱི་ཚེས་ ༡༨ ཉིན་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཐོག བྱང་ཀོ་རི་ཡའི་འགྲོ་བ་མིའི་ཐོབ་ཐང་གི་གནད་དོན་རྒྱལ་སྤྱིའི་ཉེས་དོན་ཁྲིམས་ཁང་ལ་ཞུ་གཏུག་བྱས་ཏེ། བྱང་ཀོ་རི་ཡའི་མགོ་ཁྲིད་ཅིན་ཀྲིན་ཨིན་ལ་འདྲི་གཅོད་དགོས་པའི་སྐོར་གྱི་གྲོད་ཆོད་ཅིག་བཞག་ཡོད་པ་དང་། གྲོས་ཆོད་དེ་ལ་ཚོགས་ཞུགས་རྒྱལ་ཁབ་ ༡༡༡ གི་འཐུས་མིས་རྒྱབ་སྐྱོར་གནང་ཡོད་ཀྱང་། རྒྱ་ནག་དང་ཨུ་རུ་སུ་སོགས་རྒྱལ་ཁབ་ ༡༩ ཡིས་མོས་མཐུན་བྱས་མེད་པ་རེད།
ཟླ་འདིའི་ཕྱི་ཚེས་ ༡༩ ཉིན་རྒྱ་ནག་གི་ཕྱི་འབྲེལ་མགྲིན་ཚབ་པ་ཧོང་ལི་ཡིས། རྒྱ་གཞུང་གིས་གྲོས་ཆོད་དེ་ལ་རྒྱབ་སྐྱོར་མ་བྱས་པའི་རྒྱུ་མཚན་གསལ་བཤད་བྱས་པའི་ནང་། འགྲོ་བ་མིའི་ཐོབ་ཐང་གི་གནད་དོན་ཆབ་སྲིད་ཅན་དུ་བསྒྱུར་བ་དང་། འགྲོ་བ་མིའི་ཐོབ་ཐང་གི་གནད་དོན་ཁ་ལ་འཁྱེར་ཏེ་རྒྱལ་ཁབ་གཞན་ལ་གནོན་ཤུགས་སྤྲོད་རྒྱུར་མཐའ་གཅིག་ཏུ་ངོ་རྒོལ་བྱེད་ཀྱི་ཡོད་ལ། འགྲོ་བ་མིའི་ཐོབ་ཐང་ལས་འཛིན་ལྷན་ཚོགས་ཀྱིས་འགྲོ་བ་མིའི་ཐོབ་ཐང་གི་གནད་དོན་འོས་འཚམ་གྱིས་གྲོས་བསྡུར་མ་བྱས་པར་རྒྱལ་སྤྱིའི་ཉེས་དོན་ཁྲིམས་ཁང་ལ་ཞུ་གཏུག་བྱས་ན། གནད་དོན་ཐག་གཅོད་བྱེད་པར་ཕན་ཐོགས་གང་ཡང་མེད་ཅིག་ལ་ངོས་འཛིན་བྱེད་ཀྱི་ཡོད་སྐོར་བརྗོད་འདུག
གྲོས་ཆོད་དེ་བཞག་རྗེས། ལྷན་ཚོགས་ཐོག་ཞུགས་པའི་བྱང་ཀོ་རི་ཡའི་ཕྱི་སྲིད་ལྷན་ཁང་གི་མགོ་ཁྲིད་ཚེ་མེན་ལན་གྱིས། བྱང་ཀོ་རི་ཡས་གྲོས་ཆོད་དེ་ལ་མཐའ་གཅིག་ཏུ་ངོ་རྒོལ་བྱེད་ཀྱི་ཡོད་ལ། གྲོས་ཆོད་དེ་བྱང་ཀོ་རི་ཡའི་ཆབ་སྲིད་དང་དམག་དོན་ཐོན་སྐྱེད་བཀག་སྡོམ་བྱེད་པར་དམིགས་པ་ཞིག་ལས། དོན་དངོས་ཐོག་འགྲོ་བ་མིའི་ཐོབ་ཐང་སྲུང་སྐྱོབ་དང་འབྲེལ་བ་གང་ཡང་མེད་པར་ཐེ་ཚོམ་བྱེད་མི་དགོས་སྐོར་བརྗོད་ཡོད་པ་མ་ཟད། བྱང་ཀོ་རི་ཡས་དམག་འཐབ་ནུས་པར་སྔར་ལས་ཤུགས་སྣོན་བྱས་ཏེ། ཨ་རིའི་དྲག་པོའི་ཕལ་རྒོལ་དང་བཙན་འཛུལ་ལྐོག་ཇུས་ལ་ཁ་གཏད་གཅོག་རྒྱུ་ཡིན་ལུགས་བརྗོད་འདུག
