ཨ་རིའི་དམག་རོགས་ཡོད་ཟེར།

ཁ་སང་ནུབ་དམག་ཁུལ་ཁང་གི་ཨ་རིའི་དམག་སྤྱིས་ཡུག་རེན་གྱི་སྲིད་འཛིན་དང་ཐུག་སྟེ་ཨུ་རུ་སུས་ཡུག་རེན་ས་མཚམས་དུ་དམག་རྒྱག་རྒྱུའི་གྲ་སྒྲིག་བྱེད་བཞིན་ཡོད་པར་མཉམ་རུབ་ཐོག་ནུས་པ་འདོན་རྒྱུ་ཡིན་སྐོར་བརྗོད་འདུག

ཁ་སང་ནུབ་དམག་ཁུལ་ཁང་(NATO)གི་ཨ་རིའི་དམག་སྤྱི་ཧྥེ་ལེབ་ (Philip Breedlove) ལགས་ཡུག་རེན་རྒྱལ་སར་བསྐྱོད་དེ། ཡུག་རེན་གྱི་སྲིད་འཛིན་དང་སྲིད་བློན། དམག་དཔོན་བཅས་ལ་ཐུག་འཕྲད་བྱས་ཏེ་ཨུ་རུ་སུས་ཁཱེར་མེ་ཡཱ་ (Crimea) ས་མཚམས་ཁུལ་དུ་དམག་མི་འགྲེམས་འཇོག་གིས་ཡུག་རེན་ལ་དམག་རྒྱག་རྒྱུར་གྲ་སྒྲིག་བྱེད་བཞིན་ཡོད་པའི་ཉེན་བརྡ་བཏང་ཡོད་པ་མ་ཟད། ཨ་རི་དང་ནུབ་དམག་ཁུལ་ཁང་ཟུང་འབྲེལ་ཐོག་ཡུག་རེན་གྱི་དམག་རྒྱག་ནུས་ཤུགས་གོང་འཕེལ་བཏང་སྟེ། མཉམ་རུབ་ཐོག་ནུས་པ་འདོན་རྒྱུ་ཡིན་སྐོར་བསྒྲགས་འདུག

འདིའི་ཐད་ནུབ་དམག་ཁུལ་ཁང་གི་ཨ་རིའི་དམག་སྤྱི་ཧྥེ་ལེབ་ལགས་ཀྱིས། “ཨུ་རུ་སུས་ཡུག་རེན་ས་མཚམས་མཚོ་ཁུལ་དུ་དམག་རྒྱག་གྲུ་གཟིངས་ཀྱིས་སོ་ལྟ་དང་། དམག་རྒྱག་གནམ་གྲུས་གནམ་ས་གཉིས་ཐོག་གི་གཏོར་རྒོལ་མེ་ཤུགས་འཕུར་མདེལ་འཁྱེར་ནས་འགྲོ་འོང་བྱེད་བཞིན་ཡོད་པ་མ་ཟད། ཁཱེར་མེ་ཡཱ་ནང་དམག་མི་འགྲེམས་འཇོག་གིས་རྒྱ་མཚོ་ནག་པོའི་མངའ་ཁུལ་གྱི་བདེ་འཇགས་ལ་ཉེན་ཁ་བཟོ་བཞིན་ཡོད་སྟབས་ང་ཚོས་སྔ་ས་ནས་གྲ་སྒྲིག་བྱེད་དགོས།”ཞེས་བརྗོད་འདུག ཁོང་གིས་མུ་མཐུད་བརྗོད་དོན། “ད་ལྟ་ཨུ་རུ་སུས་ཡུག་རེན་ས་མཚམས་ཁུལ་དུ་དམག་མི་འགྲེམས་འཇོག་བྱས་ཡོད་པ་མ་ཟད། ཡུག་རེན་ཤར་ཕྱོགས་ཀྱི་གྱེན་ལོག་ཤོག་ཁག་ལ་དམག་སྦྱོང་དང་རོགས་རམ་སྤྲོད་བཞིན་ཡོད་སྟབས། ཨ་རི་དང་ཡུ་རོབ་མཐུན་ཚོགས་གཉིས་ཀྱིས་ཡུག་རེན་གྱི་དམག་དོན་འཕེལ་རྒྱས་གཏོང་ཐབས་ལ་རོགས་སྐྱོར་བྱས་ཏེ། ཨུ་རུ་སུའི་རྒྱ་སྐྱེད་སྲིད་ཇུས་ལ་ཚོད་འཛིན་བྱེད་དགོས།”ཞེས་སོགས་བརྗོད་འདུག

