༧གོང་ས་མཆོག་རྒྱ་གར་ལྡི་ལིར་སྲིད་བློན་ནེ་རུ་འཁྲུངས་ཏེ་ལོ་བརྒྱ་དང་ཉེར་ལྔ་འཁོར་བའི་དུས་དྲན་དང་རྒྱལ་སྤྱིའི་ཧིན་རྡིའི་ཆོས་ལུགས་ལྷན་ཚོགས་བཅས་སུ་ཆིབས་བསྒྱུར་བསྐྱངས་ཏེ། འཛམ་གླིང་ཐོག་མི་རིགས་དང་ཆོས་ལུགས་མི་འདྲ་བ་ཡོད་པ་དེར་གཙིགས་ཆེན་བྱེད་པ་ལས་མ་འཆམ་མ་མཐུན་པ་འབྱུང་བཞིན་ཡོད་སྐོར་གསུངས་འདུག
ཟླ་འདིའི་ཚེས་ ༡༩ ཉིན་ནས་བཟུང་༧གོང་ས་མཆོག་རྒྱ་གར་རྒྱལ་ས་ལྡི་ལིར་ཉིན་དྲུག་རིང་གི་མཛད་འཕྲིན་སྐྱོང་བཞིན་ཡོད་ཅིང་། ཚེས་ ༢༠ ཉིན་༧གོང་ས་མཆོག་གིས་ནེ་རུ་གཙུག་ལག་སློབ་ཆེན་དུ། དམ་པ་ནེ་རུ་འཁྲུངས་ནས་ལོ་ ༡༢༥ འཁོར་བའི་རྗེས་དྲན་མཛད་སྒོའི་ཐོག་མང་ཚོགས་ ༡༣༠༠ ལྷག་ལ་འགྲོ་བ་མིའི་རིགས་ཚང་མ་གཅིག་མཚུངས་ཡིན་པའི་བཀའ་སློབ་གནང་དོན། ངོས་ཀྱིས་དུས་རྟག་ཏུ་འཛམ་གླིང་གི་མི་འབོར་ཐེར་འབུམ་བདུན་ཡོད་པ་རྣམས་གཞི་རིམ་འགྲོ་བ་མིའི་གནས་སྟངས་ཐོག་ནས་ལྟ་སྐབས་ཚང་མ་གཅིག་འགྱུར་ཡིན་པ་ནན་བརྗོད་བྱེད་ཀྱིན་ཡོད། འགྲོ་བ་མི་ཐེར་འབུམ་ ༧ ཡོད་པ་ཚང་མ་ལུས་སེམས་དང་། སེམས་ཚོར་གང་གི་ཆ་ནས་གཅིག་འགྱུར་ཡིན་ཡང་། ལུས་ཀྱི་དབྱིབས་ཏེ་སྣ་ཁུག་ཆེ་ཆུང་དང་སྐྲའི་ཚོན་མདངས་སོགས་ཕྲན་བུ་མི་འདྲ་བ་ཡོད་ཀྱང་། ང་ཚོ་ཚང་མར་མིའི་ཀླད་པ་གཅིག་མཚུངས་ཡོད་སྟབས། རྒྱལ་ཁབ་དང་ཆོས་དད། ཤ་མདོག་མི་འདྲ་བ་ཡོད་པ་དེ་དག་གལ་ཆེན་པོ་མིན་ཡང་། ང་ཚོར་འཕྲད་བཞིན་པའི་དཀའ་ངལ་མང་དག་ཅིག་རྒྱལ་ཁབ་དང་ཆོས་ལུགས་སོགས་མི་འདྲ་བ་ཡོད་པ་དེ་དག་གཙིགས་འཛིན་བྱེད་པ་ལས་འབྱུང་བཞིན་ཡོད། གཞི་རྩའི་ཆ་ནས་ང་ཚོ་ཚང་མ་སྤྱི་ཚོགས་ལ་རྟེན་པའི་སེམས་ཅན་ (Social Animal) ཞིག་ཡིན་པ་དང་འབྲེལ། ཕན་ཚུན་གཅིག་ལ་གཅིག་བརྟེན་ནས་འཚོ་དགོས་སྟབས། ངོས་ཀྱིས་ནམ་རྒྱུན་སྤུན་ཟླ་ཕོ་མོ་ཞེས་འབོད་ཀྱི་ཡོད། ཅེས་གསུངས་འདུག