བྷི་བྷི་སི་གསར་ཁང་གིས་གནས་ཚུལ་སྤེལ་བ་ལྟར་ན། ཐེངས་འདིའི་ཚོགས་ཆེན་ཐོག་བཞག་པའི་གྲོས་ཆོད་དེ་ནི། འདི་ལོའི་ཕྱི་ཟླ་ ༢ ནང་འཛམ་གླིང་མཉམ་འབྲེལ་རྒྱལ་ཚོགས་འགྲོ་བ་མིའི་ཐོབ་ཐང་ལྷན་ཚོགས་ཀྱིས་བཏོན་པའི་དཔྱད་ཞིབ་སྙན་ཐོ་སྟེ། བྱང་ཀོ་རི་ཡའི་མི་མང་ལ་ཐད་ཀར་བཅར་འདྲི་བྱས་པའི་གནས་ཚུལ་རྣམས་གཞིར་བཟུང་ནས་བཞག་པ་ཞིག་ཡིན་ལ། སྙན་ཐོ་དེའི་ནང་བྱང་ཀོ་རི་ཡ་གཞུང་གིས་བཙོན་པ་ཚོར་བཙན་དབང་གིས་ཟས་བཅད་པ་དང་ངལ་རྩོལ་དུ་བཀོལ་བ། བཙན་གཡེམ་གཏོང་བ། ཉེས་མེད་ངན་གསོད་སོགས་མནར་གཅོད་སྣ་ཚོགས་གཏོང་བཞིན་ཡོད་པ་དང་། འདས་པའི་ལོ་ངོ་ ༥༠ ནང་བྱང་ཀོ་རི་ཡའི་བཙོན་ཁང་ཁག་གི་ནང་ནས་ཁྱོན་ཆབ་སྲིད་བཙོན་པ་ཁྲི་ ༡༠ ཙམ་རྐྱེན་འདས་སུ་ཕྱིན་ཡོད་སྐོར་བརྗོད་འདུག
ཆབ་སྲིད་དཔྱད་ཞིབ་པ་ཚོས། རྒྱ་ནག་བྱང་ཀོ་རི་ཡའི་བརྟན་བརླིང་འགྱུར་མེད་ཀྱི་མནའ་མཐུན་རྒྱལ་ཁབ་ཅིག་ཡིན་པའི་ཆ་ནས། འདས་པའི་ལོ་ངོ་ ༧༠ ནང་ཅིན་རི་ཁྲིན་ཁྱིམ་རྒྱུད་ཀྱི་དབང་བསྒྱུར་འོག བྱང་ཀོ་རི་ཡའི་འགྲོ་བ་མིའི་ཐོབ་ཐང་རྡོག་རོལ་བཏང་བའི་ནག་ཉེས་ཚང་མ་གསལ་བོ་ཤེས་ཀྱི་ཡོད་ཀྱང་། རྒྱལ་སྤྱིའི་ཉེས་དོན་ཁྲིམས་ཁང་གིས་ཅིན་ཀྲིན་ཨིན་ལ་འདྲི་གཅོད་བྱེད་པར་ངོ་རྒོལ་བྱས་པ་དེ། བྱང་ཀོ་རི་ཡའི་གུང་ཁྲན་སྲིད་དབང་འཐོར་ཞིག་ཏུ་འགྲོ་བར་སྔོན་འགོག་བྱེད་པའི་ཆེད་དུ་ཡིན་ལ། གལ་ཆེན་གྱི་དགོས་དམིགས་གཞན་ཞིག་ནི། མཉམ་འབྲེལ་རྒྱལ་ཚོགས་ཀྱིས་རྒྱ་ནག་གི་སྲིད་འཛིན་ཟུར་པ་ཅང་ཙི་མེན་ལ་འདྲི་གཅོད་བྱེད་པའི་གྲོས་གཞི་འདོན་པར་སྔོན་འགོག་བྱེད་ཆེད་ཡིན་སྐོར་བརྗོད་ཀྱི་འདུག
གསར་འགོད་པ། པདྨ་མཚོ།