འདིའི་ཐད་ཨུ་རུ་སུའི་སྲིད་འཛིན་པུ་ཊིན་གྱིས། “ཨུ་རུ་སུས་རྒྱལ་ཁབ་གཞན་དང་མངའ་ཁུལ་གྱི་བརྟན་ལྷིང་སྲུང་སྐྱོབ་ལ་འགོག་རྐྱེན་བཟོ་ཡི་མེད་ཀྱང་། རྒྱལ་ཁབ་ཀྱི་བདག་དབང་དང་གཅིག་སྒྲིལ་གྱི་ལངས་ཕྱོགས་ལ་སྲུང་སྐྱོབ་བྱེད་བཞིན་ཡོད་པ་མ་ཟད། ཨུ་རུ་སུའི་མཐུན་གྲོགས་རྒྱལ་ཁབ་ཀྱི་བདག་དབང་གནད་དོན་ལའང་སྲུང་སྐྱོབ་བྱེད་ བཞིན་ཡོད་སྟབས། རྒྱལ་ཁབ་གཞན་གྱིས་ཐེ་ཇུས་བྱེད་དགོས་དོན་མེད།”ཅེས་བརྗོད་འདུག

འདི་ལོའི་ཟླ་ ༣ པ་ནས་བཟུང་ཡུག་རེན་གྱི་ཤར་ཕྱོགས་གྲོང་ཁྱེར་ཁག་ནང་ཨུ་རུ་སུར་དགའ་མོས་བྱེད་མཁན་གྱེན་ལོག་པ་ཚོར་ཨུ་རུ་སུས་མཚོན་ཆ་དང་དངུལ་སོགས་ཀྱི་རོགས་སྐྱོར་བྱས་ཏེ། ཡུག་རེན་གྱི་རང་སྐྱོང་མངའ་སྡེ་ཁུ་རེ་མཱེ་ཡ་བཙན་བཟུང་བྱས་ཡོད་སྟབས། ཨ་རི་དང་ཡུ་རོབ་མཐུན་ཚོགས་ཀྱིས་ཨུ་རུ་སུར་དཔལ་འབྱོར་ཉེས་ཆད་ཐེངས་གསུམ་བཏང་བ་དང་། ཡུག་རེན་གྱིས་ཨུ་རུ་སུའི་སོལ་རླངས་བུ་ལོན་སྤྲོད་མ་ཐུབ་པ་བཅས་ལ་བརྟེན་ཏེ། ད་ལོའི་ཕྱི་ཟླ་ ༦ པ་ནས་བཟུང་ཨུ་རུ་སུས་ཡུག་རེན་ལ་སོལ་རླངས་གཏོང་མཚམས་བཞག་ཡོད་ཀྱང་། ཕྱི་ཟླ་ ༡༠ ཚེས་ ༣༠ ཉིན་སྦེལ་ཇམ་རྒྱལ་སར་ཡུག་རེན་བར་བསྐྱར་དུ་གྲོས་མོལ་བྱས་ཏེ། ཡུ་རོབ་མཐུན་ཚོགས་ཀྱིས་ཡུག་རེན་ལ་དཔལ་འབྱོར་རོགས་རམ་བྱེད་པར་ཁག་ཐེག་བྱས་སྟབས། ཡུག་རེན་གྱིས་དེ་སྔོན་ཨུ་རུ་སུར་བུ་ལོན་ཆད་ཡོད་པ་ལས་ཨ་སྒོར་ཐེར་འབུམ་ ༡།༤༥ ཙམ་གང་མགྱོགས་སྤྲོད་རྒྱུ་དང་། དེའི་འཕྲོས་ཀྱི་ཨ་སྒོར་ ༡།༦༥ དེ་ད་ལོའི་ལོ་མཇུག་བར་སྤྲོད་རྒྱུ་ཁས་ལེན་བྱས་ཡོད་སྟབས། ༢༠༡༥ ལོའི་ཟླ་ ༣ བར་ཨུ་རུ་སུས་ཡུག་རེན་ལ་སོལ་རླངས་རྒྱ་དཔངས་གྲུ་བཞི་མ་ཐེར་འབུམ་ ༤ བཙོང་རྒྱུའི་གྲོས་མཐུན་བཞག་སྟེ། རྒྱལ་ཁབ་གཉིས་ཀྱི་འབྲེལ་ལམ་ཡག་ཏུ་ཕྱིན་ཡོད་ཀྱང་། ཉེ་ལམ་ཨུ་རུ་སུས་ཡུག་རེན་གྱེན་ལོག་ས་ཁུལ་གྱི་གྲོང་ཁྱེར་ཌོན་ནེ་ཊི་སི་ཀི་དང་གྲོང་ཁྱེར་གཞན་གྱི་དམག་མི་ཚོར་དམག་སྦྱོང་སྤྲད་ཡོད་པ་མ་ཟད། ཡུག་རེན་གྱི་ས་མཚམས་ཁུལ་དུ་སུན་གཙེར་བཟོས་སྟབས་རྒྱལ་ཁབ་གཉིས་ཀྱི་འབྲེལ་ལམ་ཇེ་སྡུག་ཏུ་ཕྱིན་ཡོད།

ཉེ་ལམ་ཕྱི་ཟླ་ ༡༠ ཚེས་ ༢༦ ཉིན་ཡུག་རེན་རྒྱལ་ཡོངས་འོས་བསྡུའི་སྐབས་གྱེན་ལོག་ཤོག་ཁག་གིས་འོས་བསྡུ་བྱེད་བཅུག་མེད་པ་མ་ཟད། ཟླ་ ༡༡ ཚེས་ ༢ ཉིན་ཡུག་རེན་གྱི་ཤར་ཕྱོགས་ས་ཁུལ་དུ་འོས་བསྡུ་བྱས་ཏེ། ཨེ་ལེག་ཛིན་ཌར་ (Alexander Zakharchenko) ལགས་སུ་འོས་ཤོག་བརྒྱ་ཆ་ ༨༡ ཐོབ་སྟེ་ཌོ་ནེ་ཌི་སི་ཁི་མི་དམངས་སྤྱི་མཐུན་རྒྱལ་ཁབ་ཀྱི་མགོ་ཁྲིད་དང་། ཨི་གྷོར་(Igor Plotnisky) ལགས་སུ་འོས་ཤོག་བརྒྱ་ཆ་ ༦༣ ཐོབ་ནས་ལུ་ཧན་སེ་ཁི་མངའ་ཁུལ་གྱི་མགོ་ཁྲིད་ལ་བསྐོ་བཞག་བྱས་ཚུལ་བསྒྲགས་ཡོད་པ་དང་། ཨུ་རུ་སུས་འོས་བསྡུ་དེར་རྒྱབ་སྐྱོར་ཡོད་པའི་རྣམ་འགྱུར་བསྟན་ཡོད་པ་མ་ཟད། ད་ཆ་ཡུག་རེན་གྱི་ས་མཚམས་ཁུལ་དུ་དམག་མི་ཕོན་ཆེན་འགྲེམས་འཇོག་བྱས་ཏེ་ཡུག་རེན་གཞུང་ལ་ཁ་གཏད་གཅོག་རྩིས་བྱས་སྟབས། དེ་རིང་ཡུག་རེན་གྱི་གཞུང་གསར་པའི་གྲོས་ཚོགས་ཀྱི་ཚོགས་དུས་མགོ་འཛུགས་པ་དང་འབྲེལ། འཇར་མན་གྱི་སྲིད་བློན་དང་ལི་ཐོ་ནེ་ཡའི་སྲིད་བློན་སོགས་ཀྱིས་ཨུ་རུ་སུར་སྐྱོན་འཛུགས་བྱས་འདུག