རྒྱ་གར་གྱི་སྲིད་བློན་དང་པོ་ནེ་རུ་མཆོག་གི་སྐོར་ལ་གསུངས་དོན། ཞིང་གཤེགས་སྐུ་ཞབས་ནེ་རུ་མཆོག་ནི་རྒྱ་གར་གྱི་དབུ་ཁྲིད་ཆེན་པོ་ཞིག་ཡིན་པ་མ་ཟད། ཁོང་གིས་ཨེ་ཤི་ཡའི་མངའ་ཁུལ་གྱི་མ་འོངས་འཕེལ་རྒྱས་ཐད་ཕུགས་རྒྱང་རིང་པོའི་དགོངས་པ་བཞེས་མཁན་གྱི་རྒྱ་གར་གྱི་རླབས་ཆེན་གྱི་དབུ་ཁྲིད་ཅིག་ཡིན། རྒྱ་གར་འདི་གནའ་རབས་ཀྱི་ཡུལ་གྲུ་ཞིག་ཡིན་པ་མ་ཟད། ༡༩༤༧ ལོར་དབྱིན་ཡུལ་གྱི་བཙན་འོག་ནས་རང་བཙན་ཐོབ་ཡོད། སྐུ་ཞབས་ནེ་རུ་མཆོག་དང་མེས་བོ་དམ་པ་གྷན་དྷི་མཆོག་གིས་དབུ་ཁྲིད་འོག་རང་བཙན་འཐབ་རྩོད་ཀྱི་ལས་འགུལ་སྤེལ་ཡོད། སྤྱིར་དབུ་ཁྲིད་རྣམ་གཉིས་བར་དགོངས་ཚུལ་མི་འདྲ་བ་ཡོད་ཀྱང་། ཁོང་རྣམ་གཉིས་ནས་དམངས་གཙོ་དང་ཆོས་ལུགས་རིས་མེད། འཚེ་མེད་ཞི་བའི་ལྟ་གྲུབ་སོགས་ལ་གཞི་བཅོལ་བའི་རྒྱ་གར་ཡུལ་འདི་གསར་འཛུགས་གནང་ཡོད། ངོས་སྒེར་ལ་མཚོན་ན་ ༡༩༥༤ ལོར་རྒྱ་ནག་གི་རྒྱལ་ས་པེ་ཅིན་དུ་ཀྲུའུ་ཨེན་ལེ་ཡིས་གསོལ་ཚིགས་ཤིག་གཤོམ་སྐབས་ནེ་རུ་དང་ཐོག་མར་མཇལ་རྒྱུ་བྱུང་ཡང་། སྐབས་དེར་ཀྲུའུ་ཨེན་ལེ་ཡིས་ངོས་ལ་སྐུ་མགྲོན་གནད་ཡོད་རྣམས་ངོ་སྤྲོད་བྱས་ཏེ། སྐུ་ཞབས་ནེ་རུའི་མཚམས་སུ་སླེབ་སྐབས་ནེ་རུ་མཆོག་ཡུད་ཙམ་རིང་སྨྲ་བ་གང་ཡང་ མེད་པར་མིག་ཧུར་རེར་དགོངས་པ་བཞེས་ཏེ་བཞུགས་སོང་། ངོས་ཀྱིས་བསམ་པར་སྐབས་དེར་ནེ་རུས་བོད་ནང་གི་གནས་སྟངས་སྤྱི་དང་ལྷག་པར་སྐུ་ཞབས་སཱ་ཌར་པ་ཊེལ་མཆོག་གིས་ཁོང་ལ་བོད་ནང་རྒྱ་ནག་གི་དབང་བསྒྱུར་བྱ་རྒྱུའི་ཉེན་བརྡ་བཏང་བ་སོགས་ཐུགས་དྲན་གསོས་པ་ཞིག་བྱུང་ཡོད་བསམ་པ་དྲན་བྱུང་། ཞེས་གསུངས་འདུག
༧གོང་ས་མཆོག་གིས་མུ་མཐུད་དུ་གསུངས་དོན། ༡༩༥༦ ལོར་སངས་རྒྱས་མྱ་ངན་ལས་འདས་ཏེ་ལོ་ ༢༥༠༠ འཁོར་བའི་དྲན་གསོའི་དུས་ཆེན་སྐབས་ནེ་རུ་མཆོག་དང་མཇལ་འཕྲད་ཐེངས་འགའ་ཤས་བྱུང་སྐབས་ཁོང་ནས་ལམ་སྟོན་བཀའ་སློབ་ཞུ་རྒྱུ་བྱུང་། ༡༩༥༧ ལོའི་མགོ་སྟོད་ཙམ་ནང་ངོས་ཀྱི་སློབ་སྟོན་པ་ཁག་ཅིག་གིས་ངོས་རང་བོད་དུ་ཕྱིར་ལོག་མ་བྱས་པར་རྒྱ་གར་དུ་བསྡད་ན་བཟང་ཚུལ་གྱི་བསམ་ཚུལ་བརྗོད་བྱུང་ཡང་། ངོས་རང་བོད་དུ་ཕྱིར་ལོག་ནས་སྔར་བཞིན་ཞི་བའི་ལམ་ནས་ཐབས་ཤེས་བྱས་ཏེ་གྲོས་མཐུན་དོན་ཚན་བཅུ་བདུན་ནས་རང་ཁེ་ཅི་ལོན་གྱི་ལག་ལེན་འཁེལ་ཐབས་བྱ་དགོས་པའི་སློབ་སྟོན་གནང་བ་ལྟར། བོད་དུ་ཕྱིར་ལོག་བྱས་ནས་ཁོང་གི་སློབ་སྟོན་ལྟར་ལག་བསྟར་ཡོང་ཐབས་བྱས་ཏེ། རྒྱ་གར་ནས་གྲོ་མོར་འབྱོར་སྐབས་ངོས་ཀྱི་རྒྱ་མིའི་དཔོན་རིགས་ཚོར་དེ་སྔ་ནོར་ འཁྲུལ་ཤོར་བ་དེ་དག་ཐོག་བསམ་བློ་ཟབ་ནན་གཏོང་དགོས་པ་བརྗོད་དེ། འགྲིག་ཐབས་བྱས་ཀྱང་ཕན་འབྲས་མ་ཐོན་སྟབས། མཐར་ ༡༩༥༩ ཟླ་ ༤ ནང་ངོས་རང་སླར་ཡང་རྒྱ་གར་ནང་འབྱོར་རྗེས། ངོས་ཀྱིས་ནེ་རུ་མཆོག་ལ་སྔ་རྗེས་བྱུང་རིམ་རྣམས་ཞིབ་ཕྲ་ཞུས་སྐབས་ཁོང་གིས་དོ་སྣང་ཆེན་པོ་གནང་སོང་། ༡༩༦༠ ལོར་ནེ་རུ་མཆོག་གིས་དབྱིན་སྐད་ནི་རྒྱལ་སྤྱིའི་སྐད་ཡིན་སྟབས། ང་ཚོའི་སློབ་གྲྭའི་ནང་སྐད་ཡིག་བརྒྱུད་ལམ་དབྱིན་ཇི་འཇོག་དགོས་པ་དང་། བོད་མི་རིགས་ཀྱི་རིག་གཞུང་དང་ངོ་བོ་སྲུང་སྐྱོབ་བྱེད་དགོས་ན་བོད་པའི་ཕྲུ་གུ་རྣམས་ལ་བོད་ཡིག་བོད་སྐད་སློབ་སྦྱོང་སྤྲོད་དགོས་པའི་ལམ་སྟོན་གནང་བྱུང་བར་བརྟེན། ནེ་རུ་མཆོག་ནི་ངོས་ལ་རོགས་རམ་ཧ་ཅང་གནང་མཁན་གྱི་གྲོགས་པོ་ཞིག་ཡིན་སྟབས། ད་རེབ་ངོས་རང་འདིར་ནེ་རུའི་རྗེས་དྲན་མཛད་སྒོར་སྐད་ཆ་ཤོད་རྒྱུའི་གོ་སྐབས་བྱུང་བར་ཆེ་མཐོང་ཧ་ཅང་ཐོབ་པ་ཞིག་བྱུང་། ཞེས་སོགས་གསུངས་འདུག