འཇར་མན་གྱི་སྲིད་བློན་ལྕམ་ཨན་གྷེ་ལཱ་མར་གྷལ་མཆོག་གིས། “ཨུ་རུ་སུས་ཁཱེར་མེ་ཡཱ་བཙན་བཟུང་བྱས་པ་མ་ཟད། ཌོ་ནེ་ཌི་སི་ཁི་དང་ལུ་ཧན་སེ་ཁི་ཡི་གྱེན་ལོག་ཤོག་ཁག་ལ་རྒྱབ་སྐྱོར་བྱས་ཏེ། ད་བར་ཡུག་རེན་དང་གྱེན་ལོག་ཤོག་ཁག་བར་གྱི་ཡུག་རེན་དམག་འཁྲུག་ཁྲོད་མི་ ༤༣༠༠ ལྷག་རྐྱེན་ལམ་བཏང་ཡོད་སྟབས། ཨུ་རུ་སུ་ནི་རྒྱལ་སྤྱིའི་ཁྲིམས་ལུགས་ལ་རྡོག་རོལ་གཏོང་མཁན་དང་ཡུ་རོབ་ཀྱི་བརྟན་ལྷིང་མེད་པ་བཟོ་མཁན་ཞིག་ཆགས་ཡོད།”ཅེས་དང་། ལི་ཐོ་ནེ་ཡའི་སྲིད་བློན་ལི་ནཱ་ (Linas Linkevicius) ཡིས། “ཨུ་རུ་སུ་ནི་ཡུག་རེན་གྱི་དཀའ་རྙོག་སེལ་མཁན་གྱི་ལྡེ་མིག་ལྟ་བུ་ཆགས་ཡོད་སྟབས། ཨུ་རུ་སུས་སྲིད་ཇུས་གང་འདྲ་ཞིག་འཛིན་མིན་ལ་རག་ལུས་ཡོད།”ཅེས་བརྗོད་འདུག

ད་བར་ཨ་རིས་ཡུག་རེན་གྱི་དམག་ཆས་ཆེད་ཨ་སྒོར་ས་ཡ་ ༡༡༨ ཀྱི་རོགས་དངུལ་སྤྲད་ཡོད་པ་མ་ཟད། ཨ་རིའི་གྲོས་ཚོགས་འཐུས་མི་ཞིག་གིས་ཨ་རིས་ཡུག་རེན་ལ་མཚོན་ཆ་དང་དམག་རྒྱག་འཕྲུལ་ཆས་སོགས་སྔར་ལས་མང་བ་སྤྲོད་དགོས་སྐོར་བརྗོད་ཡོད་པ་མ་ཟད། ཨ་རིའི་སྲིད་ནས་ཀྱང་ཨ་རིས་ཡུག་རེན་ལ་མཚོན་ཆའི་རོགས་རམ་སྤྲད་དེ་ཨུ་རུ་སུས་ཁྱིམ་མཚེས་རྒྱལ་ཁབ་ལ་འཛིན་པའི་སྲིད་ཇུས་ལ་བསམ་བློ་གཏོང་དགོས་པ་ཞིག་བཟོ་དགོས་སྐོར་སོགས་བརྗོད་འདུག