ཚེས་ ༢༡ ཉིན་༧གོང་ས་མཆོག་གིས་རྒྱལ་ཁབ་ ༡༥༠ ནང་གནས་པའི་ཧིན་དྷུའི་ཆོས་ལུགས་ཀྱི་སྐུ་ཚབ་ཚང་འཛོམས་ཀྱི་རྒྱལ་སྤྱིའི་ཧིན་དྷུའི་ཆོས་ལུགས་ལྷན་ཚོགས་ཀྱི་དབུ་འབྱེད་མཛད་སྒོར་ཆིབས་སྒྱུར་བསྐྱངས་ཤིང་། དེར་བྷེ་ཇི་པི་ཚོགས་པའི་ཚོགས་གཙོ་ཨ་མེ་ཌ་ཤཱ་ (Amit Shah) དང་རྒྱ་གར་ (RSS) ཚོགས་པའི་ཚོགས་གཙོ་མཱོ་ཧན་ (Mohan Bhagwat) དང་ (Vishva Hindu Parishad) ཆོས་ལུགས་ཀྱི་མགོན་སྐྱབས་ཨ་ཤོཀ་ (Ashok Singhal)། རྒྱ་གར་གྱི་འགྲིམ་འགྲུལ་བློན་ཆེན་དང་ཤེས་རིག་བློན་ཆེན། ཚོང་དོན་བློན་ཆེན་སོགས་ཡོད་ཐོག་ཏུ་འགྲོ་བ་མིའི་རིགས་གཅིག་མཚུངས་ཡིན་སྐོར་བཀའ་སློབ་ཕེབས་དོན། ང་ཚོ་འགྲོ་བ་མིའི་རིགས་གཅིག་མཚུངས་ཡིན་པ་མ་ཟད་སྐྱེས་པའི་སྐབས་སུ་ཡང་གཅིག་པ་ སྐྱེས་ཡོད་ཀྱང་། སྐབས་རེ་ང་ཚོས་འགྲོ་བ་མིའི་རིགས་གཅིག་པ་ཡིན་པ་དྲན་པ་བརྗེད་དེ། ཁ་བྲལ་གཏོང་ཐབས་ཀྱི་སྐད་ཆ་ཤོད་བཞིན་ཡོད་པ་རེད། ང་ཚོས་ཁོ་ཚོ་དང་ང་ཚོ་ཞེས་ཟེར་བའི་ཚབ་ཏུ་འཛམ་གླིང་གི་མི་འབོར་ཐེར་འབུམ་བདུན་ཡོད་པ་རྣམས་འགྲོ་བ་མིའི་རིགས་གཅིག་མཚུངས་ཡིན་པའི་འདུ་ཤེས་འཛིན་དགོས་པ་རེད། ཅེས་གསུངས་འདུག
༧ གོང་ས་མཆོག་གིས་རྒྱ་གར་ནི་ང་ཚོའི་སློབ་དཔོན་ཡིན་སྐོར་བཀའ་སློབ་རྩལ་དོན། གནའ་རབས་ཀྱི་རྒྱ་གར་ནི་ང་ཚོའི་སློབ་དཔོན་ཡིན་ཡང་ད་ལྟའི་རྒྱ་གར་མིན། ད་ལྟའི་རྒྱ་གར་འདིར་ནུབ་ཕྱོགས་ཀྱི་ཤན་ཤུགས་ཆེན་པོ་ཐེབས་ཡོད་སྟབས། ཆོས་དང་ཆོས་ཕྱོགས་ཀྱི་ཆོ་ག་ཕྱག་ལེན་བྱེད་རྒྱུའི་དུས་ཚོད་འདང་ངེས་ཤིག་མེད་པ་ལྟར་ཆགས་ཡོད། སྔོན་མ་རྒྱ་གར་གྱིས་མཁས་ཆེན་མང་པོ་ཞིག་གསོ་སྐྱོང་གནང་ཡོད་སྟབས། ད་ཆ་རྒྱལ་སྤྱི་རྒྱལ་ནང་གི་ས་ཁུལ་མང་ཆེ་བའི་ནང་དགོན་སྡེ་གྲངས་མང་གསར་འཛུགས་བྱས་ཡོད་ཀྱང་། དགོན་པ་དེ་དག་ནང་སོ་སོས་བསམ་བློ་བཏང་ནས་གོ་བསྡུར་བྱེད་རྒྱུ་མཐོང་དཀོན་པོ་ཆགས་ཡོད་སྟབས། རྒྱ་རིགས་ཚོ་འཛམ་གླིང་གི་ཡུལ་གྲུ་ག་པར་ཕྱིན་ཡང་རྒྱ་ནག་གི་གྲོང་རྡལ་ (China Town) ཞེས་བཟོ་བཞིན་ཡོད་པ་ལྟར། རྒྱ་གར་ངོས་ནས་ཀྱང་རྒྱ་གར་གྱི་གྲོང་རྡལ་ (India Town) ཞེས་བཟོ་རྒྱུ་གལ་ཆེན་ཡིན་པ་མ་ཟད། གྲོང་རྡལ་དེ་དག་ནང་ལྷ་ཁང་ཚབ་ཏུ་རིག་གཞུང་ལྟེ་གནས་ཁང་གསར་འཛུགས་གནང་སྟེ། འཚེ་མེད་ཞི་བ་དང་ (ahimsa) དང་ཆོས་ལུགས་ཀྱི་མཐུན་ལམ་སྐོར་ལ་སྐད་ཆ་ཤོད་རྒྱུ་གལ་ཆེན་པོ་ཆགས་ཡོད། ཅེས་སོགས་གསུང་བཤད་གནང་འདུག
རྒྱ་གར་(Vishva Hindu Parishad) ཆོས་ལུགས་ཀྱི་མགོན་སྐྱབས་ཨ་ཤོཀ་ (Ashok Singhal) ལགས་ཀྱིས་བརྗོད་དོན། ད་ལྟ་རྒྱ་གར་ནང་ཧིན་དྷུ་དབང་དུ་བསྡུ་མི་ཐུབ་པ་ཞིག་ཏུ་འགྱུར་རྒྱུའི་དུས་ཚོད་ལ་སླེབ་ཏེ། ནཱ་རེན་ཌ་མུ་དྷེས་སྣེ་ཁྲིད་པའི་བྷེ་ཇི་པི་ཚོགས་པར་རྒྱལ་ཡོངས་འོས་བསྡུ་ཐོབ་ནས་གཞུང་འཛིན་བཞིན་ཡོད་པ་དེ་ནི། སྔོན་མ་རྒྱ་གར་གྱི་དྷིན་དྷུའི་རྒྱལ་པོ་ཆོ་ཧན་ (Prithviraj Chauhan) ལགས་ནས་དབང་ཆ་འཕྲོག་པ་ལྟ་བུ་ཞིག་ཆགས་ནས་ལོ་ ༨༠༠ རྗེས་ཧིན་དྷུའི་ལག་ཏུ་སླར་སླེབ་ཐུབ་པ་དེ་ནི་ང་ཚོའི་གཟི་བརྗིད་ཅིག་ཆགས་ཡོད། ཅེས་སོགས་གསུངས་འདུག
གསར་འགོད་པ། དོན་གྲུབ།
སྟོན་པ་ཆེན་པོ་ཁྱེད་ཀྱི་སྐུ་ཚེ་བརྟན་པར་ཤོག